قدمنا ليكم قبل كده على موقع موبيزل مقالة أفضل 10 تطبيقات أندرويد، والنهارده هنقدم لكم الجزء التاني لكن في الجزء ده التطبيقات هتكون مجانية تمامًا، برامج الأندرويد المجانية اللي هنقدمهالكم النهارده هي مُختلفة .. هتلاقي فيها تطبيقات مُفيدة فعلًا هتسهل عليك حاجات كتير .. وهتلاقي تطبيقات للتسلية فقط.
تطبيق Filter Box : Notification Manager
كلنا محملين تطبييقات كتير اوي على الموبايل وكل تطبيق فيهم ممكن يبعتلك 20 ~ 30 إشعار او Notification طول اليوم مش في وقت مُعين .. وكتير منها بيكون مش مُهم وبتجيلك فوقت مش مُناسب زي إنك تكون نايم مثلًا او فـMeeting او إجتماع في الشغل .. ولو قفلت الإشعارات دي فإنت للأسف مش هتعرف تجبها تاني وجايز يكون فيها حاجه مهمه.
من هنا فكرة تطبيق Filter Box .. تطبيق فلتر بوكس هو تطبيق هيسمح لك إنك تفلتر الـNotifications او الإشعارات اللي هتوصلك .. إزاي بقى ؟
لما تفتح البرنامج هتقدر تعمل حاجه إسمها Rool .. وتحدد تطبيق مُعين مثلًا زي Gmail إنه ميبعتش ليك إشعارات من الساعه اللي هتحددها .. مثلًا من 12 بالليل لـ8 الصبح، واي Notifications تجيلك يعملها Dismiss او يعملها Mute بحيث متزعجكش .. او إنك تخلي كل التطبيقات متبعتش إشعارات فوقت مُعين من اليوم .. الوقت اللي بتكون نايم فيه مثلًا.
طب هل كدة الإشعارات دي مش هتقدر تشوفها تاني ؟ لأ هتشوفها عادي من التطبيق .. لما تحب تشوفها ادخل على الرئيسية او تاب الـAnalytics هيجبلك باليوم والوقت بالظبط ايه هي الإشعارات اللي جات لك وإيه الإشعارات اللي إتعملها Dismiss وتقدر تفتحها براحتك .. وكمان تعملها Restore وتخليها تظهر دلوقتي على موبايلك عشان تفتحها وتشوفها.
برنامج Filter Box بيخزن لحد 30 يوم من الإشعارات .. تقدر ترجع لأي يوم وتشوف الإشعارات وترجعها تاني لقائمة الإشعارات وتشوفها براحتك.
التطبيق مجاني تمامًا لمُدة 30 يوم .. وبعد كدة سعره هيبقى حوالي 4 دولار .. يعني جربه ولو عجبك وبتسخدمه يوميًا تقدر تشتريه مدى الحياه بـ4 دولار.
تطبيق Big File Cleaner
فجأة كدة وإنت بتلقط صورة او بتصور فيديو ضروري بتلاقي موبايلك جايب لك Error وبيقولك مفيش مساحة فاضية على موبايلك .. بتفتح الـFile Manager او مُدير الملفات على موبايلك وبتفضل تدور على الحاجه اللي واخده كُل المساحه دي .. وتفضل نص ساعه تدور بقى.
لو واجهت المُشكله دي يبقى لازم تحمل تطبيق Big File Cleaner .. التطبيق بسيط جدًا هو فلحظات بيرتب لك كل الملفات اللي على موبايلك حسب مساحتها .. هتلاقي في الأول أكتر الفيديوهات او الصور اللي مساحتها كبيره جدًا وبضغطه واحده تقدر تمسحها.
تطبيق Calculator Lock
كتير مننا بيحتاج يخفي حاجات خاصة عنده على الموبايل عشان محدش يشوفها، بالتطبيق ده بقى حتى لو معاه باسورد موبايلك وفتحه مش هيقدر يشوف حاجاتك الخاصه.
التطبيق فكرته بسيطه إنه زي تطبيق الأله الحاسبة بالظبط بكل تفاصيلها حتى الأيقونه اللي فالتطبيقات .. كلو هيفتكرها اله حاسبة عادية جدًا بس دي مُجرد واجهة فقط .. انما بالتطبيق ده تقدر تخفي صور وفيديوهات ونوتس او حتى تصور بالكاميرا حاجات تكون موجوده بس على التطبيق ده .. ومحدش يقدر يشوفها غيرك ومش هتكون موجوده فالـGallery بتاع الموبايل.
