نظام الـiOS تحسه نظام جد شويه، مفيهوش رفاهية كتير، مفيش إمكانيات كبيرة تخليك تخصص في واجهة موبايلك زي اندرويد .. النهارده هنقدملك أفضل تطبيقات مجانية للايفون تقدر تستفيد منها بإنك تتسلى او تعمل حاجات مُهمة متقدرش تعملها بأي تطبيق تاني، والتطبيقات كلها مجانية بالكامل.
تطبيق Calculator X
التطبيق ده لو حابب تخفي صور وفيديوهات من موبايلك، علشان لو في حد بيفتح موبايلك بإستمرار وانت مش عايزه يشوف حاجات مُعينه، وكمان هو يعتبر متصفح خفي في نفس الوقت .. بتنزل التطبيق ولما بتفتحه بيطلب منك تحدد رقم سري لما تكتبه توصل للملفات اللي انت خافيها فيه، وعلى جانب أخر هو آلة حاسبة عاديه.
تطبيق Live Wallpapers ME
ده تطبيق للناس اللي بتحب تغير شغل الموبايل بتاعها وتعدل فيه وتخصصه على مزاجها .. ده تطبيق خلفيات فيه صور كتير جدًا وفيه أقسام كتيره تقدر تختار منها، بتختار الصورة اللي تعجبك وتقدر تنزلها وتحطها خلفية للموبايل ولما تدوس عليها تتحرك .. برنامج لطيف ومُسلي.
تطبيق Fonts Keyboard
ده تطبيق كيبورد تقدر تغير منه شكل الكيبورد لأشكال كتير تقدر تختار منها وتطلع بأفضل شكل يعجبك وتستخدمه، وكمان تقدر تكتب منه بخطوط مُختلفة .. بيوفرلك كذا خط شيك ومُميز تقدر تكتب بيهم بشكل مُميز.
بتنزل التطبيق وبتدخل على الاعدادات بتاعت الموبايل وبتدخل على General وبعدين Keyboard وبتدخل على Keyboards وبعدين بتدوس Add New Keyboard وهتختار Fonts Keyboard.
تطبيق BgRem
ده تطبيق مُميز جدًا ومُختلف جدًا وبيعمل حاجه مفيش أي تطبيق تاني بيقدر يعملها .. وهو انه بيقدر يشيل أي خلفية لأي صورة او فيديو عندك، بس لازم يكون في انترنت علشان يقدر يشتغل لإنه بيرفع الصور والفيديوهات اللي بتشتغل عليها على النت وبعدين بيحملها تاني لما بيشيل خلفيتها، تقدر تشيل خلفية وتركب خلفية تانيه مثلًا.
تطبيق Paste
لو انت بتـScrool او بتعمل حاجه وفي حاجه عجبتك وعايز تعملها Save .. او عايز تسجل رابط مهم عندك عايز تفتحه بعدين، مش محتاج تاخد المحتوى كوبي وتروح تعمله Paste في Note مثلًا .. التطبيق ده تقدر تعمل الحاجه اللي انت محتاجها كوبي وهي هتتسيف عندك وتقدر ترجعلها أي وقت، وبيسجل كل حاجه بتعملها كوبي.
تطبيق Video Lite
ده تطبيق بيخليك تقدر تشغل يوتيوب ويوتيوب ميوزك من غير أي إعلانات خالص، وتقدر كمان تقفل الـLock والفيديو يفضل شغال صوت ميفصلش .. وتقدر تعمل Minimize للشاشة وتفتح أي تطبيق تاني زي فيس بوك او واتس اب ويفضل شغال معاك عادي من غير أي مشاكل.
تطبيق DBox
لو نفسك تحمل فيديوهات من فيس بوك او يوتيوب .. البرنامج ده بيخليك تحمل أي فيديوهات ولحد جودة 4K وكمان تحول أي فيديو لـMP3 او صوت فقط، البرنامج طريقة إستخدامه بسيطة جدًا وسهله جدًا، تقدر بكل سهولة تحمل أي فيديو انت عايزه من يوتيوب او فيس بوك بأي جودة انت تختارها.
تطبيق Dualgram
ده تطبيق بيخليك تقدر تصور فيديو بالكاميرا الأمامية والكاميرا الخلفية مع بعض في نفس الوقت، وتختار شكل التصوير يكون عامل ازاي من كذا شكل علشان لو بتصور Vlogs مثلًا، وكمان تقدر تختار العدسة اللي تقدر تصور بيها من الكاميرات الخلفية سواء العدسة الـWide او العادية او الـZook.
Comments