في بداية المقال .. الأيام اللي جايه هي الأصعب .. ياريت نلتزم بتعليمات وزارة الصحة .. نتجنب النزول اللي ملوش داعي .. ومش هوصيلك كحول وكلور وتغسل ايديك علاطول بإستمرار.
ملاحظين بقالنا فترة كبيرة .. لغبطة كتير وصعوبة في اختبار الموبايل المناسب بسبب كثرة الموبايلات الي بتنزل كل شوية في كل الفئات السعرية .. أكيد لو انت فاهم بقى في المواصفات بتاعت الموبايلات ومتابع الجديد اول باول هيبقى الموضوع بالنسبالك سهل .. انما الفكرة كلها في المستخدم البسيط اللي بيغير موبايله كل فترة كبيرة .. وحابب وقت ما يشتري موبايل .. يقدر فعلا يشتري موبايل مناسب لإستخدامه.
احنا في موبيزل حددنا 5 خطوات .. لو عرفتهم هتقدر تختار موبايلك الجديد المناسب بدون ما حد يضحك عليك !
1- تحديد الفئة السعرية :-
اول خطوات اختيار موبايل مناسب ليك، هو تحديد الفئة السعرية بتاعته .. وهنا انا بشوف ناس كتير جدا بتقع في الغلط ده .. الموبايل ده منتج انت بتشتريه وارد يحصله اي حاجه و أكيد هتغيره كل فترة سواء كبيرة أو صغيرة .. فمش طبيعي انك تسيب رنج السعر مفتوح .. ويبقى مفيش ليك سقف وتفضل تعلى وتعلى بالرقم الي هتدفعه.
بمعنى .. لو انت محدد تشتري موبايل في رينج سعر من 3 الاف لـ5 الاف جنية .. فانا بقولك انت غلطان لان انت كدا بتقارن موبايلات كتير ببعض في فئات مختلفة .. فبداية الموضوع كدا حدد رينج سعر وتحط لنفسك سقف او زيادة فيه 500 جنية بس.
على سبيل المثال، بتدور على موبايل في حدود 3000 جنيه .. واخرك تدفع 3500 جنيه .. انت ادرى بظروفك وده المبلغ اللي مش هتقدر تزود عنه .. كدا انت تمام .. واحب افكرك هي مش اخر الدنيا .. متقلقش، كدا كدا كل يوم في موبايلات جديدة بتنزل والمواصفات الأعلى بقينا نشوفها في موبايلات ارخص .. فمتدفعش دم قلبك دلوقتي وترجع تندم قدام انك زنقت نفسك علشان تشتري موبايل اعلى.
2- تحديد اهتماماتك :-
انا اهتمامي كاميرا .. انت اهتمامك العاب .. واحد تاني اهتمامه سوشيال ميديا .. كل واحد ليه اهتمامات .. وخدها قاعده مني .. مفيش موبايلات فئة اقتصادية او متوسطة متكاملة ومفيهاش غلطة .. اومال هيسيبوا ايه للموبايلات الغالية اللي اسمها فلاج شيب.
انت ادرى بإهتماماتك .. حدد اولوياتك .. واختار بالترتيب ايه اهم حاجه عندك .. وانا شايف الاهتمامات من معظم الاستفسارات اللي بتجيلنا بتكون العاب، كاميرا، سوشيال ميديا وفيديوهات مثلًا.
بعد ما بتختار اهتمامك الاساسي .. رتب بقية الاهتمامات .. يعني مثلًا اهتمامك الأساسي العاب، ثم كاميرا، ثم سوشيال ميديا وهكذا .. علشان ده هيسهل عليك الاختيار.
خلاص تمام كده ؟ .. حددت انت عاوز ايه ؟ .. يلا بينا ندخل بقى في الخطوات الأهم.
3- الاختيار :-
الخيارات هتبقى قدامك كتير في كل الفئات السعرية دلوقتي .. بس انا عارف انك حددت اهتمامتك بالترتيب .. ركز معايا بقى في الكلمتين دول عشان تقدر لـ اختيار موبايل كويس لإستخدامك !
