لو عايز تشتري موبايل إقتصادي كويس لازم تكون عارف ان بعد رفع الأسعار الفئة الإقتصادية بقى سعرها في حدود 3000 جنية ~ 4500 جنية .. النهارده هنعمل مقارنة بين أفضل 4 موبايلات في الفئة السعرية دي .. وهما Redmi Note 11 و Galaxy A22 و Infinix Note 11 و Realme 9i .. علشان نقدر نعرف الأفضل بينهم.
التصميم :-
أكبرهم حجمًا Infinix Note 11 ثم Realme 9i ثم Redmi Note 11 وأخيرًا Galaxy A22 .. ولكن الفروقات مش كبيرة خالص، بالنسبة للتخانة فا انفينكس نوت 11 رفيع جدًا، ثم ريدمي نوت 11.
أحلى تصميمين هما انفينكس نوت 11 وريدمي نوت 11 .. تصاميم جميلة جديدة ومش بيظهر فيها التبصيم بسرعة، اما Realme 9i وجالاكسي A22 فا الموبايلات بتبصم وبيظهر عليها التراب بسرعة.
شاومي وريلمي وانفينكس ضايفين جرابات في علبة الموبايلات بتاعتهم، وأشيك جراب عند انفينكس نوت 11 .. اما جالاكسي A22 مفيش جراب في العلبة للأسف.
الشاشات :-
شاشة Infinix Note 11 بحجم 6.67 بوصة AMOLED دقة FHD+ معدل تحديث 60 هيرتز .. ثم Realme 9i شاشة 6.6 بوصة IPS LCD دقة FHD+ معدل تحديث 90 هيرتز .. ثم Redmi Note 11 شاشة 6.4 بوصة AMOLED دقة FHD+ معدل تحديث 90 هيرتز .. وأخيرًا Galaxy A22 شاشة 6.4 بوصة Super AMOLED دقة HD+ معدل تحديث 90 هيرتز.
بالنسبة للتصاميم فا شاشة Redmi Note 11 تكسب بثقب صغير للسيلفي، ثم Realme 9i بثقب أكبر شوية على الشمال، ثم Infinix Note 11 و Galaxy A22 بشاشة بتصميم النوتش القديم .. بالنسبة للسطوع تحت الشمس فا أعلى سطوع في ريدمي نوت 11 ثم انفينكس نوت 11 ثم جالاكسي A22 وأخيرًا Realme 9i.
أحلى ألوان موجودة في Galaxy A22 بألوان مُشبعة مظبوطة مائلة لإنها تكون دافيه أكثر، ثم Redmi Note 11 بألوان Cold شوية، ثم Infinix Note 11 بألوان مُشبعة بزيادة .. وأخيرًا Realme 9i بأداء ضعيف وسطهم .. في سامسونج وشاومي وريلمي تقدر تغير في الألوان من إعدادات الشاشة .. اما انفينكس مينفعش تلعب في ألوان الشاشة.
الأداء :-
ريدمي نوت 11 و Realme 9i بمعالج كوالكوم سناب دراجون 680 بتكنولوجيا 6 نانو .. انفينكس نوت 11 بمعالج ميدياتك Helio G88 تكنولوجيا 12 نانو وجالاكسي A22 بمعالج ميدياتك Helio G80 تكنولوجيا 12 نانو .. ريدمي نوت 11 وريلمي 9i بيتفوقوا في سرعة ذاكرة التخزين بفرق كبير عن انفينكس نوت 11 وجالاكسي A22.
بالنسبة للأداء الفعلي فا ريلمي 9i وانفينكس نوت 11 وريدمي نوت 11 ممتازين جدًا .. أداءهم الفعلي ممتاز، يمكن انفينكس نوت 11 أسرع شوية من ريلمي 9i .. وسلاسة الواجهة أفضل في ريلمي 9i وريدمي نوت 11 علشان معدل تحديث 90 هيرتز في الشاشة، اما انفينكس نوت 11 معدل تحديث 60 هيرتز فقط.
بالنسبة لـGalaxy A22 فا هو للأسف بيجي في المركز الأخير من ناحية السرعة.
انفينكس نوت 11 أحسن واحد بيشغل الألعاب .. ببجي على High HD وبتشتغل كويس .. ثم Galaxy A22 بيشغل ببجي على High HD .. ثم ريدمي نوت 11 وريلمي 9i بيشغلوها على Medium Graphic.
عوامل الأمان وعناصر اخرى :-
كل الموبايلات بتيجي بصمة الإصبع على زِر الباور .. أسرع بصمة في ريلمي 9i ثم ريدمي نوت 11 ثم جالاكسي A22 وأخيرًا انفينكس نوت 11.
الموبايل الوحيد اللي فيه NFC هو Galaxy A22 .. الموبايل الوحيد اللي فيه IR Blaster هو Redmi Note 11 .. الموبايل الوحيد اللي مفيهوش ميكروفون اضافي لعزل الضوضاء هو Infinix Note 11.
السماعات Stereo في ريلمي 9i وريدمي نوت 11 وانفينكس نوت 11 .. لكنها Mono في Galaxy A22 .. أعلى صوت هو Realme 9i .. أفضل صوت هو Redmi Note 11 .. ثم Infinix Note 11 وأخيرًا A22.
بالنسبة للمستشعرات فا مستشعر التقارب موجود وحقيقي في انفينكس نوت 11 وفي ريلمي 9i .. اما سامسونج جالاكسي A22 وريدمي نوت 11 فا المستشعر سوفت وير ومش لطيف أوي.
