شركة Honor نزلت الفترة دى 3 هواتف جديدة و هم Honor 20 Pro و Honor 20 و Honor 20 Lite وفي المقالة ديه احنا هنتكلم عن موبايل اونر 20 لايت لاننا بعد ما جربناه لاقينا ان مواصفاته متكررة مع موبايل مشهور من هواوي وده الي هتعرفه دلوقتي لأننا هنقارن بين ال Honor 20 Lite و Huawei P30 Lite علشان نشوف ايه الاختلاف بيهم خصوصا ان الاثنين نفس المعالج ونفس سعة البطارية و نفس مواصفات الشاشة.
هاتف Huawei P30 Lite :-
المميزات:
- الحواف حول الشاشة قليلة للغاية.
- حجم الهاتف مع وزنه الخفيف يجعله مثالى و مريح جدا فى الاستخدام.
- الهاتف يدعم تقنية الشحن السريع مع USB Type C.
- نوتش صغير Drop water و يمكنك الغائه من الاعدادات.
- تصميم الهاتف شيك جدا مع خامات تصنيع ممتازة.
- بصمة الهاتف سريعة.
- متوفر بالهاتف لمبة اشعارات و لكن نورها ضعيف قليلا.
العيوب:
- بروز الكاميرا الخلفية عن ظهر الهاتف.
- لا يمكنك استخدام شريحتين اتصال و كارت ذاكرة خارجي حيث يجب الاستغناء عن الشريحة الثانية و لكن مع 128 جيجا بايت لا أظن سوف تحتاج الى كارت ذاكرة.
- سعة البطارية أقل من المنافسين.
- لا يوجد طبقة حماية على الشاشة ضد الخدوش و الصدمات و لكن يوجد اسكرينة حماية من الشركة على الهاتف.
- الهاتف لم يقدم أى جديد عن الهواتف المنافسة.
هاتف Honor 20 Lite :-
المميزات:
- أرخص هاتف من شركة Honor يدعم عدسة التصوير الواسع Wide Angel.
- يدعم الموبايل لمبة اشعارات.
- تصميم جميل و جذاب.
- حجم الهاتف صغير و وزنه قليل مما يجعله مريح فى الاستخدام.
- عملت الشركة على تقليل الحواف حول الشاشة و قد نجحت بذلك.
- يأتي بأحدث نظام أندرويد 9.0 Pie.
- نوتش صغير و يمكنك الغائة من الاعدادات.
العيوب:
- لا يمكن استخدام شريحة الاتصال الثانية و كارت الذاكرة الخارجي فى نفس الوقت
- الهاتف سهل انه يتخربش و تظهر عليه بصمات الاصتبع بسبب البلاستيك.
- منفذ USB 2.0 و ليس USB Type C.
- سعة البطارية قليلة.
التصميم :-
هاتف Huawei P30 Lite بأبعاد 152.9×72.7×7.4 و وزن 159 جرام بألوان الأسود و الأزرق و الأبيض و ظهره مصنوع من الزجاج مع اطار معدنى قوي جميل و دا حاجة بقت قليلة فى هواتف الفئة دى اللى معظمها مصنوعة من البلاستيك.
أما هاتف Honor 20 Lite بأبعاد 154.8×73.6×8 ملم و وزن 164 جرام بألوان الأزرق و الأسود مصنوع من البلاستيك المقوي مع اطار بلاستيكي.
الأفضلية فى شكل التصميم مختلفة من شخص لأخر نقدر نقول ان الهواوي P30 Lite متفوق فى الخامات و الاتنين بتصميم جميل بس خد بالك ان البلاستيك بتاع اونر 20 لايت سهل يتخربش لكن صعب يتكسر لو وقع وقعة جامدة على عكس الزجاج اللى صعب يتخربش لكن ممكن يتكسر لو وقع جامد على حسب استخدامك اختار الأفضل بالنسبة لك.
أما بالنسبة لبروز الكاميرات فا هو زيادة بحاجة بسيطة فى الهواوي P30 لايت عن ال Honor 20 Lite لكن دا هيتحل مع الجراب المُرفق فى علبة الهاتف.
الشاشة و الصوت :-
شاشة هاتف Huawei P30 Lite وهاتف Honor 20 Lite زي بعض بالظبط من نوع IPS LCD بقياس 6.2 بوصة و هى أصغر شاشة فى الفئة المتوسطة و دا بيساعد أن حجم الهاتف يكون صغير فى اليد.
