ده أول ايفون نراجعة في موقع موبيزل .. والنهارده هنقولكم رأينا في iPhone 12 الجديد واللي يعتبر مهم جدًا .. أهم كمان من iPhone 12 Pro ومتوقع يبيع زي iPhone 11 اللي باع جامد بالرغم من دقة الشاشة اللي معجبتش ناس كتير.
لكن ابل السنة دي ضافت تحديثات مهمة جدًا زي الشاشة الجديدة ومعالج جديد وتحسينات في الكاميرات وكمان مع تصميم جديد والـ5G وشوية حاجات تانية جديدة .. هنشوف النهارده هل الحاجات دي تستحق فعلًا ولا لأ.
التصميم :-
ابل رجعتنا سنين كتير لورا ورجعتلنا التصميم المُربع اللي شكله مُميز جدا .. واللي كان موجود في iPhone 4 و iPhone 5S اللي جوانب التليفون والضهر وكمان الشاشة مسطحين بالكامل .. والتصميم ده كان مميز وعاجب ناس كتير جدا وقتها.
لكن دلوقتي هل عاجب الناس كلها ؟ بصراحة أنا محتار شايف شكله جميل جدًا وعاجبني عن التصميم اللي بدورانات لكن مش حاسس براحة كبيرة في المسكة .. بس اللي لاحظته طبعًا إنه مش بيتزحلق بسهولة من الإيد ومسكته محكمة أكتر وممكن مع الوقت تتعود على مسكته.
وكده كده اعتقد الكل هيركب جراب وجوانب الجراب هتبقى أنعم شوية وأنت ماسك الموبايل في إيديك .. وبكدة هتكون مشكلة الحواف المسطحة دي اتحلت .. الموبايل نازل بألوان جميلة جدًا ومُميزة زي إسود وأبيض وأحمر وأخضر والأكثر تميُز وهو الازرق الجديد.
الفريم بيجي بخامة من الألومنيوم .. وبيجي بـFinish مط هو والجزء بتاع الكاميرات .. لكن الضهر من الزجاج ومدي شكل لامع حلو .. بس بيبصم ويتوسخ بسهولة جدًا كالعادة .. عشان كدة تقدر تركب عليه حماية من ProSkinz هتحميه من الخدوش والتجاريح وكمان تخليه مط مُميز زي نسخة الـ12 برو أو لو عايز تغير لونه وشكله لأشكال كتير جدًا.
لو جينا قارننا iPhone 12 بـiPhone 11 هنلاقي إن الوزن بقي أخف وكمان حجم الموبايل بقى أقل ودا لإن Apple إتخلت عن دائرية الأطراف وبقي الفريم مسطح وده طبعًا اللي صغر حجم الموبايل .. أما لو عايز تليفون أصغر فأنت هتستنى iPhone 12 Mini واللي هينزل الشهر ده هو والـiPhone 12 Pro Max.
وصحيح مقاومة المياة في الموبايل بقت أحسن .. وبقت بتوصل لعمق 6 متر بدل 3 متر لمدة نص ساعة تحت المياة.
الشاشة :-
من الحاجات الجديدة والمُهمة هي الشاشة .. شاشة 6.1 بوصة لكن أبل السنادي غيرت الشاشة من LCD في iPhone 11 لـOLED في iPhone 12 واللي كمان بتدعم الـHDR .. ودقة الشاشة بقت FHD+ مع 460 بيكسل في كل بوصة .. وده هينعكس على تجربة المشاهدة والألوان اللي بتباين أعلى والحواف بتاعة الشاشة بقت أصغر.
وكمان الشاشة مبقتش زجاج عادي .. بتيجي بزجاج اسمه Ceramic Shield وأبل بتقول إنها بقت أقوى 4 مرات من الجيل السابق بسبب جُزيئات السيراميك اللي دخلت في مكونات الشاشة .. وده اللي شوفناه فعلًا في فيديوهات كتير لإختبار مدى صلابة الشاشة واللي فعلًا ماتكسرتش فيه بسهولة.
