انا شخصيًا بحب الموبايلات الصغيرة .. الموبايل اللي تقدر تمسكه بإيد واحدة وتقدر تعمل كل حاجه فيه .. لكن في سنة 2020 كل الشركات كانت بتفكر ازاي تعمل موبايلات بأكبر شاشة مُمكنة .. مجربتش تقريبًا ولا موبايل حجمه صغير ودي كانت حاجه مضايقاني جدًا .. وده لحد ما تم الإعلان عن سلسلة iPhone 12 الجديدة.
أكتر موبايل شدني هو الـiPhone 12 Mini .. ابل نجحت في إضافة Hardware قوي في موبايل صغير بدون أي تنازلات صريحة عن الموبايلات التانية من نفس السلسلة. خدت قرار إني لازم أجيب الموبايل وأتعايش معاه لكني مُستخدم لأندرويد من زمان .. فاأنا هتقمص دور Android Fan boy أخد قرار إنه يخوض تجربة مُطولة مع موبايل من أبل.
علبة الموبايل :-
الـBox للأسف بيجي فاضل تمامًا .. زي ما انتو خلاص عرفتوا .. العلبة بيجي فيها الموبايل ووصلة او Converter من Type-C لـLightning مع Apple Sticker الشهير.
أول حاجه لازم تعملها لما تشتري موبايل من سلسلة الـiPhone 12 الجديدة أنك تشتري شاحن 15 او 20 وات علشان تقدر تشحن الموبايل ده لو انت جديد في عالم ابل .. اما لو انت قديم ممكن تمشي نفسك بالشاحن القديم لحد ما تنسى المبلغ اللي انت دفعته وبعد كده تشتري شاحن سريع او حتى الـMagsafe علشان تشحن Wireless.
التصميم :-
الموبايل بقى صغير جدًا .. لما تيجي تقارنه بأي موبايل تاني هتلاحظ نقطة التميز اللي تعتبر نقطة تميز قوية بالنسبالي .. طبعًا مُحبي الموبايلات الكبيرة مش هيعجبهم الكلام ده .. لكن هي في الأول والأخر تفضيلات شخصية.
تصميم الظهر بيجي من الزجاج .. لكن الزجاج هنا مش مصنفر زي الـ12 برو والـ12 برو ماكس .. بالتالي ممكن يتخدش منك .. وهو بالفعل اتخدش معايا زيه زي أي موبايل زجاج .. فا بلاش تمشي بيه من غير Protection .. انا شخصيًا مكنتش حابب فكرة الجراب .. ماهو انا مش جايب موبايل صغير أوي علشان أكبره.
لذلك حبيت جدًا فكرة الـSkin .. وعملت حماية كاملة على ظهر وفريم الموبايل من شركة Pro Skinz وبكده الموبايل مش هيتخربش وفي نفس الوقت حافظت على الحجم الصغير في الإيد والمسكة المُميزة.
وبالنسبة للفريم الـFlat الألومنيوم اللي الحواف بتاعته حادة جدًا ده .. في مراجعة iPhone 12 قولت ان تجربة الموبايل في إيدك مبتكونش مريحة تمامًا .. الكلام ده مش موجود تمامًا في نسخة الـMini .. حجم الموبايل الصغير جدًا اللي هنا مع الفريم المُسطح بيقدموا مسكة مختلفة تمامًا.
انت ماسك الموبايل بشكل كويس ومش متضايق وفي نفس الوقت مالكة بحيث ميقعش من إيدك .. تحس ان اللي فكر في الفريم المُسطح ده جربها في الـMini فا عجبته راح عاملها في الموبايلات الباقية 😅
ومش محتاج أقولك كمان ان الموبايل وزنه صغير جدًا .. الموبايل 135 جرام وتخانته 7.4 مللي .. فا بدون مُبالغة ده أخف موبايل ممكن تستخدمه ويقدملك تجربة مُرضية تمامًا وفي نفس الوقت الكاميرا الخلفية بروزها صغير جدًا عن ظهر الموبايل .. وطبعًا الموبايل مقاوم للماء والغبار بشهادة IP68 بعمق 6 متر لمدة نصف ساعة.
