مراجعة ZTE Axon 20 5G – أول موبايل بكاميرا سيلفي تحت الشاشة !

أكيد انتم عارفين اننا في موييزل مش بنقدم مراجعات وتجارب للموبايلات اللي مش بتنزل مصر .. لكن المرة دي الوضع مُختلف .. لما موبايل ينزل بتكنولوجيا جديدة تمامًا فا لازم نوريلكم التكنولوجيا دي .. علشان كده النهارده هنراجع موبايل ZTE Axon 20 5G واللي هو أول موبايل بكاميرا سيلفي تحت الشاشة .. مفيش ولا نوتش ولا ثُقب ولا موتور.


التصميم :-

قبل ما ابدأ كلام على الموبايل .. الموبايل ده فئة متوسطة عليا .. يعني مش موبايل غالي ولا فلاج شيب ولا الكلام ده .. علشان نبقا ماشيين انا وانت على نفس الخط واحنا بنراجع الموبايل .. وهقولك برده سعره في الاخر.

الموبايل ده مفيهوش أي تنازلات من ناحية التصميم .. زجاج من الخلف مع فريم معدن .. هو طبعا شكله تقليدي جدًا مفيهوش اي إبتكارات .. Simple & Sweet .. لأن الشركة طلعت كل طاقة الابداع عندها في الشاشة.

وزنه 198 جرام مش خفيف ومش تقيل أوي .. تخانته 8 ملم معقوله .. ولكن ابعاده كبيرة في الايد بشكل ملحوظ صعب تستخدمه بايد واحدة لان الموبايل شاشته عملاقه هنتكلم عنها كمان شوية.

وزرار الباور عليه نقشة مختلفه علشان تميزه بسهوله وفعلًا مع كبر حجم الموبايل بس بتقدر توصل لزرار الباور بشكل ممتاز .. وأخيرًا بروز الكاميرات الخلفية كبير شوية ولكن بيتغطى بالجراب المرفق مع العلبة.


الشاشة :-

أهم ميزة في الجهاز واللي جربته عشانها أصلا .. شاشة كبيرة 6.92 بوصة OLED بدقة 1080×2460 بيكسل يعني ممكن نقول FHD+ بس على ابعاد اكبر شوية .. مع تردد شاشة 90 هيرتز مع ألوان بتوصل لدرجة مليون لون.

والاهم أن الشاشة بدون نوتش أو خرم .. السيلفي مدفون تحت الشاشة والشركة بتقول على الشاشة انها True Full-Display .. هكلمك عن الشاشة وبعدها هقولك موضوع الكاميرا سيلفي المدفونة ده.

الحافة السفلية كبيرة جدًا .. يعني عاملين تكنولجيا متقدمة فوق وتحت حاطين حافة موبايل في 2018 .. والشاشة مسطحة وكبيرة، درجات ألوانها كويسة جدًا ولكن دي مش درجة 10-Bit Color.

وهما ضايفين أختيار تعزيز الألوان في سوفت وير الموبايل علشان لو انت بتحب الألوان تبقى مشبعة اكتر واكتر تقدر تستمتع بتجربة أفضل ولكن طبعًا متسألش عن درجة الوان حقيقية لانها هتبقى متغيرة بشكل كبير .. سطوع الشاشة كويس ولكن مش كويس بالدرجة الكافية لشاشة Super AMOLED .. أقدر أقول عليه متوسط.

بالنسبة لتردد الشاشة فالسوفت وير ضعيف في النقطة دي لأن عندك اختيار 90 هيرتز أو 60 هيرتز .. مفيش Auto .. والـ90 هيرتز لما اخترتها بتفضل شغالة علطول وبالتالي انت بتاخد استهلاك بطارية اعلى بدون داعي لو انت بتتفرج على فيلم مثلًا .. ولكن طبعا إستخدام الـ90 هيرتز في التنقل في الموبايل مدي سلاسة كبيرة اوي هتكلم عنها في جزئية الاداء.

كاميرا سيلفي تحت الشاشة :-

شركة ZTE أجتهدت جامد علشان تخرج التكنولوجيا دي في موبايل بيتباع في السوق وفئة متوسطة كمان .. الموضوع بكل اختصار وبكل بساطة عبارة عن شوية بيكسلات بتنور وتطفي محطوطين فوق الكاميرا السيلفي علشان السيلفي ميبقاش باين وفي نفس الوقت تستفاد بالجزء الصغير ده في عرض محتوى على الشاشة وتاخد تجربة الشاشة الكاملة.