الشاشة بتعرض 16 مليون لون بدقة HD+ Full بجودة 1080*2312 بيكسل مع كثافة بيكسلات 415 بيكسل لكل بوصة بأبعاد 19:9 و لا يوجد أى كلام رسمى عن حماية الشاشة و لكن قامت الشركة بتركيب سكرينة للحماية على الشاشة مسبقا في الهاتفين.
يوجد في اعلى الشاشتين نوتش على شكل قطرة ماء Drop water و يمكنك الغائه من الاعدادات كما أن الحواف حول الشاشة صغيرة للغاية نفس الأداء نفس درجة السطوع و نفس عرض الألوان تقريبا مفيش اختلاف بينهم.
و بالنسبة لموضوع اصفرار الشاشة تقدر تغير درجة الألوان من الاعدادات بحيث تكون مايلة للأصفر أو الأزرق على حسب رغبتك.
الصوت:
الصوت من سماعة خارجية واحدة فى الاتنين مجسم أكثر فى هواوي P30 لايت غير كده جيد أما عن صوت سماعة المكالمات فهو جيد و عالى فى الاتنين .
بالنسبة للصوت فى سماعة الأُذن فهو جيد كما يدعم كلاهما ميكروفون اضافي لإزالة الضوضاء مما يُحسن من جودة الصوت في التسجيل و الفيديو.
الأداء :-
المعالج هنا واحد فى الاتنين Hisilicon Kirin 710 و المعالج دا ظهر فى حوالى 10 هواتف من هواوي و هونر , المعالج هنا ثماني النواة يعمل بقوة تردد 4*2.2 جيجا هرتز cortex A73 و 4*1.7جيجا هرتز cortex A53 بمعمارية 12 nm مع معالج رسومى و جرافيك Mali-G51 MP4 مع وضع تعزيز الألعاب GPU Turbo.
أداء الهاتفين جيد و لكن زهقنا منه خلاص عرفنا كيرين 710 اللى بيعمل شوية تهنيج مع الوقت مع استخدام واجهة Huawei الثقيلة و لكن الواجهة الجديدة EMUI 9 أخف قليلا من الواجهة القديمة ولكن لسه بردة ده مش افضل اداء في الفئة المتوسطة.
أما بالنسبة للعبة PUBG الاتنين واحد بتشغيلها على High HD جرافيك بسلاسة و أداء رائع بدون أى تهنيج أو سقوط فى ال frames.
الذاكرة الداخلية و العشوائية :-
يتوافر P30 Lite و 20 Lite بنسخة واحدة بذاكرة داخلية 128 جيجا بايت مع 4 جيجا بايت رام ذاكرة عشوائية.
يمكنك زيادة المساحة الداخلية لكلا من الهاتفين عن طريق إضافة كارت ذاكرة خارجي يصل الى 512 جيجا بايت و لكن مع الاستغناء عن الشريحة الثانية لاستخدامه.
الكاميرا الخلفية :-
كاميرا هاتف Huawei P30 Lite و هاتف Honor 20 Lite الخلفية بالأرقام و على الورق زي بعض بالظبط ثلاثية بجودة 24 ميجا بيكسل مع فتحة عدسة f/1.8 للأولى و الثانية بجودة 8 ميجا بيكسل بفتحة عدسة F/2.2 من أجل التصوير بزاوية واسعة ultra wide و الثالثة بجودة 2 ميجا بيكسل مع فتحة عدسة f/2.4 مع دعم الضبط التلقائي المزدوج PDAF و فلاش احادى LED و تصوير فيديو بجودة 1080 بيكسل مع 30 أو 60 لقطة فى الثانية مع دعم مثبت اليكتروني و لكنه يعمل فقط فى حالة التصوير ب 1080 بيكسل مع 30 لقطة فى الثانية gyro EIS كما يقوم بالتصوير Slow motion حتى 460 لقطة فى الثانية و يمكنك الانتقال الى العدسة الواسعة أثناء اتصوير الفيديو و لكن تقل الجودة بشكل ملحوظ.
مع دعم التصوير بوضع بانوراما و HDR لو عايز تتحكم فى الاضاءة فى الصورة مع دعم الذكاء الاصطناعى و اللى بننصحك تقفله و انت بتصور كما أنها تدعم وضع التصوير الليلي Night Mode و اللى عليك تثبت ايدك 5 ثوانى و كمان يدعم خاصية العزل Portrait.
فى تصوير الفيديو الثبات أفضل فى هاتف P30 Lite عن ال Honor 20 Lite و كمان بيتفوق عليه فى وجود خاصية Object tracking و دى علشان لو عايز و انت بتصور فيديو تركز على شئ معين أو شخص محدد و ممكن تكون هتوصل فى تحديث لهاتف 20 Lite.
