الموبايل اللي انا هراجعه النهاردة من شركة الكاتيل ممكن يبقى عليه هجوم كتير .. بسبب المعالج .. لإن أعتقد كل اللي بيتفرجوا على مراجعات الموبايلات فاهمين كويس في المعالجات .. ودايمًا بيبقوا عارفين أفضل معالج في كل فئة سعرية .. ويقول على أي معالج تاني أقل إنه وحش.
الموبايل اللي هنراجعه النهارده هو Alcatel 3L .. الموبايل ده بيقدم تركيبة مواصفات غريبة شوية .. والكاتيل هنا مش بتحاول تقدملك أفضل معالج .. لأ هي مقدمة تركيبة إقتصادية بعض المُستخدمين في الفئة دي بيحبوها.
التصميم :-
الكاتيل بتقول إن تصميم الـ3L بيجي من الزجاج .. بس حقيقي أنا مش شايف ده .. مع التجربة أنا شايف إنه مايل أكتر للبلاستيك .. ممكن يكون عليه طبقة بسيطة من الزجاج .. وطبعًا الفريم من البلاستيك ودي واضحة وصريحه.
الموبايل بيجي بألوان مُتدرجة .. والتصميم مفيهوش أي عنصر إبهار .. وده ممكن يكون طبيعي في الفئة الإقتصادية.
والكاميرا الخلفية بارزة عن جسم الموبايل .. والبروز بيتغطى بالكامل بالجراب المُرفق في علبة الموبايل.
الكيرفات اللي في ظهر الموبايل كبيره شوية .. علشان تحسن شوية من مسكة الموبايل في الإيد .. بس هو كده كده مسكته في الإيد حلوة لإن وزنه خفيف .. بيجي بوزن 165 جرام بس.
هتلاقي على الشمال زرار مُساعد جوجل .. الزرار اللي الكاتيل علطول بتضيفه في موبايلاتها .. بس للأسف مينفعش توظف الزرار ده غير لمساعد جوجل بس .. يا تفعله يا تقفله.
الشاشة :-
شاشة بحجم 6.22 بوصة من نوع IPS LCD وبتيجي بدقة HD+ .. شاشة إعتيادية جدًا في الفئة السعرية ديه .. مش بتقدم أي عنصر إبهار.
الشاشة واخدة شكل النوتش الـWater Drop .. بس اللي لاحظته .. الحافة السفلية للشاشة كبيرة شوية .. في موبايلات بنفس السعر وأرخص الحافة السفلية أقل من كده .. يا كنتوا تقللوا الحافة يا تكبروا الشاشة !
الشاشة ألوانها الطبيعية مصفره شوية .. ومش هتقدر تعدل درجة ألوان الشاشة لإن ده مش مُتاح في الإعدادات .. بس الإصفرار البسيط ده مش هتلاحظه إلا لو حطيت الموبايل جمب موبايل تاني.
بس اللي هتلاحظه بقى ألوان الشاشة هنا مشبعة وحلوة .. شاشة مش بهتانة كده زي معظم الشاشات في الفئة السعرية ديه.
والسطوع تحت الشمس كويس .. بس مفيش حساس إضاءه .. هتتحكم في درجة سطوع الشاشة بإيدك .. وديه حاجة أنا محبتهاش لإن مُعظم الموبايلات المنافسة فيها حساس إضاءة عادي.
واخيرًا الموبايل مفيش إعلان رسمي عن طبقة الحماية .. وبيجي سكرينة في علبة الموبايل علشان دايمًا الكاتيل بتهتم جدًا بمحتويات علبة الموبايل بتاعها.
الأداء :-
شركة الكاتيل مستخدمه المعالج التقليدي الميدياتيك Helio P22 بمعمارية تصنيع 12 نانو .. ووجة نظرها إن المعالج ده هيكفي الإستخدام اليومي العادي .. لإن الموبايل ده مش مُخصص للـGamers.
وكمان علشان الكاتيل تحسن من تجربة الـP22 هنا .. فهي مزودة الموبايل بـ4 جيجا رام .. والسوفت وير كمان هنا خفيف .. شكله تقليدي مفهوش إنبهارات بس المهم إنه خفيف.
