في موبايلات كتيره نزلت السوق المصري الفتره الأخيره .. وده هيخليك في حيرة كبيرة .. خصوصًا لو انت عايز تشتري موبايل للألعاب وكل اهتمامك الألعاب .. النهارده في المقالة دي هعرفك افضل الموبايلات اللي ممكن تشتريها وتكون مناسبة للألعاب من سعر 2500 جنية لـ 6000 جنية !
من 2000 لـ2500 جنيه :-
Realme C3 :-
لو انت عايز موبايل تحت الـ2500 جنيه مصري هيكون عندك موبايل Realme C3 .. موبايل بيجي بمعالج ميدياتك Helio G70 اللي بتكنولوجيا 12 نانو .. راجعنا الموبايل ده قبل كده وقولنا انه ممتاز في الألعاب .. بيشتغل مثلًا لعبة PUBG على اعدادات جرافيك High HD وبيشغل كول اوف ديوتي على اعدادات جرافيك Low وفريمات Medium.
الموبايل ممتاز جدًا في تشغيل الألعاب .. يمكن ظهر فيه بعض المشاكل البسيطه واتحلت بتحديث سوفت وير .. والموبايل سعره الرسمي في مصر 2290 جنيه للنسخة الوحيده الموجوده منه في مصر بمساحة تخزين 64 جيجا مع 3 جيجا رام
بس للأسف .. موبايل Realme C3 نزل منه كمية وخلصت، المحلات بقى بقت بترفع سعر الموبايل بشكل كبير وبتوصله لأرقام غريبة .. عمومًا متشتريش الموبايل بأغلى من سعره، الموبايل مش طياره يعني وسعره الرسمي هو المناسب اغلى من كده بلاش.
من 2500 لـ3000 جنيه :-
1- Realme 6i :-
في الفئة دي هتلاقي 4 موبايلات .. اولهم وأحسنهم من وجهة نظري الـRealme 6i .. الموبايل ده بيجي بمعالج ميدياتك Helio G80 بيشتغل بتكنولوجيا 12 نانو .. مش فارق كتير عن الـG70 الموجود في الـC3 اللي اتكلمنا عنه فوق .. بس الموبايل نفسه فيه بعض الإضافات اللي مخليه تجربة الإستخدام احسن.
زي مثلًا الكاميرا الاماميه والخلفيه اللي هيدوك اداء كويس وزي الـUSB Type C .. بشكل عام الموبايل هيكون احسن ومتكامل اكتر .. وكمان الموبايل موجود في المحلات وتعرف تجيبه بسهولة مش هتقعد تدور عليه.
الموبايل بيشغل ببجي على اعدادات جرافيك High HD وبتشتغل كويس من غير تهنيج .. وكول اوف ديوتي بتشتغل على اعدادات جرافيك Low والفريمات Medium برده ومن غير اي مشاكل .. والموبايل ده سعره للنسخة الـ64 جيجا مع 3 جيجا رام بـ2800 جنيه.
2- Honor 9X Lite :-
في المركز التاني بيجي الـHonor 9X Lite .. معاك ان الموبايل قديم ونازل بإسم جديد بس ده مش مهم .. المهم الاداء الفعلي بتاعه وتجربتك انت ليه .. الموبايل بيجي بمعالج Kirin 710 من هواوي واللي بيقدم اداء كويس تحت الـ3000 جنيه ومفيش اي مشاكل.
الموبايل بيشغل PUBG على اعدادات جرافيك High HD وكول اوف ديوتي بتشتغل على جرافيك Low وفريمات Medium .. والموبايل ده اصلًا بيتميز بخاماته الممتازه في الفئة دي مع شاشة FHD+ قوية .. الموبايل نفسه هيكون ممتاز وPremium معاك من الأخر بس لازم تبقى متقبل السوفت وير القديم والشاشة اللي بتيجي بنوتش عريض والـMicro USB 2.0.
3- Infinix Note 7 :-
في المركز التالت بقى بيجي الـInfinix Note 7 .. وبصراحه انا هرشحه عشان الـ128 جيجا والـ6 جيجا رام مش اكتر .. والموبايل بيجي بمعالج الميدياتك Helio G 70 الموجود في Realme C3 واللي ميختلفش كتير عن اداء الـRealme 6i .. الفكره بس انه بيجي بشاشة كبيره مع مساحة تخزين ضخمه و6 رام وبطارية ضخمه مع شحن سريع.