بالنسبة لشبكات الـWiFi فا كلهم ممتازين ماعدا A22 متوسط.
البطارية :-
الـ4 موبايلات بطارية 5000 مللي امبير وكلهم أداءهم الفعلي كويس جدًا .. يمكن ريلمي وانفينكس بيقعدوا أكثر حاجه بسيطة من شاومي وسامسونج، بس فرق بسيط جدًا، كلهم هيكملوا يوم بإستخدام متوسط.
بالنسبة لسرعة الشحن فا ريدمي نوت 11 بشاحن 33 وات بيشحن في ساعه، ريلمي 9i بشاحن 33 وات بيشحن في ساعه وربع، انفينكس نوت 11 بشاحن 33 وات بيشحن في ساعه ونص، جالاكسي A22 بشاحن 15 وات بيشحن في ساعتين.
الكاميرات :-
جالاكسي A22 بيجي بعدسة قوية 48 ميجا بيكسل فيها مثبت بصري، باقي الموبايلات بعدسة 50 ميجا بيكسل .. والسيلفي 13 ميجا بيكسل في A22 وريدمي نوت 11 .. وبدقة 16 ميجا بيكسل في ريلمي 9i وانفينكس نوت 11.
لو التصوير أهم حاجه عندك، جالاكسي A22 هو الخيار الوحيد الممتاز في الفئة دي .. تفاصيل كتير ومعالجة مظبوطة للألوان، خاصًة لما تصور بالـHDR في الشمس .. مفيش أي مقارنة بينه وبين باقي الموبايلات.
في المركز الثاني بعد A22 هيجي ريلمي 9i ثم ريدمي نوت 11 ثم أخيرًا انفينكس نوت 11 .. بس لما الإضاءه بتقل انفينكس نوت 11 بيتفوق على شاومي ريدمي نوت 11.
بالنسبة للسيلفي فا مفيش موبايل كويس، يمكن A22 بيجي بسوفت وير ذكي بيحاول يتعامل، بس العدسة نفسها مش أقوى حاجه .. عمومًا A22 هو أكثر موبايل عرف يطلع صور بألوان حقيقية.
انفينكس نوت 11 في المركز الثاني في السيلفي، بأداء ممتاز وبيتفوق على A22 في بعض الأوضاع، وفي المركز الثالث ريلمي 9i اللي المعالجة متواضعه الى حد كبير، وأخيرًا ريدمي نوت 11.
أسعار الموبايلات :-
سعر Infinix Note 11 :-
- نسخة 128 جيجا مع 4 جيجا رام بسعر 3900 جنية
- نسخة 128 جيجا مع 6 جيجا رام بسعر 4200 جنية
سعر Galaxy A22 :-
- نسخة 64 جيجا مع 4 جيجا رام بسعر 3800 جنية
- نسخة 128 جيجا مع 4 جيجا رام بسعر 4300 جنية
سعر Redmi Note 11 :-
- نسخة 128 جيجا مع 4 جيجا رام بسعر 4200 جنية
- نسخة 128 جيجا مع 6 جيجا رام بسعر 4600 جنية
سعر Realme 9i :-
- نسخة 128 جيجا مع 6 جيجا رام بسعر 4850 جنية
الرأي النهائي :-
بتدور على أرخص حاجه بتنازلات قليلة ؟
هيكون انفينكس نوت 11 إختيار كويس جدًا، أرخص موبايل 128 جيجا مع 6 جيجا رام .. تصميم جديد مختلف وتجربة أداء كويسة مع أداء ممتاز في الألعاب وشاشة AMOLED محترمة ومستشعر تقارب حقيقي وميزة تسجيل المكالمات كمان، ومن عيوبه الكاميرا الخلفية ومفيش ميكروفون عزل الضوضاء وإعلانات السوفت وير.
بتدور على موبايل بأحسن كاميرا خلفية ؟
الـGalaxy A22 هيكون أفضل خيار، كاميرا خلفية “جبارة” .. مفيش زيها، وهي الوحيدة في الفئة السعرية دي اللي فيها مثبت بصري .. مع شاشة Super AMOLED ممتازة، وواجهة سامسونج ودعم للـNFC .. لكن من عيوبه الشاحن البطيء بقدرة 15 وات ومفيش جراب في العلبة ولا سكرينه على الشاشة .. والتجربة الصوتيه مش الأفضل.
بتدور على موبايل متوازن ؟
هيكون Redmi Note 11 ممتاز .. سعره غالي شوية مُقارنًة بسعره اول ما نزل .. بس مازال بيقدم أداء قوي مع شاشة محترمة جدًا مع أحسن صوت Stereo هتجربه في الفئة دي .. مع أسرع زمن فعلي للشحن، وكمان مستشعر IR Blaster .. يمكن تجربة الكاميرات فيه مش الأفضل خاصًة الكاميرا السيلفي.
امتى تجيب Realme 9i ؟
بالنسبة لـRealme 9i تفكر فيه لو محتاج موبايل متوازن بس خايف من شاومي، هتاخد أداء سريع وأحسن واجهة من ناحية السرعة والإستقرار مع كاميرات كويسة متوسطة سواء أمامية أو خلفية، مع مستشعر تقارب حقيقي للمكالمات .. بس الشاشة كجودة وألوان وسطوع سيئة جدًا .. والموبايل سعره غالي جدًا.
Comments