لو عايز تشتري موبايل في الفئة المتوسطة في حدود الـ5000 جنية او 300 دولار ومحتاج موبايل متوازن من حيث كل حاجه .. وزنه مش تقيل أوي، شاشة AMOLED بتردد عالي، بطارية كويسة، أداء معقول، كاميرات حلوه، فانا النهارده هقارنلك بين Galaxy A52 و Note 10 Pro و Reno5 4G.
الـ3 موبايلات دول نزلوا في السوق المصري علشان ينافسوا مع بعض في الفئة السعرية دي .. والـ3 موبايلات بيقدموا الحاجات اللي انا قولتلك عليها دي لكن بإختلافات من شركة للتانية.
التصميم :-
نوت 10 برو الظهر بتاعه زجاجي .. بينقلك طابع فخم نسبيًا وللأسف الطابع الفخم ده بيروح لما تلاحظ الفريم البلاستيك .. اما رينو 5 والـA52 بيجو بخامات بالكامل من البلاستيك البولي كاربونيت.
الخامات الزجاجية تخاف منها في الوقعات لإنها ممكن تتكسر بسهولة .. لكن البلاستيك بيتحمل أكتر في الوقعات .. وكده كده 99% من اللي بيشتروا موبايل جديد بيركبوا عليه جراب، صعب تلاقي حد ماسك الموبايل من غير جراب.
الـA52 واخد شكل تصميم الموبايلات الرائدة من سامسونج ودي حاجه كويسة .. الـReno5 4G واخد شكل سلسلة Reno 4 وReno5 المعتاد ومفيش تغيير جوهري .. الـNote 10 Pro شكله مُميز وده اللي دايمًا شاومي بتعرف تعمله.
بالنسبة للوزن فا Reno5 4G أخف واحد فيهم بوزن 171 جرام وتخانة 7.7 مم، اما الـA52 وزنه 189 جرام وتخانته 8.4 مم، الـ نوت 10 برو وزنه 191 جرام وتخانته 8.1 مم .. أما بروز الكاميرات أقلهم هو اوبو رينو 5 وبعديه Galaxy A52 لكن الـNote 10 Pro بروز الكاميرات فيه كبير علشان مستشعر الكاميرا الكبير، وعمومًا البروز بيتغطى بالجراب في كل الموبايلات.
الـA52 فيه ميزة مقاومة معتمدة ضد الماء والغبار IP67 علشان تبقى متطمن لو في مايه جت على الموبايل او لو وقع منك في شوية ماية متقلقش مش هيحصل له حاجه .. لكن هو مش ضد المايه يعني مينفعش تنزل بيه البحر او حمام السباحة وكده.
الشاشة :-
الـA52 شاشة Super AMOLED بحجم 6.5 بوصة بتردد 90 هيرتز .. الـReno 5 شاشة AMOLED بحجم 6.4 بوصة بتردد 90 هيرتز .. الـNote 10 Pro شاشة AMOLED بحجم 6.67 بوصة بتردد 120 هيرتز .. والـ3 شاشات كاملين وبيجو بتصميم الثُقب والـ3 شاشات بدقة FHD+ .. ومستوى الشاشات اتحسن جدًا في الفئة المتوسطة !
بالنسبالي شاشة Note 10 Pro وشاشة Galaxy A52 هما الأفضل .. شاشة نوت 10 برو سطوعها عالي ومُميز جدًا وأعلى من شاشة الـA52 .. اما شاشة الـA52 ألوانها مُميزة اوي ومشبعة بطريقة ممتازة .. لكن شاشة اوبو رينو 5 4G للأسف أقلهم وتحس ان ألوانها بهتانة الى حد كبير وهي جنبهم.
ثقب السيلفي بتاع Reno 5 هو أكبر واحد فيهم بشكل واضح، ثم الـA52 وبعدين نوت 10 برو .. والحواف حول الشاشة الـA52 أقل واحد فيهم لإن الحافة العلوية كبيرة أوي وباينة أوي وهو جنب الموبايلين التانين.
الـA52 والـNote 10 Pro عليهم طبقة حماية Corning Gorilla Glass من الجيل الخامس، لكن Reno 5 4G الحماية عليه الجيل الثالث .. والـ3 موبايلات بيجو في العلبة متركب عليهم سكرينه.
بص من الأخر .. عجباني جدا شاشة الشاومي علشان سطوعها .. وشاشة السامسونج علشان الوانها .. انما بصراحة شاشة الاوبو اقل منهم هي مش وحشة ولكن اقل منهم .
