اختيارات مُتابعين موبيزل لأفضل الموبايلات في 2021.. ورأي موقع موبيزل !

في نهاية 2021 عملنا إستطلاع رأي لـ مُتابعين موقع موبيزل علشان نقدر نعرف آرائهم بخصوص أفضل الموبايلات اللي نزلت خلال سنة 2021 في كل الفئات السعرية .. واستمر إستطلاع الرأي على موقع موبيزل لمدة 10 أيام، من يوم 16 ديسمبر حتى يوم 26 ديسمبر، وشارك في الإستطلاع أكثر من 190 ألف شخص.

في المقال ده النهارده هنوضحلكم نتائج إستطلاع الرأي لأفضل موبايلات نزلت السوق المصري في 2021، وكمان هنوضح رأي موقع موبيزل في الإختيارات اللي حصلت في كل فئة سعرية.


افضل موبايل إقتصادي 2021

الفئة الإقتصادية ( أقل من 3000 جنية ) :-

أول 3 موبايلات هما Redmi 10 ثم Infinix Hot 11S ثم Realme C25s .. هما فعلًا الأفضل في الفئة دي من وجهة نظر موقع موبيزل، واختيارك في الفئة دي مش هيخرج عنهم، الموضوع كله هيرجع لتفضيلك الشخصي.

الـRedmi 10 موبايل متكامل الى حد ما، فيه مستشعرات شاومي المعروفة وفيه صوت Stereo ومجموعة مواصفات متكاملة، لكنه مش الأفضل من ناحية تجربة الإستخدام النهائية، وألوان الشاشة فيه متواضعه.

موبايل Infinix Hot 11S موبايل جميل جدًا، أداءه حلو جدًا، كاميراته ممتازة .. بشكل عام الموبايل ده بيقدملك Package لطيف وتجربة نهائية كويسة، وكمان شاشته ضخمة لمُحبي الشاشات الكبيرة.

موبايل Realme C25s هو موبايل ممتاز وسط مُنافسيه من ناحية الشبكة وجودة الخامات والتقفيل .. والسوفت وير الراقي اللي مفيهوش اي مشاكل ولا فيه أي اعلانات مُزعجة.

سعر Redmi 10 :-

  • نسخة 64 جيجا مع 4 جيجا رام بسعر 3050 جنية
  • نسخة 128 جيجا مع 4 جيجا رام بسعر 3300 جنية
  • نسخة 128 جيجا مع 6 جيجا رام بسعر 3650 جنية

سعر Infinix Hot 11S :-

  • نسخة 128 جيجا مع 4 جيجا رام بسعر 3000 جنية

سعر Realme C25s :-

  • نسخة 64 جيجا مع 4 جيجا رام بسعر 2850 جنية
  • نسخة 128 جيجا مع 4 جيجا رام بسعر 3250 جنية

افضل موبايل شبه متوسط 2021

الفئة شبة المتوسطة ( أقل من 4000 جنية ) :-

أكثر 3 موبايلات الناس اختارتهم هما Redmi Note 10S ثم Galaxy A22 ثم Redmi Note 10 .. وفعلًا دي هتكون اختيارات موقع موبيزل لأفضل 3 موبايلات في الفئة دي.

موبايل Redmi Note 10S هو أفضل موبايل موجود في الفئة السعرية دي .. بيقدم مجموعة مواصفات متكاملة وتجربة نهائية مستقرة ممتازة، وفي المركز اللي بعده Galaxy A22 اللي كان بيتميز بإنه الأرخص سعرًا وسطهم، لكن مع الزيادات في الأسعار بسبب الجمارك الموبايل سعره رفع، ولا يزال هو الأفضل بعد نوت 10 اس.

وأخيرًا Redmi Note 10 العادي، موبايل ممتاز، هو أرخصهم سعرًا .. لكنه للأسف مش متاح للبيع من فترة كبيرة!

سعر Redmi Note 10S :-

  • نسخة 64 جيجا مع 6 جيجا رام بسعر 3750 جنية
  • نسخة 128 جيجا مع 6 جيجا رام بسعر 4250 جنية
  • نسخة 128 جيجا مع 8 جيجا رام بسعر 4500 جنية

سعر Galaxy A22 :-

  • نسخة 64 جيجا مع 4 جيجا رام بسعر 3300 جنية
  • نسخة 128 جيجا مع 4 جيجا رام بسعر 3600 جنية
  • نسخة 128 جيجا مع 6 جيجا رام بسعر 4050 جنية

سعر Redmi Note 10 (غير متاح حاليا بالسوق) :-

  • نسخة 64 جيجا مع 4 جيجا رام بسعر 3000 جنية
  • نسخة 128 جيجا مع 4 جيجا رام بسعر 3350 جنية
  • نسخة 128 جيجا مع 6 جيجا رام بسعر 3700 جنية

افضل موبايل متوسط 2021

الفئة المتوسطة ( أقل من 6000 جنية ) :-

أكثر 3 موبايلات تم التصويت لصالحهم في الفئة دي هما Galaxy A52 ثم Redmi Note 10 Pro ثم Poco X3 Pro .. هي تعتبر اختيارات كويسة لكن في بعض الملاحظات.

