بعد ارتفاع اسعار الموبايلات , مبلغ 3000 جنية كان مبلغ قليل علشان تجيب موبايل محترم بمواصفات كويسة تواكب عام 2018 الي احنا فيه , بس دلوقتي الوضع اختلف بعد صراع كبير بين الشركات للاستحواذ على فئة ال 3000 جنية و مبيعاتها الي هي مبيعات كبيرة جدا جدا , والخناقة كانت ما بين 3 شركات هما انفينكس و هواوي و شاومي , في الفئة ديه انفينكس عندها موبايلين ممتازين وهواوي موبايل جديد لسه نازل الاسواق و اخيرا شاومي بالموبايل الي عمل ضجه كبيرة اوي وهو ريدمي 5 بلس , احنا ف #موبيزل بنفكرك اننا بنتكلم عن الموبايلات بكل حيادية واحترافية وبدون اي مصلحة ولا اي تفضيل لشركة عن التانية .
وطبعا سامسونج موجودة في الفئة ديه ب موبايل Samsung J7 Core , الي ممكن تدوس على اسمه وتشوف مواصفاته وطبعا السامسونج دائما بيتفوق بالشاشة السوبر اموليد والكاميرا الخلفية الي فتحه عدستها واسعة وهتخلي التصوير بليل احسن من كل الموبايلات الي تحت , بس احنا حاولنا نضيق نطاق المنافسة بين الموبايلات الي استخدمت تصميم جديد وشاشات بالابعاد الجديدة 18:9 مع وجود بصمة وخاصية فتحه الهاتف بالوجه وعلشان كدا خرجنا J7 Core من المنافسة , رغم انه موبايل محترم في هذه الفئة بعد نزول منه نسخة 32 جيجا مع 3 جيجا رام .
هنرتب الموبايلات ع حسب الأفضل من وجه نظرنا وهتلاقي كل تفاصيل الموبايل ومكتوب جمبها ديه ميزة ولا عيب وكمان هتلاقي السعر في الاخر , ولو عاوز تعرف اكتر عن الموبايل دوس على اسم الموبايل هتروح على صفحة الموبايل على موقع موبيزل الي فيها هتلاقي كل حاجه عن الموبايل , ونتمنى انك بعد ما تقرأ المقالة تبقا اعرف أفضل موبايل بسعر 3000 جنية 2018 .
لا تنسى تصفح النسخة الجديدة من المقالة : أفضل الموبايلات بسعر 3000 جنية – انفنكس في المقدمة !
1- Infinix Hot S3
انفنكس مبتهزرش , داخلة تنافس بقوة على فئة ال 3000 جنية بموبايل جديد فيه كل الي تتمناه من شاشة كاملة 18:9 مع كاميرا سيلفي مميزة وخاصية فتح الهاتف بالوجه وكمان في بصمة ومساحة تخزين 32 جيجا مع 3 جيجا رام , موبايل Infinix S3 نازل برا مصر بقاله فتره وكل الريفيوهات الاجنبية اكدت ان الموبايل ممتاز وصفقة رابحة من انفينكس .
تفاصيل موبايل Infinix S3 :-
- شاشة 5.7 بوصة بدقة HD+ بابعاد 18:9 من نوع IPS , وهنا المفروض تكون الحواف تكون قليلة بس للاسف الحواف الي فوق وتحت الشاشة كبيرة شوية .
- وزن خفيف جدا جدا 150 جرام بس وتصميم بلاستيك .
- معالج ضعيف شوية بس من كوالكم من نوع Snapdragon 430 بس متقلقش اداء الموبايل كويس جدا بس مش مع الالعاب التقيلة طبعا .
- النسخة الحالية 32 جيجا مساحة تخزين مع 3 جيجا رام , وقريب اوي انفنكس هتنزل النسخة الجديدة البرو 64 جيجا مع 4 جيجا رام بسعر 3500 جنية تقريبا .
- بطارية كبيرة اوي 4000 مللي أمبير بتستحمل اكتر من 7 ساعات شاشة مفتوحة screen on بس للاسف مفيهاش شحن سريع وبتشحن ف اكتر من 3 ساعات .
- كاميرا امامية 20 ميجا بيكسل مع فلاش ثنائي , يعني هتتصور سيلفي زي ما انت عاوز في اي وقت واي مكان .
- كاميرا خلفية 13 ميجا بيكسل بفلاش مزدوج بردة , ادائها متوسط ومعقول , انفنكس هنا ركزت ع الكاميرا الامامية اكتر .
- الموبايل بيجي عليه اندرويد اوريو , وده احدث نظام تشغيل حاليا .
- بيدعم نظارات VR .
- بيدعم البصمة في الظهر ويدعم فتح الهاتف عن طريق الوجه , يعني تقريبا معاك كل وسائل الحماية المتاحة في الفئة السعرية ديه وديه ميزة كبيرة جدا في الموبايل ده .
- في مكان مخصص لكارت الميموري يعني هتسيب شريحتين اتصال وهتركب معاهم كارت ميموري وديه ميزة قوية جدا .
- الموبايل مفيش عليه طبقة حماية على الشاشة وده طبيعي في الفئة السعرية ديه بس انفنكس حلت المشكلة ديه وجابتلك في صندوق الموبايل لاصقة حماية وجراب سيلكون علشان تحمي الموبايل بالكامل اول ما تشتريه .
- الموبايل بيجي معاه سماعات في الصندوق بتاعه .
- سعر موبايل انفنكس اس 3 حوالي 3080 جنية .
