سامسونج بتعمل قلبان لما بتنزل موبايل جديد في الفئة المتوسطة .. سامسونج Galaxy A51 قولنا عنه انه بيقدملك شاشة ممتازة واسم سامسونج .. بس هل ده كفاية انه يخليك تشتريه ؟ .. في مقالة النهاردة على موبيزل هتشوف مقارنة كاملة بين A51 و برنس الفئة المتوسطة Realme XT.
التصميم :-
جالاكسي A51 كعادة سامسونج في فئة الـA بتاعتها .. الظهر من البلاستيك او بيقولوا عليه جلاستيك .. علشان يعني بيدي شكل الزجاج باللمعة الي فيه، انما الـXT الظهر من الزجاج .. مش هيتخربش بسهولة مع الوقت والاستخدام زي الـA51 الي هيتملى خرابيش.
فريم الموبايلين من البلاستيك .. فريم A51 لامع شوية وهيبان فيه الخرابيش كدا بتاعت وانت بتدخل وتخرج الموبايل من الجراب .. انما الـXT الفريم مطفي او مط مش هيبان فيه الخرابيش.
لحد دلوقتي الـXT متفوق .. بس السامسونج بقا برنس في المسكة في الايد بسبب وزنه الأقل وتخانته الاقل وكمان العرض بتاعه اقل من الـRealme XT .. وفوق كل ده بروز الكاميرا بتاعته اقل بكتير من الـXT.
يعني من الاخر الاكس تي يكسب في الخامات الخارجية والايه 51 يكسب في مسكة في الايد احسن زبروز كاميرا أقل.
الشاشة :-
زي ما قولنا في مراجعة Galaxy A51 .. سامسونج تاخد لقب افضل شاشة فئة متوسطة لموبايلها A51 .. شاشة 6.5 بوصة سوبر اموليد بدقة Full HD+ شاشة كاملها وفيها ثقب صغير اوي للسيلفي، اما شاشة الـXT حجمها 6.4 بوصة بدقة FHD+ من نوع Super AMOLED بردة بس فيها نوتش صغير للسيلفي.
كشكل وتجديد طبعا A51 هيبقا جامد جدا وهتبقا ماسك موبايل مواكب التريندات الجديدة في 2020 وكمان الحافة السفلية في الـA51 اقل من الـRealme XT .. يعني استغلال الشاشة لواجهة الموبايل افضل في السامسونج عن الريلمي.
الوان بقا وحركات والكلام ده .. كالعادة سامسونج شاطرة اوي في الوان الشاشة .. والشاشة بتاعتها فعلا حلوة .. والسطوع تحت الشمس .. الـA51 اعلى بفرق بسيط اوي برده.
بالنسبة للحماية الـA51 عليه طبقة حماية Corning Gorilla Glass 3 والـXT حماية Gorilla Glass 5 .. الموبايلين عليهم سكرينة متركبه عليهم لما تطلعهم من العلبه بتاعتهم.
الأداء :-
موبايل سامسونج Galaxy A51 بيجي بمعالج اكسينوس 9611 .. اما موبايل Realme XT بيجي بمعالج سناب دراجون 712 والمعالجين زي بعض في التوفير .. بيشتغلوا بتكنولوجيا 10 نانو ميتر.
بالنسبة للأداء الفعلي في السامسونج انيميشن الواجهة اتقل شوية من واجهة ريلمي الي تحسها سلسة اكتر .. وده يخليك لما تمسك الاتنين مع بعض هتحس انك مايل اكتر للريلمي .. بس من ناحية سرعة فتح البرامج والالعاب فا الاتنين تقريبًا اداءهم واحد مفيش فرق يُذكر بين الاتنين في سرعة فتح التطبيقات والالعاب.
عمتا اختار واجهة التشغيل اللي تريحك .. وشخصيا مايل اكتر لإستخدام معالج سناب دراجون مع واجهة ColorOS بتاعت اوبو في الريلمي اكس تي.
