فئة ال 7000 جنيه اللى ظهرت فجأة ما بين الفئة المتوسطة و الفئة العليا و نزل فيها أهم اتنين دلوقتى شاغلين كل الناس هاتف Samsung Galaxy A70 و هاتف OPPO F11 Pro فى مراجعة النهاردة هنحاول نقارن بين الاتنين فى أداء المعالج و الشاشة و الكاميرا و السيلفي و البطارية و نشوف مميزاتهم و عيوبهم علشان نعرف نختار مين الأنسب حسب مواصفات كل شخص الخاصة و متطلباته.
هاتف Samsung Galaxy A70 :-
المميزات:
- يمكنك استخدام شريحتين اتصال و كارت ذاكرة خارجي فى نفس الوقت.
- يمكنك تشغيل لعبة فورت نايت على الهاتف.
- يقدم المعالج الرسومي أداء قوي مع الألعاب الثقيلة مثل PUBG.
- بطارية الهاتف تقدم اداء مميز.
- كاميرا الهاتف الخلفية تقدم أداء مميز.
- شاشة كبير سوبر أمولد مع حواف قليلة توليفة رائعة لتجربة مشاهدة ممتعة.
- 6 جيجا بايت رام ذاكرة عشوائية فى الفئة المتوسطة خطوة جيدة من سامسونج.
العيوب:
- بسبب خامة الهاتف من البلاستيك فهو سهل الاتساخ ببصمات الاصابع و التجريحات و الخدوش.
- تصميم الهاتف ليس جديد.
- لا يوجد طبقة حماية على الشاشة ضد الخدوش و الصدمات.
- الشحن السريع لا يكمل بعد 90% من شحن الهاتف للحفاظ على البطارية.
- لا يمكنك الغاء النوتش من الاعدادات.
- أداء البصمة المدمجة بالشاشة لا يزال يحتاج الى تحديثات ليصبح أفضل.
- لا يوجد لمبة اشعارات و لكن تم التعويض عنها بخاصية Always on display.
هاتف OPPO F11 Pro :-
المميزات:
- شاشة كبيرة بدون نوتش تعطي شكل مميز مع نسبة استحواذ ممتازة.
- بطارية تقدم أداء مميز مع شحن سريع.
- فكرة السيلفي جديدة و مميزة كما ان أداء الكاميرا تطور عن الأجيال السابقة.
- كاميرا الهاتف الخلفية تقدم أداء مميز مع تطور ملحوظ.
- عناصر حماية الأمان البصمة و قفل الوجه تتميز بالسرعة و الدقة.
العيوب:
- وزن الهاتف ثقيل وتخانة كبيرة.
- لا يوجد بالهاتف لمبة اشعارات.
- مدخل الUSB هو Micro 2.0 و ليس USB Type C و مع ذلك شحن البطارية سريع.
- الكاميرا الخلفية لا تدعم التصوير بجودة 4K.
- لا يمكنك استخدام كارت ذاكرة خارجي و شريحتين اتصال فى نفس الوقت و لكن مع مساحة 128 جيجا بايت اعتقد لن تحتاج لكارت الذاكرة الخارجي.
التصميم :-
حرب البلاستيك وصلت لحد فئة 7000 جنيه الاتنين مصنوعين من البولى كاربونيت البلاستيك المقوي لكن لما تمسك الاتنين هتحس ان بلاستيك الأبو أفضل من السامسونج لكن لو اتكلمنا عن اطار الهاتف اللى بردوا من البلاستيك السامسونج يكسب لأن طبقة الطلاء على الأوبو خفيفة.
هاتف Samsung Galaxy A70 بأبعاد 164.3×76.7×7.9 ملم مع وزن 183 جرام مع انحنائات خفيفة فى ظهر الهاتف و لكنه الهاتف كبير بعض الشئ و قد تجد صعوبة فى استخدامه بيد واحدة كما أن ظهر الهاتف تظهر به انعكاسات جميلة مع الاضاءة فى اللون الأسود و يتوافر ايضا باللون الأبيض و الأزرق أما بالنسبة للتصميم فهو ليس جديد و يعتبر نفس تصميم هاتف Samsung A50 و اللى أرخص ب1500 من ال A70.
