بما أن في موبايلات كتيرة نزلت الفترة اللي فاتت .. قررنا نعمل ليكم فيديو ترشيحات أفضل الموبايلات للألعاب في الفئة المتوسطة .. المرة دي هنبدأ بموبايلات تحت سعر الـ3000 جنية .. ونشوف في كل فئة سعرية ايه أقوى موبايل موجود من ناحية المعالج علشان تقدر تشغل العاب اندرويد براحتك.
فئة 2500 جنية :-
1- Redmi 9
موبايل ممتاز من شركة شاومي حقق نجاح كبير .. المعالج بتاع ميدياتيك Helio G80 معالج قوي في تشغيل الألعاب .. بيقدر يشغل لعبة ببجي بشكل سلس على High HD .. وكمان كول اوف ديوتي بتشتغل بشكل سلس جدًا.
وأكيد المعالج مش هو الميزة الوحيدة في Redmi 9 .. الموبايل ده بأعلى دقة شاشة في فئته السعريه، شاشة FHD+ وكمان صوته عالي وبيجي كمان بمنفذ شحن USB Type C .. والموبايل سعرة في حدود 2500 جنية للنسخة الـ64 جيجا مع 4 جيجا رام وهي دي اللي بننصح بيها .. بلاش النسخة الأصغر.
فيديو مراجعة Redmi 9 :-
2- Infinix Note 7
موبايل Infinix Note 7 حاليًا خيار محترم جدًا .. وده بفضل سعره اللي نزل جامد بعد ما Infinix Note 8 نزل .. وكمان نزلت منه نسخة جديدة بمساحة تخزين 64 جيجا.
انفينكس نوت 7 بيجي بمعالج ميدياتيك Helio G70 .. مش أقل بفرق كبير عن G80 اللي موجود في ريدمي 9 .. المعالج برده بيقدر يشغل ببجي على High HD بكل كفاءة .. ده غير كول اوف ديوتي اللي بتشتغل بشكل كويس جدا.
نوت 7 كمان فيه صوت Stereo وبطارية كبيرة وشاشة كبيرة .. هي للأسف دقتها قليلة HD+ بس ولكن مقبولة بالنسبة للفئة السعرية اللي الموبايل فيها .. نسخة الـ64 جيجا مع 4 جيجا رام بسعر 2450 جنية ونسخة 128 جيجا مع 6 جيجا رام بسعر 2700 جنية.
فيديو مراجعة Infinix Note 7 :-
بالسعر بتاع انفينكس نوت 7 الجديدة ده .. في وجهة نظري هو حرق Infinix Hot 10 اللي أرخص منه بحاجه بسيطة .. أفكر فيه ليه وهو الـNote 7 موجود ؟ وفي نفس الوقت حرق Note 8i اللي انا مش شايف إنه مميز كتير عن نوت 7 اصلًا !
وانا عارف إنك دلوقتي هتسألني على Realme 6i و Redmi Note 9 اللي بيجوا برده بمعالجات ميدياتيك G80 وG85 .. وأحب اقلك ان ادائهم مش فارق كتير عن الموبايلات اللي لسه قايلك عليها .. وكمان هما أغلى شوية علشان كاميراتهم احسن .. واحنا هنا بنبص للمعالج بس !
فئة 3500 جنية :-
1- Realme 6
موبايل Realme 6 بمعالج G90T .. بيشغل ببجي على Ultra HDR .. معالج جامد بزيادة بصراحة .. ده غير كول اوف ديوتي بيشغلها كويس جدًا وكمان فورت نايت بتشتغل بشكل رسمي على الموبايل وبتشتغل بشكل مقبول جدًا على الموبايل ده.
طبعا ده غير الشاشة الـ90 هيرتز المُمتازة مع الكاميرات الكويسة جدًا في ريلمي 6 بالنسبة لسعره الجديد .. نسخة الـ128 جيجا مع 4 جيجا رام بسعر 3800 جنية.
فيديو مراجعة Realme 6 :-
2- Infinix Zero 8i
موبايل Zero 8i هو نسخة أقل من Zero 8 في دقة الكاميرات الأمامية والخلفية فقط لا غير .. باقي المواصفات هي نفسها بدون أي إختلاف.
وبالتالي انت معاك معالج ميدياتك Helio G90T نفس الموجود في ريلمي 7 لكن مع نظام تبريد .. وشاشة IPS LCD بمعدل تحديث 90 هيرتز برده .. مواصفات متكاملة الى حد كبير ومُناسبة جدًا للألعاب.
هتقدر تلعب كل الألعاب التقيلة بكل كفاءة بس ببجي هتلاقيها اخرها High HD بس .. ومعرفش ليه معظم الموبايلات المتوسطة اللي بجربها جديدة اليومين دول بلاقي ببجي اخرها High HD بس مع ان المعالج يقدر يشغل بقوة أعلى.
