اسعار الموبايلات في مصر شهدت موجهة من الزيادات خلال الفتره اللي فاتت .. بدايًة من فرض رسوم جمركية جديدة على الهواتف الذكية في نهاية سنة 2021، ومرورًا بأزمات الإنتاج العالمية وتأثير نقص الشرائح الإلكترونية والحرب على أوكرانيا، وأخيرًا إنخفاض قيمة الجنية المصري مقابل العملات الأجنبية.
كل الأحداث دي على الترتيب أدت الى زيادة واضحة في أسعار الموبايلات في مصر، وبعد فترة من تلك الزيادات الرسمية حاولت التجار أن توازن حركة البيع في الأسواق من خلال “حرق” أسعار الهواتف الرسمية، مما جعل الأسعار “منطقية” الى حد ما بالنسبة للسعر الجديد للدولار الأمريكي.
النهارده هنعمل “حصر” لأهم الموبايلات الموجودة في الفئة المتوسطة العُليا، الفئة اللي بتهم أغلب المُستخدمين في السوق المصري .. واللي فيها حاليًا حوالي 8 موبايلات من 6 شركات .. وهنحاول نوضح موقف كل موبايل من الموبايلات دي وسط مُنافسيه ووضعه حاليًا بعد الأسعار الجديدة.
1- Poco F3
تواجد Poco F3 الجديد في الأسواق مش كبير، سعر النسخة الـ128 جيجا مع 6 جيجا رام منه في المحلات حوالي 6800 جنية، وهو بيقدم أقوى أداء في الفئة السعرية دي بلا منافس .. لكنه بيسخن الى حد كبير لإنه من الزجاج .. شاشة الموبايل ممتازة جدًا، صوته Stereo .. موبايل مُوجه للناس اللي بتحب الأداء القوي والتجربة المتكاملة القوية.
بطارية الموبايل 4500 مللي امبير، أداءها مش أفضل حاجه .. وسرعة الشحن 33 وات وبرده مش أسرع حاجه في الفئة دي .. كاميرات الموبايل متواضعه شوية، مستشعر التقارب مش أحسن حاجه .. مش بيدعم منفذ الـ3.5 مللي ومش بيدعم تركيب كارت ميموري لزيادة الذاكرة الداخلية.
2- Galaxy A52s 5G
أقل سعر لـ Galaxy A52s 5G في المحلات للنسخة الـ128 جيجا مع 8 جيجا رام بحوالي 7800 جنية، والنسخة الـ256 جيجا مع 8 جيجا رام بسعر 9000 جنية، الموبايل مقاوم للماء، بيقدم أفضل كاميرا في الفئة دي وبمثبت بصري، شاشة Super AMOLED ممتازة، سوفت وير مستقر، صوت Stereo عالي ومحترم.
لكن للأسف الشاحن الموجود في العلبة شاحن 15 وات بطيء جدًا، والموبايل أقصى سرعة شحن بيدعمها 25 وات ودي سرعة قليلة، البصمة اللي تحت الشاشة مش سريعة .. شبكة الـWi Fi مش لطيفة في الفئة دي .. وأنصحك انك تجيب A52s 5G وتسيب الـGalaxy A53 اللي بيتفوق في البطارية وفي الكاميرا بفرق بسيط جدا.
3- Realme GT Master
سعر Realme GT Master في المحلات للنسخة الـ128 جيجا مع 6 جيجا رام بسعر 7900 جنية، النسخة الـ256 جيجا مع 8 جيجا رام بسعر 9000 جنية، والموبايل بيقدم شاشة ممتازة مع أداء ممتاز بسوفت وير ريلمي الخفيف، وبيتميز بالبصمة اللي تحت الشاشة السريعة والشبكات القوية جدًا وسرعة الشحن الأقوى في الفئة دي.
لكن الموبايل بطاريته مش أفضل حاجه .. أداءها معقول بس مش الأفضل، الصوت مش Stereo ودي نقطة ضعف قوية جدًا، الكاميرا الخلفية أداءها متواضع الى حد كبير .. والموبايل إختيار كويس للي مش حابب يشتري Poco F3 ومش حابب سرعة الشحن والبصمة البطيئة في الـA52s 5G.
4- Xiaomi 11T
سعر Xiaomi 11T في المحلات للنسخة الـ256 جيجا مع 8 جيجا رام بسعر 8700 جنية، الموبايل قريب من Poco F3 يعتبر نسخة منه لكن بتحسينات على جوانب كتير .. هنلاقي انه بيقدم شاشة أكبر وبطارية أكبر وبتدعم الشحن الأسرع بقدرة 67 وات .. وكمان كاميرا خلفية ممتازة، ومعالج قوي جدًا بيقدم أداء ممتاز.
الموبايل فيه نفس العيوب اللي في باقي موبايلات شاومي، زي مستشعر التقارب السوفت وير والكاميرا السيلفي المتواضعه وانه مش بيدعم تركيب كارت ميموري.
5- Oppo Reno 6 5G
سعر Oppo Reno 6 5G للنسخة الـ256 جيجا مع 8 جيجا رام حوالي 9700 جنية، الموبايل مش قوي في أي حاجه .. هو متوازن نسبيًا، الموبايل كأداء فا هو أقل أداء موجود في الفئة دي، كاميراته متواضعة في السعر ده .. لكنه بيتميز بالشاحن السريع والتصميم المُختلف .. أنصحك لو بتفكر فيه تجيب Realme GT Master أفضل.
6- Honor 50 & Huawei Nova 9
الموبايلين بسعر 9800 جنية، هواوي نوفا 9 بيتوفر بـ128 جيجا مع 8 جيجا رام، هونر 50 بيتوفر بـ256 جيجا مع 8 جيجا رام، موبايل Nova 9 أقوى من Honor 50 في الكاميرا الأمامية والخلفية، في الصوت الأقوى بفرق كبير برغم ان الاتنين مونو، في السوفت وير المستقر أكثر واللي فيه مميزات أكثر.
هونر 50 بيتفوق في مساحة التخزين الأكبر الـ256 جيجا وبيتفوق في دعم خدمات جوجل ودي تعتبر ميزة ضخمة جدًا.
بإختصار لو انت معندكش مشكلة في انك تشتري موبايل مفيهوش خدمات جوجل فا Huawei Nova 9 هيكون خيار أفضل ليك ولو حابب تشتري موبايل مميز مش منتشر وبخامات هواوي ودعم جوحل ف Honor 50 هيكون ممتاز.
Comments