مقارنة Realme 9i الجديد مع Redmi Note 11 .. شاومي ولا ريلمي ؟

شركة ريلمي أعلنت عن موبايل جديد في مصر وهو Realme 9i .. موبايل بيتقدم بسعر بيخليه ينافس بشكل مُباشر مع Redmi Note 11 اللي نزل قريب وحقق قبول كبير، النهارده هنقدملكم مقارنة بين Realme 9i الجديد من ريلمي مع Redmi Note 11 .. وهنعرف مين فيهم أفضل من التاني في الفئة السعرية دي.

التصميم :-

تصميم Realme 9i جديد ومختلف، شكل الكاميرات اتغير وبقى أحسن، وطبعًا الخامات من البلاستيك كالعادة .. والظهر فيه خطوط بالطول بتظهر لما الإضاءءه بتيجي عليه، وللأسف بيظهر فيه الخدوش والبصمات.

اما ريدمي نوت 11 تصميمه مش مختلف .. الظهر مصنفر ومطفي شوية علشان ميظهرش فيه بصمات والخدوش .. وبرده الخامات كالمعتاد من البلاستيك بالكامل.

بالنسبة للوزن والأبعاد، فا ريلمي 9i أكبر وأثقل وسماكته أكبر من نوت 11 .. الفرق مش ضخم لكنه موجود ولو انت بتحب الموبايلات الصغيرة هتفضل ريدمي نوت 11.

الموبايلين فيهم بروز متوسط للكاميرا الخلفية .. في ريلمي 9i البروز بيجي على درجتين، اما نوت 11 فا البروز على درجة واحدة، والاتنين قريبين من بعض وميعتبروش مشكلة في التصميم.

الشاشة :-

شاشة Realme 9i بحجم 6.6 بوصة من نوع IPS LCD بدقة FHD+ وبتردد 90 هيرتز، اما Note 11 شاشته AMOLED بحجم 6.4 بوصة بدقة FHD+ وبتردد 90 هيرتز .. الثقب في ريدمي نوت 11 صغير وموجود في نصف الشاشة.

لما جربنا الشاشات جنب بعض .. شاشة ريدمي نوت 11 تفوقت علشان نوعها AMOLED ممتاز فا بتقدملك تشبع ألوان أفضل وتباين أفضل للألوان وفرق الدرجات بيكون ظاهر، بالإضافة الى سطوع أعلى تحت الشمس.

ده مش معناه ان شاشة ريلمي 9i مش كويسة، الشاشة كويسة كـIPS LCD وجودتها كويسة ومحترمة، لكن احنا بنقارن بين IPS LCD و AMOLED فا طبيعي الـAMOLED يكسب.

الشاشتين عليهم طبقة حماية، ريلمي 9i طبقة حماية Dragontrail Pro Glass اما ريدمي نوت 11 طبقة حماية Corning Gorilla Glass 3 .. والشاشتين متركب عليهم سكرينه في العلبة.

الأداء :-

المعالج واحد في الموبايلين، معالج كوالكوم سناب دراجون 680 بتكنولوجيا 6 نانو ميتر .. ده المعالج الأكثر شيوعًا دلوقتي وفي الفترة اللي جايه في الموبايلات الإقتصادية والمتوسطة .. وبالنسبة لنوع ذاكرة التخزين والرامات فا هما زي بعض في نوت 11 وفي ريلمي 9i.

بالنسبة لتجربة سناب دراجون 680 .. المعالج ده كويس في المهام اليومية لو إستخدامك فتح برامج والتنقل بينهم زي معظم المُستخدمين العاديين .. مع توفير حلو في البطارية بفضل المعمارية الأحدث .. بس لو انت Gamer او هتلعب العاب تقيله فا المعالج ده مش هيكون أفضل خيار ليك في الفئة دي.

بالنسبة للفرق بين ريلمي 9i ونوت 11 اللي بنفس المعالج في فتح البرامج، هنلاقي الأداء مُتقارب جدًا لإن شاومي مخففه Animation واجهة نوت 11 .. وواجهة ريلمي أساسًا خفيفه .. فا الأداء معقول في الموبايلين .. ممكن ريلمي يكون بيفتح أسرع بفرق بسيط اوي .. وساعات برده تلاقي شاومي يفتح اسرع بفرق بسيط اوي.

طبعًا الأداء الرسومي مقبول في الموبايلين، ببجي بتشتغل على Medium Graphic .. الأداء مش وحش لكن مش أحسن اعدادات تقدر تلعب عليها في الفئة دي، وبالنسبة للسخونية فا الموبايلين ممتازين مفيش أي مشاكل.

عوامل الأمان وعناصر اخرى :-

بصمة الإصبع موجودة على زِر الباور في الموبايلين، وسريعة في الموبايلين بتفوق بسيط جدًا لـ Realme 9i .. والـFace Unlock برده ممتاز في الموبايلين ويمكن أسرع حاجه بسيطة في Realme 9i.

الموبايلين بيتقدموا بـ Android 11 .. ريلمي 9i فيه App Cloner علشان تقدر تعمل نسختين من برامج التواصل الإجتماعي، اما نوت 11 مفيهوش الميزة دي.

ريدمي نوت 11 فيه شاشة AMOLED اللي بتديلك ميزة Always On Display لعرض الإشعارات على الشاشة وهي مقفولة، اما ريمي 9i فا هو IPS LCD ومفيهوش الميزة دي.

الموبايلين فيهم ميكروفون اضافي لعزل الضوضاء .. ريدمي نوت 11 فيه مستشعر IR Blaster .. الموبايلين مفيهمش مستشعر الـNFC في الفئة السعرية دي.