اما بالنسبة لجودة الصور فتقريبا الهاتفين متشابهين جدا ويمكنك معاينة الصور في فيديو المقارنة في أسفل المقالة .
الكاميرا الأمامية :-
كاميرا السيلفي فى الاثنين نفس الأرقام تأتي بجودة 32 ميجا بيكسل مع فتحة عدسة F/2.0 و تصوير فيديو بجودة 1080 بيكسل مع 30 لقطة فى الثانية وبتطلع نفس جودة الصور.
البطارية :-
تأتى بطارية هاتف Huawei P30 Lite و هاتف Honor 20 Lite بسعة 3340 مللي أمبير و تعتبر قليلة بعض الشئ و هذا يرجع لحجم الهاتف الصغير و وزنه القليل و الشاشة الصغيرة و تصمد البطارية 4 الى 5 ساعات شاشة مفتوحة يعنى هتكمل اليوم بالعافية.
الاختلاف الجوهري هنا فى منفذ الشحن اللى بيجي في هواوي P30 Lite من نوع USB Type C مع شاحن بقوة 18 وات و لكن فى هاتف هونر 20 لايت منفذ Micro USB 2.0 مع شاحن بقوة 10 وات و دا هيفرق تقريبا حوالى نص ساعة الى 25 دقيقة فى وقت الشحن الكلي .
باختصار هواوي P30 لايت اسرع في الشحن من اونر 20 لايت .
خواص أخري :-
بالنسبة لقوة الشبكة ممتازة فى الاتنين.
متوفر بالهواتف دعم مستشعرات القرب و السرعة و البوصلة و الضوء.
يدعم الاثنين تشغيل الراديو FM .
يدعم الاثنان مستشعر الجيروسكوب حيث استخدام نظارات الواقع الافتراضي VR و مشاهدة فيديوهات 360 درجة.
يدعم كلاهما خاصية النقل السريع NFC و خاصية ال OTG و التى تمكنك من توصيل أى USB device و نقل البيانات من و الى الهاتف.
متوفر بالاثنان لمبة اشعارات و دا شئ جيد فى الفئة المتوسطة و بتنور بأكثر من لون و لكن الاضاءة ضعيفة قليلا.
عوامل حماية الأمان و الخصوصية :-
يدعم الاثنان مستشعر بصمة الاصبع و الذي يعمل بسرعة جيدة جدا كما أنها متعددة الاستخدامات حيث يمكنك بها فتح و غلق الهاتف و الرد على المكالمات و التقاط الصور و التنقل بين الصور وسحب لوحة الاشعارات لأعلى أو لأسفل و يمكنك تفعيل تلك المهام أو الغائها من الاعدادات كما يدعم كلاهما خاصية قفل الوجه Face unlock و التى تعمل بسرعة جيدة جدا و لا تفتح و العين مغلقة و نفس الأداء فى الاتنين.
محتويات صندوق الهاتف :-
هاتف Huawei P30 Lite و تم تركيب اسكرينة للحماية عليه مسبقا من الشركة و الشاحن وكابل الشحن و جراب سيلكون لحماية الهاتف وسماعات الأُذن Earphones.
هاتف Honor 20 Lite مع اسكرينة عليه من الشركة و الشاحن و كابل الشحن مع سماعات الأذن و جراب سيلكون لحماية لهاتف وسماعات الأُذن Earphones.
سعر الموبايلات :-
هاتف Huawei P30 Lite أول ما نزل كان سعره الرسمي 5000 جنيه بس السعر دا غير مناسب لأن فيه هواتف منافسة أفضل بكثير و بسعر أقل حاليا هو متوفر بسعر 4200 جنيه مصري للنسخة 128 جيجا بايت مع 4 جيجا بايت رام هو مش الأفضل من هواوي حاليا لان المستخدمين بيفضلوا هاتف Huawei Y9 Prime 2019 عشان تجربة الشاشة الكاملة و POP UP Camera عى الرغم من ان كاميرات هاتف P30 Lite أفضل بشكل ملحوظ.
هاتف Honor 20 Lite سعره الرسمي 4199 جنية للنسخة 128 جيجا مع 4 جيجا رام وهيتباع في المحلات بسعر حوالي 4000 جنية وأقل كمان.
وعموما احنا في موبيزل شايفين ان الموبايلات ديه دلوقتي مش مناسبة خالص وفي موبايلات افضل منها زي ريلمي 3 برو الي بيقدم قيمة مقابل سعر أفضل بمراحل .
وعموما شركة هونر هتنزل Honor 9X بسعر منافس جدا في الفئة المتوسطة في شهر سبتمبر القادم وده فعلا الموبايل الي يستحق اننا ننتظره .
Comments