شركة هواوي من أكثر الشركات اللي بتركز على أجهزة التابلت في الأسواق حاليًا .. والشركة بتهتم انها تقدم أجهزة تابلت في مختلف الشرائح السعرية من الإقتصادية وحتى الرائدة .. والنهارده هنجرب 2 تابلت جداد من هواوي وهما Huawei Matepad 2022 و Huawei Matepad T10 Kids Edition واللي نزلوا مصر بشكل رسمي.
التصميم :-
تصميم التابلت محترم جدًا زي ما متعودين من هواوي .. شركة هواوي دائمًا بتتميز بالتقفيل وجودة التقفيل، ظهر التابلت والفريم من المعدن بالكامل.
تخانة التابلت قليلة أوي 7.4 مللي، والوزن بتاع التابلت معقول جدًا .. وزنه 450 جرام.
الشاشة :-
شاشة التابلت IPS LCD بحجم 10.4 بوصة بدقة 2K .. شاشة كويسة جدًا اتجربت في Matepad النسخة القديمة وكانت ممتازة .. ومازالت الشاشة بتقدر تطلع ألوان مظبوطة مع سطوع يصل لـ470 شمعة.
الحواف بتاعت الشاشة معقولة جدًا .. والشاشة معدل تحديثها 60 هيرتز .. وده لإن التابلت في الفئة المتوسطة، وشاشة بالحجم ده انها تكون AMOLED او أكثر من 60 هيرتز هترفع سعر التابلت.
الشاشة حاصلة على شهادة TUV اللي بتؤكد ان الضوء الأزرق الضار قليل وده بيساعد عينك إنها ميحصلهاش إرهاق لما تبص على الشاشة، او بمعنى أخر بتفلتر الأشعة الضارة.
الأداء :-
معالج Kirin 710A اللي جربناه قبل كده في موبايلات هواوي وكان أداءه معقول جدًا .. بس كنت أتمنى هواوي تستخدم معالج Kirin 810 كان هيكون أفضل بكتير.
أداء التابلت معقول بسوفت وير Harmony OS من هواوي .. واللي مساعد التابلت ان أداءه يكون لطيف، بس مقدرش أقولك ان الاداء هنا سلس وناعم.
التابلت بيجي بمساحة تخزين 128 جيجا مع 4 جيجا رام وتقدر تركب كارت ميموري بحجم 512 جيجا.
بالنسبة للأداء الرسومي في الألعاب فا لعبة ببجي بتشتغل على High HD وبتشتغل كويس جدًا بدون أي مشاكل .. ممكن يكون Kirin 710 مش أحسن حاجه للألعاب بس هيقدر يشغل لك اللي انت محتاجه.
عوامل الأمان وعناصر اخرى :-
في Face Unlock لطيف في التابلت تقدر تستخدمه لو حابب .. والتابلت بيدعم تركيب كيبورد هواوي اللي بيخلي استخدام التابلت أسهل وبيديلك إمكانيات أفضل.
القلم الـm Pencil الجيل الثاني مدعوم في التابلت هنا .. وأداءه اتحسن بقى أسرع من الجيل السابق بكتير، بيتباع لوحده وبيجي معاه وصلة شحن تقدر توصلها في التابلت علشان تشحنه .. وله مكان علشان تحطه عند الكيبورد، وطبعًا لما يبقى معاك تابلت وكيبورد وقلم هتحس انك ماشي بـKit محترم جدًا.
التابلت بيدعم الـSuper Device علشان تقدر تربطه مع موبايل او لاب توب من هواوي .. الـConnection اللي شرحناه قبل كده.
السوفت وير بيدعم تشغيل 4 برامج مع بعض في نفس الوقت .. تقدر تعمل Split Screen بين برنامجين وبعد كده تفتح برنامجين عايمين فوقيهم.
صوت التابلت من أجمل الحاجات فيه .. فيه 4 سماعات بيطلعوا صوت Stereo عالي ومجسم وقوي .. تحب تسمعه، من أحسن التجارب الصوتيه اللي ممكن تاخدها من تابلت بالسعر ده.
وكمان عندك 4 ميكروفونات علشان الـConference Calls، بس للأسف مفيش مدخل 3.5 مللي للسماعات علشان جسم التابلت رفيع.
