شركة سامسونج اللي ليها قاعدة كبيرة عالميًا وأكيد في مصر .. بدأت تعمل حاجات مش عادية في الفئة المتوسطة .. إرجع معايا بذاكرتك كام شهر فات .. هتلاقي الـGalaxy A71 .. وده يعتبر من أفضل موبايلات الفئة المتوسطة ومازال محافظ على سمعته ووضعه وسعره لحد دلوقتي.
تقوم سامسونج تنزل موبايل تاني في نفس الفئة السعرية بمواصفات قربية جدا من A71 ولكن مع بطارية أقدر أقول عليها “سوبر ضخمة” 7000 مللي أمبير .. الموبايل هو الـGalaxy M51 .. والنهارده هنراجعة مراجعة كاملة وهقولك العيوب اللي هتضايقك منه والمميزات اللي ممكن تخليك تشتريه.
التصميم :-
سامسونج في فئة الـM .. بتوفر جامد في حساب الخامات وبتدي أهمية أكبر للمواصفات .. وللأسف كالعادة التصميم من النقط اللي مش لطيفه في الموبايل ده.
الظهر والفريم من البلاستيك بالكامل .. مش بس كده ده كمان طبقة الطلاء اللي عليه لامعه جدًا وبالتالي الموبايل حرفيًا بيتخربش من الهوا.
وبسبب البطارية الضخمة اللي في الموبايل ده فأعتبره باور بنك متحرك .. وزنه 213 جرام وتخانته كبيرة 9.5 ملم .. الموبايل فعلًا ضخم وتقيل وتخين .. لازم تبقى مُتقبل الفكرة دي .. بس طبعًا في Curves في الظهر علشان تحسن من مسكة الموبايل في الإيد.
وكالعادة الشكل التقليدي لرصة كاميرات سامسونج في الفئة المتوسطة، مفيش جديد هنا .. ولكن بسبب التخانة الكبيرة اللي هنا فقدروا يغطوا بروز الكاميرات .. والموبايل ده حرفيًا نقدر نقول مفهوش بروز كاميرا.
في ملحوظة أخيرة على أزرار الباور والصوت هما على ناحية واحدة على اليمين ومكانهم فوق شوية، والموبايل كبير نسبيًا .. فأنا أخدت فتره على ما أتعود على أماكنهم خصوصًا إن البصمة هنا على زرار الباور.
الشاشة :-
سامسونج مش بتضيع وقتها .. خدت نفس شاشة الـA71 حطيتها هنا .. شاشة عملاقة بحجم 6.7 بوصة من نوع Super AMOLED Plus بدقة FHD+ .. وفي ثقب كبير شوية للسيلفي في منتصف اعلى الشاشة.
طبعا التردد هنا عادي 60 هيرتز .. مش هيديك نفس نعومة الـ90 هيرتز لو كنت جربتها يعني .. ولكن حتى الأن مفيش حد إدانا أموليد و90 هرتز غير Reno 4 Pro وده سعره مش فئة متوسطة خالص فملناش دعوة بيه.
لحد دلوقتي فئة متوسطة أموليد يبقى 60 هيرتز .. لو عاوز تردد أعلى 90 أو 120 هيرتز زي ما هنشوف في Poco X3 يبقى هتاخد شاشة IPS LCD بـQuality ألوان أقل وسطوع أقل.
عمومًا شاشة الـM51 كجودة .. مفيش أي كلام سلبي عليها .. شاشة مُحترمة من ناحية الألوان ودرجاتها .. أنت بس ممكن تحس إن الشاشة مصفرة شوية .. أول ما تشتري الموبايل هتدخل أعدادات الشاشة وتخليها بارده اكتر .. او إختار الدرجة اللي تريح عينيك .. ده غير السطوع اللي تحت الشمس مُمتاز جدًا جدًا بصراحة.
حواف الشاشة فيها سيمترية يعني هتلاقي الحافة اللي فوق قد الحافة اللي تحت تقريبًا .. وأنا بالنسبالي مُتقبل جدًا الحافة السُفلية بس الحافة العلوية كانت محتاجه تصغر شوية .. ده غير الثقب اللي كنت أتمنى لو كانوا صغروه شوية.
وأخيرًا الشاشة عليها طبقة حماية Corning Gorilla Glass الجيل الثالث .. مش عارف ليه ما إستخدموش الجيل الخامس مثلًا.
الأداء :-
معالج كوالكوم سناب دراجون 730G بـ تكنولوجيا 8 نانو .. المعالج الكويس في الفئة المتوسطة .. وده نفس معالج الـA71 .. وماحستش بأي فرق في الأداء ما بينهم اصلًا.
