لو انت متعرفش .. شركة BBK الصينية عندها 4 شركات تحتها .. ريلمي واوبو وفيفو و وان بلس .. سيبك دلوقتي من وان بلس .. الـ3 شركات التانين نزلوا موبايلاتهم في الفئة المتوسطة، بدأنا بـOppo Reno 4 ثم Realme 7 Pro والأخير واللي هنراجعه النهارده هو Vivo V20 .. وتقريبًا دي أول مرة يبقى الـ3 موبايلات بنفس المعالج.
انا عارف ان فيفو مقدمتش عناصر إبهار قوية في V20 .. مفيش حاجه تشدك للموبايل وتخليك تسيب اوبو و ريلمي .. لكن بما إني جربت الـ3 موبايلات فا إيه المانع اعرفك على الـV20 ونعرف مع بعض طريقة تفكير فيفو وسط اخواتها.
التصميم :-
خلينا نتكلم في الخامات الأول .. الـV20 جاي بظهر زجاجي مع فنش مط كده على الظهر علشان التبصيم ميبنش اوي .. وبكده ديه أول نقطة تفوق لفيفو على ريلمي و اوبو اللي موبايلاتهم بالكامل من البلاستيك.
بس طبعا فريم فيفو من البلاستيك .. الموبايل رفيع 7.4 ملم وزنه خفيف 171 جرام اخف من Realme 7 Pro واتقل حاجة بسيطة من اوبو رينو 4 .. فحاجة كويسة انه يبقى زجاج وفي نفس الوقت خفيف ورفيع.
الموبايل فعلًا مسكته وإحساس إستخدامه Premium وحاجه كويسة جدًا .. والتقفيل بتاع الموبايل محترم والأزرار ليها صوت كده ومتينة وقوية.
ولكن شكل الكاميرا الخلفية محير أوي .. حقيقي مُحير .. هي فيفو حبت تعمل حاجة مختلفه خالص .. ستايل خاص بيها .. ولكن انا ماشي بالموبايل ده بقالي فترة .. نص الناس شايفاه قبيح .. والنص التاني شايفينه حلو.
واللي شايفينه حلو بيبقوا من الأشخاص اللي بيحبوا إقتناء الموبايلات النادرة .. وأكيد فيفو V20 تصميم الكاميرا بتاعته نادر وصعب تلاقيها في موبايل تاني.
وعلى فكرة بروز الكاميرا الخلفية متوسط وجاي برده على درجتين كده علشان ميحسسكش ان في بروز .. والجراب المرفق في العلبة متين بيمسك الموبايل كويس وبيغطي البروز بالكامل.
ملخص جزئية التصميم .. ظهر زجاج فخم مع وزن خفيف وتخانه رفعيه في نفس الوقت .. ولكن تصميم غير مفهوم لرصة الكاميرا الخلفية في الظهر.
الشاشة :-
شاشة غير مفهومة في 2020 .. شاشة AMOLED بحجم 6.44 بوصة بدقة FHD+ بنوتش للسيلفي .. وطبعا تردد الشاشة 60 هرتز لأنها أموليد وفئة متوسطة.
المهم .. انت متخيل نوتش في أخر 2020 في موبايل بـ6000 جنية ؟!
حقيقي .. أنا مش فاهم فيفو كانت بتفكر في ايه وهي بتختار الشكل ده للشاشة .. ده اوبو و ريلمي معملوهاش .. وكمان انتي يا فيفو بنفسك عندك الـVivo V19 القديم كان بثقبين للسيلفي وكان شكلهم شيك جدا ومحدش اشتكى.
ليه طيب ؟ هل مثلًا اللي فكر في تصميم الكاميرا الخلفية الغريبة دي قال نخلي الموضوع اغرب ونحط نوتش .. عمومًا مسئلة النوتش مش اذواق .. هي تكنولوجيا قديمة والمفروض في الأجدد دلوقتي وهو الثقب .. ويزيد على كده الحافة السفلية .. كبيرة برده .. عاوز أقولك الحافة السفلية بتاعت الـV20 اكبر من الـV19.
ولكن كـ Quality شاشة فهي ممتازة .. وتقريبًا نفس Quality شاشة الـV19 .. ألوان حلوة وسطوع حلو .. وتقدر كمان تتحكم في درجة ألوان الشاشة من الـSetting بتاعتها.
