مراجعة Oppo Reno 5 نسخة 4G و 5G – كشف الحقيقة الكاملة !

شركة اوبو في مصر السنة اللي فاتت نزلت النسخة الـ4G بس من Oppo Reno 4 .. والموبايل حقق نجاح كبير وقدر يكون من أكتر 5 موبايلات مبيعًا في مصر الفترة اللي فاتت .. لكن دلوقتي اوبو غيرت فكرها في Oppo Reno 5 و قررت تنزل النسختين مع بعض .. الـ4G والـ5G.

فـ اوبو في مصر نزلت Oppo Reno 5 5G و Oppo Reno 5 4G بشكل رسمي في مصر .. والموبايلات وصلتلنا في موبيزل وبنجربهم بقالنا فترة .. والنهارده هننقل لكم تجربتنا مع الموبايلين وهنقولك على الفرق بينهم .. وهنقولك التطورات الفعلية المحسوسة في Reno5 4G بالنسبة لـReno 4 القديم .. اما بالنسبة لـOppo Reno 5 Pro لو بتسأل عليه هو لسه قدامه شوية على ما ينزل مصر ده لو نزل أصلا !


التصميم :-

النسختين من Reno 5 جايين بنفس التصميم تقريبًا .. والتصميم ده مختلفش كتير عن تصميم اوبو رينو 4 القديم .. كالعادة السياسة بتاعت الشركات بقت معروفة .. لازم التصميم الجديد يقعد في جيلين على الأقل.

تصميم رينو 5 مُميز في إنه خفيف ورفيع، وزنه حوالي 171 جرام للـ4G وحوالي 180 جرام للـ5G .. مش كل الناس يناسبها موبايلات تقيله وكبيرة ويمكن النقطة دي كانت أهم ما يميز Oppo Reno 4 عن منافسيه .. والنقطة التنافسية دي اتنقلت زي ما هيا للرينو 5 .. والموبايلين متاحين بلونين بس وهما الأسود والفضي المصنفر.

بالنسبة للخامات .. الشركة بتقول إن ظهر الموبايلين من الزجاج .. ولكننا في موبيزل مش مقتنعين بالكلام ده .. احنا شايفين رينو 5 4G من البلاستيك مش زجاج وده واضح من استخدامنا للموبايل.

لكن Reno 5 5G ممكن فعلا يكون من الزجاج لان أتقل شوية في الأيد من الـ Reno 5 4G.

فريم الموبايلين من البلاستيك .. و بروز الكاميرات كالعادة جاي على درجتين .. والبروز مش كبير نهائي وبيتغطى بالكامل بالجراب المرفق في العلبة.

اللون اللي معانا من نسخة الـ4G هو اللون الفضي .. بيعكس كمية ألوان مش طبيعية علية على حسب إضاءه المكان، وكمان الظهر مط مش لامع وبالتالي صعب يظهر فيه الخرابيش والبصمات وعلشان كده عاجبنا جدًا.

لكن اللون اللي معانا في نسخة الـ5G هو اللون الأسود، وللأسف هو لامع وبالتالي بيظهر فيه البصمات والخرابيش والتراب.


الشاشة :-

شاشة النسختين بنفس الحجم 6.4 بوصة من نوع AMOLED .. الشاشات مسحطة تمامًا من غير Edges .. مع ثقب صغير للسيلفي مع تردد بيوصل لـ90 هيرتز.

والفرق الحقيقي بين الشاشتين هو ان شاشة الـ5G بتوصل لدرجة سطوع أعلى تحت الشمس ولكن مش فرق كبير او رهيب عن الـ4G تمامًا.

