شركة شاومي كان معروف عنها إنها أفضل شركة تقدملك موبايلات بمجموعة مواصفات ممتازة وبسعر مقبول .. لكن للأسف مؤخرًا شاومي كانت من أكتر الشركات اللي رفعت أسعار موبايلاتها .. ومع ذلك لسه في شوية موبايلات تعتبر بتقدم قيمة كويسة وسط الزيادات السعرية اللي حصلت من كل الشركات.
3000 جنية :-
Redmi 9A
موبايل Redmi 9A هو موبايل إقتصادي جدًا بيجي بمعالج ميدياتك Helio G25 الإقتصادي للمهام البسيطة مع شاشة كبيرة 6.5 بوصة من نوع IPS LCD بدقة HD+ .. بشكل عام هو موبايل إقتصادي في المقام الأول.
الموبايل سعره للنسخة الـ32 جيجا مع 2 جيجا رام حوالي 3100 جنية مصري.
من 4000 الى 5000 جنية :-
Redmi Note 11
الموبايل بيقدم شاشة AMOLED بحجم 6.43 بوصة بدقة FHD+ مع معدل تحديث 90 هيرتز .. تعتبر هي الشاشة الأفضل في الفئة دي .. مع معالج كوالكوم سناب دراجون 680 اللي يعتبر أداءه مقبول الى حد كبير في الفئة دي، كمان البطارية 5000 مللي امبير مع شحن سريع 33 وات.
من عيوب الموبايل ده مستشعر التقارب اللي مش موجود حقيقي وبيشتغل عن طريق السوفت وير .. كمان الكاميرا السيلفي أداءها متواضع الى حد كبير .. ومفيش تصوير فيديوهات 4K للأسف.
سعر الموبايل للنسخة الـ128 جيجا مع 4 جيجا رام حوالي 5000 جنية مصري، والنسخة الـ128 جيجا مع 6 جيجا رام حوالي 5600 جنية مصري.
Redmi 10
الموبايل ده بيجي مع بطارية كبيرة 5000 مللي امبير بتدعم الشحن السريع بقدرة 18 وات .. مع معالج ميدياتك Helio G88 ممتاز في الأداء في الألعاب .. والموبايل فيه مستشعر تقارب حقيقي، كمان فيه سماعات Stereo وميكروفون اضافي لعزل الضوضاء ومستشعر IR Blaster.
من عيوب الموبايل هي الكاميرات .. أداء الكاميرات متواضع الى حد كبير سواء الكاميرا الأمامية او الكاميرات الخلفية، كمان الشاشة من نوع IPS LCD مش AMOLED زي ريدمي نوت 11.
سعر Redmi 10 لنسخة 64 جيجا مع 4 جيجا رام حوالي 4400 جنية مصري.
من 6000 الى 7000 جنية :-
Redmi Note 10 Pro
الموبايل ده بيجي بمعالج كوالكوم سناب دراجون 732G اللي يعتبر من أفضل المعالجات في الفئة دي .. مع كاميرا خلفية أساسية بدقة 108 ميجا بيكسل مع دعم لتصوير فيديوهات 4K .. خامات الموبايل الخارجية من الزجاج .. الشاشة Super AMOLED بمعدل تحديث 120 هيرتز .. مع بطارية بتدعم الشحن بقدرة 33 وات.
سعر Redmi Note 10 Pro في المحلات للنسخة الـ128 جيجا مع 8 جيجا رام حوالي 7000 جنية مصري.
Redmi Note 11 Pro 4G
الموبايل ده أحسن من ريدمي نوت 10 برو في الشاحن السريع بقدرة 67 وات .. المعالج بتاعه الـHelio G96 مش أحسن من سناب دراجون 732G في الإستخدام العادي لكنه أحسن في الألعاب والأداء الرسومي .. التصميم يعتبر أشيك وأحدث شوية، لكن للأسف مفيهوش تصوير فيديوهات 4K.
سعر Redmi Note 11 Pro 4G للنسخة الـ128 جيجا مع 8 جيجا رام حوالي 7500 جنية مصري.
من 7000 الى 10000 جنية :-
Xiaomi 11T
ده يعتبر من أفضل الموبايلات اللي ممكن تشتريها في الفئة دي .. موبايل Flagship Killer .. بيقدم معالج ميدياتك Dimensity 1200 بأداء ممتاز جدًا هو الأفضل في الفئة السعرية دي .. كاميرا خلفية أساسية 108 ميجا بيكسل بتصور 4K .. بطارية 5000 مللي امبير بشاحن 67 وات .. خامات خارجية زجاجية.
من عيوب الموبايل الكاميرا السيلفي اللي تعتبر أقل من معظم المنافسين .. مستشعر التقارب مش موجود حقيقي .. ومفيش مدخل سماعات 3.5 مللي.
سعر Xiaomi 11T للنسخة الـ256 جيجا مع 8 جيجا رام حوالي 9500 جنية.
Redmi Note 11 Pro 5G / Pro Plus 5G
اما بالنسبة لموبايلات شاومي التانية زي Redmi Note 11 Pro 5G و Redmi Note 11 Pro Plus 5G فالموبايلات دي متستاهلش انك تشتريها طول ما Xiaomi 11T موجود .. لإنه هيقدملك تجربة عامة أحسن في الفئة السعرية دي.
Comments