شركة Infinix بتحاول تتحرك من مكانها التقليدي اللي هي موجودة فيه في الأسواق .. وبتنزل لنا موبايل Infinix Zero X Pro اللي بيقدم مجموعة مواصفات قوية جدًا في الفئة المتوسطة .. النهارده هنقدملكم مراجعة كاملة للموبايل ده وهنعرف هل هو فعلًا بيقدم تجربة فعلية قوية ولا مجرد أرقام فقط.
التصميم :-
تصميم الموبايل ده يقدر ينافس في الفئة المتوسطة ويتفوق على موبايلات تانيه كتير .. لأن ظهره بيجي بخامات من الزجاج وعليه نقشة نجوم كده.
الفريم طبعًا بلاستيك مش معدن … مع انه لو كان معدن كان هيفرق كير .. الفريم هنا مسطح بس معمول بطريقة لطيفة وفيه إنحناء بسيط أوي في اخره علشان يحسن من المسكه في الإيد.
وزنه فوق المتوسط حوالي 193 جرام مع تخانه معقوله 7.8 ملم .. عمومًا معنديش مشكلة في التصميم إلا في جزء واحد وهو بروز الكاميرات .. بروز الكاميرات كبير وجاي على درجتين علشان يحاولوا يحسسوك ان البروز قليل .. بس معذورين لإن العدسة كبيره وكمان فيه مثبت بصري.
ولو هزيت الموبايل في إيدك هتسمع صوت من عند الكاميرا وده طبيعي علشان المثبت البصري .. وانفنكس ضافت في العلبة جراب مختلف شكله شيك وفخم .. وفيه شفه عالية علشان يحافظلك على الكاميرا الخلفية.
الشاشة :-
شاشة الموبايل هنا AMOLED بحجم 6.67 بوصة فيها ثقب متوسط الحجم وبدقة FHD+ وبتردد بيوصل لـ120 هيرتز .. شاشة مش أقل من باقي المنافسين في نفس الفئة السعرية.
الشاشة هنا بتعمل حركة من خلال السوفت وير بتخلي الألوان مُشبعة بزيادة لدرجة انك هتحس انها Super AMOLED مش AMOLED .. السوفت وير بتاع الموبايل بيعزز الألوان أوي .. ومفيش تحكم في درجات الألوان في الاعدادات هنا.
بالنسبة للسطوع تحت الشمس فالموبايل سطوعه معقول مش هيدايقك .. ولكن لاحظت حاجة فيه وهي ان درجات السطوع مش مظبوطه ومحتاجه تحديث سوفت وير .. لو حددت السطوع في النص هتبقى محتاج تزوده ولو زودته هتحتاج تقلله وهكذا .. اعتقد موضوع بسيط يتحل بتحديث سوفت وير.
الأداء :-
الموبايل جاي بمعالج ميدياتيك Helio G95 .. مش أقوى حاجه في سعره، موجود في موبايلات أرخص .. ولكن انفنكس مقدرتش تستخدم معالج أعلى علشان هاردوير الكاميرات تقيل وتكلفته غاليه وهي عايزه تحافظ على الموبايل في الفئة المتوسطة.
واجهة انفينكس سريعة جدًا ومستقرة الى حد كبير .. استقرار قريب من استقرار واجهة اوبو .. وكمان الـ120 هيرتز هنا شغالين بكل كفاءه بالإضافة الى اعدادات الـUltra Touch اللي بتقدر من خلالها ترفع سرعة الواجهة فا بتحس انها طيارة .. الموبايل فعلًا كان هيبقى أقوى كتير جدًا لو المعالج كان أفضل.
وانا لسه عندي تحفظ على شكل واجهة انفنكس .. قديمة شوية ومحتاجه تبقى أحدث لان كل الشركات حدثت شكل واجهتها .. وكمان الإعلانات لسه موجودة وفي برامج مثبته كتير على الجهاز ملهاش لازمة .. ده مش موبايل رخيص!
في نقطة بتاعت الـDual Chip .. انفنكس قصدها ان في شريحة معمولة للشاشة لوحدها لمعالجتها وكده .. انما مفيش معالج تاني قوي ولا حاجة .. الأساسي بتاعك الـG95 اللي كلنا عارفين ادائه.
ببجي بتشغل على اعدادات High HD .. اللعبة بتشتغل كويس جدًا بشكل معقول أوي متقلقش .. المعالج ده بتكنولوجيا 12 نانو بيسخن شوية مع الألعاب .. السخونية بتسمع في الظهر تحت الكاميرا خاصًة ان الموبايل زجاج مش بلاستيك.