مبدئيًا متخليش حد يضحك عليك بالمساحة والرام والكلام ده .. هتعمل ايه بيهم لو انت اصلًا الاساس اللي بتدور عليه مش موجود .. الحاجات ديه بتبقى كماليات نفضل بيها موبايل عن التاني لو اصلًا الاتنين فيهم الحاجات اللي انت بتدور عليها .. انما ده ميبقاش هو الاساس اللي بتدور عليه .. متفقين ؟
اول إختيار، الألعاب :-
تعالوا نتكلم عن اول اختيار، وهو الألعاب .. علشان تاخد تجربة العاب كويسه .. لازم يكون معاك معالج كويس في فئته السعرية .. هرتبلك المعالجات اللي انصحك بيها لو اهتمامك العاب .. من اول الفئة المتوسطة لحد الفئة الاقتصادية .. الاقوى فالاضعف وحتى وقت كتابة المقال ده.
- كيرين 980 الموجود في Nova 5T وHonor 20
- ميدياتك Helio G90T الموجود في Note 8 Pro و Realme 6
- سناب دراجون 730 الموجود في Mi 9T و A71
انا خليت الـ730 بعد الـG90T لإن الأداء الرسومي في G90T افضل بفرق بسيط بس بيجي في موبايلات ارخص بقيمة احسن من ناحيه الأداء في الالعاب - كيرين 810 الموجود في Nova 7i وHonor 9X Pro
المعالج بيقدم اداء ممتاز لكن اداءه الرسومي او اداءه في الالعاب مش الأفضل لذلك بيجي في ترتيب بعد الـG90T والـSnap Dragon 730 - سناب دراجون 712 و710 الموجودين في Realme XT وMi 9 Lite
- اكسينوس 9610 الموجود في Galaxy A51 وM30s
- ميدياتك Helio G80 الموجود في Realme 6i وفي نفس المركز يتواجد الكيرن 710 الموجود في Huawei Y7p
- ميدياتك Helio G70 الموجود في Realme C3 وInfinix Note 7
- سناب دراجون 665 الموجود في Note 8 و Realme 5
دي المعالجات اللي انصح بيها .. ومنصحكش تجيب موبايل بمعالج اقل من كده دلوقتي لو اهتماماتك الألعاب، والترتيب ده من وجهة نظرنا وتجربتنا لمعظم الموبايلات اللي نزلت في الفتره الأخيره.
ويفضل طبعا يكون مع المعالج القوي .. شاشة FHD+ وصوت عالي .. علشان تاخد تجربة العاب محترمة.
تاني إختيار، الكاميرات :-
هنا الموضوع ملخبط اوي اوي .. الاول لازم تبقى عارف ان الكاميرات مش مجرد ارقام .. ويمكن يكون نوع المستشعر الموجود في الكاميرا وفتحة العدسة .. اهتمام اولى واحسن من رقم الميجا بيكسل.
بمعنى مثلًا ان كاميرا 12 ميجا بيكسل بفتحة عدسة F/1.8 ممكن تكون افضل من كاميرا 48 ميجا بيكسل بفتحة عدسة F/2.0.
وعلشان برده الكاميرا مبتجيش غير بالتجربة الفعلية .. وصعب جدا تحكم عليها من شوية كلام وأرقام .. لان هنا سوفت وير الموبايل نفسه بيختلف في معالجة الصور .. وحتى لو حطيت موبايلين جنب بعض بنفس مستشعر الكاميرا ونفس فتحة العدسة ونفس الميجا بيكسل .. ممكن تلاقي موبايل افضل من التاني بفضل السوفت وير.
فحقيقي لازم هنا يكون اعتمادك على المقارنات .. تحاول تشوف مقارنات كاميرات على قد ما تقدر .. وتركز على الصور اللي في اضاءات ضعيفة لان هي اللي بتقدر تحدد الكاميرا الافضل… وهتلاقي على قناة موبيزل على اليوتيوب فيديوهات مقارنات بين كل الموبايلات الي في خيالك !