ليه شاشة Reno 5 4G ممتازة في فئته السعرية؟

  • ثقب واحد للسيلفي
  • الحافة السفلية أقل من الجيل السابق ( رينو 4 ) بفرق ملحوظ
  • الشاشة حجمها كويس جدًا للإستخدام
  • معدل التحديث الـ90 هيرتز ونوعها AMOLED في نفس الوقت
  • ألوان مظبوطة جدًا و سطوع ممتاز تحت الشمس

ده كده بالنسبة للنسخة الـ4G .. لكن Reno 5 5G أغلى وفي فئة سعرية أعلى وممكن بسعره تلاقي موبايلات بتقدم شاشات أفضل .. زي S20 FE مثلًا بشاشة Super AMOLED وبتردد 120 هيرتز .. علشان كده منقدرش نقول ان Reno 5 5G شاشته ممتازة بالنسبة لسعره.

بالنسبة للحماية .. شاشة Oppo Reno 5 5G بتيجي عليها طبقة حماية Corning Gorilla Glass الجيل الخامس اما الـReno 5 4G طبقة الحماية اللي عليه Corning Gorilla Glass الجيل الثالث .. والموبايلين في العلبة متركب عليهم سكرينة.


الأداء :-

الـReno 5 4G جاي بمعالج كوالكوم سناب دراجون 720G وده نفس المعالج المستخدم في Reno 4 القديم .. أما الـReno 5 5G جاي بمعالج كوالكوم سناب دراجون 765G الداعم لشبكات الجيل الخامس.

وعمومًا معروف عن اوبو انها مش بتقدم افضل معالج في الفئة السعرية اللي الموبايل بتاعها موجود فيها.

اوبو بتتبنى فكرة الـSoftware .. بتاخد معالج وتثبته فترة علشان تقدر توصل بالسوفت وير بتاعها لأحسن تجربة ممكنة .. تجربة سوفت وير مستقر جدًا ثابت جدًا أداءه اليومي العادي مستحيل يدايقك حتى بعد فترة كبيرة من إستخدامك للموبايل وده اللي فعلًا هتلاقيه في سلسلة رينو 5.

من الأخر لو انت Gamer أو استخدامك تقيل فببساطة موبايلات اوبو مش معمولة ليك .. انت لو Gamer هات موبايل بمعالج رائد وده هتلاقيه في الفئة السعرية بتاعت الـ4G في موبايلات زي Nova 5T .. وفي فئة الـ5G في موبايلات زي Mi 10T .. ولازم تعرف ان موبايلات اوبو مُوجهة لفئة من المجتمع عايزه موبايل شيك شاشته حلوة أداءه معقول.

ولو هتسأل عن الفرق بين أداء المعالجين الـ720G والـ765G .. فالفرق الفعلي بسيط مش جوهري ما بينهم .. بعيدًا عن موضوع دعم شبكات الجيل الخامس اللي لسه مشتغلش عندنا في مصر.

الأداء الرسومي، ببجي بتشتغل على High HD في الموبايلين وبتشتغل كويس بدون أي مشاكل .. وكول اوف ديوتي بتشتغل برده على Very High بدون اي مشاكل والموبايلات سخونيتها معقولة جدًا .. عمرنا ما سمعنا عن موبايل اوبو بيسخن، دي حاجة هما بيحطوها دايما في حسابتهم.


عوامل الأمان وعناصر اخرى :-

بصمة مدمجة تحت الشاشة وأداءها سريع ومظبوط جدًا في الموبايلين .. والـFace Unlock أداءه سريع جدًا برده في الموبايلين مش هتواجه معاهم اي مشاكل.

الموبايلين جايين بـAndroid 11 واجهة ColosOS 11.1 .. اللي بقت موفرة أكتر لإستهلاك الطاقة بشكل ملحوظ بصراحة مع ثبات أكثر للنظام.

في Always On Display لعرض الإشعارات اللي جاتلك على الشاشة وهي مقفولة بأكتر من شكل.

الـ5G فيه NFC إنما الـ4G مفيهوش للأسف وده عيب للأسف.

المستشعرات كلها موجودة وشغالة حقيقية بدون أي مشاكل .. ضوء وتقارب وجيروسكوب في الموبايلين.