طريقة تشغيل التطبيق سهله جدًا، حمل التطبيق وهو هيقولك إرشادات إزاي تحط الباسورد بتاعك وتحط سؤال سري في حالة إنك نسيت الباسورد .. هيسألك السؤال السري عشان تغير الباسورد.
تطبيق Wanna Kicks
لو نفسك تشوف شكل الـShoes الغاليه من براندات زي Adidas وReebok وNike على رجلك من غير ما تخرج من بيتك .. التطبيق ده هيخليك تعمل كده !
تطبيق Wanna Kicks بيستخدم تكنولوجيا إسمها Augmented Realty ودي بتخليك تقدر تشوف الـShoes على رجلك من التطبيق وإنت فالبيت.
ببساطه إفتح التطبيق وإختار الـShoes اللي يعجبك وهتلاقي التطبيق فتحلك الكاميرا .. هات رجلك فالصوره وشوف شكل الـShoe على رجلك عامل ازاي.
التكنولوجيا دي بتتطور يوم عن التاني ومن المُخطط ليها إنك في المستقبل تقدر تشتري اونلاين بعد ما تشوف الحاجه عليك الأول، اعتقد هتعمل ثورة في عالم التسوق على الأنترنت.
تطبيق Photo Lab
في الفترة الأخيرة انا مُتأكد إنك شوفت صورة زي دي على فيس بوك او شوفتها عمومًا في أي مكان.
الصورة دي بتتعمل من تطبيق Photo Lab .. وهو تطبيق إضافة مؤثرات على الصور وبتعمل من الصور العاديه Posters زي ما يكون في مُصمم إشتغل عليها بالفوتوشوب او الـIllustrator.
المُميز في برنامج Photo Lab عن باقي التطبيقات هو جودته في مُعالجة الصور وقص الشخصيات من الصوره بإحترافيه تخليه يتفوق على المنافسين .. وده سبب إنتشاره بشكل كبير في الفتره الأخيره.
بخلاف الصوره بقى اللي كُلنا شفناها على الفيس بوك .. التطبيق في فلاتر كتير جدًا ومؤثرات تقدر تختار منها، العيب الوحيد فيه هو إن النسخه المجانية فيها إعلانات كتير.
وطبعًا في أقسام كتير زي قسم تحويل صورتك لكارتون او تغير خلفية صورك وحاجات كتير جدًا مُمكن تجربها بنفسك.
تطبيق Wifilink
فكرة التطبيق ده بسيطه وجميله، صُحابك لما يجولك او أي حد متعرفوش يجيلك ويقولك هات باسورد الـWiFi .. ومعظمنا عامل باسورد الـWiFi هو باسورد الـFacebook او هو باسورد الـEmail بتاعك فا بتخاف تقوله لحد.
هنا بكل بساطه إنت بتفتح الـApplication وتعمل شير للـWiFi Link بتاعك وتقدر تبعته له على الـWhatsapp او أي وسيله تانيه .. وممكن كمان تبعتهوله في رساله وخليه يدخل على اللينك وهو اتوماتيك هيبقى Conntected بالـWiFi من غير ما تقوله على الـPassword.
كمان في Option او خيار تاني وهو إنك تخليه يعمل Scan لـQR Code بدال اللينك .. وفي ثواني هيبقى مُتصل بالـWiFi بتاعك.
تطبيق AirDroid
برنامج AirDroid هو تطبيق نقل ملفات بين موبايلك وبين الكمبيوتر بتاعك بأسهل وأسرع طريقة مُمكنة .. من غير ما تكون موصل موبايلك بـCable او حتى مش شرط تكونوا على نفس شبكة الـWiFi .. كل الموضوع إن الموبايل والكمبيوتر يكونوا متوصلين بإنترنت .. بس مش أكتر من كده.
إنت هتنزل تطبيق AirDroid على موبايلك .. وتنزل برنامج AirDroid على الـPC بتاعك .. وهتعمل أكونت من على الموقع بإيميلك وتعمل تسجيل الدخول بالأكونت ده على الموبايل وعلى برنامج الكمبيوتر .. وبكده هيكونوا الإتنين مربوطين ببعض .. والتطبيق هيطلب منك صلاحيات كتير طبعًا عشان يقدر يـAccess على كل حاجه تقريبًا على موبايلك.
