وأخيرًا عودة شركة HONOR في مصر بموبايل HONOR 50 الداعم لخدمات جوجل بشكل رسمي .. موبايل بيجي بـPackage مواصفات قوي جدًا .. لكن هل فعلًا الموبايل بيقدملك تجربة Premium في جميع الجوانب ؟ ولا الموبايل فيه نواقص ممكن ترخم التجربة ؟ وهل الموبايل يستاهل سعره ؟ ده اللي هنعرفه في مراجعة HONOR 50 !
التصميم :-
تصميم هونر 50 فاخر جدًا .. خامة الظهر من الزجاج مع فريم معدني .. الخامات المُستخدمة كويسة جدًا والتقفيل ممتاز والمسكة في الإيد فعلًا بتحسسك بإن الموبايل Premium مش رخيص إطلاقًا .. مشكلة التصميم ان الألوان بتيجي لامعه بشكل كبير جدًا، وده بيخلي البصمات تظهر فيه بسهولة جدًا.
تصميم الكاميرات الخلفية مُختلف وغريب شوية .. ممكن تحبه وممكن متحبوش، ولكنه مُختلف عن إتجاه مُعظم الشركات الثانيه في التصميم .. تحفظي بس ان العدسة الرئيسية كبيرة شوية وكمان في بروز للكاميرات الخلفية وده ممكن يعرضها للكسر، ولكن هونر ضايفه جراب شفاف في العلبة لحل البروز الكبير.
الموبايل وزنه 175 جرام وزن خفيف جدًا مع تخانه 7.8 مم قليلة جدًا .. والموبايل نفسه أبعاده حلوه جدًا في الإيد وصغير وسهل الإستخدام بإيد واحدة لو انت يديك صغيرة.
الحاجه اللي بتنقص الموبايل ده علشان يكمل التجربة الرائدة من ناحية التصميم هي شهادة مقاومة المياه المُعتمدة .. واللي موجودة في موبايل واحد مُنافس من سامسونج ولكن مع خامات أقل .. والإختيار ليك!
الشاشة :-
الشاشة بتكمل التجربة الـPremium .. شاشة 6.57 بوصة من نوع OLED بدقة FHD+ مع ثقب كبير للسيلفي .. وتردد بيوصل لـ120 هيرتز .. والشاشة بتعرض أكثر من مليار لون مع سطوع ممتاز.
ميكس المواصفات ده بيخلي تجربة الشاشة كويسة جدًا، الألوان مُشبعة لكن بشكل معقول مش بزيادة .. وكمان الشاشة واخده شهادة TUV للحماية من الأشعه الضارة .. المشكلة الوحيدة اللي في الشاشة هي ان ثقب الكاميرا السيلفي كبير وحجمه ممكن يدايقك شوية.
الشاشة هنا Premium لإنها Curved او فيها إنحناءات بسيطة من الأطراف بتكون بزاوية 75 درجة علشان متدايقكش في الإستخدام ولا تعمل أوامر بالغلط .. ميكس الشاشة الـCurved مع خامات الموبايل بيقدملك إنطباع حلو على الموبايل .. لكن الشاشة الـCurved لو حصلها حاجه بتتكلف كتير في تصليحها فا لازم تحافظ عليها كويس.
وعلشان كده شركة HONOR بتقدم ضمان سنه على الشاشة فيها إستبدال مجاني لأول مرة للشاشة لو حصل فيها حاجه .. الميزة دي هتاخدها في حالة الحجز المُسبق للموبايل.
الأداء :-
معالج كوالكوم سناب دراجون 778G المتوسط الشهير بتكنولوجيا 6 نانو ميتر وداعم لشبكات الجيل الخامس .. معالج فئة مُتوسطة عُليا كويس .. تشتريه بسعر 7 ~ 8 الاف جنية، أكثر من كده لأ .. المعالج فعلًا قوي ويعيش فترة أطول مع التحديثات لإنه أقوى بفرق ملحوظ عن معالجات SD720G و SD730G القديمة.
