من فترة عملنا مراجعة Itel P36 .. وده موبايل إقتصادي عجبني فيه حاجات كتير .. بس الموبايل كان ناقص شوية حاجات زي انه 1 جيجا رام والمعالج ضعيف والبطارية بتشحن بشاحن بطيء وكان بيدعم شبكات 3G فقط.
المراجعة بتاعت النهارده على موبايل Itel P36 Pro واللي بيجي يعالج النواقص اللي وضحتها ليكم فوق وسعرة مش فارق كتير .. فا النهارده هنراجعه وهنشوف هل ممكن تقدر تعتمد عليه كموبايلك الأساسي بالسعر الإقتصادي ده ولا لأ .. وهل عالج فعلًا النواقص والعيوب اللي كانت موجوده في P36 بفرق السعر البسيط ده ولا لأ ؟!
التصميم :-
موبايل P36 Pro بيجي بتصميم من البلاستيك بالكامل .. شيء طبيعي في الفئة دي .. وعمومًا مُستخدم الفئة الإقتصادية بيهمه أكتر شكل التصميم .. وهنا شكل التصميم مُحترم جدًا فيه تدرج على اللون مع إنعكاسات بسيطة للضوء .. تصميم شيك جدًا بصراحة.
وعلشان دي فئة إقتصادية .. فا لازم نهتم بالإضافات اللي جوا العلبة .. وهنا شركة Itel هتقدملك في العلبة جراب شفاف بلاستيك مع سكرينة وسماعة .. محتويات مقبوله جدًا جدًا في الفئة دي.
الموبايل وزنه حوالي 195 جرام مع تخانة 8.6 مللم .. الحجم والوزن مقبولين جدًا والمسكة في الإيد سهلة ومُريحة.
وبالنسبة للشكل والتصميم فا انت مش هتقدر تفرق النسخة العادية P36 عن النسخة اللي بنراجعها النهارده وهي الـP36 Pro .. التصميم واحد في الموبايلين.
الشاشة :-
شاشة كبيرة بتيجي بحجم 6.5 بوصة من نوع IPS LCD بدقة HD+ .. والشاشة فيها نوتش صغير Water Drop موجود فيه الكاميرا السيلفي.
شكل الشاشة يمكن من أهم مميزات الموبايل ده .. لإن الفئة الإقتصادية صعب تلاقي فيها شاشة بالشكل والحجم وإستغلال الحواف ديه.
الشاشة مش هقولك الوانها رائعة ولا سطوعها عالي اوي يعني تحت الشمس .. ولكن أقدر اقولك إنها مقبولة جدًا .. وللأسف مفيش حساس إضاءة .. هتحتاج تظبط سطوع الشاشة بإيدك على حسب المكان اللي انت فيه.
وبرده أحب اقولك إن الشاشة هنا في Itel P36 Pro متفرقش اي حاجة عن النسخة العادية.
الأداء :-
الموبايل هنا جاي بمعالج ثماني النواة بتكنولوجيا 28 نانو من شركة يونيسوك .. وإسم المعالج SC9863A.
والأداء هنا كويس جدًا مقارنتًا بالنسخة العادية لإنه ثماني النواة مش رباعي زي النسخة العادية .. الفرق واضح وصريح .. وكمان النسخة البرو بتيجي بـ2 جيجا رام مش 1 جيجا رام زي النسخة العادية.
وكل ده منعكس على الأداء بشكل واضح جدًا .. النسخة البرو فعلًا تقدر تعتمد عليها بشكل كامل وتقدر تسطب كل برامجك الأساسية من غير ما تحس إنك متضايق من بطيء الموبايل.
المعالج الرسومي اللي هنا مقبول جدا .. بدأت تجربة الألعاب بلعبة Subway اللي كانت بتعلق على النسخة العادية .. بس النسخة البرو شغلت اللعبة بكفاءة من غير اي مشكلة.
إتجرأت أكتر وسطبت ببجي النسخة الكاملة مش اللايت ولاقيت إنها ممكن تشتغل على اعدادات جرافيك Balanced Medium .. جودة مقبولة جدًا .. بس طبعًا قللتها لأقل حاجة وقدرت العب بشكل طبيعي على الموبايل .. وجربت برده كول اوف ديوتي وإشتغلت على اعدادات جرافيك Low واللعبة إشتغلت كويس جدًا.
وأرجع واقولك ممكن تلاقي تسقيط فريم ولا إتنين مع اللعب لأن المعالج اللي هنا مش بالقوة الكافية لتشغيل الألعاب التقيلة اصلًا .. ولاحظت سخونية متوسطة من على ظهر الموبايل .. بس سخونة مش كبيرة أوي.
عوامل الأمان وعناصر اخرى :-
الموبايل فيه بصمة في الظهر .. غاطسة جوا الظهر شوية علشان تميزها بسهولة، والبصمة أدائها مُرضي جدًا .. والـFace Unlock كمان سرعته مقبولة جدًا .. وعوامل الأمان هنا أسرع بفرق واضح عن النسخة العادية.