فعليًا بقى .. جودة البيكسلات اللي في المربع الصغير اللي بيخفي السيلفي أقل بشكل ملحوظ عن بقية الشاشة .. يعني بتظهر جدًا وبيبقا شكلها بايخ لما تفتح أي صفحة بيضا على الشاشة، هتلاقي المربع الصغير ده ظاهرلك فوق.

ولكن مع الألوان الغامقة شوية ولما الاضاءة بتاعت الشاشة متكونش عالية اوي .. ممكن متحسش أوي بالمربع المبكسل ده .. ده غير أن في الالعاب التجربة كانت حلوة مش بطالة وممكن فعلًا تنسى ان في سيلفي موجود وتاخد تجربة شاشة كاملة فعليا .. ولما تبص للشاشة بزاوية حادة كده ممكن تاخد بالك من عدسة السيلفي المدفونة.

عمومًا التكنولوجيا دي لو على وضعها كده معتقدش الكل هيستخدمها .. لأنها بشكل أو بأخر ممكن المُستخدم يفتكر ان الشاشة بايظة او فيها حاجة .. ومش كل المستخدمين هيبقوا فاهمين موضوع فرق جودة البيكسلات .. علشان كده مفيش شركة نزلت التكنولوجيا دي فعليًا في موبايل دخل خطوط الإنتاج وبيتباع في السوق غير ZTE.

ولكن بصراحة هي تكنولوجيا مستقبلية جميلة .. وأعتقد لو اتطورت بشكل أكبر هتبقى مبهرة جدا .. تقييمي للتجربة دي 5 من 10 بسبب ضعف جودة البيكسلات اللي مغطية السيلفي وبسبب ضعف أداء الكاميرا السيلفي اللي هتكلم عنه كمان شوية.


الأداء :-

الموبايل جاي بأحسن معالج فئة متوسطة من كوالكم .. سناب دراجون 765 بتكنولوجيا 7 نانو الداعم لشبكات الجيل الخامس .. المعالج ده غالي شوية واحنا في مصر معندناش 5G علشان كدا الشركات لحد دلوقتي مش بتجيبه.

أداء الـ سناب دراجون 765 بما أني اول مرة انقلكم تجربته فا هو مختلف تمامًا عن بقية سلسلة الـ700 من كوالكم .. أنت عارف الـ720G ميفرقش كتير عن الـ730G وميفرقش كتير عن الـ732G .. وكلهم ميفرقوش كتير عن الـ750G اللي لسه نازل مصر مؤخرًا في Mi 10T Lite.

ولكن احب اقولك وبكل ثقة الـ765G في حته لوحده .. أداء احسن بفرق ملحوظ في الأستخدام العادي .. تحس انك واخد الاداء اليومي بتاع معالج رائد مش معالج فئة متوسطة .. وطبعًا مع الـ90 هيرتز ونعومة التنقل اللي هنا فانت بتاخد تجربة اداء محترمة جدا في الفئة المتوسطة.

الأداء الرسومي بقى .. الـ765 يرجع تاني لوضعه الطبيعي وبيشغل ببجي على High HD .. بيشتغل كول اوف ديوتي على Very High جرافيك وفريمات بتوصل لـMax Frame Rate .. تجربة الألعاب حلوة جدًا خاصة ان الشاشة كبيرة وكاملة .. وكمان التبريد هنا محترمة جدًا وصعب الموبايل يسخن منك.


عوامل الأمان وعناصر اخرى :-

البصمة تحت الشاشة وأداءها سريع ومفيهوش اي مشاكل .. الـFace Unlock برغم ضعف الكاميرا السيلفي إلا أنه فاجئني انه سريع جدا ولكن أعتقد مش هيبقى أمن أوي ممكن لو واحد شبهك شوية يفتح عادي.

السوفت وير بتاع الموبايل هنا معجبنيش أوي .. تحسه بدائي شوية ولكنه يقضي الغرض .. هو الميزه فيه أنه مش متقل الموبايل تمامًا وقريب للأندرويد الخام.

الموبايل فيه Always On Display وفيه اشكال كتير .. وكمان فيه NFC والمستشعرات كلها شغالة و موجودة .. صوت الموبايل جاي من سماعة واحدة تحت على اليمين وصوتها عالي ولكن مش مجسم اوي .. تحس الـBass مجاش.

مفيش سماعة مكالمات علشان يكملوا التطور التكنولوجي الرهيب اللي في اعلى الموبايل ده .. الصوت بيطلع من تحت الشاشة والصوت لما جربته في مكالمة مش عالي اوي .. الصوت درجه العلو بتاعته أكنك موطي موبايلك العادي لـ60% من درجة الصوت .. والموبايل بيسجل مكالمات عادي.