الموبايل غالي شوية عن المتوسط الطبيعي بتاع المعالج ده .. لكن الأداء مش عبارة عن معالج بس، السوفت وير ليه دور كبير والسوفت وير هنا سلس وسريع وهيحسسك ان الموبايل فعلًا اداءه ممتاز جدًا مش أداء موبايل في الفئة المتوسطة خالص .. ولسه هنتكلم عن السوفت وير في الفقرة اللي جايه.
لعبة ببجي بتشتغل في الموبايل هنا على Ultra HDR وبتشتغل كويس جدًا ومفيش أي مشاكل .. سخونية الموبايل مقبولة جدًا لإن المعالج المُستخدم موفر الى حد كبير وممتاز في نقطة السخونية.
عوامل الأمان وعناصر اخرى :-
البصمة تحت الشاشة .. سريعة جدًا .. بسرعة موبايلات اوبو اللي تحت الشاشة .. والـFace Unlock سريع جدًا برده .. عوامل أمان مُمتازة يُعتمد عليها فعلًا.
الموبايل بيجي بواجهة Magic UI 4.2 من هونر والمبنية على Android 11 مع دعم كامل لخدمات جوجل .. واجهة سريعة ومستقرة جدًا .. وهي تعتبر واجهة هواوي لكن مُدمج فيها خدمات جوجل.
كُنا مُفتقدين الواجهة دي .. لإن دائمًا كان في مُفاضلة بين اوبو وشاومي وسامسونج .. اوبو اللي بتقدم واجهة سريعة بس مفيش مميزات والمواصفات بتبقى ضعيفه .. شاومي اللي بتقدملك كل حاجه معادا السوفت وير الخالي من المشاكل، وسامسوج اللي بتقدم سوفت وير مش أسرع حاجه.
دلوقتي ومع عودة هونر هتاخد سلاسة الـMagic UI بنفس سرعة واجهة اوبو مع فخامة وتصميم واجهة سامسونج .. لكن بشكل عام هونر لسه مشتغلتش على الواجهة لإنها تعتبر هي واجهة هواوي بس مع دعم لخدمات جوجل .. ومفيش عمل نسختين من برامج التواصل الإجتماعي ومفيش إمكانية التحكم في حجم أيقونات الواجهة.
الموبايل فيه مستشعر NFC وفيه Always On Display بأشكال كتير .. مستشعر التقارب مظبوط موجود حقيقي ومفيهوش أي مشاكل .. مفيش مدخل 3.5 مللي لكن في مُحول 3.5 لـType C في علبة الموبايل.
المشكلة الكبيرة هي ان صوت الموبايل Mono .. صوت بيطلع من سماعة واحدة لا يرقى لإنه يتحط في موبايل Premium إطلاقًا .. هو صوت السماعة عالي ومفيش مشاكل، ولكنه أقل أكيد من أي موبايل بصوت Stereo.
بالنسبة لشبكات الـWi Fi فا هي قوية جدًا، تنافس موبايل شركة اوبو .. وأكيد أقوى من موبايلات شاومي وسامسونج.
البطارية :-
البطارية بسعة 4300 مللي امبير .. بتقدملك حوالي 6 ساعات شاشة مفتوحة وممكن تزيد حسب إستخدامك .. مش أفضل وقت إستهلاك في الفئة دي إطلاقًا.
لكن يعوض ده الشاحن السريع اللي بقدرة 66 وات واللي بيشحن البطارية بالكامل في أقل من ساعه إلا ربع وده وقت شحن كويس جدًا.
الكاميرات :-
الكاميرا الخلفية رُباعية، الأساسية 108 ميجا بيكسل بفتحة عدسة F/1.9 .. الثانية 8 ميجا بيكسل بفتحة عدسة F/2.2 للتصوير الواسع .. الثالثة 2 ميجا بيكسل بفتحة عدسة F/2.4 وهي ماكرو .. الأخيرة 2 ميجا بيكسل بفتحة عدسة F/2.2 وهي مُخصصة للعزل .. والسيلفي 32 ميجا بيكسل بفتحة عدسة F/2.2.