الأداء :-
اوبو رينو 5 وجالاكسي A52 بينزلوا بمعالج كوالكوم سناب دراجون 720G .. اما نوت 10 برو بيجي بمعالج سناب دراجون 732G يعتبر أعلى حاجه بسيطة عن الـSD720G لكن مفيش فرق جوهري بينهم .. الـ3 معالجات أداءهم الفعلي متقارب جدًا.
ذاكرة التخزين UFS 2.1 في Reno 5 4G وفي Galaxy A52 .. اما في الـNote 10 Pro بتكون UFS 2.2 .. ومفيش فرق جوهري ما بينهم بصراحة، ولما الهاردوير بيكون متقارب السوفت وير هو اللي بيفرق في تجربة الإستخدام.
فرق تردد الشاشة مش هيبقى محسوس أوي .. الـ120 هيرتز في شاومي مش مستقرين علطول، مش هتحس بفرق أوي عن الـ90 هيرتز بتوع سامسونج واوبو.
اما احسن سوفت وير فيهم هو سوفت وير اوبو، لإنه مستقر وثابت لكن الواجهة فاضيى شوية ومفيهاش Options كتير .. في المركز اللي بعده سوفت وير سامسونج المُميز جدًا، أحسنهم شكلًا وفيه خواص كتير جدًا وممكن تسرع الـAnimations بتاعته او تلغيها خالص .. المركز الأخير واجهة شاومي اللي فيها Options كتير بس مش مستقرة أوي.
بالنسبة للأداء الرسومي فا الـ3 موبايلات هيقدمولك أداء متقارب، ببجي على High HD وكول اوف ديوتي على Very High .. والسخونية مُعتدلة في الـ3 موبايلات مفيش فرق جوهري بينهم.
عوامل الأمان وعناصر اخرى :-
لو بتحب البصمة المُدمجة في الشاشة هيعجبك رينو 5 .. لو بتحب البصمة اللي على زرار الباور هيعجبك Note 10 Pro .. بصمة A52 تحت الشاشة برده بس أبطأ شوية من اوبو لو هتقارن بينهم .. والـFace Unlock معقول في الـ3 موبايلات بس احسنهم رينو 5.
الـ3 موبايلات بما انهم بشاشاة AMOLED فا فيهم Always On Display لعرض الإشعارات اللي جاتلك على الشاشة وهي مطفية، والـA52 والـNote 10 Pro فيهم NFC لكن رينو 5 مفيهوش للأسف .. الـ Note 10 Pro فيه مستشعر IR Blaster ومش موجود في الباقي.
بالنسبة لمستشعر التقارب المسؤل عن قفل الشاشة على ودنك وانت بتعمل مكالمة .. احسن اداء ليه في رينو 5 وبعده الـA52 واقل واحد فيهم نوت 10 برو.
بالنسبة للصوت .. نوت 10 برو وجالاكسي A52 صوتهم ستيريو .. ولكن عجبني أكتر صوت الـGalaxy A52 مجسم اكتر ومفيهوش ولا غلطة .. مش معناه ان صوت نوت 10 برو وحش .. بس صوت A52 افضل .. انما رينو 5 صوته Mono عادي واقل بفرق واضح من سامسونج وشاومي.
بالنسبة لقوة الشبكات .. كالعادة اوبو تتفوق في الـWi Fi و شبكات الاتصال .. سامسونج يجي في المركز الثاني في قوة شبكة الإتصال، ونوت 10 برو في المركز الأخير .. اما في الـWiFi فا نوت 10 برو في المركز الثاني وجالاكسي A52 في المركز الأخير.
البطارية :-
بطارية Galaxy A52 بحجم 4500 مللي امبير وبطارية Reno5 4G بحجم 4300 مللي اميبر وبطارية Note 10 Pro بحجم 5000 مللي امبير.
اقوى بطارية فيهم عن تجربة هي اوبو رينو 5 بسبب السوفت وير الذكي جدا .. متوسط 8 ساعات شاشة مفتوحة .. بعده يجي A52 بمتوسط 7 ساعات ونصف شاشة مفتوحة .. والمركز الأخير شاومي بمتوسط 6 ساعات ونصف شاشة مفتوحة .. وطبعا الكلام ده على اعلى تردد شاشة لكل موبايل.
رينو 5 احسنهم في الشحن برده لإنه معاه شاحن 65 واط بيشحن فعلي 50 واط في ساعة الا ربع .. نوت 10 برو معاه شاحن 33 واط بيشحن في حوالي ساعة و 5 دقايق .. اقلهم في الشحن Galaxy A52 بيدعم 25 واط ولكن بيجي معاه شاحن 15 واط بس بيشحن البطارية في ساعة ونص.