المُميز في Zero 8i انه بيجي بنسخة واحدة بس بمساحة تخزين 128 جيجا مع 8 جيجا رام .. والنسخة دي بتتباع في المحلات بحوالي 3800 جنية.
فيديو مراجعة Infinix Zero 8 :-
3- Redmi Note 9S
عندك كمان موبايل Redmi Note 9S نسخة الـ64 جيجا مع 4 جيجا رام .. الموبايل بيجي بمعالج سناب دراجون 720G معالج قوي جدًا في الفئة دي .. وسبب انه جه في المركز الثالث ان اداءه الرسومي أقل حاجه بسيطة عن G90T.
وكمان الشاشة هنا بتيجي بتردد 60 هيرتز عادي مش 90 هيرتز زي ريلمي 6 وزيرو 8i .. الموبايل موجود بنسخة الـ64 جيجا و4 جيجا رام بسعر حوالي 3400 جنية مصري.
فيديو مراجعة Redmi Note 9S :-
فئة 4500 جنية :-
1- Poco X3 NFC
موبايل Poco X3 NFC الجديد بيجي بمعالج سناب دراجون 732 .. معالج قوي بيشغل الألعاب بكل كفاءة بدون اي تقصير .. وكمان الشاشة بمعدل تحديث 120 هيرتز ومعدل لمس للشاشة عالي 240 هيرتز.
ده غير الصوت الـStereo والكاميرات الجامدة جدًا والبطارية الكبيرة .. الموبايل للنسخة الـ128 جيجا مع 6 جيجا رام بقى بيتباع في حدود 4350 جنية مصري.
فيديو مراجعة Poco X3 NFC :-
2- Realme 7
موبايل Realme 7 يعتبر خيار ممتاز للألعاب بمعالج قوي ميدياتك Helio G95 .. وده تطوير غير محسوس عن G90T الموجود في ريلمي 6 .. بيقدملك نفس الأداء الرسومي الفعلي ونفس السخونية المعهودة وعلشان كده انا خليته في المركز الثاني.
ريلمي 7 بيجي بشاشة 90 هيرتز برده .. حاجه كويسة، ومعاه شاحن 65 وات واللي يعتبر أسرع شاحن في الفئة السعرية ده .. ولكن في وجهة نظري هو بيقدم قيمة أقل شوية مقابل السعر عن Poco X3 .. الموبايل سعره للنسخة الـ128 جيجا مع 8 جيجا رام حوالي 4600 جنية مصري.
فيديو مراجعة Realme 7 :-
فئة 5500 جنية :-
Nova 5T
ده يعتبر الخيار الوحيد اللي في الفئة دي مناسب للألعاب .. هو موبايل قديم شوية أه بس محترمة جدًا .. بيقدملك معالج رائد Kirin 980 اللي بيقدم أحسن أداء في الفئة السعرية دي وأحسن أداء عمومًا في الفئة المتوسطة.
الموبايل مفيش قلق منه لإنه بيجي بخدمات جوجل بدون أي مشاكل وهتفضل شغاله عليه لإنه نزل قبل الحظر الأمريكي .. والموبايل بيشغل ببجي على أعلى اعدادات جرافيك بكل سلاسة وبدون أي مشاكل او سخونية.
ده غير الخامات المحترمة بزيادة من هواوي .. هو بس شاشته صغيرة شوية .. حجمها 6.2 بوصة وترددها 60 هيرتز .. وبطاريته صغيرة شوية ولكن أدائها معقول .. قديم نسبيًا في السوق ولكن له اسمه وماسك سعر .. سعره حوالي 5500 جنية للنسخة 128 جيجا مع 8 جيجا رام.
فيديو مراجعة Nova 5T :-
يكفي إني أقولك ان بوجود موبايل نوفا 5 تي .. موبايلات هواوي الجديدة Nova 7 5G و Nova 7 SE مبقاش ليهم لازمة أوي .. الناس مش بتفضلهم بسبب خوفهم من غياب خدمات جوجل وكله بيروح لـNova 5T اللي مفيش شكوة ظهرت منه لحد دلوقتي !
ومن بعد Kirin 980 الموجود في نوفا 5 تي مش هتلاقي معالج يعجبك جدا غير الـSD855 Plus وده مش هتلاقيه غير في Realme X2 Pro الموجود بشكل غير رسمي في مصر وممكن تلاقيه في حدود 7500 جنية مثلًا.
وهتلاقي نفس المعالج في Realme X3 Superzoom اللي رجعناه قبل كده برده وده هتلاقي في حدود 8500 جنية .. دول الموبايلين اللي هتحس بيهم انك بتاخد اداء اعلى من نوفا 5 تي .. وأنا عارف ان في S10 Lite بسناب دراجون 855 ولكنه للأسف مبقاش موجود في السوق.
شهر ديسمبر الجاي هنشوف موبايلات Mi 10T و Mi 10T Pro من شاومي بمعالجات SD865 وبسعر في حدود 8000 ~ 9000 جنية مصري !
Comments