الكاميرا الخلفية بتطلع صور زي باقي موبايلات الفئة المتوسطة .. مش موبايلات غالية .. حسيت في بعض الأوقات ان الألوان محتاجه تبقى أفضل .. المعالجة بتاعت الكاميرا محتاجة تحديث يظبط موضوع تعزيز الألوان ويظبط الـSharpness او حدة تفاصيل الصور .. وفي تحديث بالفعل هيوصل للموبايل يظبط أداء الكاميرا.
لما قارنته بالـGalaxy A52s 5G من سامسونج لاقيت ان الـA52s متفوق في معظم الصور .. يمكن الـHONOR 50 متفوق في بعض الصور لكن الأغلبية كانت للـA52s 5G.
بالنسبة للسيلفي فا الصور محتاجه تزيد فيها الـSharpness بشكل كبير .. الصور ممسوحة بزيادة، ومعالجة الصور بتعمل تجميل لوحدها .. في زاوية Wide في السيلفي بتخلي مساحة التصور أوسع .. اما عن التصوير بالسيلفي في الإضاءات الضعيفة فا أداءها بيقل بفرق كبير.
شوف تجربة التصوير بالمويايل صور وفيديوهات مع مقارنته بالمنافسين في فيديو المراجعة !
بالنسبة لتصوير الفيديوهات فالموبايل بيصور لحد 4K مع 30 فريم في الثانية وبيدعم المثبت الإلكتروني .. المثبت أداءه متوسطة في الموبايل ولازم تحاول تثبت إيدك كويس علشان تاخد أحسن ثبات .. الموبايل مفتقد جدًا للمثبت البصري الحقيقي بصراحة !
سوفت وير الكاميرا في تصوير الفيديوهات فيه مميزات كتير ومنها انك تقدر تصور Multi-Video يعني تستخدم كاميرا أمامية وخلفية مع بعض في نفس الوقت .. وتقدر تتنقل بين أوضاع تصوير كتير وانت بتصور الفيديو من غير ما تقفل .. وكمان تقدر تسرع او تبطأ المشهد بتاعك، مميزات لطيفة جدًا مع تقطيعات خفيفة في فريمات الفيديو.
وموجود برده ميزة الـStories .. ميزة لطيفة تقدر من خلالها تعمل Story من خلال 9 قوالب موجودة على الموبايل وتعمل الحركة اللي الموبايل بيقولك عليها وهو هيمنتجها ويطلعهالك ستوري جاهزه بـMusic حلوه جاهزة انك تنزلها في كل منصات السوشيال ميديا .. مميزات كتير مُبهرة في تصوير الفيديوهات في الموبايل ده!
سعر HONOR 50 :-
- نسخة 128 جيجا مع 6 جيجا رام بسعر 7999 جنية
- نسخة 256 جيجا مع 8 جيجا رام بسعر 8999 جنية
النسخة الـ128 هتكون متوفرة بلون واحد وهو HONOR Code .. اما نسخة الـ256 جيجا هتكون متوفرة بثلاثة ألوان وهما الأسود والأخضر والكريستال .. وبينفع تركب شريحتين إتصال 5G لكن مينفعش تركب كارت ميموري.
الرأي النهائي :-
مميزات HONOR 50 :-
- خامات وتقفيل محترم ووزن مثالي
- شاشة بتردد عالي بها Edges
- سوفت وير سلس جدًا
- أداء محترم في الإستخدام اليومي
- شاحن سريع 66 وات
- بصمة سريعه جدًا
- مستشعر تقارب ممتاز
- شبكات قوية جدًا
- مميزات كتير في تصوير الفيديوهات
عيوب HONOR 50 :-
- مفيش صوت Stereo
- مفيش مثبت بصري
- الكاميرات محتاجه تتظبط بتحديث سوفت وير
- مميزات ناقصة من السوفت وير
الموبايل ده واخد الحلو من Galaxy A52s 5G مع الحلو من Oppo Reno 6 5G .. واخد معالج الـA52s مع سلاسة سوفت وير اوبو وسرعة البصمة ومستشعر التقارب والشبكات والخامات المحترمة .. ومزود عليهم شاشة Curved وميزات تصوير الفيديو .. والأختيار ليك بين التلاته!
Comments