الطريقة الصحيحة لـ تعقيم الموبايل بدون إتلاف اي جزء فيه !

في تصرفات كتير غلط بنعملها الفتره دي عشان القلق اللي احنا فيه، التصرفات دي ليها علاقة بالموبايل نفسه اللي ممكن ينقلك عدوى فيروس كورونا ..  والي ممكن وانت بتعقمه تبوظه اصلًا .. في المقال ده انا هوضحلك ازاي تتعامل في الظروف الصعبه اللي احنا فيها دي مع موبايلك بأقل الخساير.

قبل اي حاجه، لازم تيجي على نفسك اليومين دول وتغسل ايدك بالمايه والصابون لمدة 20 ثانيه، انا عارف اكيد ان انت صدعت من كتر ما بتسمع الكلام ده وشوفت اكيد طرق كتير لغسل الإيد بالطريقة الصحيحة .. بس انا حابب اأكد عليك برده علشان مصلحتك لإن دي اسهل وارخص واسرع طريقة تقدر تطهر بيها ايدك عشان متبقاش ايدك دي هي السبب في نقل فيروس كورونا ليك.

طبعًا لو انت بره ومفيش مايه وصابون يبقى الكحول في جيبك، هو غالي اه شوية دلوقتي بس حاول تدور عليه .. ولو لمست اي سطح او فتحت باب تعقم ايدك كده علطول بيه اول بأول.

في موضه بقى طالعه دلوقتي وهي الكمامات والجوانتيات .. انا مش هتكلم معاك في انك تستخدمها امتى وليه لإن دي ليها ناس تانيه تتكلم فيها احسن مني .. انما انا هكلمك في نقطة إستخدام الموبايل وإنت لابس الجوانتي في إيدك او وانت لابس الكمامه على وشك.

إستخدام الموبايل بالجوانتي والكمامه :-

اول مشكلة هتقابلك وانت لابس الجوانتي وبتستخدم الموبايل وهي انك مش هتقدر تفتح الموبايل بإستخدام البصمة .. سواء معاك موبايل فيه بصمة في الشاشة زي الـOppo Reno 2 او معظم الموبايلات الجديده حاليًا او معاك حتى موبايل فيه بصمة في الضهر.

البصمة هتشتغل معاك عادي لو الجوانتي على مقاس صُباعك بالظبط .. انما لو الجوانتي مش على مقاس صباعك بالظبط هتحس ان البصمة ساعات بتعلق، ولو انت مش عارف تفتح موبايلك بالبصمة فا بلاش بعد إذنك كل شوية تشيل الجوانتي عشان تفتح موبايلك بالبصمة .. انت كده مبتعملش حاجه وبتخلي الجوانتي يبقى ملوش لازمه.

الطريقة الأمنة والأسهل لفتح الهاتف في هذه الفتره :-
  • كتابة الباسورد او الـPettern او رسم النقش
  • إستخدام الـFace Unlock او فتح الهاتف عن طريق الوجه

وبالنسبة لطريقة الـFace Unlock .. الموبايل مش هيفتح لو انت لابس الكمامه فا هتلجأ وقتها للطريقة الأولى وهي كتابة الباسورد او رسم النقش، وبلاش بعد إذنك كل شوية ترفع الكمامه من على وشك بإيدك اللي فيها الجوانتي واللي احتمال يكون فيها الفيروس وترجع الكمامه تاني .. انت كده مبتعملش حاجه، شيل الكمامه احسن.


ممكن تاخد كل إحتياطاتك وتفتح الموبايل بالطريقة اللي كتبتها لك فوق دي وبرده يفضل موبايل مُعرض لإنه يبقى حامل للفيروس وينقله لك او لأي حد تاني يمسك موبايلك .. بالنسبة بقى للموبايل فا انا هقول على طريقة لتعقيم الموبايل من غير ما تخربشه او تبوظ حاجه فيه.

انا شايف ناس كتيره جدًا كل شوية تمسك الكحول وترش على الموبايل بطريقة بشعه .. انت اه بتطهر الموبايل وكل حاجه بس المشكله ان رش الكحول ده على الموبايل ممكن يدخل جوه جسم الموبايل ويسبب تلف في اجزاء الموبايل الداخليه وطبعًا هيكلفك بقى تصليح والكلام ده.

طريقة تعقيم الموبايل :-
  • تنضف السطح اللي بتحط عليه موبايلك، لإن ممكن اساسًا يبقى السطح ده عليه حاجه وتتنقل للموبايل فا انت هتعقم السطح اللي هتحط عليه الموبايل سواء مكتب او ترابيزه او حتى كرسي، هترش عليه كحول وتمسحه بيه وتسيبه لحد اما ينشف والكحول يتطاير
فوطة مايكرو فايبر
  • هتجيب فوطه MicroFiber اللي هي مش بتخربش الموبايل .. ولو ملاقيتهاش ممكن تستخدم قطنة طبية ، هتاخد الكحول وترش على الفوطه او القطنه كحول كتير وتروح ماسح بيها الموبايل مسحه كده محترمه وتاخد الموبايل تحطه على السطح اللي انت عقمته وتسيبه لحد اما ينشف والكحول يتطاير من عليه وبعدين تستخدمه

الكلام ده يتعمل برده على الشاحن ووصلة الشاحن والساعه او الساعه السمارت والسماعه البلوتوث او العاديه .. كل مستلزماتك تعقمها بنفس الطريقة اللي كتبتهالك فوق بالكحول وتتأكد انها تمام والكحول مُتطاير من عليها قبل ما تستخدمها.

ياريت بقى اليومين دول منستخدمش موبايلات بعض .. اللي هو تاخد بقى موبايل صاحبك تعمل مكالمه او تشوف كوميك والكلام ده .. حتى لو لابسين جوانتيات وكمامات برده بلاش لإنك متعرفش الجوانتي كان عليه ايه والكمامه اللي انت لابسها هتمنع الفيروس انه يتنقلك ولا لأ.

ياريت اليومين دول كل واحد يخليه في حاجته الشخصيه ويبقى هو المسؤول عن تعقيمها .. ولو خرجت ورجعت من بره ترجع تعقم نفسك انت الاول قبل ما تستخدم مستلزماتك، ولو كان معاك الموبايل بره تعقمه وتعقم نفسك.

مناديل بالكحول

في برده Wipes طبية فيها نسبة كحول ٧٠٪ ممكن تخليها في جيبك معاك وتستخدمها و تعقم بيها موبايلك لو انت بره البيت واضطريت تعقم موبايلك مثلًا .. بتطلعها من جيبك وتفتحها وتمسح موبايلك بيها علطول من غير ما يكون معاك ازازة كحول وفوطه مايكرو فايبر والكلام ده كلو.

اتمنى نكون قدرنا نوعيكم ازاي تحمي نفسك و موبايلك من الفيروس ونتمنى ربنا يكرمنا و نعدي الوقت الصعب الي احنا فيه ونرجع لحياتنا الطبيعية مرة تانية.

قد يعجبك أيضا...

Comments

جاري التحميل...