صوت الموبايلين للأسف Mono مش Stereo والصوت بيطلع من السماعة السفلية فقط .. مع إن خلاص الـStereo بقى تريند وبنشوفه في موبايلات أرخص .. عامة الصوت معقول، متوسط او فوق المتوسط على انه بسماعة واحدة .. ولكن الملحوظ ان الـBass او التجسيم افضل شوية في الـ5G عن الـ4G.

الشبكات بقى .. الـWiFi او الإتصال ممتازين لاقصى درجة في الموبايلين دول زيهم زي Reno 4 و Reno 4 Pro بالظبط .. حاجة محترمة تقدر تعتمد عليها بدون اي مشاكل ممكن تقابلها.


البطارية :-

بطارية 4300 مللي أمبير في الموبايلين .. زيادة 300 مللي أمبير عن الجيل اللي فات.

وقت الإستخدام الفعلي بيوصل 7 ~ 8 ساعات شاشة مفتوحة في الموبايلين واحنا مشغلين الـ90 هيرتز في  اعدادات الشاشة علطول .. و ده وقت أحسن حوالي ساعه من رينو 4 القديم .. وعلشان كده بنقول دايما ان اوبو شاطرة في الـSoftware وهتاخد أداء بطارية محترم من موبايلات رينو 5 الجديدة.

الشاحن المرفق في علبة الموبايلين واحد 65 واط .. ولكن في فرق في قدرة الشحن الفعلية .. هيشحنلك الـ4G بقدرة 50 واط فقط بدون مشاكل في حوالي 45 دقيقة .. وهيشحن الـ5G بقوته الكاملة 65 واط في حوالي 35 دقيقة .. وده وقت ممتاز جدا جدا.


الكاميرات :-

الموبايلين جايين بنفس الكاميرا الخلفية .. الأساسية 64 ميجا بيكسل فتحة عدسة F/1.7 والتانية 8 ميجا بيكسل للتصوير الواسع فتحة عدسة F/2.2 .. والتالتة 2 ميجا بيكسل ماكرو والرابعة 2 ميجا بيكسل عزل.

والسيلفي مختلف في الـ4G بدقة 44 ميجا بيكسل فتحة عدسة F/2.4 وفي الـ5G بدقة 32 ميجا بيكسل فتحة عدسة F/2.4.

احنا صورنا كتير بالموبايلين سوا .. وبرغم إن الموبايلين المفروض بنفس العدسة الرئيسية إلا إننا لاحظنا ان كاميرا الـ5G أحسن .. تفاصيل أحسن .. المعالجة بتاعت الصور مظبوطة أكتر .. جايز ينزل ابديت للـ4G يحسن الكاميرات شوية.

بس علشان منحكمش غلط على الموضوع قارنت بين Reno 4 و Reno5 4G و هنلاقي البورترية لسه كرتوني في القص بس تفاصيل الصورة أحسن شوية في الرينو 5 4G .. وفي معظم الصور اللي قارنا فيها بين الرينو 4 و الرينو 5 4G لاقينا تفوق الرينو 5 على الرينو 4 .. ده ملحوظ جدًا .. واللي تطور بشكل كبير الـNight Mode إتحسن جدا لانه ساعات كان بيلسع الصور في رينو 4 .. نقدر نقول أداء التصوير في رينو 5 4G إتطور وبقى يقدر ينافس Poco X3 وحش التصوير في الفئة المتوسطة.

أما السيلفي في Reno 5 4G فللأسف مفيش تطوير مقارنًة مع رينو 4 .. بالعكس حسينا إن Reno 4 معالجة ألوان صور السيلفي باعته أحسن .. الصور بتبقى Warm شوية ومش بهتانه زي الـ4G .. المستشعر المستخدم في السيلفي في Reno5 4G مش الأفضل في السيلفي .. نقدر نقول عليه متوسط مش أكتر.