هاتف OPPO F11 Pro بأبعاد 161.3x 76.1×8.8 مع وزن 190 جرام مما يعتبر كبير بعض الشئ خاصة اذا كنت من أصحاب اليد الصغيرة قد تواجه صعوبة فى استخدام الهاتف بيد واحدة بألوان الأحمر المتدرج للبنفسجي و الأخضر المتدرج بالنسبة للتصميم جديد و جميل و مميز عن النسخة Oppo F11 العادي اللى أرخص بحوالى 1500 جنية.
لو هنقارن فى المسكة فى اليد هنلاقي ان ال A70 أطول بحاجة بسيطة و أرفع و أخف عموما زي ما قولنا فى كل واحد الاتنين صعب تستخدمهم بايد واحدة و هتحتاج تستخدم ايديك الاتنين و على فكرة مفيش ولا واحد منهم مضاد للماء.
فى النهاية مفيش واحد أحسن من التانى التصميم مختلف نسبيا من كل شخص للتانى.
الشاشة :-
شاشة هاتف Samsung Galaxy A70 تأتي من نوع Super Amoled كما هو متعتاد من سامسونج بقياس 6.7 بوصة تعرض 16 مليون لون بدقة Full HD+ بجودة 1080*2400 بيكسل مع كثافة بيكسلات 393 بيكسل لكل بوصة بأبعاد 19.5: 9 يوجد اسكرينة حماية تم تركيبها على الشاشة مسبقا و تمثل الشاشة 86% من حجم الهاتف و الأطراف حول الشاشة قليلة جدا خاصة الحافة السفلية و أعلى الهاتف نوتش Infinity U و لا يمكنك الغائها من الاعدادات .
شاشة هاتف OPPO F11 Pro تأتي من نوع LTPS IPS LCD بقياس 6.53 بوصة تعرض 16 مليون لون بدقة Full HD+ بجودة 1080*2340بيكسل مع كثافة بيكسلات 397 بيكسل لكل بوصة بأبعاد 19.5: 9 مفيش كلام اكيد عن وجود طبقة حماية و لكن الشركة قامت بتركيب اسكرينة للحماية على الشاشة مسبقا و تمثل الشاشة 84.4% من حجم الهاتف.
لما عملنا مقارنة بين الاتنين بالرغم من السامسونج شاشة سوبر أمولد و الأوبو IPS LCD الا ان سطوع شاشة الأوبو كان ممتاز و قريب جدا من السامسونج الفروق الجوهرية هنا أربعة فروق أولهم ان شاشة السامسونج أكبر و هى الأكبر فى الفئة المتوسطة و الثانى هو عدم وجود نوتش فى ال F11 Pro و الثالث ان الحافة السفلية للشاشة فى A70 أقل من ال F11 Pro و الرابع فى نوع الشاشة السوبر أمولد فى السامسونج أفضل الأنواع.
و بكده يبقي السامسونج يكسب فى 3 نقاط و هم الحجم الأكبر و السوبر أمولد و الحافة الأقل و الأوبو فى نقطة واحدة وهى عدم وجود نوتش.
الأداء :-
معالج هاتف Samsung Galaxy A70 هو Qualcomm Snapdragon 675 ثماني النواة يعمل بقوة تردد 2*2.0 جيجا هرتز Kyro 460 gold و 6*1.7 جيجا هرتز Kyro 460 silver بمعمارية 11 نانو مع معالج رسوميات و جرافيك Adreno 612 الهاتف سجل 167688 نقطة فى اختبار Antutu.
أما معالج هاتف F11 Pro هو Mediatek Helio P70 ثماني النواة معمارية 12 نانو يعمل بقوة تردد 4*2.1 جيجا هرتز cortex A73 و 4*2.0 جيجا هرتز cortex A53 مع معالج رسوميات و جرافيك Mali-G72 MP3 مع وضع تعزيز الأداء Hyper boost اللى سجل 149790 نقطة فى اختبار Antutu و يتفوق فى وجود ال Game space الموجود بالهاتف يساعد على التحكم فى التنبيهات و المكالمات أثناء اللعب كما يمكنك من التحكم فى استهلاك البطارية فى العادى بيكون على Balance ولو عايز المعالج يشتغل أفضل بس هيسحب بطارية أكثر يبقي خليه على High performance أو نقلل الاستهلاك و نخليه على Low Power.