وبالنسبة لفكرة إستخدام المعالج ده فأنا شايفها كويسة .. المُنافسين بيستخدموا أيه ؟ SD720G وSD730 .. يبقى تمام مفيش هنا تقصير.
نوع ذاكرة التخزين الـ128 جيجا هنا هو UFS 2.1 ولكني لاحظت أن سرعة القراءة والكتابة أقل حاجة بسيطة عن المُعتاد من نوع الذاكرة ده.
الأداء بتاع الـM51 معقول ولكنه مش الأسرع .. مشوفتش معاه مشاكل جوهرية .. كل فين وفين لو حصل Drop Frame في الواجهة .. وكل فين وفين أما افاجئ الموبايل وأفتحه بالبصمة بعد فتره سكون أحس بتأخر بسيط جزء من الثانية في إستجابة تجميع الواجهة .. ولكن كل ده مش هيسببلك مشكلة.
بس أنا ما زلت عند رأيي واجهة سامسونج مش أسرع واجهة في الفئة المتوسطة .. وكمان الشاشة عشان 60 هيرتز بس .. فأحساس النعومة وإن الموبايل طاير لوحده مش هتلاقيها هنا برده .. ده لو أنت كنت جربت يعني تردد اعلى من 60 هرتز في موبايل قبل كده .. أنما لو مجربتش مش هتحس باللي أنا بقوله ده خالص.
الموبايل جاي بـ8 جيجا رام .. والواجهة هنا بتحافظ على البرامج المفتوحة في الخلفية .. صعب جدًا أنه يقفل أي برنامج في الخلفية .. ميزة كويسة جدًا كعادة سامسونج.
بالنسبة للألعاب .. لعبة ببجي بتشتغل على High HD .. واللعبة بتشتغل كويس جدًا .. لعبة كول اوف ديوتي بتشتغل على Very High بدون أي مشاكل .. لعبة فورت نايت بتشتغل على اعدادات جرافيك Medium واللعبة بتشتغل بشكل مقبول بس طبعًا مش أحسن حاجة .. والسخونية مقبولة جدًا في جسم الموبايل.
عوامل الأمان وعناصر اخرى :-
بصمة على زرار الباور سريعه وأحسن بكتير من البصمة اللي تحت الشاشة بتاعت سامسونج A71 .. والـFace Unlock سرعته متوسطة.
الموبايل جاي بـ Android 10 مع واجهة سامسونج One UI2.5 .. في هنا خاصية المسح على زرار الباور لتنزيل قائمة الإشعارات .. الـDark Mode موجود وطبعًا تحفة بسبب الشاشة الـAMOLED.
وطبعا الـAlways On Display المُميز من سامسونج موجود في الـM51 وتقدر تختار بين أكتر من شكل ليه .. لعرض أشعارات البرامج على الشاشة وهي مطفية.
وفي خاصية Dual Messanger لعمل نسختين من برامج التواصل الاجتماعي .. والموبايل كمان داعم للـNFC الميزة اللي شرحتها قبل كده وقلتلك أنها مهمة.
بالنسبة للمستشعرات فمستشعر الضوء موجود والجيروسكوب موجود .. اما التقارب فا هو سوفت وير كالعادة.
صوت الموبايل جاي من سماعة واحدة صوتها مُتوسط .. ولا هو عالي أوي ولا هو واطي .. هو أقل من Reno 4 حاجة بسيطة.
صوت سماعة المكالمات كويس وفي ميكروفون اضافي لعزل الضوضاء.
أما بالنسبة لشبكات الـWiFi فا للأسف لسه السوفت وير بيعمل Filter للشبكات الضعيفة وبالتالي هتلاقي ضعف في إستقبال الشبكات لو الراوتر بعيد عنك.
البطارية :-
أقوى حاجة في الموبايل ده البطارية .. حجمها 7000 مللي أمبير .. وهي فعلًا 7000 مش مجرد رقم .. لإنها إستحملت معايا حوالي 11 ساعة شاشة مفتوحة .. رقم ضخم جدًا .. وممكن تقعد أكتر على حسب إستخدامك.
منفذ الشحن USB Type C والشاحن المرفق 25 واط بيشحن البطارية في حوالي ساعتين إلا ربع .. وقت معقول على حجم البطارية الضخمة اللي هنا.
الكاميرات :-
الموبايل جاي بـ4 كاميرات في الظهر .. الساسية 64 ميجا بيكسل فتحة عدسة F/1.8 بالمستشعر الجديد سوني IMX682 .. والعدسة التانية 12 ميجا بيكسل بفتحة عدسة F/2.2 للتصوير الواسع .. والعدسة التالتة 5 ميجا بيكسل فتحة عدسة F/2.4 ماكرو والأخيرة 5 ميجا بيكسل للعزل.