عوامل الامان وعناصر اخرى :-
البصمة تحت الشاشة .. البصمة سريعة لكن الواجهة بتتأخر على ما تفتح .. والـFace Unlock معقول مفيهوش مشاكل .. والموبايل فيه Always On Display لعرض الإشعارات اللي جاتلك.
الموبايل مفيهوش NFC .. وللأسف مفهوش ميكروفون اضافي لعزل الضوضاء .. معرفش ليه موبايل زي ده متشال منه القطعه دي .
مستشعر التقارب هنا هاردوير حقيقي وشغال زي الفل مفيهوش أي مشاكل .. اما شبكات الـWi Fi والإتصال فا هي ممتازة جدًا مواجهتش معاها اي مشكلة.
البطارية :-
بطارية الموبايل بحجم 4500 مللي أمبير .. ادائها 6 ~ 7 ساعات بالكتير شاشة مفتوحه .. السوفت وير حلو وموفر .. ولكن 120 هيرتز ومعالج 12 نانو فا يادوبك تكمل اليوم معاك .. مش وحش خالص.
الشاحن اللي مع الموبايل 45 واط .. بيشحن البطارية في أقل من ساعة .. بيتأخر 20 دقيقة في أخر 10% .. يعني لو مش هتشحن أخر 10% هيشحن معاك في نص ساعة لحد 90% وده وقت كويس جدًا.
الكاميرات :-
كاميرا رئيسية 108 ميجا بيكسل فتحة عدسة F/1.8 فيها مثبت بصري حقيقي .. التانية 8 ميجا بيكسل فتحة عدسة F/3.4 للزوم فيها مثبت بصري حقيقي وزوم حقيقي 5X وبتوصل Digital لـ60X .. والأخيرة 8 ميجا بيكسل فتحة عدسة F/2.3 للتصوير الواسع .. السيلفي 16 ميجا بيكسل ومعاه فلاش LED مُزودج امامي كعادة انفنكس.
التصوير الصبح بالكاميرا الخلفية إتحسن كتير عن الأجيال اللي فاتت من موبايلات انفينكس .. ولكن مازال هتحس بتقصير أحيانًا في معالجة الصور في الشمس القوية حتى مع تشغيل الـHDR .. والألوان مش بتبقى أفضل حاجه، الكلام ده في الشمس، لسه انفينكس محتاجه تحديث سوفت وير يظبط الكاميرا.
اما بالنسبة للـTelephoto فا هي معقولة جدًا لحد 20X .. بعد كده بتبدأ تفقد تفاصيل كتير، بس هي إضافة قوية جدًا في الفئة المتوسطة اللي يغيب عنها الميزة دي .. كانت ميزة حصرية في الموبايلات الغالية بس.
بالنسبة للتصوير بالليل فالموبايل ممتاز جدًا .. مستشعر 108 ميجا بيكسل مع مثبت بصري مع سوفت وير شاطر في تعزيز ومعالجة ألوان الصور بالليل .. قليل لما تلاقي شركة بتقدم معالجة بالليل أحسن من الصبح.
بالنسبة للسيلفي فا هو دون المستوى للأسف .. في جميع الأوضاع والإضاءات .. التفاصيل مش أفضل حاجه، الألوان والمعالجة مش مظبوطه في معظم الصور.
بالنسبة لتصوير الفيديوهات بالموبايل فا هو بيدعم تصوير بجودة 4K لحد 30 فريم في الثانية لكن مفيش ثبات بصري .. المثبت البصري بيشتغل على جودة 1080p بس والاداء بتاعه في تثبيت الفيديوهات مش الأفضل تماما .. ومفيش ميكروفون اضافي لعزل الضوضاء.
شوف تجربة التصوير صور وفيديوهات ومقارنة تصوير في فيديو المراجعة
سعر Infinix Zero X Pro :-
- نسخة واحدة 128 جيجا مع 8 جيجا رام بسعر 5888 جنية
والموبايل بيدعم تركيب شريحتين إتصال 4G مع كارت ميموري في نفس الوقت.
الرأي النهائي :-
مميزات Infinix Zero X Pro :-
- تصميم شيك بخامات محترمة
- شاشة ممتازة وسريعة 120 هرتز
- كاميرا مُخصصة للزوم
- أداء الكاميرا ممتاز بالليل
- شاحن سريع 45 وات
- مستشعر تقارب ممتاز
- شبكات ممتازة
عيوب Infinix Zero X Pro :-
- معالجة الصور بالنهار مش الأفضل
- تصوير الفيديوهات مش الأفضل
- مفيش ميكروفون اضافي لعزل الضوضاء
- سعر مرتفع نسبيا
- صوت الموبايل مش الأفضل
Comments