تالت إختيار، السوشيال والفيديوهات :-
تالت واخر اهتمام معانا هو برامج السوشيال ميديا والفيديوهات .. وهنا مفيش تنازل عن شاشة اموليد بقى .. يمكن سامسونج من اشطر الشركات اللي بتديلك الشاشات الاموليد باسعار حلوة .. بعيدًا عن كمية التنازلات اللي فيها.
بس في الاول وفي الاخر .. في ناس كتير غيرنا .. مش اهتمامهم العاب تقيلة والموبايل يكون صاروخ .. هو عاوز موبايل شاشته حلوة وصوته عالي وشكله شيك .. وهنا بتيجي موبايلات سامسونج من سلسلة الـA .. اللي يمكن محققه مبيعات قوية بسبب النقطة ديه.
في بقى شوية حاجات تانية زي الشحن السريع وشكل التصميم .. دول خليهم في اعتبارك .. بس متخليهمش هما السبب اللي تجري وراه علشان تشتري موبايل.
4- تقبل العيوب :-
تقبل العيوب .. لازم لازم تعرف عيوب الموبايل اللي هتشتريه وتفكر فيها كويس جدا قبل ما تاخد خطوة الشراء .. اسمع لكل الناس .. مراجعين مصريين او عرب او اجانب شوف بترتاح لمين .. واسمع كل الفيديوهات واقرا كل المقالات اللي عن الموبايل اللي هتحدده.
وتقبل كل عيوبه .. ولازم افكرك .. ان لازم الموبايل يبقى فيه عيوب .. ممكن تبقى من وجه نظري ومن طابع استخدامي ده عيب .. وممكن اصلًا انت متفتكرش ان الموضوع ده عيب.
اديلك مثال .. موبايل مثلًا مفيهوش لمبة اشعارات ولا خاصية Always On Display .. ده عيب رخم بالنسبالي .. هل ده عيب بالنسبالك ولا عادي انت ممكن كل شوية تفتح موبايلك وتبص على الاشعارات ؟
واخيرًا .. في نقطة العيوب، انصحك تتأكد من شبكة الموبايل اللي هتشتريه انها قوية .. ولو مش واثق فينا .. إسأل على الجروب الرسمي للموبايل على الفيس بوك .. او حتى إسأل ناس تعرفهم اشتروا الموبايل .. لان النقطة ديه ممكن تكرهك في موبايل حرفيًا .. خصوصًا لو انت بتتواجد كتير في اماكن مفيهاش شبكة كويسة.
5- وقت الشراء :-
- لو مش مستعجل على تغير الموبايل وموبايلك مريحك حاليًا .. متفكرش تغير
- متشتريش موديل من موبايل وترجع تشتري الموديل الأحدث منه على طول اما ينزل
يعني مثال بسيط، اشتريت Realme 5 وهو معاك ومبسوط بيه، متبيعوش علشان تجيب ريلمي 6i مثلًا، الأفضل تستنى الـVersion او الإصدار الأعلى وليكن Realme 7i مثلًا او ايً كان اسمه لأن ده اللي هتلاقي فيه النقلة اللي انت عايزها - وقت الشراء يكون دايمًا بعد ما الموسم بتاع نزول الموبايلات يخلص .. تفكر وتدور وتقارن وبعد كده تشتري بس متطولش اوي في النقطة دي اخرك شهر مثلًا لإن لو اكتر من كده هتلاقي الجيل الجديد جاي في السكه
وخلي بالك شركات الموبايلات دلوقتي في السنه الواحده بتنزل إصدارين من كل موديل .. يعني خلال النص الأول من السنه بينزل نسخة والنص التاني بينزل النسخة الأحدث.
وعلى سبيل المثال، ريلمي هتنزل موبايلات Realme 6 وRealme 6 Pro قريب في مصر، وشاومي هترد عليها بسلسلة Note 9 .. خليك ناصح بقى واستنى كل واحد يجيب اخره وشوف كل المقارنات وبعدين إختار .. اما لو انت ليك انتماء لبراند معين منهم او حتى اي براند تاني فإختيارك هيبقى محسوم لصالح موبايل معين اول ما ينزل وتشوف مراجعته.
Comments