الموبايلين اللي هنراجعهم النهاردة من شركة Honor إتعملهم مؤتمر في مصر من شهر وإتعلن عن أسعارهم .. ولكن فعليًا هما لسه نازلين السوق من كام يوم .. الموبايلات دي هي Honor 9A و Honor 9C .. خلينا نشوف مميزات وعيوب كل موبايل فيهم بكل صراحة وهقولك رأيي في السعر برده متقلقش.
حابب أوضح إن الموبايلات دي جايه بخدمات هواوي ومفيهاش خدمات جوجل .. تقدر تحمل تطبيقاتك من الـApp Gallery .. واللي مش هتلاقيه هتفتح تطبيق Petal Search وتدور عليه وتحمل التطبيق كـ APK وتسطبه بكل سهولة .. طبعًا الكلام ده لا يسري على البرامج الأساسية لجوجل اللي مش هتقدر تعوضها ولازم بدايل على سبيل المثال الـYoutube Studio.
تاني حاجة حابب أتكلم عنها هي خاصية الـNFC اللي ساعات بتكلم عنها في مراجعات الموبايلات .. وبإختصار الميزة دي مُهمة جدًا لإن أنت عارف دلوقتي عداد الكهرباء بكارت وشوية وهيبقى عداد المياه كمان بكارت عند الكل وهكذا .. فا بدل ما بتنزل مخصوص تشحن الكارت .. من خلال خاصية الـNFC بتقدر تشحن الكارت علطول من موبايلك من غير ما تنزل من البيت.
ده غير إنها طريقة أمنة جدًا للدفع الـ لا تلامُسي من غير ما تطلع كارت الفيزا بتاعك .. الميزة ديه خلال سنتين مش هتقدر تتعايش من غيرها ولازم تبقى موجودة على كل الموبايلات .. الميزة ديه بقى موجودة في الـ9A والـ9C .. ودول كده يعتبروا من أرخص الموبايلات اللي فيها الميزة دي.
1- Honor 9A
العيب الأول :-
أول عيب المعالج المستخدم ميدياتيك Helio P22 .. معالج قديم ضعيف .. واحنا في أخر 2020 .. ممكن تتقبل فكرة وجود المعالج ده في موبايل في فئة الـ1000 جنية .. إنما 2000 لأ صعب .. لإن في موبايلات تانية مُنافسة بمعالجات أقوى بكتير.
إستقرار واجهة هواوي مخلي الموبايل في أداء المكالمات وبرامج السوشيال مقبول جدًا وممكن تتقبله عادي .. إنما أكتر من كدا لا مش هيكون كويس.
الأداء الرسومي بتاع المعالج ضعيف .. بيشغل ببجي على اقل إعدادات جرافيك وكذلك الحال كول اوف ديوتي .. وهتحس بتقطيعات ومش هتتبسط من الأداء الرسومي خالص .. ومن الأخر الموبايل ده مش معمول للألعاب خالص .. متفقين ؟
العيب الثاني :-
الكاميرات .. بص هي مش عيب أوي لإن اصلًا كاميرات الفئة السعرية دي بتبقى تعبانة شويتين .. الموبايل جاي بـ كاميرا خلفية ثُلاثية الأساسية 13 ميجا بيكسل بفتحة عدسة F/1.8 والتانية 5 ميجا بيكسل للتصوير الواسع والأخيرة بتيجي بدقة 2 ميجا بيكسل وهي مُخصصة للعزل .. والسيلفي 8 ميجا بيكسل فتحة عدسة F/2.0.
انا جربت الكاميرا وشايف إن الكاميرات مُتوسطة أو أقل من المتوسطة بشوية .. بس كان لازم أتكلم عنها فحطيتها في العيوب وهتكلم عنها في المميزات كمان شوية .. والموبايل بيصور فيديوهات بالكاميرا الخلفية على 1080p بدون أي ثبات الكتروني كالمُتوقع يعني.
العيب الثالث :-
مفيش مستشعر الـGyroscope .. مش عارف ليه بيشيلوه من الموبايلات الرخيصة شوية !
العيب الرابع :-
الشاحن بيجي بقوة 10 وات ومنفذ الشحن Micro USB 2.0 .. بس خلينا نتفق إن بالسعر ده المعظم بيجي بنفس قوة الشحن دي وبنفس والمنفذ ده بس برده الكلام ده مش بيعجب بعض الناس .. فا كان لازم أذكر الحته دي وطبعًا البطارية علشان كبيرة شوية فا هي بحجم 5000 مللي امبير وهتشحن في 3 ساعات وشوية.