الموبايل بيشغل لعبة ببجي على اعدادات جرافيك High HD برده .. وكول اوف ديوتي بتشتغل على اعدادات جرافيك Low وفريمات Medium .. يعني مفيش اي اختلاف بينه وبين الموبايلات التانيه اللي معاه في الفئة السعرية دي .. الموبايل ده سعره في المحلات دلوقتي للنسخة الـ128 جيجا مع 6 جيجا رام حوالي 2850 جنيه.
بس لازم تتقبل في الموبايل ده ان كاميراته مش حلوه سواء الأماميه او الخلفيه وكمان الشاشة بتاعته كبيره بس جودتها مش كويسه وكثافة البيكسلات فيها ضعيفه شوية .. هو اه في موبايلات كتير HD+ رشحناها بس حجم الشاشة بتاعتهم صغيره وده بيخلي جودة الشاشة احسن.
4- Redmi Note 8 :-
اخر موبايل في الفئة دي هو الـRedmi Note 8 .. اللي بيجي بمعالج سناب دراجون 665 ثماني النواة بمعمارية 11 نانو ميتر .. والموبايل بيقدر يشغل ببجي على اعدادات جرافيك Medium وبيشغل كول اوف ديوتي على Very High .. طب ليه انا خليت الموبايل أخر موبايل في الفئة دي ؟
الموبايل ده بيقدم تصميم زُجاجي بخامات بريميم وشاشة FHD+ محترمه .. وانا خليته اخر موبايل في الفئة دي عشان الموبايل ده اولًا فيه بعض المشاكل في الشاشة زي التطبيع وفيه مشاكل برده في الشبكه ودي حاجات تعتبر اساسية .. طيب المشاكل دي اصلًا محصلتش معايا، هي حصلت مع نسبة صغيره من المستخدمين.
بس السبب الأساسي اللي خلاني احط الموبايل ده في المركز الأخير هو ان الـXiaomi Note 9 اللي هيجي بمعالج اقوى هينزل قريب خلاص خلال شهر .. فا منصحكش تجيب موبايل والـVersion او الجيل الجديد منه هينزل خلال شهر.
اما لو انت عايز تشتري الـXiaomi Note 8 فا هو سعره حوالي 2750 جنيه للنسخة الـ64 جيجا مع 4 جيجا رام .. والحاجات اللي بتميز الموبايل ده عن الباقيين هي الكاميرات المحترمه جدًا الموجوده فيه مع الخامات الزُجاجيه الفخمه والشاشة الـFHD+ المحترمه اللي موجوده فيه.
من 3000 لـ3500 جنيه :-
1- Redmi Note 9S :-
في الفئة دي عندك موبايلين .. هنبدأ المركز الأول بالـRedmi Note 9S واللي بيجي بمعالج كوالكوم سناب دراجون 720G ثماني النواة بيشتغل بمعمارية 8 نانو ميتر .. معالج محترم جدًا في الفئة السعرية دي .. هو مش سريع اوي بس كويس جدًا تحت سعر 3500 جنيه.
الموبايل ده بيشغل لعبة PUBG على High HD وبتشتغل كويس وبيشغل كول اوف ديوتي على Very High وكمان بيشغل فورت نايت على اعدادات جرافيك Medium .. يعني عندك كل الألعاب متاحة قدامك وبتشتغل بدون مشاكل والاعدادات بتاعتها كويسه جدًا وتجربتها سريعة وسلسة ومفيهاش مشاكل.
وطبعا كل ده بيتضاف عليه التصميم الزجاج الفخم مع الشاشة الكبيره الكامله والكاميرات المحترمه اللي من افضل كاميرات الفئة دي .. كل الكلام ده محترم جدًا في الموبايل وسعره للنسخة الـ64 جيجا مع 4 جيجا رام حوالي 3300 جنيه وفي نسخة اعلى 128 جيجا مع 6 جيجا رام بسعر 3770 جنيه.
لو حاسس ان في بعض المشاكل في الـRedmi Note 9S او مقلق من اللاج اللي في السوفت وير اللي اكيد هيتحل بتحديث من شاومي .. ممكن تشوف الخيار التاني.