على فكرة الفضل يرجع لشركة OPPO فى تغيير فكرة المستهلكين عن معالجات ميديا تك بفضل السوفت وير المستقر و امكانيات المعالج الجيدة و اللى ظهر فى سلسلة الF زي F7 وF9.
بالنسبة للPUBG بتشتغل على Ultra HDR فى هاتف A70 و على High HD فى ال F11 Pro و بتشتغل بدون مشاكل أو تهنيج فى الاتنين و كمان الA70 بيتفوق انه يمكنك تشغيل لعبة فورت نايت عليه على أقل جرافيك انما ال F11 PRO لأ.
من الآخر الأداء الرسومي فى هاتف A70 أفضل بفرق ملحوظ عن الأوبو انما الأداء العادى قريب جدا من بعض فى الأوبو السوفت وير مستقر و أفضل شوية السامسونج لسه قدامها وقت علشان تعرف تستغل امكانيات المعالج بتاعها صح و استقرار أفضل للواجهة.
يتم اصدار كلا الهاتفين بنظام تشغيل اندرويد 9.0 PIE و واجهة مستخدم One UI فى هاتف Samsung A70 أما هاتف OPPO F11 Pro بواجهة مستخدم Color OS 6.0 , والسوفت وير ثابت ومستقر اكتر في الاوبو عن السامسونج الي لسه محتاج شوية تحديثات .
الذاكرة الداخلية و العشوائية:
يتوافر هاتف Samsung A70 بذاكرة داخلية 128 جيجا بايت مع 6 جيجا بايت رام ذاكرة عشوائية و يمكنك زيادة المساحة الداخلية للهاتف عن طريق إضافة كارت ذاكرة خارجي يصل الى 512 جيجا بايت فى منفذ منفصل عن شريحتى الاتصال و هى نقطة تفوق على هاتف OPPO F11 Pro.
يتوافر الهاتف بنسخة واحدة فى مصر حيث ذاكرة داخلية 128 جيجا بايت مع 6 جيجا بايت رام ذاكرة عشوائية و يمكنك زيادة المساحة الداخلية للهاتف عن طريق إضافة كارت ذاكرة خارجي يصل الى 256 جيجا بايت و لكن مع الاستغناء عن الشريحة الثانية لاستخدامه.
الصوت :-
صوت السماعة الخارجية سماعة واحدة فى الاتنين و لكن فى ال A70 تقدر تعلى الصوت أكتر عن طريق خاصية Mono Audio من الاعدادات و لكن نقاء الصوت هيكون ضعيف جدا و صوت سماعة المكالمات ممتازة فى الاتنين و صوت سماعات الأُذن الاتنين قريبين من بعض و لكن فى F11 Pro فيه صدي خفيف و كلاهما يدعم ميكروفون اضافي لازالة الضوضاء.
الكاميرا الخلفية :-
خلينا نتكلم عن الأرقام فى الاتنين الأول كاميرا هاتف Samsung Galaxy A70 الخلفية تأتي ثلاثية بجودة 32 ميجا بيكسل مع فتحة عدسة f/1.7 مع دعم الضبط التلقائي المزدوج PDAFو الثانية 8 ميجا بيكسل مع فتحة عدسة f/2.2 بزاوية واسعة Ultra wide و الثالثة 5 ميجا بيكسل مع فتحة عدسة f/2.2 مخصصة للعزل و فلاش أحادى LED و تصوير فيديو بجودة Ultra HD 2160 مع 30 لقطة فى الثانية و هى أقل من 4K و بجودة 1080 بيكسل مع 30 أو 60 لقطة فى الثانية و لكن فى ال 60 لقطة لا يعمل المثبت الاليكترونى مع تصوير بجودة 720 بيكسل مع 30 لقطة فى الثانية كما يمكن تصوير Super Slow motion كما يمكنك تصوير الفيديو بالزاوية الواسعة بجودة 1080 بيكسل.
