وصلنا رسايل كتير على الانبوكس بتاع فيس بوك موبيزل .. بيسألوا عن افضل موبايل في الفئة المتوسطة بدون تنازلات كتير .. وكمان يكون بدون سلايدر .. لان لسه في ناس كتير خايفة من وجود اسلايدر ( موتور للسيلفي ) في جسم الموبايل بتاعهم !
وعلشان كدا انا المرة ديه اخترت افضل موبايلين في رنج الـ5000 جنية دلوقتي وهعملكم مقارنة كاملة ما بينهم علشان تعرف مين الموبايل الأفضل بالنسبة لاستخدامك .. الموبايل الاول هو Realme XT .. والي لقى نجاح كبير اوي الفترة الأخيرة .. والموبايل التاني هو الـHonor 20 .. والي يمكن بقاله فترة في السوق .. بس بسعره دلوقتي بعد ما نزل جامد خلى الطلب عليه جامد جدا.
التصميم :-
الـHonor 20 والـRealme XT متميزين في التصميم الخارجي الزجاجي البرميم جدا .. مفيش خلاف في النقطة ديه .. وعلشان لو انت مش متابعنا على طول .. الزجاج صعب يتخربش بس قابليته للكسر بتبقا اسهل لو انت بتوقع الموبايل كتير من ايديك .. فيعني لو انت جديد في عالم الموبايلات .. خلي بالك بعد اذنك ومتشلش الموبايل من الجراب.
الفريم بقا .. الـ هونر 20 فريم معدني محترم .. انما الـ اكس تي فريم بلاستيك .. وهنا ديه نقطة تفوق للـ اونر 20 ومش بس الاونر 20 متوفق ف الفريم لا كمان ف متفوق في الوزن الأقل والحجم الاصغر والتخانة الاقل .. وده بيخلي المسكة ف الايد ممتازة حرفيا .. يمكن هو انظف موبايل فئة متوسطة من ناحية الخامات والمسكة في الايد.
بروز الكاميرات بقا كبير في الاتنين .. بس اكبر شوية في الريلمي اكس تي .. بس كدا كدا الجرابات الشفافة الي بتيجي مع الموبايلات في العلب بتاعتها .. بتحل مشكلة البروز ده وبتغطيه تماما.
بص من الاخر بعيدًا عن الشكل .. الـHonor 20 افضل من وجه نظري في نقطة التصميم بسبب الحجم والفريم المعدن.
الشاشة :-
ريلمي اكس تي بشاشة سوبر اموليد 6.4 بوصة فيها نوتش صغير للسيلفي وبدقة FHD+ .. اما شاشة الاونر 20 بحجم 6.2 بوصة فيها ثقب للسيلفي وبدقة Full HD+ .. بس للأسف نوعها IPS LCD.
وهنا لو انت بتحب الشاشة الوانها تبقا مشبعة والكلام ده كله .. يبقا وانت مغمض شاشة الاكس تي افضل وتحت الشمس كمان سطوع الشاشات الأموليد عالي والاكس تي بيتفوق عن الاونر 20 في السطوع تحت الشمس.
يمكن الحاجة الوحيدة اللي بيتفوق فيها الـHonor 20 هو شكل الشاشة الي بثقب احدث شوية من الشاشة الي بنوتش .. بس التفوق البسيط ده ميخلهوش يقدر يكسب الشاشة الاموليد.
بالنسبة للحماية على الشاشة .. الاكس تي عليه حماية كورنينج جورلا جلاس الجيل الخامس .. انما الاونر 20 مفيش اعلان رسمي عن طبقة الحماية .. والموبايلين بتلاقيهم في العلبة متركب عليهم سكرينة.
ومن الأخر .. انا هنا افضل شاشة الريلمي اكس تي علشان بشكل شخصي بحب الشاشات الأموليد اكتر.
الأداء :-
ريلمي اكس تي بمعالج فئة متوسطة وكمان مش افضل معالج فئة متوسطة وهو معالج كوالكوم سناب دراجون 712 تكنولوجيا 10 نانو .. انما الاونر 20 بيجي بمعالج رائد حرفيا .. كيرن 980 بتكنولوجيا 7 نانو .
وبالتالي انا مرتاح جدا للـ Honor 20 واُفضِلُه من ناحية نقطة الاداء لان الموبايل ده فعلا مش هيقصر معاك ف الاداء لسنتين قدام على الاقل.
هل ده معناه ان الريلمي وحش .. لا ابدا .. هي نفس فكرة الشاشة الي قولت عليها من شوية ان الريلمي افضل .. هنا الوضع معكوس والاونر افضل.
الريلمي اكس تي بيجي بـ8 جيجا رام والـHonor 20 بـ6 جيجا رام .. وفرق الـ2 جيجا رام ده ميخلكش ابدا ترجح الاكس تي عن الـ هونر 20 علشان نقطة فرق قوة المعالج هنا تغطي اي حاجة و6 جيجا رام مش هيقصروا معاك خالص في الاداء.