دلوقتي بقي إفتح البرنامج على الكمبيوتر بتاعك .. وموبايلك هيبقي قدامك وتقدر تحمل أي حاجه من موبايلك على الكمبيوتر والعكس بكل بساطه .. تعالى بقى على تاب الـNotifications او الإشعارات .. هتقدر تشوف كل الإشعارات اللي بتجيلك على الموبايل وهتظهرلك على الكمبيوتر بتاعك .. ومش بس كدة .. لما يجيلك إشعار هيظهرلك PopUp تقدر تدوس عليه وترد عليها بكل سهولة منغير ما تمسك موبايلك.
تعالى بقى على تاب الـRemote Control .. هنا تقدر تعمل حاجات لطيفه جدًا بقى .. أول حاجه هي Access Phone Camera From Desktop .. هنا بقى تقدر تفتح كاميرا موبايلك حتى لو موبايلك في أوضه تانيه .. وتقدر تاخد صور وتسجل فيديو من الكاميرا الأماميه او الخلفيه .. او تفتح الـFlash كمان لو عايز .. كل ده وموبايلك مقفول.
وكمان تقدر إنك تستخدم كيبورد الكمبيوتر بتاعك للكتابه على الموبايل، يعني لو عايز تكتب Notes طويله تقدر تكتبها من كيبورد الكمبيوتر بكل سهوله.
اما بقى بالنسبة للـScreen Mirror تقدر بيها من غير كابل ولا اي حاجه إنك تظهر شاشة موبايلك على الكمبيوتر .. وبرده تقدر تسجل فيديو أو تاخد ScreenShot او تتفرج على فيديو مثلًا بصوره كبيره على الكمبيوتر بتاعك.
أخر حاجه بقى ودي اللي هتحتاج الـCable فيها .. وهي إنك تتحكم في الموبايل بتاعك من خلال الكمبيوتر، تقدر تقلب بين التطبيقات او حتى تشغل لعبه او أي حاجه إنت عايزها وتتحكم فيها بالماوس عادي.
تطبيق Smash File Transfer
لو عندك ملفات سواء مساحتها كبيره أو صغيره على موبايلك وعايز ترفعها على سيرفر عشان تبعت اللينك لأي حد يحملها .. يبقي التطبيق ده مُناسب لطلبك.
في العادي علشان تعمل كدة فإنت هترفعها على موقع زي Mega Upload او Mediafire او ايًا كان .. بس ساعتها لازم تعمل Account على المواقع دي وليك Limit فالرفع وLimit في سرعة الـDownload .. ده غير إنك لو بعت صورة مثلًا بجوده عاليه على الـWhatsapp او الـFacebook فا أتوماتيك الصور الـQuality بتاعها بيقل .. ده غير برده إنك ليك Limit في حجم الملف اللي هتبعته ومتقدرش تبعت ملفات كبيره اوي.
إنما بقى مع برنامج Smash .. الوضع إسهل مما تتخيل .. إفتح الـApplication .. إختار الملف ايًا كان حجمه حتى لو 20 جيجا .. وإبعت اللينك لأي حد ويقدر يحمل الملف بكل سهوله وفي ثواني ومن غير Limit فسرعة التحميل او Limit فحجم الملف.
برنامج Smash File Transfer مش بيطلب منك Account علشان تستخدمه .. ولا بيطلب منك مساحه مُعينه تقدر ترفعها .. ده غير إنه مجاني تمامًا لحد دلوقتي واللينك بتاعك بيفضل شغال لمدة إسبوع كامل .. أي حد يدخل على اللينك يقدر يحمل الملف.
تطبيق Vani
احيانًا كدة بتكون بتاكل وموبايلك على الترابيزه او بتصلح حاجه وإيدك مش نضيفه .. ويجيلك مُكالمه وتبقى مش عارف تمسك الموبايل .. من هنا بقى جت فكرة تطبيق Vani .. هو تطبيق أوامر صوتيه لموبايلك خاصة بالمكالمات.
يعني تقدر تحط كلمة بصوتك .. ولما تقولها الموبايل يرد على المُتصل او يكنسل او يرد و يفتح الـSpeaker .. كل ده من غير ما تلمس موبايلك.
تطبيق Fectar
تطبيق Fectar هو شبه تطبيق Wanna Kicks .. بس مش Shoes بقى .. لا دي عربيات والعاب وأماكن سياحيه وموتوسيكلات والفضاء وحتى المركبات الفضائية بتاعة Nasa .. لو عايز تتفرج عليها هتلاقيه عليه.
كل اللي بتعمله إنك بتختار عايز تشوف ايه قدامك .. وتعمل Scan للمنطقة دي يمين وشمال وتدوس Place .. وهتلاقيها قدامك.
Comments