مع ده كله للأسف الشاشة بتيجي بـRefresh Rate بيوصل لـ60 هيرتز بس مش 120 هيرتز .. ولكن ده مش هيحس بيه غير اللي جرب الـ120 هيرتز واللي كان هيدي نعومة أكتر في التنقل بين البرامج والـScroll عامة .. لكن كدة كدة نظام الـIOS بيكون سلس وفي نعومة في الإستخدام فمش حاسسها خسارة كبيرة.
الأداء :-
طبعا مع معالج ابل الجديد A14 Bionic المبني علي معمارية 5 نانو ميتر .. بدون شك الأداء هيكون مُمتاز جدًا .. طبعًا مفيش أي مشكلة في تشغيل العاب على اعلى إعدادات أو برامج أو تصفح أو تنقل بين البرامج .. يعني كل حاجة بتشتغل بنعومة وبسلاسة.
طبعا سكور Antutu ممكن يكون أقل شوية من الـFlagships في الاندرويد اللي بتوصل لـ600 الف نقطة .. بس كده كده ده مش المقياس الوحيد .. موبايلات ابل فعلًا بتقدر تقدم أداء ناعم يتفوق على أي موبايل اندرويد موجود .. ايفون 12 جاي بـ4 جيجا رام زيه زي الـMini .. إنما الـPro والـPro Max بييجوا بـ6 جيجا رام.
بس هل لو كنت بتستخدم iPhone 11 اللي مازال سريع برده .. هل هتحس فرق الأداء ؟ موبايلات ابل بتفضل محافظة على أدائها تقريبًا متوسط خمس سنين وممكن أكتر كمان .. وبالتبعية فأنا شايف إن لأ .. ايفون 12 مش أفضل كتير في الأداء من ايفون 11 اللي اصلا أداءه حلو جدا.
لكن في مشكلة موجودة وبعاني منها حتى في ايفون اكس وهي إن الموبايل بيسخن حبتين بعد فترة بسيطة من اللعب مثلًا .. وبتبقي واضحة فعلًا وكمان بتسمع في فريم الموبايل .. وبالنسبة للأداء الرسومي فا الموبايل بيشغل كل الألعاب ( ببجي وكول اوف ديوتي وفورت نايت ) على أعلى إعدادات جرافيك مُمكنة.
البطارية :-
البطارية 2815 مللي أمبير .. هي أقل من iPhone 11 بشوية بس أبل بتقول إنها هتديك نفس الأداء .. على الحقيقية بقى هي مقبولة بس مش أفضل حاجة بالرغم إن المعالج ٥ نانو ميتر وده اللي المفروض يتميز بإستهلاك طاقة أقل .. وعمومًا لما قارنتها مع ايفون 11 اللي بطاريته كانت بتكمل اليوم بالعافيه .. الـ12 ممكن تبقى أقل فعليًا حاجة بسيطة اوي.
هل ده بسبب جودة الشاشة الأعلى ؟ مش عارف ! وطبعًا كلنا عارفين إن ابل مابقتش تحط الشاحن في علبة الموبايل وكمان الكابل من USB Type C لـLightning وده اللي هيجبرك للأسف تشتري شاحن جديد إلا لو أنت عندك شواحن قديمة بكابلاتها زي ما ابل بتقول .. تقدر تستخدمها وأنا بالفعل بستخدم شاحن الـiPad 2 اللي معايا من 9 سنين تقريبًا ومازال شغال.
وكمان دلوقتي في تقنية الـMagsafe الجديدة اللي هشرحهالك كمان شوية وبإختصار بتخليك تشحن الموبايل Wireless بشاحن Magnetic بيلزق على طول مكان الشحن غير إنه بيدعم الشحن الـWireless العادي واللي بيدعم لحد 15 وات.
عوامل الأمان وعناصر اخرى :-
الـFace ID زي ما هو ماحصلش عليه أي تحديث .. ولكن كان نفسي يتضاف البصمة في زرار الباور زي ما عملوا في iPad Air الجديد كبديل مُمتاز للـFace ID خاصة في فترة كورونا والماسكات.
مع العلم ان الـFace ID بصراحة مُريح جدًا في إستخدامه على مدار أكتر من سنة ماحستش أني متضايق منه غير في فترة الكورونا والماسكات اللي بتجبرك تكتب الباسورد كل مرة.