الموبايل مفيهوش مدخل 3.5 ملم بس معاه وصلة تحويل من تايب سي لـ3.5 ملم علشان تركب سماعاتك القديمة لأنه مش بيجي معاه سماعات اصلا .. وشبكات الـWiFi تمام جدا وقوية جدا .. ومجربتش أوي شبكة الأتصال لان الموبايل جاي من برا ومش بينزل هنا رسمي.


البطارية :-

البطارية بتيجي صغيرة شويتين تلاته .. حجمها 4220 مللي أمبير .. أداءها معجبنيش تماما ويدوبك 5 ساعات شاشة مفتوحة بالعافية .. حتى لو قللت التردد لـ60 هيرتز .. الشاحن المرفق في علبة الموبايل 30 واط بيشحن البطارية في ساعة إلا ربع تقريبًا.


الكاميرات :-

أقل حاجة في الموبايل ده هي الكاميرات .. الكاميرا الخلفية رباعية، الاساسية 64 ميجا بيكسل بفتحة عدسة F/1.8 والتانية 8 ميجا بيكسل للتصوير الواسع فتحة عدسة F/2.2 .. والتالتة 2 ميجا بيكسل ماكرو والرابعة 2 ميجا يبكسل للعزل.

السيلفي الموجود مخفي تحت الشاشة 32 ميجا بيكسل فتحة عدسة F/2.0.

اداء الكاميرا الخلفية متواضع جدا .. يعني زيه زي أي موبايل في الفئة المتوسطة .. مش أحسن ولا أوحش .. يعني نقدر نقول مقبول .. الاداء بتاع الكاميرا الخلفية هنا مش مُميز خالص .. الألوان معقولة والتصوير بالكاميرا سريع مفهوش أي Lag.

البورترية مش قد كدا خالص .. بيمسح التفاصيل والعزل بتاعه مش حلو .. وأخيرًا الـNight Mode في الموبايل ده متواضع جدًا جدًا .. مش على المستوى المطلوب منه .. ولكن في الأول وفي الأخر الموبايل ده مش مركزين فيه على الكاميرات .. لأن مش ده المطلوب منه هما حاطين كاميرات تقضي الغرض.

السيلفي بقا اللي لازم تبقى ماسح مكان السيلفي كويس أوي .. والاضاءة تكون عالية أوي علشان تاخد صورة مقبولة .. أنما غير كدا أداء السيلفي ضعيف جدًا .. الصور علطول فيها Noise ومش مظبوطة .. تحسها صور سيلفي طالعة من موبايل اقتصادي مش موبايل فئة متوسطة نهائيًا.

بالنسبة بقى لتصوير الفيديوهات بالموبايل ده فا هو بيصور 4K على 30 فريم في الثانية مع ثبات إلكتروني .. في مايكروفون اضافي لعزل الضوضاء .. تجربة تصوير الفيديوهات بالموبايل ده متوسطة .. مش ممتازة ومش وحشة!


سعر الموبايل :-

أسعار الموبايل الرسمية في الخارج :-

  • نسخة 128 جيجا مع 8 جيجا رام بسعر 450 دولار او حوالي 7000 جنية
  • نسخة 256 جيجا مع 8 جيجا رام بسعر 500 دولار او حوالي 7800 جنية

وطبعًا بينفع تركب شريحتين إتصال من الجيل الخامس او شريحة واحدة بس مع كارت ميموري.


الرأي النهائي :-

أنا جربت الموبايل ده بس علشان شاشته .. التكنولوجيا الجديدة حلوة .. بس زي ما قولتلك التكنولوجيا دي محتاجة تطوير .. بمستواها الحالي في الموبايل اللي جربناه ده معتقدش ان في شركات موبايلات تانية هتستخدمها زي ما انا قولتلك .. المُستخدمين ممكن يفتكروا في عيب في الشاشة .. ده غير أداء السيلفي اللي مش بيكون حلو خالص.

ولكن اللي أبهرني الحقيقة هو أداء المعالج الـSnap Dragon 765 اللي أول مرة أجربة .. المعالج ده هو King الفئة المتوسطة بجد .. معالج قوي وشديد، أتمنى الشركات في مصر ينزلوا موبايلات قريب بالمعالج ده بس وميبقاش على حساب التسعير.

قد يعجبك أيضا...

Comments

جاري التحميل...