2- Huawei Y7 Prime 2018
براند هواوي بقا براند محبوب جدا للمصريين , يمكن علشان الخامات كويسة ومشاكله قليله وصيانته سهله وقطع غياره واكسسوارته موجودة بسهولة في كل انحاء الجمهورية , بس هواوي مكنتش قادرة تنافس على الفئة السعرية بتاعت 3000 جنية من فترة علشان مكنش في موبايل مميز عندها في الفئة ديه ومشكلتها اتحلت لما نزلت نسخة جديدة من Y7 Prime بأسم Y7 Prime 2018 , الموبايل ده حرفيا باع اكتر من 3000 نسخة في 5 ايام وده رقم كبير جدا يدل فعلا على قوة الموبايل واد ايه هينافس بقوة في السوق .
تفاصيل موبايل هواوي Y7 Prime 2018 :-
- شاشة IPS عملاقة 6 بوصة بدقة HD+ بالابعاد الجديدة 18:9 والحواف بتاعت الشاشة قليلة جدا والموبايل تصميم ممتاز فعلا .
- وزن خفيف جدا 155 جرام وتصميم بلاستيك .
- نفس المعالج الضعيف Snapdragon 430 , بس زي ما قولنا فوق الاداء بتاعه معقول .
- مساحة 32 جيجا مع 3 جيجا رام .
- بطارية متوسطة 3000 مللي أمبير وللاسف مش بتدعم الشحن السريع .
- كاميرا امامية 8 ميجا بيكسل بفلاش , كاميرا متواضعة مش هتديلك الاداء الممتاز والمميز .
- كاميرا خلفية مزدوجة 13+2 ميجا بيكسل تقدر تعمل بيها عزل في الصور وبصراحة هنا اداء الكاميرا الخلفية افضل من انفنكس اس 3 , بس خلينا نتفق ان اداء الكاميرا الخلفية بليل سئ بعض الشيء من هواوي علشان فتحة العدسة ضيقة شوية ومش بتدخل ضوء كتير .
- الموبايل عليه احدث واجهه من هواوي مع احدث اندرويد اوريو .
- الموبايل مش بيدعم نظارات VR .
- موبايل واي 7 2018 فيه بصمة في الظهر وكمان فيه خاصية فتح الهاتف عن طريق الوجه .
- نفس ميزة انفنكس موجودة هنا وهي وجود مكان مخصص لكرت الميموري .
- الموبايل مفيش عليه حماية , بس بيجي معاه لاصقة حماية .
- الموبايل بيجي معاه سماعات في الصندوق بتاعه .
- سعر موبايل هواوي Y7 Prime 2018 هو حوالي 3100 جنية .
3- Xiaomi Redmi 5 Plus
شاومي هي اول شركة نزلت موبايل بالابعاد الجديدة للشاشات 18:9 في مصر , بصراحة موبايل Xiaomi Redmi 5 Plus صاحب افضل اداء على الاطلاق لانه بمعالج قوي جدا Snapdragon 625 بس الحلو ميكملش , الموبايل الكاميرات بتاعته الامامية والخلفية متواضعة جدا والموبايل بيدعم الشحن السريع بس شاومي بتنزل في الصندوق بتاعه شاحن مش سريع فهنا خسر الموبايل نقطتين مهمين خلتنا نحط الموبايل في الترتيب الأخير ولكن سيظل شاومي صاحب الاداء الافضل والهاتف المرشح الأول لكل المستخدمين الي بيدوروا على موبايل يشغل العاب بجرافيك ممتاز من غير اي تهنيج .
تفاصيل موبايل Xiaomi Redmi 5 Plus :-
- شاشة 6 بوصة بدقة FHD+ بابعاد 18:9 من نوع IPS طبعا ديه احسن دقة شاشات في ال 3 موبايلات , وتقريبا الشاومي هو الافضل من ناحية الشاشة بس الفرق مش هيبقا ملحوظ .
- وزن تقيل شوية حوالي 180 جرام مع ظهر معدني وحواف بلاستيكية .
- زي ما قولنا المعالج Snapdragon 625 قوي جدا صاحب الاداء الافضل .
- مساحة 32 جيجا مع 3 جيجا رام , وفي نسخة افضل 64 جيجا مع 4 جيجا رام بس قليلة شوية في السوق وسعرها عالي شوية حوالي 3700 جنية .
- بطارية كبيرة 4000 مللي أمبير , الموبايل نفسه بيدعم الشحن السريع , بس بيجي مع الموبايل شاحن مش سريع وبيشحن تقريبا 30% من الموبايل في نصف ساعة .
- الكاميرا الخلفية 12 ميجا بيكسل بفلاش ثنائي مع فتحة عدسة متواضعة f/2.2 , اداء الكاميرا متوسط وزي ما قولنا هو مش الافضل .
- كاميرا امامية 5 ميجا بيكسل ادائها اقل من المتوسط .
- الموبايل بيجي باندرويد نوجا 7.1.2 , ولسه مش عارفين شاومي هتحدث الواجهه امتى !؟
- الموبايل بيدعم نظارات VR .
- الموبايل فيه بصمة في الظهر , بس الواجهه الحالية للموبايل فيهاش خاصية فتح الهاتف عن طريق الوجه .
- لو هتركب كارت ميموري هيبقا مكان الشريحة الثانية Sim2 , للاسف مفيش مكان مخصص لكارت الميموري .
- شاشة الموبايل عليها حماية من كورنج جوريلا جلاس , وصندوق الموبايل بيجي فيه جراب شيك جدا .
- للاسف مش بيجي في الصندوق بتاعه سماعات .
- سعر موبايل شاومي Redmi 5 Plus للنسخة 32+3 جيجا رام حوالي 3250 جنية .
ممكن كمان تدخل على مقالة فيها احدث اسعار الموبايلات 2018 في مصر مع موبيزل .
Comments