علشان نقدر نحدد هل الموبايل مناسب للإستخدام في الألعاب لازم نتأكد من كذا حاجه .. زي المعالج وقوته، وزي معدل التحديث بتاع الشاشة وجودتها .. والصوت هل هو Stereo وعالي ولا لأ .. وأخيرًا البطارية وسرعة الشحن .. وبعد الزيادات المتتالية في أسعار الموبايلات، النهارده هنعرف أفضل موبايلات للألعاب في الفئة المتوسطة.
من 4000 جنية الى 5000 جنية :-
1- Infinix Note 11
الموبايل ده بيجي بمعالج ميدياتك Helio G88 بأداء رسومي كويس .. مع شاشة كبيرة 6.7 بوصة AMOLED بدقة FHD+ بمعدل تحديث 60 هيرتز .. صوت Stereo وبطارية ضخمة 5000 مللي امبير وشحن سريع 33 وات.
سعر انفنكس نوت 11 للنسخة الـ128 جيجا مع 4 جيجا رام بسعر 4800 جنية، والنسخة الـ128 جيجا مع 6 جيجا رام بسعر 5000 جنية.
2- Redmi 10
سواء النسخة القديمة او نسخة 2022 الاتنين واحد .. بيجي بمعالج ميدياتك Helio G88 .. شاشة 6.5 بوصة IPS LCD بدقة FHD+ وبمعدل تحديث 90 هيرتز .. وسطوع الشاشة تحت الشمس من أهم عيوبه .. صوت الموبايل Stereo وهو الأفضل في الفئة السعرية دي .. بطارية 5000 مللي امبير والشحن 18 وات.
سعر الموبايل للنسخة الـ128 جيجا مع 4 جيجا رام بسعر 4800 جنية، نسخة 128 جيجا مع 6 جيجا رام بسعر 5300 جنية.
3- Galaxy A22
الموبايل ده بيجي بمعالج ميدياتك Helio G80 اللي يعتبر قريب من Redmi 10 و Infinix Note 11 .. مع شاشة 6.4 بوصة AMOLED بدقة HD+ وبمعدل تحديث 90 هيرتز .. ودي الشاشة الأفضل في الفئة السعرية دي .. الموبايل للأسف صوته Mono متواضع، بطارية 5000 مللي امبير لكن سرعة الشحن 15 وات.
سعر الموبايل للنسخة الـ64 جيجا مع 4 جيجا رام بسعر 4700 جنية، ونسخة 128 جيجا مع 4 جيجا رام بسعر 5000 جنية.
4- Realme Narzo 50A
سواء Narzo 50A او Realme C25s .. الإثنين نفس الموبايل .. معالج Helio G85 واللي يعتبر في نفس المستوى الطبيعي في الفئة دي .. شاشة 6.5 بوصة IPS LCD بدقة HD+ بتردد 60 هيرتز .. صوت Mono عادي .. بطارية ضخمة جدًا بحجم 6000 مللي امبير لكن بتدعم الشحن بقدرة 18 وات بس.
نسخة 64 جيجا مع 4 جيجا رام بسعر في حدود 4500 جنية، اما نسخة 128 جيجا مع 4 جيجا رام في حدود 5000 جنية.
من 5000 جنية الى 6000 جنية :-
1- Redmi Note 10 5G
موبايل قديم بس بيقدملك معالج قوي Dimensity 700 5G بتكنولوجيا 7 نانو بيقدم اداء قوي وفي نفس الوقت سخونة قليلة واستهلاك بط ارية ممتاز .. شاشته 6.5 بوصة IPS FHD+ بتردد معقول 90 هيرتز .. للأسف الصوت مش ستريو و الكاميرات متواضعة .. بس داعم لخاصية الـ NFC .. بطارية كبيرة 5000 مللي أمبير و شحن 18 واط بس.
سعر ريدمي نوت 10 5G للنسخة 128 جيجا مع 6 جيجا رام هو 5700 جنية مصري.
2- Infinix Note 11 S/Pro
سواء الموبايل ده او Infinix Note 11 Pro اللي الفرق بينهم في الكاميرات بس لصالح البرو أكيد.. بيقدموا معالج ميدياتك Helio G96 بتكنولوجيا 12 نانو واللي يعتبر تاني اقوى معالج في الفئة السعرية دي بعد معالج شاومي .. بيقدم أداء رسومي كويس جدا في الفئة دي .. لكن مش أفضل حاجه من ناحية السخونية ( بيسخن شوية ) .. شاشة 6.95 بوصة ضخمة IPS LCD بدقة FHD+ بتردد 120 هيرتز، لكن السطوع مش أعلى حاجه.