الكاميرات :-
الـ3 موبايلات ب 4 كاميرات في الظهر .. الأساسية 108 ميجا بيكسل في نوت 10 برو .. وبدقة 64 ميجا بيكسل في جالاكسي A52 واوبو رينو 5 .. والـA52 هو الوحيد اللي فيه مثبت بصري حقيقي في الكاميرا الخلفية .. الباقي مفيهوش .. السيلفي 16 ميجا بيكسل في نوت 10 برو .. 32 ميجا بيكسل في جالاكسي A52 .. وبدقة 44 ميجا بيكسل في اوبو رينو 5.
مش هستخدم تطبيق جوجل كاميرا في شاومي لإني بعمل مقارنة، وجوجل كاميرا مش بيشتغل بكفاءة على سامسونج و اوبو.
في الـOurdoor بالنسبة للألوان فا A52 دايمًا بينقل ألوان مظبوطة ولون البشرة بيكون مظبوط .. نوت 10 برو بيقدم حدة وتفاصيل واضحة جدًا في الصورة .. وفي البورتريه نوت 10 برو جاب أحسن ألوان والـA52 قص الصورة أفضل لكن رينو 5 معجبنيش للأسف .. الألوان في رينو 5 دايمًا بتيجي بعيدة عن الواقع.
العدسة الماكرو في Note 10 Pro تكسب بإكتساح .. والعدسة الـUltra Wide Angle تكسب في Galaxy A52 كزاوية واسعه وتفاصيل وألوان.
اما بقى في الإضاءه الداخلية فا صور الـGalaxy A52 عجبتني جدًا وبعديها Redmi Note 10 Pro .. وكالعادة رينو 5 معجبتنيش للأسف .. الألوان في A52 ممتازة والتفاصيل في Note 10 Pro ممتازة وللأسف رينو 5 أقل منهم.
بالنسبة للـNight Mode فا سامسونج مش بيرفع الـShadows لكن بيعلي الـContrast شوية، وبالتالي معالجة صورة الـNight Mode بتاعته مختلفة تمامًا عن شاومي و اوبو .. الصور مش بتطلع منورة بشكل مبالغ فيه لكن الموبايل بيحافظ على التفاصيل كويس جدًا .. حقيقي الـA52 كاميراته الخلفية يُعتمد عليها.
بالنسبة للسيلفي فا كالعادة الـReno5 بيفتح الصورة زيادة عن الطبيعي .. اما A52 متوازن جدًا في الألوان .. الـNote 10 Pro فيه Over Sharpness بسيط .. وفي الإضاءه الداخلية صور نوت 10 برو كويسة بس تفاصيلها مش كتير .. صور رينو 5 معقولة نسبيًا .. انما صور الـA52 ألوانها مش مظبوطة للأسف.
اسعار الموبايلات :-
سعر Galaxy A52 :-
- نسخة 128 جيجا مع 8 جيجا رام بسعر 5600 جنية
- نسخة 256 جيجا مع 8 جيجا رام بسعر 6200 جنية
بينفع تركب شريحتين إتصال 4G او شريحة واحدة مع كارت ميموري بحجم 1 تيرا.
سعر Oppo Reno5 4G :-
- نسخة واحدة 128 جيجا مع 8 جيجا رام بسعر 5600 جنية
بينفع تركب شريحتين إتصال 4G مع كارت ميموري بحجم 256 جيجا في نفس الوقت.
سعر Redmi Note 10 Pro :-
- نسخة 64 جيجا مع 6 جيجا رام بسعر 4200 جنية
- نسخة 128 جيجا مع 6 جيجا رام بسعر 4666 جنية
- نسخة 128 جيجا مع 8 جيجا رام بسعر 5000 جنية
بيدعم تركيب شريحتين إتصال الجيل الرابع مع كارت ميموري 512 جيجا في نفس الوقت.
الرأي النهائي :-
نقاط تفوق Galaxy A52 :-
- كاميرا خلفية أقوى في الصور و الفيديوهات
- صوت Stereo عالي
- شهادة ضد الماء والغبار
- احسن ألوان شاشة
نقاط تفوق Note 10 Pro :-
- خامات خارجية من الزجاج
- مستشعر IR Blaster
- أكبر شاشة وأسرع تردد
- موبايل رفيع وخاماته Premium
نقاط تفوق Reno5 4G :-
- شبكات هي الأقوى
- سرعة الشحن هي الأفضل
- مستشعر التقارب ممتاز
- في سماعات أذن في العلبة
- عوامل أمان هي الأسرع
Comments