الموبايل جاي باندرويد 9.0 نسخة كاملة مش مُخففة وفيها كل المميزات .. زي الكورة العايمة اللي فيها بعض الإختصارات .. وزي المسح بـ3 أصابع علشان تاخد سكرين شوت.
الموبايل مفيهوش لمبة اشعارات .. بس شركة ايتل معوضة ده بإنك ممكن تشغل فلاش الموبايل لما يجيلك إشعار وكمان شاشة الموبايل وهي مطفية تنور خفيف علشان تنبهك إن في إشعار جالك.
الموبايل مفهوش حساس ضوء ولا جيروسكوب .. بس فيه حساس تقارب علشان يقفل الشاشة لما يكون الموبايل على ودنك وإنت بتعمل مكالمة .. وبيدعم وصلة الـOTG.
الموبايل صوته جاي من سبيكر وحيد سُفلي .. صوته مقبول جدًا على سعر الموبايل .. مش هتواجه مشكله معاه .. وصوت سماعات المكالمات كويس وصوت سماعات الأذن كويس برده.
بالنسبة لشبكات الإتصال .. الـWiFi تمام مفيهوش مشاكل .. وبالنسبة لشبكات الإتصال فالموبايل داعم لشبكات الجيل الرابع والأداء بتاعه متوسط .. مش هيسببلك أزمة خالص في الإستخدام.
البطارية :-
البطارية في موبايل الـItel P36 Pro بتيجي بحجم 5000 مللي أمبير زي النسخة العادية بالظبط .. هتستحمل معاك نفس الوقت تقريبا .. حوالي 8 ساعات شاشة مفتوحة وده وقت مرضي جدًا في الفئة ديه.
الي فارق جامد في النسخة البرو عن العادية الشاحن المرفق واللي بيجي بقوة 10 واط .. وبالمناسبة ديه ميزة في الفئة السعرية ديه لإن كل الشواحن هنا 5 واط .. البطارية بتشحن في حوالي 3 ساعات ونص .. وقت طويل طبعًا بس أرحم من النسخة العادية اللي بشاحن 5 واط وبتشحن في 5 ساعات !
الكاميرات :-
الكاميرا الخلفية ثُنائية .. الأساسية 13 ميجا بيكسل والتانية للذكاء الصناعي .. والسيلفي بتيجي بدقة 8 ميجا بيكسل .. والسوفت وير هنا فعلًا فيه ذكاء إصطناعي، مش زي النسخة العادية.
الموبايل بيقدر يطلع صور مقبولة جدًا طول ما الإضاءة عالية .. يعني لو عايز تصور أي حاجة هتقدر بسرعة تطلع الموبايل ده وتصور والصورة هتطلع واضحة .. بس زي ما قولتلك لازم إضاءة عالية.
وكويس جدًا إن في هنا تصوير بورترية سواء بالكاميرا الخلفية او الأمامية .. هو اه البورترية هنا مش ممتاز .. بس أهو موجود .. متتوقعش أداء أحسن من كدا من كاميرات الموبايلات الإقتصادية عمومًا.
الموبايل ده زي النسخة العادية .. بيصور فيديوهات على 1080p ودي الجودة المنطقية في الفئة السعرية دي .. وبسبب عدم وجود مُستشعر الـGyroscope فا اصلًا مفيش مثبت إلكتروني في الموبايل .. وبرده مفيش مايكروفون اضافي لعزل الضوضاء.
شوف تجربة التصوير بالموبايل صور وفيديوهات في الفيديو في اخر المقال.
سعر الموبايل :-
سعر الموبايل الرسمي 1500 جنية للنسخة 32 جيجا مع 2 جيجا رام.
وينفع تركب كارت ميموري وشريحتين إتصال بدعم شبكات الجيل الرابع مع بعض في نفس الوقت.
الرأي النهائي :-
موبايل Itel P36 Pro مميز في :
- تصميم شيك جدًا
- شاشة كبيرة بتصميم مقبول
- أداء مقبول جدًا
- مساحة ورام كويسين
- عوامل امان كويسة جدًا
- بطارية ضخمة
- دعم لشبكات الجيل الرابع
وواضح جدًا تفوق النسخة البرو من الـP36 عن العادية في حاجات كتير وفعلًا فرق السعر 300 جنية بس ما بينهم يخليني أرشحلك وبقوة النسخة البرو اللي فعلًا تقدر تعتمد عليها إعتماد كامل في يومك.
بس لازم تبقى عارف في الفئات الإقتصادية كل جنية بيفرق .. ولازم تبقا عارف إنك لو زودت 700 جنية هتروح في حته تانية خالص مع الـRedmi 9 اللي هنعمله مراجعة قريب .. او كمان الـRealme C3 .. بس مش كل الناس تقدر تزود المبلغ ده.
Comments