2- Realme 5 Pro :-
موبايل Realme 5 Pro يعتبر بديل محترم للنوت 9 اس .. هو اه قديم بس محترم وبيجي بمعالج سناب دراجون 712 ثماني النواة بمعمارية 10 نانو ميتر .. اقل حاجه بسيطه من الـ720G وبيشغل ببجي على اعدادات جرافيك High HD وبيشغل كمان كول اوف ديوتي على Very High وفورت نايت كمان بتشتغل على اعدادات جرافيك Medium.
مفيش تقصير من الموبايل ده من ناحية الأداء الرسومي في ريلمي 5 برو .. والموبايل ده موجود دلوقتي للنسخة الـ128 جيجا مع 4 جيجا رام بسعر في حدود الـ3350 جنيه.
من 3500 لـ4500 جنيه :-
1- Realme 6 :-
الفئة دي فيها حرب كبيره اوي .. عندك 4 موبايلات محترمين في الألعاب واولهم هو موبايل Realme 6 .. الموبايل بيجي ببروسيسور ميدياتك Helio G90T .. تصميم الموبايل بيجي من البلاستيك .. ولما استخدمت الموبايل وعملت التحديثات اللي ريلمي بعتتها .. الموبايل سخونيته بقت مقبوله .. كلمة مبيسخنش دي كلمه مستحيله على كل الموبايلات اللي اتكلمنا عنها دلوقتي.
المعالجات والموبايلات اللي بتطلع لك اداء رسومي عالي غالبًا وبنسبة كبيره بتسخن .. لازم تبقى متقبل الفكره دي .. مينفعش تقارن موبايل في 2020 بيشغلك العاب تقيله على اعدادات جرافيك عاليه بموبايل تاني قديم مكانش بيشغل العاب اصلًا وتقولي ده بيسخن وده مبيسخنش.
المهم .. موبايل ريلمي 6 هيشغل لك ببجي على اعدادات جرافيك Ultra HDR على النسختين عادي خالص وكول اوف ديوتي هتشتغل على اعدادات جرافيك Very High بدون مشاكل برده .. وفورت نايت هتشتغل على اعدادات جرافيك High.
الموبايل ده سعره في المحلات للنسخة الـ128 جيجا و4 جيجا رام بحوالي 3850 اما النسخة الـ128 جيجا و8 جيجا رام بحوالي 4250 جنيه .. ولو معاك فلوس وتقدر تجيب النسخة الأعلى هاتفها بدون ما تفكر كتير.
2- Redmi Note 8 Pro :-
تاني موبايل في الفئة دي هو الـNote 8 Pro واللي بيجي برده بنفس البروسيسور الميدياتك Helio G90T اللي موجود في الـRealme 6 .. وانا خليته في المركز التاني عشان التصميم الزُجاجي بيسخن اكتر حاجه بسيطه من الـRealme 6 .. هو المفروض ان النوت 8 برو فيه تبريد مائي والريلمي 6 مفيهوش .. بس بصراحه مش ملاحظ الموضوع ده خالص .. وعمومًا الاتنين بيسخنوا مفيش واحد احسن من التاني.
الموبايل بيشغل نفس الألعاب على نفس اعدادات الجرافيك اللي كانت موجوده في ريلمي 6 .. ببجي بتشتغل على Ultra HDR وكول اوف ديوتي بتشتغل على Very High وفورت نايت بتشتغل على اعدادات جرافيك High.
النوت 8 برو سعره دلوقتي حوالي 3650 جنيه للنسخة الـ64 جيجا مع 6 جيجا رام .. والنسخة الـ128 جيجا مع 6 جيجا رام سعرها حوالي 4100 جنيه.
3- Honor 9X Pro, Nova 7i :-
مبدأيًا الموبايلين دول لازم تبقى عارف انهم مش عليهم خدمات جوجل .. لو انت عندك مشاكل مع الموضوع ده وشايف انك مش هتشتري موبايل من غير جوجل، خلاص خليك في اول خيارين.
الموبايلين دول بيجو بنفس البروسيسور اللي هو الكيرين 810 بتكنولوجيا 7 نانو .. البروسيسور ده خداع شوية .. ارقامه كبيره على الـBenchmarks وبيقدم لك اداء كويس في الإستخدام العادي .. بس الأداء الرسومي بتاعه اضعف من الخيارات التانيه اللي اتكلمنا عنها فوق.