كاميرا هاتف OPPO F11 Pro الخلفية تأتي مزدوجة بجودة 48 ميجا بيكسل مع فتحة عدسة f/1.8 و الثانية بجودة 5 ميجا بيكسل مع فتحة عدسة f/2.4 من اجل العزل مع دعم الضبط التلقائي المزدوج PDAF و فلاش احادى LED و تصوير فيديو بجودة 1080 بيكسل مع 30 لقطة فى الثانية و ايضا التصوير بجودة 720 بيكسل مع 30 اطار فى الثانية كما يقوم بالتصوير Slow motion و للأسف الهاتف لا يدعم التصوير بجودة 4K.
نيجي بقى للتجربة العملية تشبع الألوان أفضل فى الأوبو بس الألوان الحقيقة كانت فى ال A70 .
فى وجود الشمس يتفوق ال F11 Pro فى ال Dynamic range المظبوط أكثر أما فى الظل يكسب A70 يعنى الوضع اتعكس.
فى البورتريه ال A70 كان أفضل لأن فى الأوبو التفاصيل كانت ضايعة أما فى الصور ال Indoor الأوبو ممتاز فى انه يعمل تشبع فى الألوان و يخرج صور جميلة.
فى التصوير الليلى و لو فيه مصدر اضاءة فى وش الكاميرا يتفوق السامسونج مع noise أقل ولو مفيش مصدر اضاءة فى وش الكاميرا و مع استخدام الوضع الليلي فى الوبو يتفوق الأوبو.
الكاميرا الأمامية :-
كاميرا السيلفي فى هاتف Samsung A70 تأتي بجودة 32 ميجا بيكسل مع فتحة عدسة F/2.0 و تصوير فيديو بجودة 1080 بيكسل مع 30 لقطة فى الثانية كما تدعم HDR كما تدعم العزل عن طريق السوفت وير.
أما عن كاميرا هاتف OPPO F11 Pro تأتي بجودة 16 ميجا بيكسل مع فتحة عدسة F/2.0 و تصوير فيديو بجودة 1080 بيكسل مع 30 لقطة فى الثانية.
بالنسبة للتجربة العملية السيلفي ممتاز فى الاتنين بس تفاصيل الوش ممسوحة شوية فى ال A70 و لكن ألوان الأوبو أكثر واقعية لكن فى القص يكسب السامسونج و لكن الأوبو ألوان واقعية أكثر خصوصا لون الجلد .
فى اضاءة الغرفة تفوق ال OPPO بيظهر خصوصا فى تفاصيل الوجه و الفرق بين الاتنين بيظهر أكثر مع وجود أكثر من شخص فى الصورة و كأن الصورة فى السامسونج بتتهز و بتحتاج تاخدها أكثر من مرة علشان تظبط.
البطارية :-
هاتف Samsung Galaxy A70 بسعة 4500 مللي أمبير مع دعم تقنية الشحن السريع بأسرع شاحن من سامسونج حتى الآن و تستهلك البطارية حوالي ساعة لإعادة الشحن من 14% الى 90% و لكن الشحن السريع يغلق بعد ال 90% و تم شحن من 90% الى 100% فى نصف ساعة يعنى زمن الشحن بالكامل ساعة و نصف و تصمد لمدة 7 ساعات شاشة مفتوحة مع Mobile data و WiFi و PUBG هنا فى تفوق USB Type C.
هاتف OPPO F11 Pro بسعة 4000 مللي أمبير و هى اكبر ب500 مللي أمبير من أجيال سلسلة ال F القديمة كما أنها تدعم تقنية الشحن السريع VOOC 3.0 و ذلك تعويض عن مدخل USB Micro 2.0 و تستهلك البطارية ساعة واحدة فقط لإعادة الشحن من 20 % الى 100% كما أن الشاحن يقوم بالشحن السريع طوال مدة الشحن و ليس فى مرحلة واحدة فقط مثل الأجيال القديمة و هنا Micro USB 2.0.