فالتجربة اليومية العادية من فتح برامج سوشيال ومكالمات مش هتواجه معاها مشاكل .. وهتحس إن الموبايل بيتعامل عادي والبرامج مش بتقفل لوحدها في الخلفية وكمان التنقل بين البرامج المفتوحة في الخلفية بيبقى سريع.
بس طبعًا إحنا بنجرب كل حاجة في الموبايل .. سطبنا ببجي إشتغلت على اعدادات Balanced و Medium .. والأداء بيبقى مش أحسن حاجة .. هتحس بتقطيعات خفيفه كل شوية بس هتقدر تلعب.
وكول اوف ديوتي إشتغلت على اعدادات جرافيك Low ونفس الملاحظات اللي في ببجي موجودة في كول اوف ديوتي .. وكمان مفيش هنا سينسور Gyroscope.
وعمومًا .. موبايل الكاتيل 3L مُوجه في المهام اليومية وهو كويس فيها .. بس مش أفضل موبايل في الألعاب.
عوامل الأمان وعناصر اخرى :-
البصمة في الظهر سرعتها مقبولة .. مش أسرع بصمة من وجه نظري .. والـFace Unlock برده سرعته مقبوله .. مش الأسرع.
الموبايل جاي بنظام تشغيل Android 10 .. والواجهة هنا فيه ميزة عمل نسختين من برامج التواصل الإجتماعي .. وكمان أوبشن الـDark Mode اللي بيقلب القوائم للإسود موجود في السوفت وير هنا.
بس للأسف مفيش لمبة اشعارات في الموبايل هنا .. معرفش كل الشركات بقت تتخلى عن لمبة الإشعارات ليه .. ومفيش مستشعر ضوء ومفيش الجيروسكوب.
مستشعر التقارب موجود وشغال كويس .. والموبايل بيدعم تسجيل المكالمات وكمان في مايكروفون إضافي لعزل الضوضاء علشان تجربة المكالمات تبقى احسن.
بالنسبة للصوت فالموبايل جاي بسماعة واحدة .. التانية بتشتغل كمايك .. والصوت مُتواضع جدا .. حقيقي مش أعلى صوت في الفئة السعريه ديه.
صوت سماعة المكالمات كويس وعالي .. وصوت سماعات الأذن مقبول برده لكن مش اعلى حاجة.
بالنسبة لقوة الشبكة .. فالموبايل مُمتاز من ناحية قوة شبكات الـWiFi وشبكات الإتصال .. مفيهوش أي مشاكل وأحسن من موبايلات تانية كتير بسعره في نقطة الشبكة.
البطارية :-
بطارية عادية بتيجي بسعة 4000 مللي أمبير بتستحمل معاك حوالي 6 ساعات وشوية شاشة مفتوحة .. وقت مقبول بس مش الأفضل.
بس للأسف منفذ الشحن Micro USB 2.0 .. ومش هعتبره عيب لإن معظم الموبايلات بنفس المنفذ ده إلا موبايلين تلاته فلته كدا .. والشاحن المُرفق 10 واط بيشحن البطارية في حوالي ساعتين ونص.
الكاميرا :-
الكاتيل ضايفه هنا 3 كاميرات حقيقة في الظهر ليهم وظائف مش مجرد أرقام وخلاص .. الأساسية 48 ميجا بيكسل بفتحة عدسة F/1.8 .. والتانية 5 ميجا بيكسل مع فتحة عدسة F/2.4 للتصوير الواسع .. والتالتة 2 ميجا بيكسل للتصوير الماكرو بفتحة عدسة F/2.4.
والسيلفي بيجي بدقة 8 ميجا بيكسل مع فتحة عدسة F/2.0 وهو موجود في نوتش الشاشة.
وللأسف سوفت وير الكاميرات مفهوش Night Mode .. كنت أتمنى أشوف نايت مود يا الكاتيل علشان يحسن أكتر من تجربة التصوير بالموبايل ده.