الصوت Stereo في الموبايلين، ريلمي 9i صوته أعلى بس الـBass أقل وجودة الصوت أقل، اما ريدمي نوت 11 مستوى الصوت أقل لكن الصوت مجسم أكثر وجودته أفضل.

مستشعر التقارب موجود حقيقي في Realme 9i سريع ودقيق في قفل الشاشة وفتحها في الوقت المُناسب، اما مستشعر التقارب في نوت 11 فا هو أداءه متواضع وبيغلط أحيانًا، وبالنسبة للـGyroscope فاهو أسرع وأدق في ريدمي نوت 11 عن ريلمي 9i بشكل واضح.

بالنسبة للشبكات فا الاتنين ممتازين جدًا، ريدمي نوت 11 شبكته فعلا قوية ومفيش أي شكوى منها، وبرده ريلمي 9i شبكته قوية .. فا متقلقش من ناحية الشبكة في الموبايلين دول.

البطارية :-

بطارية 5000 مللي امبير في الموبايلين، والشحن سريع بقدرة 33 وات في الموبايلين، والموبايلين بنفس المعالج بنفس دقة التصنيع الموفرة الـ6 نانو ميتر.

لكن عمر بطارية Realme 9i ممكن يكون أطول حاجه بسيطة، يعني مثلًا ريدمي نوت 11 بيقدم متوسط شاشة مفتوحة 8 ساعات، اما ريلمي 9i يوصل 8 ساعات ونصف .. ممكن علشان ريلمي 9i فيه Auto Select لمعدل التحديث في الشاشة وده بيوفر أكثر في إستهلاك البطارية.

بالنسبة لسرعة الشحن بقى فا نوت 11 بيشحن أسرع حاجه بسيطة، تقدر تشحن البطارية بالكامل في حوالي ساعة، انما Realme 9i بيشحن البطارية بالكامل في ساعة وثلث.

الكاميرات :-

الموبايلين بيقدموا نفس العدسة الأساسية بدقة 50 ميجا بيكسل بفتحة عدسة F/1.8 .. مع عدسات ماكرو وعزل في الموبايلين، اما نوت 11 بيتفوق في وجود عدسة تصوير واسع .. وبالنسبة للكاميرا السيلفي فا هي في نوت 11 بدقة 13 ميجا بيكسل بفتحة عدسة F/2.4 وفي Realme 9i بدقة 16 ميجا بيكسل بفتحة عدسة F/2.1.

ريدمي نوت 11 بيتفوق في معالجة الصور في الإضاءات العالية لإنه بيقدر يطلع ألوان منطقية أكثر .. اما ريلمي 9i بيفتّح ألوان الصور بزيادة وبيعدل في الألوان وبيحاول يخلي الصورة أحلى، وده مش بيكون لطيف.

بس ده ميمنعش ان ريلمي 9i الكاميرا الخلفية بتاعته بتطلع تفاصيل أحسن حاجه بسيطة في الإضاءات الداخلية من ريدمي نوت 11 بعيدًا عن معالجة الألوان اللي مش مظبوطة في ريلمي 9i.

اما الـNight Mode فا هو زيه زي ريدمي نوت 11 .. مش أفضل حاجه في التصوير بالليل.

لما نقارن كاميرا Realme 9i مع Galaxy A22 هنلاقي تفوق جالاكسي A22 بفرق واضح .. زي ما قولنا قبل كده ان جالاكسي A22 هو أفضل موبايل في الكاميرات بسعر 3000 جنية.

بالنسبة للسيلفي فا هو في Realme 9i أفضل من ريدمي نوت 11 لإن معالجة ألوان الصور في ريلمي 9i أحسن وكمية التفاصيل اللي بتطلع في الصورة أحسن، خاصًة لما الإضاءه تبقى قليلة.

الموبايلين بيدعموا تصوير فيديوهات بجودة 1080p مع 30 فريم في الثانية .. والاتنين فيهم ميكروفون اضافي لعزل الضوضاء، وطبعًا المثبت البصري مش موجود في الفئة دي غير في Galaxy A22.

أسعار الهواتف :-

سعر Realme 9i :

• نسخة 128 جيجا مع 4 جيجا رام بسعر 3790 جنية
• نسخة 128 جيجا مع 6 جيجا رام بسعر 4090 جنية

وتقدر تركب شريحتين إتصال من الجيل الرابع مع كارت ميموري 256 جيجا في نفس الوقت.

سعر Redmi Note 11 :

• نسخة 64 جيجا مع 4 جيجا رام بسعر 3400 جنية
• نسخة 128 جيجا مع 4 جيجا رام بسعر 3700 جنية
• نسخة 128 جيجا مع 6 جيجا رام بسعر 4000 جنية

وتقدر تركب شريحتين إتصال 4G مع كارت ميموري 1 تيرا في نفس الوقت.

الرأي النهائي :-

نقاط تفوق Redmi Note 11 :

• شاشة أفضل من ناحية السطوع والألوان
• دعم للـAlways On Display
• كاميرا خلفية Ultra Wide
• دعم مستشعر الـIR Blaster

نقاط تفوق Realme 9i :

• كاميرا سيلفي أفضل
• مستشعر تقارب حقيقي وشغال
• بصمة أسرع بفرق بسيط

الفكرة ان الموبايلين قريبين في السعر، يمكن ريلمي 9i أغلى بحوالي 100 جنية .. وعمومًا متشتريش موبايل من دول بسعر أعلى من 4000 جنية، لو وصلت للسعر ده ممكن تجيب Redmi Note 10S او تزود حاجه بسيطة وتشوف Poco X3 Pro ودي موبايلات أفضل وأقوى بفرق كبير جدًا.