خلال الـ 6 أيام الي فاتوا .. عملنا في موبيزل استفتاء عن أفضل الموبايلات في عام 2019 من خلال أكتر من سؤال وبصراحة اتفاجئنا من النتيجة الايجابية من مستخدمين موقع موبيزل ولاقينا اكتر من 120 الف تصويت على الاسئلة الي طرحناها .
ودلوقتي بعد ما خلصنا مدة التصويت وعدينا الحمد الله اكتر من 120 الف صوت في اجمالي عدد الاصوات على كل الاسئلة هنعرض عليكم نتائج التصويت .
أفضل ماركة في عام 2019 ؟
الاختيار أكيد كان مبني عن تجارب المستخدمين لكل الماركات .. وتجربتهم المطولة بعد فترة لموبايلات بمواصفات محترمة اثبتت جدارتها ومن غير عيوب صناعة مع تعامل محترم من التوكيل .
والي قدر يكسب في التصويت شركة ريلمي .. والي بقت مشهورة في الفترة الأخيرة انها بتقدم موبايلات بمواصفات قوية مع خامات كويسة وعيوب صناعة قليلة جدا وبتتعامل كويس جدا مع العملاء من خلال التوكيل الخاص بها التابع لشركة أوبو .
أفضل موبايل فئة متوسطة في 2019 ؟
وهنا كان في خناقة كبيرة بين موبايلات كتير جدا في الفئة المتوسطة .. المستخدمين اختاروا موبايل Realme XT كأفضل موبايل نزل في سنة 2019 في الفئة المتوسطة وده ممكن يكون راجع بسبب استخدام ريلمي لمعالج سناب دراجون في الموبايل وكمان مع كاميرات خلفية وامامية ممتازة بتصور بالطريقة الي بيحبها المستخدمين وهي التعديل البسيط في الألوان وكل ده مع شاشة سوبر أموليد وبصمة في الشاشة سريعة جدا وبطارية كويسة وشحن سريع .. تركيبة محترمة بدون مشاكل عملت ضجة ونجاح كبير في السوق المصري .
أفضل موبايل اقتصادي في 2019 ؟
وهنا الصراع كان محصور بين شاومي نوت 8 و ريلمي 5 لان دول بيقدموا أفضل قيمة مقابل سعر في الفئة السعرية تحت 3000 جنية .. وكسب في التصويت ده Xiaomi Note 8 لانه بيقدم خامات زجاج وشاشة FHD+ وكاميرا خلفية أفضل وصوت أعلى .
أفضل موبايل رائد أو فلاج شيب في 2019 ؟
الصراع هنا كان بين وحش سامسونج النوت 10 و وحش أبل وهو iPhone 11 Pro Max وفي التصويت ده تفوق الأيفون بسبب جودة الكاميرات الي فعلا فعلا ملهاش منافس في 2019 وكمان اداء البطارية حلو جدا ومستقر اكتر من النوت والاداء عموما في الأيفون مثالي ومش هتلاقي فيه اي مشاكل .. ولو فعلا معاك مبلغ كبير علشان تشتري موبايل رائد .. الايفون 11 برو ماكس هيكون اختيار ممتاز بكل تأكيد وده كان رأي متابعي موبيزل الي كان واضح في التصويب .
أفضل موبايل في التصوير السيلفي في 2019 ؟
بصراحة وبعد مقارنات كتير شخصيا كنت شايف ان Realme XT أفضل كاميرا سيلفي هو و Vivo V17 Pro الي السيلفي بتاعه حلو جدا ويمكن يكون الفيفو أفضل .. بس المستخدمين فضلوا اختيار كاميرا الريلمي في التصوير السيلفي .
أفضل كاميرا خلفية في الفئة المتوسطة في 2019 ؟
معرفش ايه سر حب المستخدمين في براند ريلمي .. ولكن بردو هما اختاروا Realme XT كأفضل كاميرا خلفية .. شخصيا شايف ان كاميرا مثلا الـ Huawei Nova 5T أفضل ولكن مع سعر أعلى .. بس بردة لازم نحترم رأي متابعين موقع موبيزل .. وبردو الكاميرا الخلفية في ريلمي اكس تي كويسة جدا .. يمكن احنا في موبيزل شايفين انها مش الأفضل بسبب ان بيحصل معالجة كبيرة في الصور والسوفت وير بيغير جامد من ألوان الصورة .
أفضل موبايل فئة متوسطة من ناحية تشغيل الألعاب في 2019 ؟
كنت فاكر ان الكل هيختار Huawei Nova 5T او Honor 20 لأن فيهم معالج رائد وبيقدم اداء ممتاز في الألعاب قد يكون الأفضل .. بس المستخدمين ليهم وجه نظر تانية وفضلوا يختاروا Xiaomi Note 8 Pro لانه ارخص وبيقدم اداء محترم في الألعاب .
أفضل موبايل بيقدم قيمة مقابل سعر في 2019 ؟
نرجع تاني ونلاقي الـ Xiaomi Note 8 Pro بيفوز وهنا بصراحة عن جدارة لان الشاومي نوت 8 برو بيقدم خامات محترمة , اداء ممتاز , كاميرا خلفية محترمة جدا , شاشة كبيرة وبطارية ضخمة كل ده بسعر 4 الاف جنية فقط .
أفضل تصميم في الفئة المتوسطة في 2019 ؟
بصراحة أوبو ابدعت في موبايل Oppo Reno 2F بتصميم زجاجي مفيهوش اي بروز في الكاميرات .. الكاميرا الخلفية غاطسة جوا ظهر الموبايل الزجاجي والتصميم شيك مع اسلايدر السيلفي .. حاجة أخر شياكة وكان فعلا لازم يفوز بالجائزة ديه .
أفضل بطارية في الفئة المتوسطة في 2019 ؟
طبيعي لازم سامسونج تتواجد في لستة الأفضل في 2019 .. وهي موجودة بموبايل Samsung M30s كأفضل بطارية لان البطارية في الموبايل ده 6000 مللي أمبير ادائها محترم جدا جدا .
أفضل واجهة تشغيل في 2019 ؟
وهنا فازت شاومي بواجهة التشغيل الخاصة بها MIUI والي انا شايفها كويسة جدا بس بعد التحديثات الاخيرة بقت تقيلة شوية ومحتاجة تتظبط وترجع خفيفه زي زمان .
أفضل ماركة من ناحية استقبال الشبكات في 2019 ؟
وهنا فازت شركة ريلمي كأفضل شركة ليها موبايلات استقبالها قوي في الشبكات في الاماكن الي تغطيتها ضعيفة , وبصراحة النتيجة ديه عادلة لان ريلمي فعلا مهتمة جدا بموضوع الشبكات ده واي شكوى حتى بتظهر بيقدروا يوصلوا للعميل ويحلوا مشكلته فورا .
نتمنى تكونوا راضيين ان اداء موقع موبيزل في 2019 وان شاء الله هتلاقوا تطويرات كتير في 2020 .
Comments