والسيلفي الموجود في ثقب الشاشة بيجي بدقة 32 ميجا بيكسل بفتحة عدسة F/2.0.
سوفت وير الكاميرات فيه Night Mode في الكاميرا الخلفية والأمامية .. وكمان فيه ميزة الـSingle Take بتاعت الـFlagship من سامسونج واللي بدوسة واحدة منها بتصور صور وفيديوهات كتير وأنت تختار الأفضل ما بينهم .. ميزة حلوة إننا نشوفها في موبايل فئة متوسطة.
جربنا الكاميرات وكالعادة .. أداء مُبهر من مُعالجة سامسونج للألوان .. والـSensor بتاع الكاميرا هنا كمان أدائه عجبني بشكل كبير .. هو اه مش تطوير كبير بالنسبة للـGW1 اللي كان موجود في A71 .. ولكن اصلا أداء الكاميرات كان عاجبني في A71 .. وهنا الأداء إتحسن نقدر نقول بنسبة 10% مثلا.
تجربة التصوير بالموبايل ده هتعجبك .. في مختلف أوضاع التصوير .. شمس، ظلة، إضاءة داخلية .. وفي الإضاءة الضعيفة شغل الـNight Mode وهتلاقي تفاصيل مُحترمة ويمكن التحسن الـ10% ده في الـNight Mode اللي التفاصيل بقت أكتر فيه.
لما جربت Oppo Reno 4 جنب الـGalaxy M51 وجربت اصور بيهم كتير وفي مختلف أوضاع التصوير .. لاقيت كاميرا الـM51 تتفوق على كاميرا Oppo Reno 4 في مختلف أوضاع التصوير.
بالنسبة للسيلفي بقى فا مستشعر IMX616 موجود في سيلفي الـM51 أدائه مُرضي بشكل كبير .. محستش بعجز أو مشكلة في الكاميرا السيلفي اللي هنا .. كل أما أطلع الموبايل من جيبي وأتصور سيلفي الاقي تفاصيل وألوان كويسة .. حقيقي عاش سامسونج .. واللي أتحسن أكتر التصوير الليلي في السيلفي أدائه بقى معقول جدًا.
لما جربت الـM51 مع الـReno 4 في السيلفي .. إستغربت النتائج جدًا، الـM51 فعلًا متفوق على الـReno 4 في إنه أي وضعية تصوير حتى لو مش ملائمة للتصوير بيقدر يعالج الصور كويس ويطلعلك صورة مقبولة جدًا.
وطبعا Look الصور بتاعت الـM51 مُختلفه كتير عن Look صور الـReno 4 .. شوف تجربة التصوير صور وفيديوهات بالموبايلين في فيديو المراجعة وحدد بنفسك !
بالنسبة بقى لتصوير الفيديوهات فالموبايل بيقدر يصور فيديوهات 4K بجودة 2160p@30fps بالكاميرا الأمامية والخلفية .. وللأسف مفيش 4K مع 60 فريم .. والموبايل بيدعم مثبت إلكتروني وفيه ميكروفون اضافي لعزل الضوضاء.
سعر الموبايل :-
السعر الرسمي للموبايل 6666 جنية للنسخة الوحيدة الموجودة 128 جيجا مع 8 جيجا رام وينفع تركب كارت ميموري بحجم 512 جيجا وشريحتين إتصال مع بعض .. وأعتقد سعره بعد كام يوم هيبقى حوالي 6400 جنية في المحلات.
في كارت ضمان 12 شهر على الشاشة ودي ميزة قوية جدًا في حالة الحجز المُسبق ومعاه سماعة بلوتوث نوعها غير معروف .. ومعرفش كارت الضمان هيكمل بعد فترة الحجز المسبق ولا لأ !
الرأي النهائي :-
مميزات Galaxy M51 :-
- شاشة AMOLED عملاقة محترمة جدًا من ناحية الألوان والسطوع
- بطارية ضخمة جدًا جدًا
- كاميرات محترمة كويسة أداءها ثابت
- موبايل بأداء معقول متوازن
عيوب Galaxy M51 :-
- خامات مش الأفضل ومش Premium تمامًا
- وزن الموبايل تقيل وسُمكه تخين جدًا
- شاشة بمعدل تحديث 60 هيرتز فقط
- استقبال الـWiFi ضعيف نسبيا
من الأخر الـGalaxy M51 يُعتبر نسخة من الـGalaxy A71 .. الفرق بس إن الـM51 بطارية أكبر وبصمة أحسن على زرار الباور .. وكاميرات فيها تحسن بسيط بنسبة 10% .. وطبعا الـM51 أتقل وأتخن من الـA71 بفرق كبير علشان فرق البطارية.
Comments