ولكن لما جربت الشاشة بتاعت الـV20 مع Oppo Reno 4 و Realme 7 Pro .. مش حاسس يعني ان في فرق في الـQuality .. الفرق المحسوس شكل الشاشة الأقدم في Vivo V20.
وطبعًا الموبايل بيجي في العلبة متركب عليه سكرينه.
الأداء :-
وهنا فيفو إستخدمت نفس معالج رينو 4 وريلمي 7 برو .. سناب دراجون 720G .. ونفس الملحوظات موجودة .. المعالج ده تقدر تاخده في موبايل بنص سعره زي الـNote 9S من شاومي.
ولكن حقيقي التجربة هنا في الـV20 مستقره جدًا .. الموبايل مستقر في كل حاجة واي حاجة بتعملها .. وحقيقي صعب يحصل معاك Drop في الـFrames او أي حاجة .. وعلى فكرة الموبايل جاي بـAndroid 11 وده اول موبايل يجي بالإصدار ده من الاندرويد على الموبايل علاطول في العلبة في مصر .. وهتكلم عنه كمان شوية.
الاداء الرسومي المعتاد .. ببجي على High HD .. كول اوف ديوتي على Very High .. فورت نايت على Medium .. والألعاب بتشتغل كويس جدا بدون اي مشاكل الطبيعي بتاع الـ720G.
ومن الأخر فيفو مقدمتش حاجة اعلى من اخواتها في الأداء.
عوامل الأمان وعناصر اخرى :-
البصمة مُدمجة بالشاشة سريعة جدا ومفيهاش أي مشاكل .. والـFace Unlock برده سريع جدا بدون اي مشكلة.
الموبايل جاي بأندرويد 11 .. وتحس شكل الواجهة بتاعت فيفو الـFunTouch 11 بقت مياله أكتر للأندرويد الخام .. شكل الـMenu بتاع الـTop Bar وشكل الـNotification Bar تحس فيفو متدخلتش فيه.
وكمان بقا عندك ميزة مهمة وهي الـNotification History في الاندرويد 11 .. لو فعلتها .. لو مسحت الـNotifications بالغلط .. هتدخل تلاقيهم كلهم موجودين في الـHistory.
السوفت وير سلس وخفيف خالص مفهوش إضافات كتير من فيفو زي ما قولتلك .. في بس التحكم في الـAnimations بتاعت البصمة والشحن وفتح وقفل شاشة الموبايل وحاجات كتير كده.
اما Animations الواجهة نفسها سرعتها ثابته .. متوسطة كده ولا هي سريعة اوي ولا بطيئة اوي .. مظبوطة بحيث لو المعالج إتأخر عليك في حاجة الـAnimation يغطي عليك التأخير ده .. لو عاوز تقفلها خالص اقفلها من الاعدادات.
الموبايل فيه Always On Display لعرض الإشعارات على الشاشة المطفية .. زمان فيفو كان بستخدم اشكال كتير للساعة اللي بتظهر ولكن دلوقتي الاشكال محدودة اوي.
الموبايل للأسف مفهوش NFC .. زي اخواته من ريلمي و اوبو .. والمستشعرات كلها شغالة كويس.
الموبايل صوته جاي من سماعة واحدة وصوته مش عالي .. أوطى من رينو 4 وريلمي 7 برو .. ولكن هو يكسبهم في التجسيم .. الصوت بيطلع مجسم جدا .. ولكن درجة العلو هي الأقل في وسط اخواته.
بالنسبة لقوة شبكات الـWiFi والإتصال فالموبايل ممتاز زي اخواته برده من اوبو وريلمي.
البطارية :-
بطارية صغيرة اوي بتيجي بسعة 4000 مللي أمبير ولكن ادائها الفعلي معقول .. لإنها وصلت معايا لحوالي 7 ساعات شاشة مفتوحة.
طبعًا لو كانت البطارية ديه 4500 كانت هتبقا قوية جدا زي الـV19 .. ولكن هنقول ايه هما كانوا عاوزين يعملوا موبايل خفيف وخلاص.
الشاحن المرفق 33 واط بيشحن البطارية الصغيرة في ساعة إلا ربع .. وطبعا لسه ريلمي متفوقه بالشاحن الأسرع الـ65 واط.
الكاميرات :-
الموبايل جاي بـ3 كاميرات في الظهر .. الأساسية 64 ميجا بيكسل بفتحة عدسة F/1.9 والتانيه للتصوير الواسع 8 ميجا بيكسل فتحة عدسة F/2.2 والاخيرة 2 ميجا بيكسل للعزل .. والسيلفي 44 ميجا بيكسل فتحة عدسة فتحة عدسة F/2.0.
