بعد إرتفاع الأسعار، موبايلات اوبو المعروفة اللي نقدر نرشحها أسعارها رفعت اوي .. بالإضافة الى ان شركة اوبو عندها مشاكل كتير في انها تدخل موبايلاتها للسوق المصري .. النهارده هنقدملكم ترشيحات لـ أفضل موبايلا اوبو اللي تقدر تشتريها في السوق المصري بأسعار منطقية وبأفضل مواصفات مُمكنة.
من 3000 الى 7000 جنية :-
للأسف موبايلات اوبو في الفئة السعرية دي كلها من سلسلة الـA واللي احنا مش بنفضلها تمامًا .. لإنها دائمًا غالية ومش بتقدر تقدم مواصفات متوازنه، لكن احنا هنوضحلكم أبرز الموبايلات الموجودة في الفئة دي من اوبو للعلم فقط .. واحنا مش بنرشحها بسبب وجود بدائل وخيارات أفضل من باقي الشركات.
1- Oppo A16K
الموبايل ده بيجي بمعالج ميدياتك Helio G35 اللي يعتبر متواضع جدًا في الفئة السعرية دي .. شاشة 6.52 بوصة IPS LCD بدقة HD+ والشاشة فيها نوتش .. الكاميرا الخلفية 13 ميجا بيكسل والأمامية 5 ميجا بيكسل .. وللأسف مفيش بصمة، والبطارية 4230 مللي امبير ومنفذ الشحن القديم للأسف.
موبايل Oppo A16K سعره للنسخة الـ32 جيجا مع 3 جيجا رام بسعر حوالي 3800 جنية، اما نسخة 64 جيجا مع 4 جيجا رام فا بتكون بسعر حوالي 4000 جنية مصري.
2- Oppo A16
ده نسخة طبق الأصل من A16K لكن مع فروقات بسيطة .. نفس المعالج ونفس الشاشة المتواضعه ونفس الكاميرا .. لكن الفرق بيكون في ان في بصمة على زِر الباور، والبطارية بقت 5000 مللي امبير ومنفذ الشحن USB Type C.
سعر الموبايل للنسخة الـ64 جيجا مع 4 جيجا رام حوالي 4600 جنية مصري.
3- Oppo A95
موبايل Oppo A95 ده بيجي بمعالج كوالكوم سناب دراجون 662 .. اللي هو أضعف من سناب دراجون 680 أصلًا .. لكن شاشته AMOLED بحجم 6.4 بوصة بدقة FHD+ .. كاميرا خلفية 48 ميجا بيكسل وكاميرا أمامية 16 ميجا بيكسل .. بطارية 5000 مللي امبير كويسة .. بتدعم الشحن السريع بقدرة 33 وات.
النسخة الـ128 جيجا مع 8 جيجا رام سعرها في المحلات حوالي 6700 جنية مصري.
سلسلة Oppo Reno :-
Oppo Reno 5 / Reno 6
رينو 5 ورينو 6 نسخة طبق الأصل من بعض .. لو هتشتري ولاقيت رينو 5 أرخص من Reno 6 يبقى اشتري Reno 5 .. وهما بيقدموا معالج سناب دراجون 720G .. مع شاشة AMOLED بحجم 6.4 بوصة بدقة FHD+ ومعدل تحديث 90 هيرتز .. كاميرا خلفية 64 ميجا بيكسل وأمامية 44 ميجا بيكسل .. وبطارية 4300 مللي امبير بتدعم الشحن بقدرة 50 وات ودي قدرة ممتازة.
سعر Oppo Reno 6 للنسخة الـ128 جيجا مع 8 جيجا رام حوالي 8500 جنية مصري.
Oppo Reno 6 5G
ده موبايل متميز من ناحية التصميم والخامات الخارجية والإستخدام في الإيد .. والموبايل بيجي بمعالج ميدياتك Dimensity 900 وده معالج ممتاز .. والبطارية 4300 مللي امبير وبتدعم الشحن بقدرة 65 وات .. الكاميرات كمان بتقدم أداء ممتاز جدًا.
سعر الموبايل للنسخة الـ128 جيجا مع 8 جيجا رام بسعر 10 الاف جنية مصري.
موبايلات أوبو رينو 7 متاحه للبيع بشكل غير رسمي بالمحلات بضمان دولي وليس محلي .. لا ننصح بها بسبب الضمان !
Comments