أما سيلفي الرينو 5 5G فا هو أحسن بشكل ملحوظ من الرينو 5 4G لإن المستشعر المستخدم في الـ 5G في السيلفي هو نفسه المستشعر القديم اللي كان موجود في رينو 4 .. بعيدًا عن الأرقام بلاش حد يضحك عليك ويقول سيلفي رينو 5 4G احسن من رينو 5 5G .. إحنا موجودين علشان محدش يضحك عليك. 😊

بالنسبة لتصوير الفيديوهات فا الموبايلين زي بعض بالظبط .. بيدعموا تصوير لحد 4K مع 30 فريم في الثانية .. في وضع الـUltra Steady اللي بيزود الثبات بتاع الفيديو لكن بينزل الفيديو لجودة 1080p.

الجديد ان في زرار اسمه AI موجود في تصوير الفيديوهات في الكاميرا الخلفية والأمامية .. وده بيشغلك مود اسمه Live HDR .. يعني بيعمل معالجة حقيقية للـHDR وانت بتصور الفيديوهات .. والجودة برده بتنزل لـ1080p .. وفي وضع الـDual View واللي بيخليك تصور بالكاميرا الخلفية والأمامية في نفس الوقت.

شوف تجربة تصوير فيديوهات وصور بالموبايلين في فيديو المراجعة !


سعر Oppo Reno 5 :-

  • الـOppo Reno5 4G نسخة واحدة 128 جيجا مع 8 جيجا رام بسعر 5990 جنية
  • الـOppo Reno5 5G نسخة واحدة 128 جيجا مع 8 جيجا رام بسعر 7990 جنية

الـ4G بينفع تركب فيه كارت ميموري بحجم 256 جيجا وشريحتين إتصال مع بعض في نفس الوقت .. اما الـ5G فا بينفع تركب فيه شريحتين إتصال لكن مش بيدعم تركيب كارت ميموري.


الرأي النهائي :-

مبدأيًا كده Reno5 4G سعره هيقل عن سعره الرسمي كالعادة حوالي 400 ~ 500 جنية في المحلات خلال شهر بالكتير .. يعني هياخد مكان رينو 4 وسعر Reno4 هينزل برده 400 ~ 500 جنية.

مميزات Reno 5 4G :-

  • شاشة AMOLED بتردد عالي
  • تصميم خفيف شيك بعيدًا عن الخامات
  • بطارية مش الأكبر بس أداء ممتاز وشحن سريع
  • كاميرا خلفية معقولة نسبيًا
  • بصمة تحت الشاشة سريعة جدًا
  • شبكة ممتازة جدًا

عيوب Reno 5 4G :-

  • مش أفضل معالج في الفئة دي
    لكن لا يزال الأداء معقول للإستخدام المتوسط
  • كاميرا سيلفي مقبولة ولكنها مش الأفضل
  • لا يدعم صوت Stereo
  • لا يدعم خاصية الـ NFC

التطورات في Reno5 4G عن Reno4 :-

  • تردد الشاشة أعلى
  • حافة سفلية للشاشة أصغر
  • بطارية أداءها بقى أفضل
  • شاحن أسرع
  • كاميرا خلفية أفضل لكن السيلفي أقل

بالنسبة بقى لـReno5 5G فا هو تجربة جديدة بالنسبة لـOPPO .. أه هو أحسن من الـ4G في بعض الحاجات لكن كل الفروقات بسيطة مش جوهرية، ومعرفش انت ممكن تفكر تزود المبلغ ده وتشتريه ولا لأ ؟ .. مع العلم انه 128 جيجا ومفيهوش مكان لكارت ميموري .. وديه حاجة هتصعب جدا موقف Reno 5 5G في المنافسة بسعره خصوصا مع وجود وحش شاومي Xiaomi Mi 10T في نفس الفئة السعرية !

قد يعجبك أيضا...

Comments

جاري التحميل...