مراجعة Huawei Nova 9 SE الجديد – نسخة خفيفة !

هواوي نزلت موبايل جديد بشكل رسمي في مصر .. وهو Nova 9 SE واللي بيعتبر نسخة Lite من Nova 9 العادي .. بيجي بنفس التصميم الـPremium اللي عجب ناس كتير، مع Package مواصفات ممتازة .. النهارده هنقدملكم مراجعة Huawei Nova 9 SE الجديد وهنوضح كل حاجه عنه.

التصميم :-

موبايل Nova 9 SE بيجي بنفس تصميم Huawei Nova 9 العادي .. مع إختلاف في فريم الكاميرات اللي في الظهر .. لكن بشكل عام التصميم شكله فخم جدًا والظهر زجاج ودي حاجه تميزه وسط المنافسين.

بس طبعًا علشان الظهر زجاج بيعمل كمية إنعكاسات مش طبيعية .. وكمان البصمات بتظهر فيه بسهولة جدًا ومن أقل حاجه .. دي نقطة سلبية في الزجاج لازم تكون عارفها.

وزن الموبايل 191 جرام وتخانته 7.9 مللي .. مفيش أي مشكلة في إستخدام الموبايل ومسكته في الإيد من ناحية الوزن والتخانه بالرغم من الشاشة الكبيرة.

الشاشة :-

شاشة الموبايل IPS LCD بحجم 6.78 بوصة بدقة FHD+ مع تردد بيوصل لـ90 هيرتز .. ده أول تنازل عن Nova 9 اللي شاشته كانت OLED ومعدل تحديث 120 هيرتز.

شاشة Nova 9 SE شاشة عادية مش مبهرة، ألوانها معقولة بس مشبعة زي الـAMOLED .. سطوعها معقول بس مش عالي زي الـAMOLED .. كنت اتمنى الشاشة تكون اموليد بصراحة.

الميزة هنا في التصميم برده .. حواف الشاشة قليلة جدًا .. وده مخلي تصميم الموبايل Premium وجميل جدًا.

الأداء :-

هواوي استخدمت معالج كوالكوم سناب دراجون 680 بتكنولوجيا 6 نانو ميتر وداعم لشبكات الـ4G .. ده المعالج الشائع حاليًا في الفئة الإقتصادية العُليا والمتوسطة بسبب أزمة المعالجات.

المعالج ده أداءه اليومي العادي مفيهوش أي مشاكل لو استخدامك سوشيال ومكالمات استخدام بسيط .. موفر في استهلاك البطارية، مش بيسخن .. وكمان هواوي بتقدم نوع ذاكرة تخزين سريع ولما اختبرناه طلع أرقام حلوة جدًا .. وده علشان تحسن من تجربة الموبايل في الإستخدام اليومي.

بالنسبة للـ90 هيرتز فا هما منطقيين مع المعالج ده .. لو كانت الشاشة 120 هيرتز مكانش الموضوع هيفرق أوي .. فا الـPackage هنا مظبوطة ومنطقية لكن مش الأقوى.

لو بتسأل عن الفرق بين الـSD778 اللي في نوفا 9 والـSD680 اللي في نوفا 9 SE فا الفرق كبير مش قليل خالص .. الـNova 9 أقوى في الأداء بفرق واضح وملحوظ.

كنت أتمنى هواوي تستخدم معالج أقوى من كده في نوفا 9 SE .. حتى لو الأداء في برامج السوشيال ميديا مقبول بس كان ممكن يكون أسرع علشان يكون منافس أقوى للموبايلات الباقي.

بالنسبة لتجربة الألعاب فا ببجي بتشتغل على Medium Graphic .. الموبايل مش للـGamers خالص بالرغم من أن هواوي مهتمة جدًا بتبريد الموبايل وحرفيًا الموبايل ده مش بيسخن تمامًا.

عوامل الأمان وعناصر اخرى :-

البصمة موجودة على زِر الباور .. أداءها سريع وعملي ومش بتغلط ومش بيحصل أي تجميع في أيقونات الواجهة .. اما الـFace Unlock فا هو برده سريع مفيش أي مشاكل .. كالعادة هواوي مميزة في عوامل الأمان .. الموبايل شغال بخدمات هواوي بواجهة EMUI 12 اللي أداءها لطيف وسريع جدًا.

في هنا دعم لخاصية الـNFC .. وداعم كمان للـSuper Devices علشان لو عايز تعمل Conntent للموبايل على تابلت او لاب توب او تلفزيون من هواوي تقدر تعمله بسهولة.