بالنسبة للأداء الرسومي اونر 20 بيشغل لعبة PUBG على Ultra HDR بدون تسقيط اي فريمات واللعبة شغالة زي الفل .. انما الاكس تي بيشغل على High HD بس .. وبالنسبة لـ فورت نايت الي هي اتقل لعبة ممكن تلعبها حاليا .. شغالة على اعلى اعدادات جرافيك على الـHonor 20 .. انما الريلمي اكس تي اللعبة شغالة على اعدادات جرافيك متوسطة.
ومن الأخر انا شايف ان موبايل الـHonor 20 افضل بشكل عام في الاداء على المدى البعيد خصوصًا في الاداء الرسومي في الألعاب.
عوامل الامان وعناصر اخرى :-
الاونر 20 البصمة مدمجة بزر الباور والاكس تي مدمجة تحت الشاشة وكل واحدة سريعة في نوعها .. بس طبعا الاونر 20 كاستخدام هو عملي اكتر وسهل الوصول ليه اكتر .. بس برده في ناس بتحب البصمة تحت الشاشة واللي الاكس تي كويس جدا فيها ومش بيعلق خالص، بالنسبة للـFaceUnlock فهو سريع جدا في الموبايلين ومفيهوش اي مشاكل.
الـHonor 20 وصله تحديث الاندرويد 10 والي ضاف الدارك مود .. وكنا عملنا عنه فيديو قبل كدا بنشرح فيه مميزات نسخة الاندرويد الجديدة، انما الريلمي اكس تي لسه باندرويد باي 9 وبردة هتلاقي فيه دارك مود وهو افضل من دارك مود الاونر 20 علشان الشاشة هنا اموليد وهيوفر معاك في استهلاك البطارية.
الاونر 20 فيه لمبة اشعارات صغيرة اوي كدا فوق .. انما الاكس تي مفيهوش اللمبة ديه .. وخاصية الـScreen Off Clock مش بتعرضلك كل الاشعارات .. اخرها لو حد اتصل او رسالة من رسايل الخط يعرضلك الايقونة .. اعتقد في اندرويد 10 كل اشعارات البرامج هتظهر على الشاشة المطفية عادي.
بالنسبة للمستشعرات .. الموبايلين فيهم كل المستشعرات وشغالين بشكل ممتاز .. مفيهمش اي مشاكل في النقطة دي.
سماعات الاذن بقا .. الاونر 20 مفيش مدخل 3.5 مللي .. بيجي معاه سماعات تايب سي او ممكن تستخدم وصلة تحويل وتشغل سماعتك القديمة .. والموبايلين صوتهم عالي في سماعات الاذن.
بالنسبة لقوة الصوت .. الريلمي اكس تي صوته اعلى بفرق واضح عن الـHonor 20 .. بس مكان السماعة ف الاكس تي رخم شوية على اليمين مش على الشمال زي الاونر 20.
صوت سماعات المكالمات اعلى ف الاكس تي وصعب انه يتكتم مع الوقت .. انما الاونر 20 مكان السماعة سهل جدا يتكتم مع دخول التراب ف طرف الموبايل العلوي وهو جوا الجراب وكل شوية هتحتاج تنظف سماعة المكالمات.
واخيرا بالنسبة لقوة الشبكة .. الموبايلين ممتازين من ناحية الشبكة ومفيهمش اي مشاكل.
البطارية :-
الاونر 20 بطارية 3750 مللي امبير .. والاكس تي بطارية 4000 مللي أمبير .. يعني الفرق مش كبير ما بينهم .. الاتنين هيستحملوا متوسط من 5 لـ7 ساعات شاشة مفتوحة على حسب الاستخدام، الاونر 20 معاه شاحن 22.5 وات والاكس تي معاه شاحن 20 وات .. والاتنين بيشحنوا تقريبا في ساعة وتلت.
من الاخر مش هتحس باي تقصير في اداء البطاريتين والاتنين ممتازين من ناحية البطارية.
الكاميرات :-
وهنا كل شركة ليها تفكير معين .. الموبايلين باربع كاميرات في الظهر .. اساسية ووايد انجل وماكرو وعزل .. الاونر 20 بمستشعر سوني IMX586 الـ48 ميجا بيكسل .. والاكس تي بمستشعر سامسونج GW1 الـ64 ميجا بيكسل .. وبالنسبة للسلفي فالـHonor 20 بجودة 32 ميجا بيكسل فتحة عدسة F/2.0 موجود في ثقب الشاشة انما الاكس تي 16 ميجا بيكسل فتحة عدسة F/2.0 موجود في نوتش.
وبعيدا عن الارقام الي بتخدع .. خلينا نشوف كل موبايل بيصور ازاي، بالنسبة للتصوير بورتريه في الشمس فا الاكس تي بيلعب في الوان الصورة كلها عشان يطلعلك صورة اجمل، وهو ده اتجاه موبايلات ريلمي واوبو، اما الهونر 20 معدلش اي حاجه خالص .. سابلك الصورة زي ما هي بألوان واقعيه وتفاصيل اكتر من الريلمي اكس تي.