الشاشة :-
شاشة صغيرة 5.4 بوصة .. شاشة OLED Super Retina XDR بدقة FHD+ مع كثافة بيكسلات 476 بيكسل لكل بوصة .. وطبعًا داعمة للـHDR10 والـDolby Vision وفيها الـNotch العريض كالعادة ومعدل تحديث 60 هيرتز.
ونتفق على ان النوتش الكبير لما يتحط في شاشة صغيرة زي في الـ12 ميني شكله مش بيكون لطيف إطلاقًا .. بمعنى ان نفس حجم النوتش لما تشوفه في الـ12 برو ماكس ممكن تتقبله لإنه نسبة النوتش بالنسبة لحجم الشاشة صغيرة .. لكن في الشاشة الصغيرة هتحس ان الـNotch واخد الحافة العلوية للشاشة كلها.
الشاشة Flat ومفيهاش أي Curves .. الحافة السُفلية قليلة جدًا زي سلسلة الـiPhone 12 كلها .. الشاشة نفسها من ناحية الـQuality والألوان ودرجة التشبع هي محترمة لأقصى درجة .. سطوع عالي جدًا ومحترم جدًا .. مستحيل السطوع يكون مشكلة تحت الشمس .. زيه زي بقيت السلسلة كلها.
طبعًا الشاشة بتردد 60 هيرتز .. ابل متقدرش تحط تردد شاشة أعلى مع البطارية الصغيرة اللي هنا .. واعتقد الـRefresh Rate الأعلى ميزة سايبينها للأجيال القادمة.
بالنسبة بقى لحجم الشاشة فا انت هتقدر تتقبله عادي في إستخدام الـSocial Media والمكالمات عادي جدًا .. لكن في الفرجة على الفيديوهات وفي الألعاب التقيلة هتحس أنك محتاج شاشة أكبر .. الـ12 ميني عمومًا معمول لشريحة مُعينة عايزة الحجم الصغير وميهمهاش باقي الحاجات.
مفيش طبقة حماية على الشاشة .. ومهما ابل قالت ان الشاشة مش بتتكسر فا أنت لازم تحميها بسكرينة علشان الخرابيش السطحية اللي أكيد هتحصل عادي وحصلت بالفعل في سلسلة الـiPhone 12.
الأداء :-
معالج ابل الجديد A14 Bionic بمعمارية 5 نانو ميتر .. أقوى معالج عند ابل حاليًا واللي موجود في الـiPhone 12 Pro Max .. هتاخد أداء جبار بدون أي تنازلات.
الـAnimations بتاعت الـIOS لطيفة جدًا وبتحاول انك متحسش ان الشاشة 60 هيرتز بس .. دي حاجه ممكن معرفش اوصلهالك إلا لما انت تجرب الموبايل بنفسك .. لكن انا مازلت مُقتنع ان الموبايل لو كان 90 هيرتز او 120 هيرتز كان هيبقى خارف وطيارة أكتر .. ومكنش في موبايل هيقدر يسد قصادة في الأداء.
الـSoftware بتاع أبل مُحكم جدًا ومغلق جدًا .. هم شايفين ان ده الأصح .. علشان حتى تبعت حاجه لموبايل Android لازم تستخدم برامج خارجية زي Send Anywhere مثلًا .. والنقطة دي مش لطيفة خالص .. انا شخص بحب كل حاجه تبقى سهلة .. مبحبش اعمل حوار على حاجه تافهة .. طبعًا لو انت معاك Ecosystem كامل من ابل فا مفيش أي مُعاناه.