الـApp Gallery تقدم تحمل منه معظم الـApplications اللي انت محتاجها .. وتقدر تستخدم الـPetal Maps اللي أداءها اتطور كتير، وأي حاجه متعلقة بجوجل تقدر تعملها Shortcut من المتصفح عادي.

ده غير خدمات Huawei Care اللي بتقدر تمد بيها فترة الضمان على موبايلك سنه او سنتين بأسعار رمزية، وهما عاملين خصومات علشان تصلح موبايلك لو حصله حاجه بقطع غيار أصلية 100%.

الموبايل فيه ميكروفون اضافي لعزل الضوضاء .. مستشعر التقارب موجود سوفت وير علشان الحافة العُلوية للشاشة صغيرة جدًا .. وبالتالي مش بيقدم أفضل أداء لكنه مقبول.

صوت الموبايل هنا Mono مش Stereo .. بس الـSpeaker صوتها عالي جدًا ومجسم الى حد كبير وهتاخد تجربة صوتيه قوية، بس طبعًا كان يبقى Stereo أفضل.

بالنسبة لشبكات الإتصال والـWi Fi فا متقلقش الموبايل مُميز وقوي جدًا في الشبكات كالعادة.

البطارية :-

بطارية الموبايل 4000 مللي امبير بس أداها كويس وده بيرجع للسوفت وير الموفر والشاشة وكمان المعالج اللي بيشتغل بدقة تصنيع 6 نانو ميتر .. هتكمل اليوم عادي جدًا.

وكمان الموبايل بيدعم الشحن السريع بقدرة 66 وات، بيشحن من 0% لـ60% في أقل من ربع ساعة .. زمن شحن ممتاز جدًا.

الكاميرات :-

الموبايل بيجي بكاميرا خلفية رئيسية 108 ميجا بيكسل بفتحة عدسة F/1.9 .. مع عدسة Ultra Wide بدقة 8 ميجا بيكسل بفتحة عدسة F/2.2 .. وعدسة 2 ميجا بيكسل بفتحة عدسة F/2.4 ماكرو وعدسة أخيرة 2 ميجا بيكسل بفتحة عدسة F/2.4 للعزل .. والموبايل بيدعم كاميرا سيلفي 16 ميجا بيكسل بفتحة عدسة F/2.2.

الكاميرا الخلفية بتطلع صور معقولة في الإضاءات العالية .. بس الصور Soft شوية .. الـSharpness بتاعها مش عالي أوي .. وفي فرق في الـContrast بيظهر بين الصور العادية والبورتريه.

الألوان عجباني أكثر ومظبوطة أكثر في الصور البورتريه عن الصور العادية .. كمية التفاصيل كانت المفروض تكون أكثر من كده بس وارد الموضوع يتظبط بتحديث سوفت وير.

بشكل عام المستشعر الـ108 ميجا بيكسل اللي هنا كان محتاج معالج أقوى شوية علشان يقدر يطلع صور أفضل والمعالجة بتاعته تكون أحسن من كده.

الصورة في إضاءه داخلية بتقل تفاصيل كتير، لازم تشغل الـNight Mode اللي بياخد حوالي 4 ثواني وبيطلع صور الـExposure فيها عالي شوية بس أكيد أحسن من الصور العادية.

بالنسبة للسيلفي فا الصور تفاصيلها قليلة شويتين .. بس الصور السيلفي العادية مقبولة اما البورتريه القص فيها مش دقيق شويتين تلاته .. وعمومًا المعالجة مش أفضل حاجه في السيلفي.

الموبايل بيدعم تصوير فيديوهات بجودة 1080p مش بيدعم الـ4K بسبب المعالج الموجود هنا .. الموبايل مفيهوش مثبت إلكتروني .. لكنه فيه ميكروفون اضافي لعزل الضوضاء.

سعر Huawei Nova 9 SE :-

• نسخة 128 جيجا مع 8 جيجا رام بسعر 7500 جنية مصري

والموبايل بيدعم تركيب شريحتين إتصال 4G لكن مش بيدعم تركيب كارت ميموري.

الرأي النهائي :-

مميزات Huawei Nova 9 SE :-

• تصميم مُتميز جدًا
• شاحن فائق السرعة 66 وات
• سوفت وير مُستقر

عيوب Huawei Nova 9 SE :-

• الكاميرات مش الأفضل
• الشاشة متواضعه الى حد كبير
• أداء الموبايل ضعيف في الالعاب
• سعر مرتفع نسبياً