بالنسبة بقى للأداء الرسومي في الألعاب، ببجي بتشتغل على Ultra HDR في الـ سامسونج .. بس اخرها High HD بس في الريلمي اكس تي .. بس هل ده معناه ان السامسونج اقوى ف تشغيل الالعاب .. لا هي الفكرة انه بيديلك اوبشن اعلى بس لما تلعب لفترة هتلاقي نفسك بتنزل الجرافيك لـHigh HD علشان مفيش فريمات تسقط معاك وهتلعب بنفس الجودة بتاعت ريلمي اكس تي.
كول اوف ديوتي شغالة على High في A51 .. انما الاكس تي شغالة على Very High .. واخيرا فورت نايت مش شغالة بشكل رسمي على A51 .. بس بتشتغل على اعدادات جرافيك متوسطة على الريلمي اكس تي.
عوامل الامان :-
الموبايلين فيهم بصمة تحت الشاشة .. بس بصمة الـXT اسرع وعملية اكتر من الـA51.
الـFaceunlock اسرع بردة ف الاكس تي، ومن الاخر ريلمي تتفوق على سامسونج في عوامل الأمان.
واجهة التشغيل بتاعت سامسونج مليانة اوبشنز وانبهارات وحركات كفاية اوبشن البوب اب فيو الممتاز والي اتكلمنا عنه كتير في مراجعات سامسونج الي فاتت … واجهة سامسونج اتقل بس مليانة اوبشنز اكتر هي ديه الفكرة وكمان الـA51 بيجي من العلبه باندرويد 10 ع عكس الاكس تي الي بيجي باندرويد 9 ولسه هيتحدث لأندرويد 10.
ميزة الـDark Mode موجوده في الموبايلين والفيس بوك بيبقا دارك او اسود في الاكس تي انما السامسونج بيفضل ابيض زي ما هو زي باقي شركات الموبايلات، الموبايلين مفيهمش لمبة اشعارات .. بس السامسونج فيه الـAlways On Display بيعرضلك ايقونات اشعارات كل البرامج الي جاتلك .. انما ف الريلمي بيظهرلك ايقونات الـMissed Calls والمسدجات بتاعت الخط بس على الشاشة المطفية.
المستشعرات شغالة بكفاءة على الموبايلين .. مفيهمش اي مشاكل.
بالنسبة للتجربة الصوتية الموبايلين صوتهم عالي بس الريلمي XT صوته اعلى بفرق بسيط .. بس للاسف الاكس تي سماعته تحت على الشمال المكان اللي ممكن يتكتم معاك بسهولة لو بتلعب على الموبايل .. الحل انك تلف الموبايل وانت بتلعب وتتقبل شكل النوتش على اليمين وخلاص .. غصب عنك.
صوت سماعات المكالمات عالي وممتاز في الموبايلين .. وصوت سماعات الاذن عالي وممتاز بردة ف الموبايلين .. واحب افكرك ان السامسونج بيجي معاه ف العلبه سماعة انما الريلمي مش بيجي معاه ف العلبه سماعة.
واخيرا بالنسبة لقوة الشبكة .. فبعد تجارب كتير .. شبكة الريلمي XT افضل من ناحية المكالمات في الاماكن الي شبكتها ضعيفه وصعب يوصلك رسالة ان في حد اتصل بيك وموبايلك كان غير متاح .. انما الـ Samsung A51 لو هتجيبه يفضل يكون الاماكن الي انت بتبقى موجود فيها يكون مفيهاش مشاكل ف الشبكة.
البطارية :-
الاتنين بطاريتهم بتيجي بسعة 4000 مللي أمبير .. الاتنين هيستحملوا معاك من 6 لـ 7 ساعات شاشة مفتوحة في استخدام متوسط لمدة يوم كامل .. بس تنظيم واجهة ColorOS لإستخدام البطارية افضل شوية من واجهة One UI في الـ سامسونج وبالتالي ممكن تلاقي افضلية توصل لساعة في الريلمي عن السامسونج.
سرعة الشحن بقى .. الـSamsung A51 معاه شاحن 15 وات في العلبة .. والاكس تي شاحن 20 وات .. انما سامسونج A51 بيشحن في حوالي ساعة و40 دقيقة انما الاكس تي بيشحن في حوالي ساعة و25 دقيقة .. يعني الريلمي بيشحن اسرع بحوالي ربع ساعة عن السامسونج.
