النهارده هنقدم لكم مراجعة Huawei FreeBuds 4i الجديدة من هواوي .. ملاحظين طبعًا ان هواوي بقت تهتم بالساعات والسماعات والمنتجات التانية بشكل كبير الفترة الأخيرة .. والسماعة ديه فيها مميزات قوية جدا زي الـ Active Noise Cancellation و صوتها ممتاز و بطاريتها قوية و بسعر أقل من 2000 جنية .. في الريفيو ده هتعرف كل حاجة عن سماعة هواوي الجديدة.
البطارية :-
علبة السماعات فيها بطارية بسعة 215 مللي امبير، وكل سماعة فيهم 55 مللي امبير، العلبة بتشحن السماعات مرتين ونص تقريبا .. والشحنة الواحدة بتقدملك حوالي 10 ساعات موسيقى و 6 سماعات مكالمات .. يعني السماعات بالعلبة هتقدملك حوالي 22 ساعة .. هتقضي معاك اليوم بكل راحة.
لو مشغل Active Noise Cancellation هتاخد حوالي 7 ساعات موسيقى و 5 ساعات مكالمات .. والعلبة نفسها اتشحنت بالكامل في حوالي ساعة تقريبًا، و10 دقائق من الشحن يقدمولك حوالي 4 ساعات موسيقى.
وبكدا بطارية السماعة فعلا قوية جدا.
جودة الصوت والميكروفون :-
السماعة صوتها عالي ومفيش فيه أي Distortion او أي تقطيع او Noise وانت معلي الصوت على الأخر .. والـBass فيها معقول جدا مقارنتا بالسعر.
بالنسبة لصوت الميكروفون فا السماعة فيها Dual Mic System او نظام ميكروفون مُزدوج علشان يقلل من الـNoise او الدوشة وانت بتتكلم .. او يتعرف على الصوت اللي حولك علشان يعزله في وضع الـActive Noise Cancellation.
في إستخدامي للميكروفون بقى فا هو كان كويس في المكالمات ومواجهتش معاه أي مشكلة .. محدش من اللي كنت بكلمهم اشتكى منه مثلًا .. شوف تجربة الميكروفون في أوضاع مختلفة في فيديو المراجعة !
الـ Active Noise Cancellation :-
أهم ميزة بقى في السماعة وهي الـActive Noise Cancellation .. الجميل إننا بقينا نشوف الميزة دي بأسعار أقل .. الميزة دي بقى فيها 3 أوضاع.
أول وضع وهو الـNoise Cancelling وفعال وبيخفف الصوت المُحيط لو انت في بيت وحواليك تكييف او مروحة او تلاجة مثلًا.
الأصوات الخفيفة اللي بتبقى حواليك دي ولو انت قاعد في مطعم مثلًا وفي دوشة في المكان .. الوضع ده بيكون كويس وبيبدأ يخفف الصوت والدوشة اللي حواليك لكن طبعًا مش بيمنعها 100% ولكن بتخلي الوضع أكثر راحة .. تعليقي عليه بس انه وضع واحد، مش بيديني إمكانية إني اختار انا Outdoor ولا InDoor مثلًا.
الوضع التاني هو الـAwareness وده بيخلي السماعة توضحلك الأصوات اللي حواليك .. يعني لو انت مشغل وضع الـNoise Cancelling وبتتكلم مع حد مثلًا وضع الـAwareness هينبهك ويوضحلك الصوت علشان تكون مركز مع الشخص اللي بيكلمك وتاخد بالك منه وتسمعه بوضوح.
ثالث وضع بقى وهو الـOff .. او الطبيعي بتاع السماعة، ولا بتلغي أصوات ولا بتوضحلك أصوات خارجية.
تجربة الألعاب :-
اما عن تجربتها في الألعاب فا هي مش Gaming Headset او يعني مش سماعة مخصصة للألعاب ولكن اداءها لطيف ، وتقدر تشوف فيديو المراجعة علشان تقيم التجربة بتاعتها بنفسك.
التصميم :-
السماعة بتيجي في Box او صندوق تقليدي جدًا .. بيجي معاها وصلة USB Type C ومقاسات مختلفة من الـEar Tips علشان تختار المقاس المناسب ليك .. والسماعة بتتوفر بـ3 ألوان وهم الأسود والأحمر والأبيض.