العيب الخامس :-
سعر الموبايل ده لازم يجي في العيوب .. السعر كان محتاج يقل شوية، خصوصًا ان الموبايل ده نسخة من Huawei Y6p اللي بالمناسبة ناجح جدًا، ولكن الـ9A أحسن منه في دعم الـNFC بس للأسف أعلى منه بـ100 جنية.
العيب السادس :-
غياب خدمات جوجل .. وممكن أعتبرها مش عيب لو انت هتتعايش وتحمل كل البرامج اللي أنت عايزها من برنامج Petal Search زي ما أنا وضحتلك فوق.
الميزة الأولى :-
أول ميزة هي التصميم الشيك .. صعب تحس إن ده موبايل بـ2000 جنية .. طبعًا من البلاستيك بس بصراحة بلاستيك نظيف وخامات مُحترمة جدا .. مفيش بروز كاميرات وكمان في جراب في العلبة .. الموبايل مصروف جامد على خاماته الخارجية.
الميزة الثانية :-
الشاشة .. هي شاشة عادية 6.3 بوصة من نوع IPS LCD وبدقة HD+ .. ولكن الشاشة نظيفة من ناحية الـQuality .. وده باين من سطوعها العالي تحت الشمس .. وألوانها الكويسة جدًا اللي ممكن تكون من أفضل الشاشات بالسعر ده من ناحية جودة تباين الألوان .. طبعًا كان الافضل تكون FHD+ .. بس محدش عملها بالسعر ده غير شاومي وكان على حساب سطوع الشاشة.
الميزة الثالثة :-
تالت ميزة .. البصمة والـFace Unlock .. أدائهم معقول .. حاطتهم في المميزات علشان مكانهم مش العيوب بس مش أكتر.
الميزة الرابعة :-
الصوت .. صوت الموبايل عالي جدًا .. اعلى من الـHonor 9C الأغلى منه .. صوته بجد عجبني جدًا جدًا.
الميزة الخامسة :-
في ميكروفون إضافي لعزل الضوضاء .. أيوة دي تعتبر ميزة بالسعر ده علشان في موبايلات تانيه كتير اوي في الفئة دي مفهياش الميكروفون ده.
الميزة السادسة :-
بطارية ضخمة بتيجي بحجم 5000 مللي أمبير مُحترمة جدا هتكمل معاك 8 ~ 9 ساعات شاشة مفتوحة مستريح جدًا .. يعني يوم أو يوم ونص لو إستخدامك خفيف .. كويس جدًا.
الميزة السابعة :-
الموبايل بيجي بمساحة تخزين 64 جيجا مع 3 جيجا رام مش بطال خالص .. وكمان تقدر تركب كارت ميموري بحجم 256 جيجا مع شريحتين اتصال مع بعض.
الميزة الثامنة :-
ده يعتبر من أرخص الموبايلات اللي بتدعم ميزة الـNFC.
سعر الموبايل :-
السعر الرسمي للموبايل هو 2299 جنية للنسخة اللي بتيجي بمساحة تخزين 64 جيجا مع 3 جيجا رام وأعتقد هيقل شوية في المحلات.
الموبايل بالنسبة للمنافسين :-
الموبايل ده بالنسبة للمنافسين فا هو أضعف حاجه فيه هي المعالج .. نقطة مُتأخره جدًا على كل المنافسين، بس بقيت النقط هو يقدر يسد فيها عادي.
وأكتر 3 حاجات عجبوني في الموبايل هم الخامات الخارجية النضيفة وجودة التقفيل مع الصوت العالي ودعم الـNFC.
2- Honor 9C
العيب الأول :-
البطارية .. حجمها عادي 4000 مللي أمبير .. وهي بصراحة مش عيب أوي .. هي هتكملك حوالي 5 ~ 6 ساعات شاشة مفتوحة .. وقت مش وحش .. ومش حلو .. حاجة في النص .. بس أنا اتقفلت خالص من موضوع البطارية بسبب الشحن هنا.
تخيل إن الموبايل جاي معاه نفس الشاحن الـ10 واط ومنفذ الشحن الـMicro USB 2.0 اللي مش عاجبني الـ9A الأرخص .. ما بالك بـ هنا بقى بنتكلم في فئة الـ3 الاف جنية .. المعظم بالسعر ده بيقدم شحن سريع .. وعموما الـ9C شحن معايا في حوالي ساعتين ونص.
العيب الثاني :-
الشاشة .. برغم شكلها الحلو وإنها Punch Hole وبحجم 6.39 بوصة من نوع IPS LCD .. إلا أن الدقة منخفضة HD+ فقط .. وفي ناس بتقدم شاشات FHD+ بالسعر ده.
