مقارنة Vivo V21 مع Mi 11 Lite و Galaxy A52 – مين الأفضل ؟!

بعد ما كل شركات الموبايلات نزلت موبايلاتها الجديدة في الفئة المتوسطة .. هنعمل النهارده مقارنة هتوضحلك أفضل موبايل تقدر تشتريه من سعر 5 لـ 6 الاف جنية بأقل تضحيات مُمكنه .. او بمعنى تاني أفضل موبايل متكامل تقدر تشتريه في الفئة السعرية دي .. والموبايلات هي Vivo V21 و Galaxy A52 و Mi 11 Lite !


التصميم :-

لما نيجي نشوف الـ3 تصميمات هتلاقي نفسك واقع بين 3 اختيارات راقية ومحترمة من غير بهرجة كتير .. الـV21 ومي 11 لايت ظهرهم من الزجاج وفريمهم بلاستيك .. السامسونج كله بلاستيك.

الاخف والارفع هو Mi 11 Lite وبعديه V21 واخرهم سامسونج A52 ولكن كلهم في المعقول والمقبول .. يعني اتقل واحد  فيهم مش تقيل اصلًا.

بروز الكاميرات زي بعض كلهم تقريبًا .. كلهم في المعقول، وكلهم معاهم جرابات في العلب بتاعتهم.

الـGalaxy A52 أحسنهم في مقاومة الماء بشهادة IP67 والـMi 11 Lite شهادة ضد رذاذ الماء الخفيف IP53 .. اما Vivo V21 مفيهوش اي شهادة معتمدة.

التقييم :-

  • جالاكسي A52 تقييم 2 من 3 بسبب شهادة مقاومة الماء المعتمدة
  • مي 11 لايت تقييم 3 من 3 علشان أخف وزن وزجاج وفيه مقاومة خفيفة لطرطشة الماء
  • فيفو V21 تقييم 2 من 3 علشان زجاج لكن مفيش شهادة حماية من الماء

الشاشة :-

الـ3 شاشات باحجام 6.5 بوصة بدقة FHD+ .. والـ3 شاشات بيشتغلوا بتردد 90 هيرتز، الـVivo V21 أقلهم في شكل الشاشة علشان النوتش .. والنوتش معمول علشان المثبت البصري في الكاميرا السيلفي.

الـMi 11 Lite هو الوحيد اللي بشاشة مليار لون .. سامسونج جالاكسي A52 هو الوحيد Super AMOLED والباقي AMOLED .. الـVivo V21 هو الوحيد اللي بيدعم الـHDR10+ .. كل واحد ليه نقطة بتميزه.

ولكن الواقع بقى نجرب الـ3 شاشات جنب بعض .. أفضل شاشة فيهم هي شاشة Vivo V21 وبعدها علطول شاشة Galaxy A52 .. شاشة مي 11 لايت ألوانها بعيدة عنهم شوية.

التقييم :-

  • جالاكسي A52 تقييم 3 من 3 لأنها شاشة مُتكاملة
  • مي 11 لايت تقييم 2 من 3 علشان الألوان مش الأفضل
  • فيفو V21 تقييم 2 من 3 علشان شكل النوتش قديم

الأداء :-

جالاكسي A52 معالج سناب دراجون 720G .. مي 11 لايت سناب دراجون 732G .. فيفو V21 ميدياتيك Dimensity 800U .. التلاته 4G .. سرعة Vivo V21 في القراءه والكتابة للمساحة الداخلية هو الأفضل.

احسن موبايل فيهم في الأداء اليومي هو Vivo V21 .. الموبايل سلس وناعم جدًا في الإستخدام بشكل غير طبيعي .. ثم Galaxy A52 بأداء ثابت ومستقر .. في الأخر مي 11 لايت اللي أوقات هتلاقيه في سرعة V21 وأوقات هتلاقيه بطيء وده بسبب عدم إستقرار واجهة شاومي.