بالنسبة لتصميم العلبة فا هو تصميم بيضاوي او دائري شكله جميل .. حجمه مش كبير، بتتمسك في الإيد بسهولة .. ومش كبيرة فا تقدر تحطها في جيبك او في الشنطة بسهولة .. وتقدر تفتح وتقفل العلبة بتاعت السماعة بإيد واحدة .. ولما العلبة تتفتح السماعات بتكون ثابته جدًا جواها ومستحيل تقع من العلبة.
من الجنب في زرار الـParing او اللي بيوصلك بالموبايل .. ومن تحت هتلاقي منفذ الـUSB Type C اللي بتشحن العلبة من خلالة .. ومن قدام في لمبة LED علشان تعرفني حالة الـParing او هل السماعة متصلة بالموبايل ولا لا وكمان مستوى البطارية.
السماعات نفسها من نوع الـIn Ear .. ده النوع اللي لازم تحطها في ودنك كويس علشان تاخد منها أحسن أداء وتاخد جودة صوت كويسة .. تصميم السماعات حلو ووزنها خفيف وثباتها في الأذن كويس بعد ما تختار الـEar Tips المناسبة لودنك .. ومش بتبقى بارزة أوي وانت لابسها ولو لبستها لفترة طويلة بتكون مريحة.
السماعات بتدعم الـWear Detection يعني فيها حساس تقارب وده اللي بيخليها توقف الموسيقى لما تشيلها من ودنك وتشغلها تاني لما تلبسها .. وينفع تستخدم كل سماعة لوحدها عادي والتانية تفضل في العلبة.
بخصوص مقاومتها للماء فا مفيش معلومة واضحة .. لاقيت مرة IPX4 ومرة تانية IP54 .. في الحالتين هتبقى مقاومة للطرطشة الخفيفة والعرق لكن مش ضد الماء بشكل كامل يعني مينفعش تنزل بيها المياه.
التحكم في السماعة :-
السماعات بتشتغل عادي على Android او IOS .. لما تيجي توصلها بموبايل من هواوي بتقربها من الموبايل بس وبتفتح الـBox وبتظهرلك علشان توصلها .. ولو مظهرتش بتدوس ثانيتين على زرار الـParing في علبة السماعة وهتظهر على طول وهتوصلها.
السماعة علشان تتحكم فيها بتحتاج تحمل برنامج Life AI بتاع هواوي للتحكم في بعض أجهزتها .. التطبيق موجود في الـPlay Store والـApp Store .. لكن مش هتلاقي الـFreebuds 4i لإنها لسه منزلتش بشكل رسمي.
التطبيق من خلالة تقدر تعرف نسبة البطارية للعلبة ولكل سماعة وكمات تعملها تحديث .. وده اللي حصل معايا بالفعل اول ما السماعت وصلت جالها تحديث.
وكمان تقدر تتحكم في الـNoise Control وإختصارات التحكم والـWear Detection .. التطبيق بسيط ومش معقد بس يفتقد لشوية حاجات شوفتها في تطبيقات تانية ومنها تعديل مستوى الصوت علشان تختار الوضع اللي يريحك .. والبديل بقى لو موبايلك فيه الـDolby Vision .. وممكن برنامج الموسيقى بتاع هواوي نفسه تقدر تتحكم في إعدادات الصوت وبتختار منها المناسب معاك.
التحكم في السماعة بيتم عن طريق اللمس .. التحكم كان سلس ومفيش أي مشاكل فيه تمامًا في الخيارات المتاحة للتحكم .. وهم الـDouble Tab او الـTouch and Hold .. اللمستين ينفع تخليهم لتشغيل او وقف الموسيقى او يجيبلك التراك التالي او السابق او تشغل المساعد الصوتي او تقفله.
اما الـTouch and Hold فا هو بتتحكم من خلاله في أوضاع الـActive Noise Cancellation او تقفله خالص .. والجميل ان السماعة بتقولك بصوت واطي كده اسم الوضع اللي انت فعلته.
سعر Huawei FreeBuds 4i :-
- السعر الرسمي 1899 جنية.
الرأي النهائي :-
السماعة دي تعتبر أفضل سماعة في فئتها السعرية .. سماعة صوتها ممتاز .. جودة الصوت كويسة .. فيها Active Noise Cancellation .. حجمها صغير .. وزنها خفيف .. بطارية قوية .. من براند قوي زي هواوي.
وبكدا Huawei FreeBuds 4i تعتبر أفضل سماعة تحت سعر 2000 جنية !
Comments