معاك صوت Stereo ممتاز، وسوفت وير انفينكس الخفيف .. بطارية 5000 مللي امبير تدعم الشحن السريع بقدرة 33 وات .. سعر انفنكس نوت 11S للنسخة 128 جيجا مع 8 جيجا رام بسعر 5500 جنية مصري.. وانفنكس نوت 11 برو للنسخة 128 جيجا مع 8 جيجا رام بسعر 5900 جنية مصري.
من 6000 جنية الى 7000 جنية :-
Redmi Note 11S
الموبايل ده بيجي بمعالج ميدياتك Helio G96 الممتاز في الأداء الرسومي، مع شاشة AMOLED بدقة 6.43 بوصة بدقة FHD+ بمعدل تحديث 90 هيرتز .. صوت Stereo ممتاز وبطارية 5000 مللي امبير بتشحن بقدرة 33 وات.
سعر الموبايل للنسخة الـ128 جيجا مع 6 جيجا رام حوالي 6500 جنية .. ونسخة 128 جيجا مع 8 جيجا رام في حدود 7000 جنية.
الموبايل ميعتبرش بيقدم زيادة من ناحية المعالج عن الموبايلات في الفئة السعرية الي قبله .. فلو يهمك الاداء فقط ننصحك يا تنزل لفئة سعرية أقل .. يا تزود وتشوف الفئة السعرية الأعلى.
من 7000 جنية الى 8000 جنية :-
1- Galaxy M52 5G
معالج كوالكوم سناب دراجون 778G اللي بيجمع بين الأداء الرسومي الممتاز والإستقرار .. مع شاشة Super AMOLED Plus بدقة FHD+ بحجم 6.7 بوصة بمعدل تحديث 120 هيرتز .. شاشة فائقة، للأسف صوت Mono مش Stereo .. بطارية بحجم 5000 مللي امبير والشحن بقدرة 15 وات للأسف.
موبايل Galaxy M52 5G للنسخة الـ128 جيجا مع 8 جيجا رام بسعر في حدود 7000 جنية.
2- Realme GT Master Edition
الموبايل ده بيجي بمعالج سناب دراجون 778G برده .. مع شاشة 6.43 بوصة من نوع Super AMOLED بدقة FHD+ وبمعدل تحديث 120 هيرتز .. الصوت للأسف مش Stereo .. البطارية 4300 مللي امبير لكن أداءها كويس، والميزة القوية هنا هو الشحن السريع بقدرة 65 وات .. والبصمة تحت الشاشة السعرية جدا وشبكات واي فاي قوية.
سعر الموبايل للنسخة الـ128 جيجا مع 6 جيجا رام بسعر 8000 جنية، ونسخة 256 جيجا مع 8 جيجا رام بسعر 9000 جنية.
فئة 10 الاف جنية :-
1- Xiaomi 11T
الموبايل ده بيجي بمعالج ميدياتك Dimensity 1200 5G الممتاز جدًا على جنب الأداء .. مع شاشة 6.67 بوصة من نوع AMOLED بدقة FHD+ وبمعدل تحديث 120 هيرتز .. مع صوت Stereo ممتاز وتصميم فخم بخامات زجاجية، بطارية 5000 مللي امبير مع شحن سريع جدًا بقدرة 67 وات.
سعر موبايل Xiaomi 11T للنسخة الـ256 جيجا مع 8 جيجا رام في حدود 10 الاف جنية.
2- Realme GT Neo 2
الموبايل ده بيجي بمعالج كوالكوم سناب دراجون 870 مع شاشة 6.62 بوصة من نوع AMOLED بدقة FHD+ بتردد 120 هيرتز .. مع صوت Stereo ممتاز، وبطارية ضخمة 5000 مللي امبير وشحن سريع 65 وات.
سعر الموبايل للنسخة الـ256 جيجا مع 12 جيجا رام بسعر 11 الف جنية.
3- Galaxy S20 FE 5G
هنا احنا بنرشح نسخة سناب دراجون من S20 FE ده، لإن في نسخة بمعالج اكسينوس لكن مش بنرشحها إطلاقًا .. القصد هي نسخة اللي بتيجي بمعالج سناب دراجون 865 الرائد مع شاشة 6.5 بوصة Super AMOLED بمعدل تحديث 120 هيرتز بدقة FHD+ .. بطارية 4500 مللي امبير وسرعة شحن 25 وات.
موبايل Galaxy S20 FE 5G ده بيتميز بتجربة الموبايلات الرائده، بيدعم الشاحن اللاسلكي وبيقدم مستوى كاميرات قوي جدًا ومقاوم للماء والغبار بشهادة IP68 .. نسخة الـ128 جيجا مع 8 جيجا رام في حدود 10 الاف جنية.
Comments