الاداء الرسومي كويس جدًا .. ببجي بتشتغل على اعلى اعدادات جرافيك .. كول اوف ديوتي برده بتشتغل على اعلى اعدادات جرافيك .. ولكن تجربة الألعاب مش لطيفة أوي علشان الشاشة صغيرة وانت بتحط ايدك الاتنين علشان تـControl اللعبة فا تحس ان ايدك بتغطي على نص الشاشة تقريبًا.
ومن ناحية السخونية فا أكيد الموبايل بيسخن مع الإستخدام التقيل لكن السخونية بتكون مقبولة جدًا.
عوامل الأمان وعناصر اخرى :-
الموبايل فيه الـFace ID المُميز بتاع Apple واللي بيتعرف على وجهك في كل ظروف الإضاءه .. لكن لسه لحد دلوقتي مفيش بصمة صباع مع أن الفريم كان بينفع يبقى فيه بصمة صباع عادي.
وصلني أخر تحديث واللي هو IOS 14.3 واللي حسن شوية حاجات في الموبايل زي تجربة اللمس على الشاشة واللي كانت بتعلق أحيانًا مع تركيب الجراب .. دلوقتي الموضوع اتحسن كتير.
الموبايل صوته Stereo وبيطلع من السماعة السُفلية وسماعة المكالمات .. الصوت على قد حجم الموبايل .. مش عالي أوي زي باقي الموبايلات لكن من ناحية النقاء والـBass فا هو ممتاز لأقصى درجة .. ومفيش 3.5 مللي كالعادة.
إستقبال الـWiFi في موبايلات ابل زي موبايلات سامسونج بالظبط .. بيفلتر الشبكات الضعيفة .. اما شبكات الإتصال فالأداء هنا فوق المتوسط بشوية.
البطارية :-
دي أضعف حاجه في الموبايل .. بطارية 2227 مللي امبير وأكيد ابل كانت مضطر تضيف البطارية الصغيرة دي علشان جسم الموبايل يكون صغير أوي كده.
المعالج ده 5 نانو ميتر .. موفر جدًا جدًا في الطاقة .. وطبعًا سوفت وير الـIOS بتاع أبل المُمتاز .. البطارية بتستحمل حوالي 4 ~ 5 ساعات شاشة مفتوحة .. يعني هتيجي على أخر اليوم وهتحتاج تشحنه .. أنا شايف ان الوقت مقبول على حجم الموبايل الصغير أوي ده .. ده نفس الوقت اللي موبايلات سامسونج الرائدة بتطلع بمعالجات Exynos.
وعمومًا تجربة البطارية هنا قريبة جدًا من iPhone 12 العادي بالرغم من فرق حجم البطارية ما بينهم لكن طبعًا علشان الشاشة في الـMini أصغر كتير وبالتالي خلت الإستهلاك متقارب جدًا .. وأكيد كان نفسي في بطارية أكبر من كده علشان تجربة الـ12 ميني كانت هتبقى أحسن كتير.
وزي ما عرفنا كلنا طبعًا .. مفيش معاك شاحن في العلبة .. هتشتري شاحن 15 وات او 20 وات وهو بيدعم لحد 20 وات .. البطارية بتشحن بالكامل في ساعة تقريبًا .. وكمان بيدعم الـMagSafe او الشاحن الـWireless.
الكاميرات :-
الموبايل فيه كاميرتين في الظهر .. الأساسية 12 ميجا بيكسل بفتحة عدسة F/1.6 بمثبت بصري حقيقي والتانية 12 ميجا بيكسل فتحة عدسة F/2.4 للتصوير الواسع .. والسيلفي 12 ميجا بيكسل فتحة عدسة F/2.2.
الكاميرا هنا مش موجود فيها وضع الـPro Row الجديد بتاع أبل واللي بتقدر من خلاله تصور صور خام بألوان أكتر وتعدل عليها براحتك .. المود ده موجود في iPhone 12 Pro والـPro Max بس.
وطبعًا تجربة الكاميرات إستثنائية جدًا على حجم الموبايل ده .. انا شخصيًا همشي بالموبايل ده كموبايل ثانوي بسبب كاميراته مش أكتر .. تحسه كاميرا صغيرة معايا وفيها إمكانيات جبارة.