موبايل A52 من سامسونج فعلًا هو أفضل موبايل في الفئة دي، لكن ده قبل ما ينزل A52s 5G اللي الفرق السعري بينهم مش كبير، اما عن Note 10 Pro فا هو يعتبر موبايل متكامل من جميع الجوانب، بيقدم مجموعة مواصفات هي الأفضل في الفئة السعرية دي، لكنه ميعتبرش الأفضل في التجربة الفعلية.

وأخيرًا Poco X3 Pro اللي يعتبر من أفضل الاختيارات في الفئة دي .. موبايل بمعالج رائد لعشاق الـGaming والألعاب، الـGamers في الفئة دي بيفضلوه عن كل الموبايلات وده فعلًا اللي ظهر في نتيجة إستطلاع الرأي.

سعر Galaxy A52 :-

  • نسخة 128 جيجا مع 8 جيجا رام بسعر 6200 جنية
  • نسخة 256 جيجا مع 8 جيجا رام بسعر 6800 جنية

سعر Redmi Note 10 Pro :-

  • نسخة 64 جيجا مع 6 جيجا رام بسعر 4600 جنية
  • نسخة 128 جيجا مع 6 جيجا رام بسعر 5200 جنية
  • نسخة 128 جيجا مع 8 جيجا رام بسعر 5700 جنية

سعر Poco X3 Pro :-

  • نسخة 128 جيجا مع 6 جيجا رام بسعر 4600 جنية
  • نسخة 256 جيجا مع 8 جيجا رام بسعر 5250 جنية

افضل موبايل فئة متوسطة عليا 2021

الفئة المتوسطة العُليا ( أقل من 9000 جنية ) :-

اكثر الموبايلات اللي اجتمع عليها الناس في الفئة دي هي Galaxy A52s 5G ثم Xiaomi 11T ثم Poco F3 .. ورأينا في موقع موبيزل بيتفق مع نتيجة الإستطلاع بشكل كبير.

موبايل A52s 5G يستحق المركز الأول بجدارة، الموبايل اللي بقاله فترة طويلة بيسد قصاد أي موبايل ينزل في فئته .. مفيش في الموبايل ده غير مشكلتين، الأولى هي سرعة الشحن والثانية هي البصمة البطيئة.

موبايل Xiaomi 11T برده ممتاز الى حد كبير في الفئة دي .. موبايل متكامل بيقدم خامات خارجية فخمة جدًا، مشكلته الوحيدة هي أداء الكاميرا السيلفي المتواضع .. وكمان Poco F3 يعتبر من الإختيارات اللي فعلًا ممتازة من ساعت ما نزلت لحد دلوقتي، سواء اختارته هو او Xiaomi 11T فالاتنين كويسين بالنسبالك.

موبايل Realme GT Master Edition في المركز الرابع، موبايل ممتاز منافس بشدة لـGalaxy A52s 5G لكنه للأسف مش متوفر في المحلات، وده السبب اللي يخلينا منرشحهوش في الفئة دي.

سعر Galaxy A52s 5G :-

  • نسخة 128 جيجا مع 8 جيجا رام بسعر 7000 جنية
  • نسخة 256 جيجا مع 8 جيجا رام بسعر 7850 جنية

سعر Xiaomi 11T :-

  • نسخة 128 جيجا مع 8 جيجا رام بسعر 7400 جنية
  • نسخة 256 جيجا مع 8 جيجا رام بسعر 7900 جنية

سعر Poco F3 :-

  • نسخة 128 جيجا مع 6 جيجا رام بسعر 6200 جنية
  • نسخة 256 جيجا مع 8 جيجا رام بسعر 7300 جنية

افضل موبايل رائد 2021

أفضل موبايل رائد ( فلاج شيب ) :-

في فئة الموبايلات الرائدة الناس اختارت iPhone 13 Pro Max ثم Galaxy S21 Ultra ثم Xiaomi Mi 11 .. ودي فعلًا الإختيارات اللي موقع موبيزل هيفضلها في الفئة دي.