بس الحق يتقال لو الدقة متفرقش معاك اوي .. فالشاشة هنا عليها نفس ملاحظات الـHonor 9A .. سطوع عالي .. ألوان مظبوطة جدًا.
العيب الثالث :-
الموبايل جاي بـ64 جيجا مع 4 جيجا رام .. هتقولي حلو وينفع تركب شريحتين إتصال وبتاع .. هقولك ماشي بس الـ64 جيجا قليل .. في موبايلات كتير بتقدم 128 جيجا بالسعر ده.
العيب الرابع :-
صوت الـSpeaker .. شوف هو كان مُمتاز في الـ9A .. انما الـ9C الأعلى الـSpeaker ضعيف ومعجبنيش.
العيب الخامس :-
الكاميرا السيلفي الـ8 ميجا بيكسل اللي هنا أدائها ضعيف جدًا .. خصوصًا في التصوير في إضاءة ضعيفة.
العيب السادس :-
العيب السادس هو غياب خدمات جوجل.
العيب السابع :-
الموبايل ده نازل أغلى 350 جنية من الـHuawei Y7p .. واللي هما اصلًا نسخة طبقة الأصل من بعض .. الفرق بس أن الـ9C بيتفوق في دعم الـNFC .. كانت تبقى مبلوعة شوية لو الفرق 100 جنية زي الفرق بين الـ9A والـY6p اللي إتكلمت عليهم من شوية .. إنما هنا الفرق كبير.
العيب الثامن :-
أي منطق يخليني أسيب الـHonor 9X Lite .. الداعم لخدمات جوجل .. الgي بيجي بظهر زجاج محترم .. اgلي بيجي بشاشة FHD+ محترمة .. اللي بيجي بمساحة 128 جيجا .. كل ده وبنفس سعر Honor 9C .. فا ايه اللي يخليني أعمل كده ؟
الميزة الأولى :-
التصميم ألوانه شيك .. خامة خارجية بتيجي من البلاستيك بس متينه .. ولكن تظل بلاستيك (بصراحة البلاستيك صعب يكون ميزة ولكنه مش عيب).
بس بروز الكاميرات هنا أكبر شوية بس بيجي جراب في العلبة .. وطبعًا شكل الكاميرات مرصوص بالتريند القديم بتاع 2019 مش بتاع 2020.
الميزة الثانية :-
المعالج .. كيرن 710A اللي كلكم عارفينه .. هو هنا حقق Score قليل شوية على Antutu معرفش ليه .. ولكن يظل أداءه معقول .. بس خلي بالك مقصدش إنه ميزه .. ولكنه مش عيب وأدائه مش أقل بكتير عن الـG70 والـG80 الموجودين في الفئة السعرية دي.
أداءه الرسومي برده معقول جدًا .. ببجي بتشتغل على اعدادات High HD وبتشتغل كويس جدًا .. وكول اوف ديوتي بتشتغل برده كويس على المعالج اللي هنا.
الميزة الثالثة :-
الكاميرا الخلفية هي ثلاثية، الأساسية 48 ميجا بيكسل فتحة عدسة F/1.8 والتانية 8 ميجا بيكسل للتصوير الواسع والأخيرة 2 ميجا بيكسل للعزل.
الكاميرا أدائها عادي جدًا الصبح .. الصور سايحة شوية ومش شارب اوي .. والألوان كمان مش مُشبعه اوي والتفاصيل عادية جدًا.
ولكن محطتهاش في العيوب بسبب الأداء المُميز في الـNight Mode .. الصور بتطلع حاجه تانية خالص .. لدرجة اني أنصحك لو هتشتري الموبايل ده وهتصور حتى في إضاءة داخلية عالية صور برده بالـNight Mode هتتبسط جدًا.
الميزة الرابعة :-
الموبايل أكيد فيه بصمة سريعه وFace Unlock سريع .. وده من ضمن الحاجات العادية اللي في الموبايل ده.
الميزة الخامسة :-
الميزة هي دعم الـNFC.
سعر الموبايل :-
السعر الرسمي للـ9C هو 3099 جنية للنسخة 64 جيجا مع 4 جيجا رام وينفع تركب كارت ميموري بحجم 512 جيجا وشريحتين إتصال مع بعض.
والموبايل مفيهوش ميزة حقيقية تديلة نقطة تفوق أو أفضلية عن المُنافسين غير الـNFC .. لإن هونر هي اللي حطت الموبايل ده في منافسة صعبة عليه جدًا بسبب التسعير بتاعه، مش أكتر.
Comments