بص انا كنت قارنت كاميرات الـريلمي 7 برو مع الـOppo Reno 4 .. والـ7 برو كسب .. فأنا خدت الـ7 برو علشان أقارنه مع الـV20 في الكاميرات.
وكل اللي واخد بالي منه Look صور الـV20 مصفر شوية .. ولوك الـ7 برو محمر شوية .. وطبعا الكلام ده على الوشوش والأشخاص .. والوشوش عمومًا يليق عليها الإحمرار اكتر من الإصفرار .. الصينين برده عليهم حاجات غريبة يا اخي.
في الـNight Mode بقى النتايج متضاربة .. شوية يعجبني الـV20 وشوية يعجبني الـ7 برو ولكن في المجمل أنا شايف الكاميرتين قريبين جدا من بعض .. وسوري معلش يعني الـGalaxy M51 والـMi Note 10 Lite احسن في الكاميرا الخلفية من الفي 20 ومن الـ 7 برو .. متفقين ؟
ولما جربت الـV20 جنب الـVivo V19 القديم .. لاقيت تحسن حصل في الـNight Mode بنسبة بسيطة أوي.
اما السيلفي فا لوك سيلفي V20 مايل اكتر للـReno 4 .. فعلشان كده هتلاقي سيلفي الريلمي مختلف شوية في الشكل العام .. في الشمس عجبني اكتر صور الـV20.
ولكن في الإضاءات الداخلية وفي الـNight Mode عجبني اكتر صور السيلفي بتاعت الـ7 برو .. أحسن شوية في المعالجة والتفاصيل من الـV20.
أما لما قارنت سيلفي الـV20 مع الـV19 القديم .. محستش يعني أن في فرق WOW ما بينهم .. ده كمان الـV19 كان في عدسة Ultra Wide للسيلفي والـV20 مفيهوش.
بالنسبة لتصوير الفيديوهات بالموبايل فا هو بيقدر يصور على 4K مع 30 فريم ودي أعلى حاجه .. وده الطبيعي في الفئة السعرية دي .. والثبات الإلكتروني موجود وكويس على الجودة الـ4K دي .. الموبايل كمان بيصور 4K بالكاميرا الأمامية ودي حاجه ممتازة جدًا اننا نلاقيها في الفئة السعرية دي.
وفي وضع الـStady Face في سوفت وير الكاميرا السيلفي وده وظيفته انه بيعمل زي Focus كده على وجهك والميزة دي متاحه في الجودة الـ4K عادي .. وعندك كمان وضع الـStady Mode اللي بيزود الثبات لو انت عايز تصور مشهد رياضي او وانت بتجري مثلًا .. لكن الجودة بتنزل في المود ده على الـ1080p.
ممكن تشوف الصور و الفيديوهات بالكامل في فيديو المراجعة في أول المقالة.
سعر الموبايل :-
- نسخة واحدة متوفرة من الموبايل بمساحة تخزين 128 جيجا مع 8 جيجا رام بسعر 6099 جنية
الرأي النهائي :-
الـV20 بالنسبة لـRealme 7 Pro و Reno 4 :-
مميزات V20
- ظهر من الزجاج
- نزل بـAndroid 11
- شوية مميزات في تصوير الفيديوهات
عيوب V20
- شكل شاشة بتصميم قديم
- سعر أغلى منهم
- تصميم كاميرا خلفية مختلف وممكن تشوفه مش الأفضل
- الأقل في درجة ارتفاع الصوت
- الأقل انتشارا في الأسواق المصرية
الـVivo V20 معمول للناس اللي عايزه موبايل فريد من نوعه .. موبايل كده كده مش هيبيع كتير .. وانا عارف ان في نسبة قليلة من الناس بتحب الحاجات النادرة دي.
وانا شايف ان Vivo V20 كان محتاج يتضاف فيه ميزة أقوى زي مساحة 256 جيجا او صوت Stereo او كان يجي بشاحن 65 واط زي ريلمي 7 برو .. أي ميزة قوية تتقل كفة الـV20 شوية خاصة ان براند فيفو لسه مقدرش ينتشر بشكل كافي في مصر .. وانا شايف ان ده مش التطوير اللي استنيناه بعد الـV19 اللي عجبنا فعلًا.
Comments