أداء الكاميرات هنا هو نفس أداء iPhone 12 .. مفيش أي فرق ما بينهم وبصراحة تجربة الكاميرات هنا كانت مُرضية جدًا بالنسبالي .. سواء في الكاميرا الخلفية أو الكاميرا الأمامية .. الإتنين مُمتازين .. ابل محافظة على هوية ألوان البشرة البرونزية اللي بتخلي أي حد يشوف الصورة يعرف انها متصورة بموبايل iPhone.
مع العلم ان ألوان الصور مش بتكون Saturated أوي مُقارنتًا بمعالجة ألوان موبايلات سامسونج مثلًا .. لكن بسهولة وفي ثواني تقدر تعدل الصور من تطبيق الصور بتاع أبل وتخلي الصورة مُعززة بالألوان او تعدل في الـShadows والـHighlights في ثواني من غير ما تحتاج أي تطبيق خارجي.
بالنسبة لتصوير الفيديوهات فا هو مُميز أكتر وأكتر .. بتصور 4K لحد 60 فريم في الثانية .. حقيقي سواء بتصور فيديوهات الصبح او بالليل فالموبايل هنا بيخرجلك Quality فيديو في الأخر مُناسب جدًا لتصوير الـVlogs وانسى بقى موضوع انك تمشي بكاميرا ده .. نقطة الكاميرات خطيرة في الموبايل ده!!
شوف تجربة التصوير بالموبايل في فيديو المراجعة في بداية المقال
سعر الموبايل :-
سعر الموبايل عالميًا :-
- نسخة الـ64 جيجا بسعر 700 دولار او حوالي 11 الف جنية
- نسخة الـ128 جيجا بسعر 750 دولار او حوالي 11800 جنية مصري
- نسخة الـ256 جيجا بسعر 850 دولار او حوالي 13400 جنية مصري
سعر الموبايل في مصر :-
- نسخة الـ64 جيجا بسعر 15 الف جنية مصري
- نسخة الـ128 جيجا بسعر 16 الف جنية مصري
انا شخصيًا جبته من بره بـ11 الف جنية لنسخة الـ64 جيجا وDual SIM .. أنصحك لو هتجيبه كموبايل رئيسي ليك هات الـVersion الـ128 جيجا منه علشان الـ64 جيجا صغيرة جدًا ومش هينفع يكون موبايل رئيسي.
الرأي النهائي :-
للأسف سعر الموبايل حاليًا في مصر مش مُشجع خالص وميخليش حد يفكر فيه بسعره المُبالغ فيه ده .. محتاج يرخص شويتين علشان يبقى في فرق واضح في السعر عن الـiPhone 12 العادي .. وبسعره تقدر تجيب iPhone 11 Pro ولو مش همك موضوع الحجم الصغير فا ايفون 11 برو فعلًا هيكون اختيار كويس بالسعر ده.
مميزات iPhone 12 :-
- الحجم الصغير
- خامات محترمة جدًا
- معالج قوي جدًا بأداء ثابت وسريع
وتحديثات مُستمرة - كاميرات قوية جدًا
- شاشة محترمة بـQuality محترم
- مقاومة للماء والغبار
- دعم الشحن الـWireless
عيوب iPhone 12 :-
- علبة الموبايل فاضية
- بطارية الموبايل ضعيفة نسبيًا
- سعر الموبايل في مصر مش لطيف خالص
- أقل نسخة من الموبايل 64 جيجا ودي مساحة صغيرة جدًا
وطبعًا هتحتاج تصرف على الموبايل بعد ما تجيبه .. هتجيبله شاحن 20 وات وسماعات ولازم سكرينة طبعًا علشان الشاشة متتخدش منك زي ما حصل معايا .. وكمان هتشتريله Cover او Skin من شركة برو سكينز.
Comments