الكاميرات :-
بدون رغي كتير .. الموبايلين فيهم 4 كاميرات .. اساسية و وايد انجل وماكرو و عزل .. الاساسية في سامسونج A51 .. بجودة 48 ميجا بيكسل فتحة عدسة F/2.0 والريلمي 64 ميجا بيكسل فتحة عدسة F/1.8 .. والسيلفي ف الايه 51 بجودة 32 ميجا بيكسل فتحة عدسة F/2.2 والاكس تي 16 ميجا بيكسل فتحة عدسة F/2.0 .. سيبك من الارقام ديه علشان بتخدع.. المهم التجربة الفعلية !
بالنسبة للتجربة الفعليه، سامسونج جالاكسي A51 هيقدملك الوان احسن والوان واقعيه اكتر ولون بشره مظبوط .. معالجة سامسونج عمومًا للصور اتحسنت بشكل كبير جدًا على الاول، انما بالنسبة للتفاصيل فا انت هتحس ان الـXT بيديك تفاصيل اكتر شوية لو هتركز اوي في حتت التفاصيل .. والتصوير في الاضاءه الداخليه نفس الكلام بينطبق لكن الاكس تي بيمسح التفاصيل وبيجمل الصورة زيادة عن اللزوم.
اما بالنسبة للتصوير بالليل فا الاتنين فيهم Night Mode لكن الـA51 ميقدرش ينافس الاكس تي، الـXT اقوى لإنه بيقدر يجيب تفاصيل اكتر في التصوير بالليل بسبب فتحة العدسة الاوسع والمستشعر الاحسن الموجود فيه.
بالنسة للسيلفي فا الموبايلين ممتازين جدًا، بس الـHDR في الـA51 فعلًا احسن بفرق كبير و واضح عن الريلمي اكس تي ومعالجة الـA51 للصور بتبقى احسن، لكن كتفاصيل وزوم فا الاكس تي بيكون افضل وبيدي تفاصيل اكتر.
الموبايلين فيهم Night Mode في السيلفي والاتنين كويسين لكن برده انا مايل اكتر للـXT وشايفه احسن من الـA51 وده بسبب فتحة العدسة الاوسع شوية.
بالنسبة لتصوير الفيديوهات فموبايل A51 و موبايل XT بيقدروا يصوروا فيديوهات بجودة 4K ولكن بدون اي تثبيت الكتروني ( الفيديو هيتهز ) .. ولازم تنزل الجودة لـ 1080p وهتلاقي الثبات الالكتروني شغال كويس جدا في الموبايلين.
ممكن تشوف صور وفيديوهات متصورة بالموبايلين في فيديو المقارنة في أخر المقالة !
اسعار الموبايلات :-
سامسونج Galaxy A51 هتلاقيه في المحلات بسعر وصل لـ4650 جنية للنسخة 128 جيجا مع 6 جيجا رام وينفع تركب كارت ميموري وشريحتين اتصال مع بعض .. انما موبايل Realme XT بسعر حوالي 5200 جنية للنسخة 128 جيجا مع 8 جيجا رام وينفع تركب بردة كارت ميموري وشريحتين اتصال مع بعض.
الرأي النهائي :-
سامسونج A51 تشتريه لو بتدور على موبايل حجمه خفيف ومنتشر واستخدامك مش عنيف للموبايل .. وحابب شكل الشاشة الجديد والمميز بتاع سامسونج واكيد طبعا فارق معاك انك تشيل موبايل باسم سامسونج ( براند ) .
انما ريلمي XT تشتريه لو بتدور على موبايل متكامل اكتر ( قيمة مقابل سعر أفضل ) ومش فارق معاك انك تزود 500 جنية فوق تمن السامسونج علشان تاخد خامات خارجية احسن وشبكة افضل وكاميرا افضل بليل وبصمة اسرع وشحن اسرع وحجم رام ازيد ومعالج سناب دراجون اقوى على المدى البعيد.
Comments