بالنسبة للسوفت وير فا بعد تحديث الـIOS 14 تم إضافة شوية حاجات جميلة اهمها الـWidgets .. وطبعًا مش هنختلف على سرعة وسلاسة أداء الموبايل وسهولة التنقل وتعديل الإعدادات وده اللي متميزة بيه ابل على طول.
الموبايل فيه سماعتين بيشتغلوا Stereo صوتهم مُمتاز .. ممكن نلاقي موبايلات تانيه أعلى في الصوت لكن في جودة الصوت وتفاصيله أعتقد الـiPhone 12 يتفوق .. بس مفرقش حاجة عن صوت iPhone 11.
الـMagsafe تقنية جديدة إتضافت لسلسلة الـiPhone 12 .. بقى في مغناطيس في ضهر التليفون بشريحة NFC بتخلي التليفون يلزق في الإكسسوارات اللي بتدعم الخاصية دي زي الشاحن الـMagsafe الجديد اللي قولنا عليه.
من خلال شريحة الـNFC الموبايل بيتعرف عليها لدرجة إنه بيعرف لون الجراب أما تركبه أو إنك وصلت الشاحن .. وكمان تقدر تستخدمه في تثبيت محفظة ابل الجديدة اللي برده تقدر تثبتها في ضهر الموبايل.
بالنسبة بقى للشبكات فالموبايل بيدعم الـ5G .. وبصراحة محرج أتكلم عليه وإحنا موبايلاتنا لاقطة 2G بالعافية وبنعاني عشان نكمل مكالمة للأخر .. سلسلة الـiPhone 12 كلها من الـMini للـMax بتدعم الـ5G .. ومش هنقدر نتكلم عنها غير لما تكون متوفرة ونقدر نستخدمها .. لكن بشكل عام الشبكة محترمة.
الكاميرات :-
هنيجي لأهم جزئية بتتميز بيها موبايلات أبل عامة وخاصة iPhone 12 وهي الكاميرات .. الموبايل بيجي بنفس الـSensor ونفس الكاميرتين الخلفيتين في الـiPhone 12.
الكاميرتين 12 ميجا بيكسل بس العدسة الأساسية بقت بفتحة F/1.6 بدل F/1.8 وده اللي هيديك نتايج أفضل في الإضاءة الضعيفة .. والـUltra Wide زي ما هي بفتحة عدسة F/2.4 أما الكاميرا الأمامية 12 ميجا بيكسل بفتحة عدسة F/2.2.
طيب التطوير فين بقى ؟ هنلاقي إن مُعظم التغيير كان في الـSoftware وبعض المُميزات اللي إتضافت بسبب المعالج الجديد الـA14 Bionic اللي خلى وضع الـNight Mode متاح فكل الكاميرات الخلفية وكمان الأمامية.
وكمان حسنوا تقنية الـHDR وأضافوا خاصية التصوير السينمائي الـDolby Vision في تصوير الفيديو .. وأضافوا تقنية الـDeep Vision للكاميرا الامامية.
بالنسبة بقى للتجربة الفعلية .. الصورة في إضاءه النهار بتكون ممتازة جدًا .. مفيش لعب في الألوان .. الـSkin Toons مظبوطة والتفاصيل واضحة جدًا .. لما جربت أصور بالعدسة الـUltra Wide لاقيت ان الكاميرا عاملة Control على الألوان .. في فرق بين الألوان الفاتحة والغامقة وده بيدي نتيجة أفضل.
التصوير برده inDoor بنلاقي الصور مظبوطة .. ألوان وتفاصيل ومفيش Noise كتير في الصورة .. بالنسبة بقى للتصوير بالليل فالموبايل مطلع صور بتفاصيل ممتازة جدًا ومسيطر على الـHighlights او الأجزاء اللي الضوء فيها عالي.
التصوير بالليل بشكل عام في الموبايل ده كويس جدًا .. التفاصيل واضحة والألوان حلوة جدًا .. لما جربت أقارن ايفون 12 بالايفون 11 لاقيت ان ايفون 12 حسن من الـSaturation بتاع الصور بشكل واضح جدًا .. لكن الفروقات مش كبيرة أوي.