مفيش كلام عن شبكات الـWi Fi .. قوية جدًا، وفي نسخة من التابلت بتدعم تركيب شريحة إتصال وكارت ميموري .. وفي نسخة تانية بتدعم تركيب كارت ميموري بس.
مننساش خدمات Huawei Care واللي من خلالها تقدر تمد ضمان التابلت لأكثر من سنة او سنتين .. وتقدر تحمل البرامج اللي انت محتاجها من App Gallery او تبحث عنها في Petal Search.
الكاميرا :-
كاميرا خلفية 13 ميجا بيكسل بفتحة عدسة F/1.8 وأمامية 8 ميجا بيكسل .. كاميرات بسيطة تؤدي الغرض في إضاءات عالية .. وكده كده التابلت مش بيكون مطلوب منه كاميرات قوية.
البطارية :-
بطارية 7250 مللي امبير ضخمة من أهم مميزات التابلت .. تشتغل 13 ساعة ~ 14 ساعة إستخدام شاشة مفتوحة .. والتابلت بيدعم شحن بسرعة 22.5 وات ودي سرعة شحن معقولة جدًا.
سعر Huawei Matepad 2022 :-
- نسخة 128 جيجا مع 4 جيجا رام بسعر 5740 جنية WiFi فقط
- نسخة 128 جيجا مع 4 جيجا رام بسعر 6440 جنية تدعم شبكات الإتصال 4G
وتقدر في النسختين تركب كارت ميموري بحجم 512 جيجا.
الرأي النهائي :-
مميزات Matepad 2022 :-
- تصميم فخم متين
- شاشة كبيرة بدقة كويسة
- صوت عالي جدًا وقوي جدًا
- بطارية ضخمة ممتازة
- سوفت وير بمميزات كتير
عيوب Matepad 2022 :-
- مدخل 3.5 مللي مش موجود
- معالج قديم وضعيف
تابلت Huawei Matepad T10 Kids Edition :-
التابلت ده بيناسب الأطفال من سن 3 لـ8 سنين .. معاه جراب سيليكون متين جدًا محافظ ومغطي كل أجزاء التابلت .. والجراب فيه يد علشان الطفل يقدر يشيله منه أكنه شنطة .. وتقدر تستخدم اليد دي كمسند علشان تسند عليها التابلت وتتفرج على أي محتوى عليه، وجوه الجراب في قلم من البلاستيك.
الشاشة 9.7 بوصة IPS LCD بدقة HD+ .. شاشة كبيرة إقتصادية تناسب الأطفال لإن هما مش هيركزوا في كثافة بيكسلات والكلام ده .. أقصى سطوع للشاشة مش عالي أوي لكن مناسب لإستخدام طفل.
المعالج هو Kirin 710A مع سوفت وير EMUI 10 المبني على Android 10 بخدمات هواوي .. مساحة تخزين 32 جيجا مع 2 جيجا رام .. وتقدر تركب كارت ميموري عادي.
الصوت Stereo من سماعتين، والصوت عالي ومحترم وفي 2 ميكروفون علشان الـVideo Chat .. الـKids Corner موجود وفيه مميزات كتير جدًا أهمها انك تقدر تتحكم في الوقت اللي الطفل بيستخدم فيه التابلت .. وتقدر تحمي عينه من الأشعة الضارة، ويبعتله تنبيهات لتحسين وضعية جلوسه وهكذا.
بالإضافة انك تقدر تتحكم في التطبيقات اللي يقدر يفتحها علشان تبقى متطمن وطفلك ماسك التابلت .. وتقدر تحددله الصور والفيديوهات اللي يقدر يفتحها .. ولو فتحت له الـKids Corner مش هيقدر يخرج منها علشان تبقى متطمن دائمًا .. وهتلاقي تطبيق فيه ألعاب وقصص للأطفال بتحددها حسب سنه.
البطارية كبيرة 5100 مللي امبير بتستحمل حوالي 8 ساعات شاشة مفتوحة .. منفذ الشحن USB Type C وسرعة الشحن 5 وات فا هياخد وقت طويل على ما يتشحن بالكامل.
السعر الرسمي للنسخة الـ32 جيجا مع 2 جيجا رام هو 3640 جنية مصري، مع دعم تركيب كارت ميموري او شريحة إتصال 4G.
Comments