يعني لما جربت الـ9X Pro لاقيت ان PUBG بتشتغل على High HD وكول اوف ديوتي بتشتغل على Very High .. ولعبة فورت نايت مش شغاله اصلًا .. اما لما جربت الـNova 7i لاقيتها شغاله على نفس الاعدادات في ببجي بس في كول اوف ديوتي لاقيتها شغاله على Low Medium .. مش عارف ازاي بصراحه.
الموبايلين دول زي ما قولتلك .. اضعف في الأداء الرسومي من الريلمي 6 والنوت 8 برو .. بس سخونيتهم اقل بفرق كبير جدًا .. فا لو انت مقلق من حوار السخونيه شوف موبايل من الاتنين دول مع العلم ان مفيش خدمات جوجل ودي تعتبر مشكله كبيره دلوقتي !
بالنسبة للأسعار فا الـHonor 9X Pro النسخة الـ256 جيجا مع 6 جيجا رام بتيجي بسعر 4300 جنيه اما الـNova 7i النسخة الـ128 جيجا مع 8 جيجا رام بتيجي بسعر 4100 جنيه .. طيب لو عايز تختار موبايل بينهم .. هقولك خليك في النوفا 7i لإنه بيقدم شحن اسرع وكاميرات احسن خصوصًا الكاميرا السيلفي .. الهونر 9 اكس برو بيتفوق بس في الخامات الأحسن والمساحة الأكبر.
من 4500 لـ5500 جنيه :-
1- Honor 20, Nova 5T :-
الموبايلين دول بيقدموا تجربة اداء مفيش زيها في الفئة السعرية دي .. لإن هما بيجو بمعالج Kirin 980 بتكنولوجيا 7 نانو .. سيبك من اسم المعالج المهم ده معالج فلاج شيب فعلًا بيقدم اداء ممتاز هو الأقوى في الفئة دي.
لعبة ببجي بتشتغل على Ultra HDR وكول اوف ديوتي بتشتغل على Very High وفورت نايت بتشتغل على EPIC .. الأداء اللي هتاخده من الموبايلات دي ممتاز وعدد الفريمات اكتر من اي موبايل تاني بفرق ملحوظ .. الحقيقه تجربة الألعاب مش هتلاقي احسن منها في الـHonor 20 والـNova 5T.
بالنسبة لأسعار الموبايلات دي النوفا 5 تي بيجي بنسخة واحده بمساحة 128 جيجا مع 8 جيجا رام بسعر 5700 جنيه اما الهونر 20 بيجي بنسخة واحده برده بمساحة تخزين 128 جيجا بس مع 6 جيجا رام وبتيجي بسعر 5400 جنيه.
واحب اقولك ان برده الموبايلات دي لما بتلعب عليها على اعدادات جرافيك عاليه وبتعلي الـBrightness بتسخن زي باقي الموبايلات اللي قولنا عليها في الفيديو ده.
والموبايلات دي بيشتغل عليها خدمات جوجل عادي بشكل مُستقر وبدون اي مشاكل.
2- Realme 6 Pro :-
الموبايل ده جديد من شركة ريلمي في الفئة دي .. الموبايل ده بيجي بمعالج سناب دراجون 720G اللي موجود في Note 9S واللي هيجي في Note 9 Pro .. انا رشحتلك المعالج ده في فئة 3500 جنيه فا عيب اوي اقولك هاته في فئة الـ5500 جنيه .. الريلمي 6 برو اداءه ميقربش خالص للـHonor 20 او الـNova 5T وهو اقل منهم بفرق ملحوظ جدًا.
ممكن يقربلهم من ناحية الكاميرات مثلًا او البطارية والشحن السريع .. بس من ناحية الألعاب لأ الموبايل مش خيار يترشح تمامًا بالسعر ده .. والـ90 هيرتز اللي فيه مش هيفرقوا معاك في الالعاب عشان محدش بس يشتريه على امل انه ياخد عدد فريمات اكبر في الألعاب.
نصيحة من موبيزل :-
وأخيرًا ياريت في اليومين الحر اللي احنا فيهم دول .. بلاش تدوس اوي على الموبايل وبلاش ببجي ساعتين تلاته في اوضه حر والكلام ده .. بلاش تشحن الموبايل وتستخدمه في نفس الوقت .. بلاش وانت بتشحن الموبايل تحطه على قماش او قطن حاول تحطه على مكتب او سطح مستوي.
Comments