الاتنين تقريبا نفس الأداء و فى الاستخدام المتوسط تصمد لمدة يوم كامل.
عناصر حماية الأمان و خصوصية المستخدم :-
الاتنين فيهم مستشعر بصمة الاصبع و خاصية قفل الوجه Face Unlock لما تيجي تطلع هاتف F11 Pro من جيبك هتكون حطيت صباعك على البصمة و يتفتح لكن فى السامسونج هتطلع الهاتف بيد و تمسكه باليد التانية و تحط بصمتك على مكان البصمة المدمج بالشاشة و دى هياخد وقت أكثر.
اما بالنسبة ل Face Unlock الأوبو أسرع بشكل ملحوظ بالرغم من وجود ال slider.
خواص أخري :-
الاتنين بيدعما كل المستشعرات بوصلة وضوء و تقارب بعد الاستخدام بقي لقينا ان مستشعر الضوء فى A70 بيعلق احيانا.
كلاهما يدعم الهاتف تشغيل الراديو FM.
كلاهما يدعم الهاتف مستشعر الجيروسكوب حيث استخدام نظارات الواقع الافتراضي VR و مشاهدة فيديوهات 360 درجة.
الاتنين بيدعموا تشغيل خاصية ال OTG و التى تمكنك من توصيل أى USB Driver و نقل البيانات من و الى الهاتف.
بالنسبة لتعامل الاتنين مع الشبكة ممتاز في الاتنين و بدون أى مشاكل.
يتفوق ال A70 فى دعم مستشعر NFC بروتوكول النقل السريع كما أنه يدعم خاصية Night mode اللى بيحول خلفية التطبيقات للون الأسود و كمان الوجهة فى سامسونج بتدعم خاصية POP up view و اللى بتخلي تطبيق زي ال What’s app يظهر زي كورة عايمة على الشاشة زي الماسنجر.
الاتنين مفيش فيهم لمبة اشعارات و لكن فى السامسونج فيه خاصية Always on display اللى بتعرض الاشعارات اللى وصلت من غير ما تفتح الشاشة و الاشعارات بتظهر فى الاتنين فوق بدون أى مشاكل و الشاشة مفتوحة.
رأى موبيزل النهائي :-
كلام نهائي علشان اللخبطة تشتري ال Samsung A70 لو انت واثق أكثر فى براند سامسونج و عايز شاشة كبيرة سوبر أمولد مع كاميرا خلفية متميزة لتصوير فيديوهات مميز و عدسة واسعة مع Always on display بديل لمبة الاشعارات و معالج رسومي ممتاز و تكون خايف من ال slider الموجود بالأوبو و تكون محتاج كارت ذاكرة و شريحتين اتصال و USB Type C.
لكن تشتري ال OPPO F11 Pro لو انت بتتصور سيلفي كتير و عايز سوفت وير مستقر و بصمة سريعة و عملية و شحن سريع لحد 100% و معجب بفكرة الكاميرا السلايدر و شاشة بدون نوتش.
محتويات صندوق الهاتف :-
هاتف Samsung Galaxy A70 : مع تركيب اسكرينة للحماية عليه مسبقا والشاحن و كابل الشحن و سماعات الأُذن Earphones و جراب لحماية الهاتف.
هاتف OPPO F11 Pro : و تم تركيب اسكرينة للحماية عليه مسبقا من الشركة و الشاحن بتقنية VOOC و كابل الشحن و جراب شفاف لحماية الهاتف و سماعات الأُذن Earphones .
سعر الهواتف :-
هاتف Samsung Galaxy A70:
بالسوق المصري 6900 جنيه مصري للنسخة 128 جيجا بايت مع 6 جيجا بايت رام.
هاتف OPPO F11 Pro:
فى السوق المصري 7000 جنيه مصري للنسخة 128 جيجا بايت مع 6 جيجا بايت رام.
أما بالنسبة للنسخة العادية OPPO F11 نسخة 64 جيجا بايت مع 6 جيجا بايت رام بسعر 5590 جنيه مصري.
Comments