وبالنسبة للتصوير بشكل عام الاكس تي بيحاول يشيل كل عيوب البشره ويلعب في لون الجلد بحيث يخلي الصورة اجمل وعينك تحب تشوفها وحتى لو هتصور ورد او منظر طبيعي، الاكس تي هيديك صورة ملعوب فيها لكن حلوه اما الهونر 20 بينقلك الصورة الواقعيه زي ما هي وده بيعجبني انا شخصيًا اكتر.
بالنسبة للعدسة الماكرو فا هي افضل في الاكس تي وبتطلع صور احسن بتفاصيل احسن بفرق بسيط عن الهونر، اما العدسة الـWide Angle فا التفاصيل والصورة الحقيقيه للهونر 20 بدون نِقاش اما الصورة الاحلى هتروح للريلمي اكس تي.
بالنسبة للتصوير بالليل بقى بالـNight Mode في الموبايلين، مبدأيًا لازم تبقى عارف ان هونر 20 بياخد حوالي 6 ثواني في التصوير بالنايت مود بتاعه انما الاكس تي في 3 ثواني بس وده فرق كبير بصراحه في الوقت .. بس الحقيقي ان الـHonor 20 بيحاول على قد ما يقدر انه يجيب تفاصيل حقيقيه بألوانها الحقيقيه، انما الاكس تي بيستسهل وبيعدل شوية في الالوان والتفاصيل.
بالنسبة لتصوير الفيديوهات .. موبايل Honor 20 يتفوق في نقطة تصوير الفيديوهات لان التثبيت الالكتروني شغال على جودة 4K .. انما في الريلمي XT التثبيت الالكتروني مش شغال على جودة 4K وبالتالي هتلاقي الفيديو بيتهز .. وكمان العدسة الـ Wide Angle في موبايل Honor 20 تقدر تصور بيها 4K انما في الريلمي XT العدسة الوايد انجل اخرها بتصور 1080p.
بالنسبة للكاميرات السيلفي .. السيلفي في الشمس والإضاءه المظبوطه جامد جدًا في الموبايلين .. مفيش تقصير من موبايل مُعين .. بس عمومًا انا بحب سيلفي الاكس تي اكتر خصوصًا في ظبطه للون البشره بدون اي تعديلات على عكس الكاميرا الخلفيه، انما الهونر 20 في السيلفي ساعات كده بيجيب لون بشره مش مظبوط.
وعمومًا كتفاصيل ولو الاضاءه كويسه الموبايلين ممتازين جدًا ومفيش حد فيهم هيقصر معاك، وبالنسبة للتصوير في الاضاءه الداخليه فا التفوق واضحل للريلمي اكس تي بحيث انه بيقدر يجيب تفاصيل اكتر والـHDR بيفضل شغال.
وبالنسبة للتصوير السيلفي بالليل .. الوضع محسوم شوية لإن الريلمي اكس تي فيه Night Mode في السيلفي واللي بالتالي بيقدر يطلع لك صور افضل بفرق واضح وملحوظ عن الهونر 20.
تقدر تشوف الصور والفيديوهات المتصورة بالموبايلين في فيديو المقارنة في أخر المقالة.
اسعار الموبايلات :-
موبايل Realme XT سعره وصل لحوالي 5200 جنية للنسخة 128 جيجا مع 8 جيجا رام وينفع تركب كارت ميموري وشريحتين اتصال مع بعض، اما Honor 20 سعره وصل لـ5600 جنية للنسخة 128 جيجا مع 6 جيجا رام وينفع تركب شريحتين اتصال ومينفعش تركب كارت ميموري اصلا.
رأيي النهائي :-
تشتري Honor 20 لو بتدور على موبايل حجمه صغير سهل تستخدمه بإيد واحده .. همك الرئيسي الالعاب لانه بيجي بمعالج رائد ممتاز في تشغيل الالعاب .. وفيه كمان لمبة اشعارات .. والكاميرا الخلفية بتاعته ممتازة في تصوير الفيديوهات.
انما Realme XT تشتريه لو بتدور على موبايل شاشته حلوة وبتستخدمها كتير تحت الشمس وعاوز سيلفي جامد كدا وتكون بتحب الصور المتصورة بالكاميرا الخلفية تبقا طالعة متعدله شوية وطبعًا حابب يكون معاك مدخل سماعات 3.5 مللي ومدخل كارت ميموري لو الـ128 جيجا مش بيكفوا استخدامك.
وفي النهاية الموبايلين دول ممتازين في تقديم افضل قيمة مقابل سعر وفي نفس الوقت مفيش خوف نهائي من فكرة وجود سلايدر سيلفي ولا عيوب تظهر في الموبايل بعد فترة خصوصا ان Realme XT والاونر 20 من اقل الموبايلات الي وصلت عليهم شكاوي.
Comments