شركة سامسونج عندها كم موبايلات كبير جدًا في الفئات الإقتصادية والمتوسطة والمتوسطة العُليا من خلال سلسلة الـA .. النهارده هنقدملكم ترشيحات لأفضل الموبايلات اللي تقدر تشتريها من سامسونج في مختلف الفئات السعرية بـ أسعار الموبايلات الجديدة بعد الإرتفاعات الأخيرة.
من 4000 الى 5000 جنية :
Galaxy A22
ده أفضل موبايل من سامسونج في الفئة دي .. بيجي بشاشة AMOLED بمعدل تحديث 90 هيرتز .. لكنها بنوتش وبدقة HD+ .. ومع ذلك فا هي تعتبر الأفضل في الفئة دي .. كمان بيجي بمعالج ميدياتك Helio G80 اللي هيقدملك أداء ممتاز في الفئة دي .. الكاميرات كمان تعتبر ميزة قوية في الموبايل.
الموبايل موجود في الأسواق للنسخة الـ64 جيجا مع 4 جيجا رام بسعر 4700 جنية والنسخة الـ128 جيجا مع 4 جيجا رام بسعر في حدود 5000 جنية .. وبدون نقاش هو أفضل موبايل من سامسونج في الفئة دي.
من 5000 الى 6000 جنية :
Galaxy A32
الموبايل بيتقدم بشاشة AMOLED بدقة FHD+ بمعدل تحديث 90 هيرتز .. شاشة ممتازة جدًا، لكنه بيجي بمعالج ميدياتك Helio G80 واللي يعتبر مش الأفضل في الفئة السعرية دي .. الكاميرا السيلفي في الموبايل تعتبر كويسة الى حد كبير .. لكن الكاميرا الخلفية مش الأفضل.
سعر Galaxy A32 للنسخة الـ128 جيجا مع 6 جيجا رام حوالي 5800 جنية مصري.
Galaxy A23
الموبايل بيجي بشاشة IPS LCD بدقة FHD+ بتردد 90 هيرتز .. دي نقطة ضعف مُقارنة بـA32 .. لكن الموبايل بيجي بمعالج كوالكوم سناب دراجون 680 اللي بيقدم أداء أفضل في الإستخدام اليومي وكمان بيكون موفر أكثر في الإستهلاك .. الموبايل بيقدم كاميرا خلفية ممتازة لكن الكاميرا السيلفي تعتبر مش الأفضل.
سعر Galaxy A23 للنسخة الـ128 جيجا مع 6 جيجا رام حوالي 5700 جنية.
من 6000 الى 7000 جنية :
Galaxy M52
ده يعتبر أفضل موبايل في الفئة دي من سامسونج من حيث القيمة مقابل السعر .. وده بسبب انه بيقدم معالج كوالكوم سناب دراجون 778G الداعم لشبكات الجيل الخامس .. ده أرخص موبايل بيقدم المعالج ده في السوق المصري .. ده بالإضافة الى مجموعة مواصفات كويسة ككاميرا وشاشة وهكذا.
سعر موبايل Galaxy M52 5G في السوق المصري للنسخة الـ128 جيجا مع 8 جيجا رام حوالي 6700 جنية.
Galaxy A33
الموبايل ده بيتميز بالمعالج الـExynos 1280 اللي بتكنولوجيا 5 نانو واللي بيكون موجود في موبايلات أغلى من سامسونج .. لكنه مازال أقل من SD778G .. كمان بيجي بشاشة AMOLED ممتازة 90 هيرتز .. بيجي كمان ببطارية 5000 مللي امبير أداءها ممتاز .. لكن مفيهوش مدخل سماعات للأسف.
سعر الموبايل للنسخة الـ128 جيجا مع 8 جيجا رام حوالي 7000 جنية.
Galaxy A52
الموبايل ده يعتبر أقل من الإثنين اللي ذكرناهم قبله في المعالج الـSD720G .. لكنه مازال بيقدم كاميرات 64 ميجا بيكسل كويسة فيها مثبت بصري وكمان مقاوم للماء والغبار والصوت بيكون Stereo.
موبايل Galaxy A52 سعره دلوقتي للنسخة الـ128 جيجا مع 8 جيجا رام حوالي 6900 جنية.
من 7500 الى 8500 جنية :
Galaxy A52s 5G / A53
الموبايلين يعتبروا قريبين من بعض في كل حاجه .. بإختصار المعالج الموجود في A52s 5G أفضل من الموجود في Galaxy A53 .. الكاميرات قريبه من بعض جدًا بتفوق بسيط لصالح A53 .. بطارية A53 أكبر حاجه بسيطة .. مُجملًا الموبايلين قريبين جدًا من بعض .. بس علبة A52s 5G فيها شاحن وجراب على عكس علبة الـA53 الفاضيه.
سعر Galaxy A52s 5G للنسخة الـ128 جيجا مع 8 جيجا رام حوالي 8400 جنية، وسعر Galaxy A53 للنسخة الـ128 جيجا مع 8 جيجا رام حوالي 8600 جنية.
Comments