كلهم بيشغلوا الألعاب بنفس الإعدادات تقريبًا، ومنهم ببجي بتشتغل على High HD .. أحسنهم في تشغيل الألعاب Galaxy A52 ثم Mi 11 Lite .. الاتنين نفس الكفاءه تقريبًا، الـV21 في المركز الأخير.

التقييم في الأداء اليومي :-

  • جالاكسي A52 تقييم 2 من 3 بسبب انه مش الأسرع
  • مي 11 لايت تقييم 3 من 3 علشان أخف واجهة وأسرع أداء يومي
  • فيفو V21 تقييم 1.5 من 3 علشان مش مستقر

التقييم في الألعاب :-

  • جالاكسي A52 تقييم 2 من 3
  • مي 11 لايت تقييم 1.5 من 3 لإنه أكتر واحد بيسخن فيهم
  • فيفو V21 تقييم 1 من 3 علشان أداءه متواضع في الألعاب

عوامل الأمان وعناصر اخرى :-

فيفو V21 بيقدم أسرع بصمة تحت الشاشة .. والـFaceunlock صاروخي .. تاني أسرع بصمة في مي 11 لايت على زرار الباور والـFace Unlock برده كويس .. المركز الأخير A52 مش بتقدم أسرع وسائل أمان.

مي 11 لايت وجالاكسي A52 فيهم NFC لكن V21 مفيهوش للأسف .. الـMi 11 Lite والـA52 صوتهم Stereo والـMi 11 Lite بيقدم أعلى صوت .. الـV21 صوته Mono في المركز الأخير.

الـMi 11 Lite فيه IR Blaster، الباقي مفيهوش .. الـGalaxy A52 فيه راديو FM والباقي مفيهوش .. الـA52 فيه مدخل سماعات 3.5 مللي اما الباقي مفيهوش .. الـV21 معاه سماعة أذن في العلبة.

مستشعر التقارب في الـ3 موبايلات مش الأفضل .. الـ3 بيتأخروا لكن ممكن نقول A52 أحسنهم .. والـMi 11 Lite والـV21 مع بعض بعد الـA52.

شبكات الإتصال والـWi Fi .. فيفو رقم 1 بكل إكتساح، المركز التاني Galaxy A52 .. وفي الأخر الـMi 11 Lite.

تقييم عوامل الأمان :-

  • جالاكسي A52 تقييم 0.5 من 3 بسبب انها بطيئة
  • مي 11 لايت تقييم 2 من 3
  • فيفو V21 تقييم 3 من 3 علشان هي الأسرع

تقييم المستشعرات والشبكات :-

  • جالاكسي A52 تقييم 2 من 3
  • مي 11 لايت تقييم 1 من 3
  • فيفو V21 تقييم 2.5 من 3

البطارية :-

الـ3 بطاريات مش كبار اوي .. الـGalaxy A52 بطارية 4500 مللي امبير .. مي 11 لايت 4250 مللي امبير وأخيرًا فيفو V21 ببطارية 4000 مللي امبير.

بعيدًا عن فرق أحجام البطاريات .. مش هتحس بفرق فعلي ما بينهم .. ممكن لما A52 ياخد شوية على استخدامك تحسه احسنهم ولكن الفروقات مش كبيرة .. الـ3 موبايلات هيكفوا معاك 7 ~ 8 ساعات شاشة مفتوحة.

الشواحن .. مي 11 لايت وفيفو V21 معاهم شواحن 33 واط بيشحنوا في ساعة .. إنما A52 بيدعم شحن بقوة 25 واط ولكن معاه شاحن 15 واط بس في العلبة بيشحن في ساعتين إلا ربع.

التقييم :-

  • جالاكسي A52 تقييم 1 من 3 علشان الشاحن البطيء
  • مي 11 لايت تقييم 2.5 من 3
  • فيفو V21 تقييم 2.5 من 3

الكاميرات :-

نشوف الكاميرات بقى .. الـ3 موبايلات بكاميرا خلفية 64 ميجا بيكسل فتحة عدسة F/1.8 .. الـA52 والـV21 فيهم مثبت .. الشاومي مفيهوش .. الـA52 فيه احسن عدسة تصوير واسع 12 ميجا بيكسل.