لإن فعلًا سلسلة iPhone 13 من ابل بتقدملنا أقوى موبايلات على الإطلاق حتى الأن، كل المشاكل اللي كانت موجودة قبل كده اتحسنت .. اما الـGalaxy S21 Ultra فا هو فعلًا موبايل ممتاز .. لكنه نازل بقاله فتره كبيرة جدًا، والـGalaxy S22 خلاص نازل خلال شهرين بالكتير، وفي المركز الأخير Mi 11 اللي بيقدم أفضل قيمة مقابل سعر.

لكن الغريب ان الموبايلات القابلة للطي محصلتش على مركز من المراكز الثلاثة الأولى، ودي حاجه غريبة .. يمكن علشان سعرهم غالي وكمان الناس مش محتاجه التكنولوجيا دي في حياتها اليومية.

سعر iPhone 13 Pro Max :-

  • نسخة 256 جيجا بسعر 29.000 جنية

سعر Galaxy S21 Ultra :-

  • نسخة 256 جيجا مع 12 جيجا رام بسعر 20.500 جنية

سعر Xiaomi Mi 11 :-

  • نسخة 256 جيجا مع 8 جيجا رام بسعر 13.300 جنية

افضل شركة موبايلات في الكاميرات 2021

أفضل ماركة أندرويد من ناحية الكاميرات :-

سامسونج اكتسحت بفرق ضخم عن أقرب مُنافسيها في السؤال ده .. ودي حقيقة لإن فعلا معظم موبايلات سامسونج اللي نزلت في 2021 في مختلف الفئات السعرية بتقدم كاميرات قوية جدًا .. في المركز الثاني هي شركة شاومي اللي فعلًا كاميراتها الخلفية ممتازة، لكن للأسف الكاميرا الأمامية في موبايلات شاومي دائمًا بتكون سيئة.

اما عن اوبو فا هي في المركز الثالث، كاميراتها السيلفي مميزة جدًا وكويسة لكنها في الكاميرا الخلفية مش بتطلع دائمًا افضل نتيجة، بتحتاج تصور في أوضاع معينه علشان تاخد صورة كويسة.


افضل شركة موبايلات 2021

أفضل ماركة موبايلات :-

سامسونج بتيجي في المركز الأول، ثم شاومي في المركز الثاني، وفي المركز الثالث Apple ودي غريبة شوية .. يمكن سامسونج تستحق المركز الأول بجدارة .. شركة نشيطة وعلى مدار السنة عرفت تنزل موبايلات كويسة في فئات سعرية مختلفة وتغطي طلب كبير وتنافس بقوة مع كل الشركات، وسعرها بينزل بشكل تدريجي.

اما شركة Xiaomi فا هي دائمًا بتلعب لعبة القيمة مقابل السعر لكن بيكون عندها أزمة في توفير كمية من الموبايلات، في السوفت وير اللي مش مستقر، في الشبكات والمستشعرات .. لكن الشركة خلال سنة 2021 حسنت بشكل كبير من عيوبها وقدمت موبايلات بشبكات قوية جدًا وبمستشعرات حقيقية ممتازة.

وطبعًا شركة ابل غنية عن التعريف، سلسلة iPhone 13 حققت مبيعات كويسة وانتشرت بشكل كبير.


افضل موبايلات في الشبكة 2021

أفضل ماركة اندرويد في إستقبال الشبكة :-

نتيجة متوقعة، الناس اختارت شركة OPPO في المركز الأول، ثم Realme في المركز الثاني، ثم Samsung في المركز الثالث .. اوبو وريلمي في مكانهم الطبيعي، يمكن هونر كانت ممكن تتواجد في المركز الثالث بسهولة وتتفوق على سامسونج .. لكن ده محصلش لإن الشركة ملحقتش تتواجد في السوق بشكل كبير.


أفضل واجهة تشغيل اندرويد 2021

الناس اختارت سامسونج One UI في المركز الأول، ثم اوبو ColorOS في المركز الثاني، ثم شاومي MIUI في المركز الثالث .. ودي نتيجة متوقعة، سامسونج فعلًا هي الواجهة الأكثر إعتدالًا فيهم لكن مع معالج حلو، بلاش تحكم عليها وهي على موبايل بمعالج مش قوي أوي لإنها تقيلة مش خفيفه وسلسه.

واجهة اوبو هي واجهة عملية وسريعة، اعتمادية .. بتقدملك كل اللي انت محتاجه بسرعه وبسلاسه وبإختصار، مفيهاش مميزات كتير ومش تقيلة إطلاقًا .. اما عن شاومي فا هي مليانه Options ومميزات لكنها مش سريعة أوي .. ومش مستقرة أوي وبيحصل فيها بعض التهنيجات.

قد يعجبك أيضا...

Comments

جاري التحميل...