بعد تجربة مطولة مع الكاميرات اللي في Alcatel 3L .. السوفت وير لسه مش مُتطور أوي .. ومش بيقدر يعزز الصور بالألوان .. معنديش أي مشاكل مع كمية التفاصيل اللي بتطلع من الصور بالكاميرا الخلفية .. مقبولة جدًا .. بس زي ما بقولك معالجة الصور مش قد كدا.
والكاميرا الـMacro اللي هنا مش قد كده برده .. والكاميرا الـUltra Wide الزاوية اللي فيها كويسة .. بس الألوان والتفاصيل بتقل بفرق واضح .. وده الطبيعي بالسعر ده.
لما جربت أصور في إضاءه داخلية لاقيت الصور كويسة جدًا وطبيعية جدًا .. محستش إن الأداء ضايع .. أما في الإضاءة الضعيفة برغم عدم وجود Night Mode إلا إن تفاصيل الصورة طالعة كويسة جدًا ومفيش Noise.
اما جربت Redmi 9 جنب الـAlcatel 3L .. لاقيت تفوق واضح للريدمي 9 في الشمس في معالجة ألوان الصورة .. وفي الظلمة لاقيت تفوق الكاتيل 3L بصورة أوضح من غير الـNight Mode.
أما بقى بالنسبة للسيلفي في الكاتيل 3L فا هو معجبنيش أوي .. معالجة الألوان مش قد كدا .. وكمان في حاجة غريبة .. الموبايل بيعمل Mirror للصور العادية بس مش بيعمل ميرور للصور البورترية ولازم تعكسها بإيدك.
لما جربت السيلفي جنب الـRedmi 9 لاقيت ان فعلًا سيلفي ريدمي 9 أفضل وبيطلع صور ونتائج أفضل.
اما بالنسبة لتصوير الفيديوهات .. فالموبايل بيصور فيديوهات بجودة 1080p مع مايكروفون اضافي لعزل الضوضاء .. ومكتوب في الـSettings إنه بيدعم الثبات الإلكتروني مع إن مفيش مُستشعر جيروسكوب .. فا أعتقد إنه بيشتغل عن طريق Crop للفيديو علشان يقدر يثبته .. وبشكل عام مقبول جدًا في الفئة السعرية دي.
شوف صور وفيديوهات متصورة بالموبايل في فيديو المراجعة في أخر المقالة !
سعر الموبايل :-
سعر موبايل Alcatel 3L النسخة الوحيدة المتوفرة منه بمساحة تخزين 64 جيجا مع 4 جيجا رام بتيجي بسعر 2399 جنية.
وبينفع تركب شريحتين إتصال من الجيل الرابع مع بعض او شريحة واحدة وكارت ميموري بحجم 128 جيجا في منفذ مخصص له.
الرأي النهائي :-
مميزات Alcatel 3L :
- موبايل خفيف بتقفيل حلو وضمان i2
- مساحة ورام ممتازين بالسعر ده
- شبكة قوية جدًا
- كاميرا خلفية مقبولة جدًا
- بطارية مقبولة جدًا
عيوب Alcatel 3L :
- كاميرا سيلفي مش الأفضل
- حافة سُفلية للشاشة كبير جدًا
- مفيش حساس إضاءه لظبط سطوع الشاشة
- صوت الموبايل منخفض نسبيًا
- أداء الموبايل مش الأفضل خصوصا في الألعاب
- لا يدعم تركيب شريحتين وكارت في نفس الوقت
شركة الكاتيل كمان عندها موبايلين نازلين .. وهما الـAlcatel 1S وده نسخة أصغر من الـ3L بكاميرا 13 ميجا بيكسل فقط ومساحة 32 جيجا مع 3 جيجا رام .. وباقي المواصفات زي بعض وبسعر 1899 جنية.
وعندها كمان الكاتيل 1V وده بيجي بمساحة تخزين 32 جيجا مع 2 جيجا رام وكاميرا خلفية مُزدوجة مش ثُلاثية وكاميرا سيلفي أقل وبسعر 1699 جنية مصري.
والـ3 موبايلات بيشتركوا في المعالج الـHelio P22 والشاشة الـ6.22 بوصة والبطارية الـ4000 مللي امبير والبصمة وFace Unlock.
Comments