السيلفي في السامسونج 32 ميجا بيكسل فتحة عدسة F/2.2 .. والشاومي 16 ميجا بيكسل فتحة عدسة F/2.5 .. والفيفو 44 ميجا بيكسل فتحة عدسة F/2.0 وهو الوحيد اللي فيه مثبت بصري في السيلفي وفلاش LED مُزدوج كمان.

اولًا كده أحسن عدسة تصوير واسع هتكون في Galaxy A52 بإكتساح .. بالنسبة للتصوير في مختلف الأوضاع فا الـA52 بيتفوق في العدسة الأساسية عن الباقي .. لكن في التصوير الليلي بيتفوق بإكساح Vivo V21 بسبب الـNight Mode المُمتاز اللي فيه .. اما مي 11 لايت فا نقاط تفوقه عليهم قليلة جدًا.

بالنسبة للسيلفي فا مي 11 لايت أقل بفرق واضح من المنافسين في السيلفي .. في الإضاءات العالية الـA52 مش بيعدل الألوان أوي لكن الـHDR فيه ممتاز، الـV21 بيضيف لمسات على الصور علشان يخلي شكلها أحلى .. اما في الإضاءات القليلة الـV21 ممتاز جدًا، التفاصيل مش بتكون الأفضل لكن الصورة بشكل عام بتكون قابلة للإستخدام!

تقدر تشوف فيديو المقارنة فيه مقارنة مُفصلة بين الـ3 كاميرات

بالنسبة لتصوير الفيديوهات

تقييم الكاميرا الخلفية :-

  • جالاكسي A52 تقييم 2.5 من 3
  • مي 11 لايت تقييم 1.5 من 3
  • فيفو V21 تقييم 2 من 3

تقييم الكاميرا الأمامية :-

  • جالاكسي A52 تقييم 2 من 3
  • مي 11 لايت تقييم 0.5 من 3
  • فيفو V21 تقييم 2.5 من 3

اسعار الموبايلات :-

  • جالاكسي A52 نسخة 128 جيجا مع 8 جيجا رام بسعر 5300 جنية
  • مي 11 لايت نسخة 128 جيجا مع 8 جيجا رام بسعر 5100 جنية
  • فيفو V21 نسخة 128 جيجا مع 8 جيجا رام بسعر 5700 جنية

الـ3 موبايلات بنسخهم الـ128 جيجا بينافسوا بعض .. الـV21 سعره أغلى حاجه بسيطة لإنه لسه نازل لكن قريب سعره هيتحرق في المحلات، والـ3 موبايلات بيدعموا شريحتين إتصال 4G او شريحة واحدة مع كارت ميموري.

تقييم الأسعار :-

  • جالاكسي A52 تقييم 2 من 3
  • مي 11 لايت تقييم 3 من 3
  • فيفو V21 تقييم 0.5 من 3


الرأي النهائي :-

التقييم الإجمالي :-

  • جالاكسي A52 مجموع 22 نقطة
  • مي 11 لايت مجموع 21.5 نقطة
  • فيفو V21 مجموع 22 نقطة

امتى تشتري Galaxy A52 ؟ لو عايز موبايل متوسط في كل حاجه .. موبايل منتشر مشهور ومعروف في المحلات بأقل عيوب مُمكنه .. اللي ممكن يضايقك فيه هو البصمة وسرعة شحن البطارية.

امتى تشتري Vivo V21 ؟ لو إستخدام عادي سوشيال ميديا وفيديوهات وإستخدام يومي خفيف مش ألعاب .. أداء الموبايل سلس جدًا، ممتاز في الشبكة وسرعة البصمة والكاميرا السيلفي، وشاشة ممتازة بس شكلها قديم.

امتى تشتري Mi 11 Lite ؟ لو عايز توفر فلوس لإن دي أهم ميزة فيه، موبايل خفيف وشكله لذيذ .. ولو انت بتحب شركة شاومي عمومًا وبتحب الواجهة بتاعتها.

قد يعجبك أيضا...

Comments

جاري التحميل...