بالنسبة بقى للكاميرا السيلفي فا هنلاقي ان التفاصيل ممتازة جدًا وفي سيطرة واضحة على الـHighlights في الصورة .. السيلفي inDoor يمكن بيطلع تفاصيل مش أفضل حاجه .. والسيلفي outDoor بالليل بيطلع صورة كويسة لو بتصور أشخاص لكن شخص واحد مثلًا هتلاقي Noise بسيط في الصورة.
بالنسبة للكاميرا السيلفي جنب الـiPhone 11 فا هنلاقي تحسن بسيط في الألوان والتفاصيل والـDinamic Range .. وفعلًا الـNight Mode فرق جدًا في الكاميرا الأمامية لايفون 12 عن ايفون 11.
الموبايل بيدعم تصوير فيديوهات 4K مع 30 او 60 فريم في الثانية .. الموبايل بيدعم تثبيت فيديوهات على اي جودة تصوير ممكنه .. وبيدعم التصوير بالـDolby Vision اللي بيدي نتيجة ممتازة لو بتتفرج من شاشة بتدعم الـHDR.
شوف صور وفيديوهات متصورة بالموبايل في فيديو المراجعة !
سعر الموبايل :-
سعر الموبايل العالمي :-
- نسخة 64 جيجا مع 4 جيجا رام بسعر 800 دولار
- نسخة 128 جيجا مع 4 جيجا رام بسعر 850 دولار
- نسخة 256 جيجا مع 4 جيجا رام بسعر 950 دولار
سعر الموبايل في المحلات حوالي 18500 جنية مصري للنسخة الـ128 جيجا مع 4 جيجا رام .. للأسف !
الرأي النهائي :-
الرأي النهائي لمُستخدم أبل :-
ايفون 12 الجديد مش Upgrade كبير عن ايفون 11 إلا في 3 حاجات .. الكاميرا السيلفي بالليل .. الشاشة الـOLED .. تصوير الفيديوهات .. اما لو انت معاك أيفون قديم مثلًا زي الـiPhone X .. فا لأ هتلاقي تطورات ملحوظة هتحس بيها لما تشتري ايفون 12.
الرأي النهائي لمُستخدم عادي :-
مبدأيًا لو معاك ايفون 11 وعايز تجيب ايفون 12 الجديد فا لأ بلاش .. مفيش تطوير يستاهل .. اما لو انت معاك ايفون من الأجيال القديمة وعايز تجيب ايفون جديد فا خليك في ايفون 12 هيكون مناسب جدًا ليك .. لإن الـiPhone 12 Pro مفيهوش حاجه تشدك عن الـ12 العادي .. اما الـiPhone 12 Mini والـPro Max فا دول هينزلوا الشهر ده وأكيد بإذن الله هنجربهم.
المميزات الحقيقية للـiPhone 12 :-
- كاميرات مُمتازة جدًا خاصة في تصوير الفيديوهات
- أداء ثابت ومستقر مع مرور الوقت
- علامة التُفاحة ( ميزة حقيقية عند بعض الناس )
- سعر الـResale او إعادة البيع
وفي النهاية ايفون 12 مشدنيش أوي في أواخر 2020 .. يعني مقدمش المُميزات الرهيبة من شكل شاشة أو تردد .. هنا النوتش زي ما هو عريض والشاشة 60 هيرتز .. لغة تصميم الظهر نفسها متغيرتش بعيدًا عن الحواف المُربعة الرخمة اللي أنا مش حاببها .. البطارية معجبتنيش خالص وكمان سرعات شحن بدائية جدًا .. وكمان مفيش شاحن في العلبة .. والتريند اللي هما بدأوه ممكن نعاني منه لو باقي شركات الموبايلات مشيت وراهم فعلًا وشالوا هما كمان الشواحن.
والمعالج قوي وكل حاجة بس كده كده أي معالج Flagship أنا شايف إنه بيقضي الغرض وزيادة .. واخيرًا الكاميرات حلوة جدًا ومظبوطة جدًا ويمكن دي أكتر حاجة عجبتني فيه.
Comments