سلسلة الـNova من هواوي ليها طابع خاص وفيها هواوي بتقدم أفضل ما عندها علشان تنافس بقوة في الفئة المتوسطة .. وعلى سبيل المثال موبايل Nova 5T .. الموبايل القوي واللي ما زال الأقوى في فئته لحد دلوقتي بسبب المعالج بتاعه.
النهاردة هنراجع موبايل Huawei Nova 7 الجديد الداعم لشبكات الجيل الخامس ولكن بدون خدمات جوجل .. الموبايل جاي بتطويرات واضحة وصريحة عن الـNova 5T .. بس هل التطويرات اللي في الـNova 7 كافية إنها تخليك تشتريه بدون خدمات جوجل .. وتصرف نظر عن الـ5T اللي بيجي بخدمات جوجل ؟
التصميم :-
موبايل Huawei Nova 7 تصميمه بيجي من الزجاج مع فريم معدني .. مفيش غلطة ممكن أطلعها في التصميم .. مُناسب جدًا وشيك جدًا.
الموبايل واخد نفس النقشة وشكل الظهر بتاع الـNova 5T .. ولكن مع تحسن في شكل الكاميرات .. اللي بقت في نافذة مُستطيلة علشان تواكب تريندات 2020.
موبايل Nova 7 وزنه 180 جرام، يُعتبر خفيف بالنسبة للأوزان اللي بقينا نشوفها الفترة دي .. والتخانه 8 ملم .. والموبايل مسكته في الإيد كويسة جدًا.
في بروز متوسط في الكاميرات الخلفية .. والجراب الشفاف المُرفق في العلبة بيغطي البروز ده بالكامل.
الشاشة :-
وأخيرًا شاشة أموليد من هواوي في الفئة المتوسطة .. الـNova 7 جاي بشاشة بحجم 6.53 بوصة من نوع اوليد بدقة FHD+.
والشاشة واخد تريند الثقب بتاع السيلفي اللي على الشمال .. والثقب اللي هنا حجمه صغير مش كبير ومش هيضايقك .. ومفيش أي ظل حواليه لإن الشاشة هنا AMOLED.
الحواف حوالين الشاشة مقبولة .. ولكني كنت أتمنى حافة سفلية أصغر من كدا .. بس هي برده مقبولة، مش ميزة ومش عيب.
وعمومًا أنا شايف الشاشة مُمتازة بصراحة .. كسطوع تحت الشمس بتوصل لدرجات سطوع عالية .. وزوايا رؤية مُمتازة وألوان طبيعية جدًا مظبوطة جدًا .. لإن الشاشة هنا مش بتلعب في الألوان ومش بتخليها مُشبعة بزيادة زي الشاشات الـSuper AMOLED.
ولكن الشاشة بتردد 60 هيرتز فقط .. وطبعًا كنت أتمنى شاشة أموليد و90 هيرتز .. ولكن هواوي بتاخد الموضوع درجات .. الـNova 5T كان بشاشة IPS LCD .. النوفا 7 بقا OLED .. الجيل اللي جاي ممكن يفكروا يرفعوا تردد الشاشة.
وأخيرًا .. كعادة هواوي برده مفيش إعلان رسمي عن طبقة الحماية على الشاشة .. ولكن الموبايل بيجي في العلبة متركب عليه سكرينة.
الأداء :-
معالج جديد رائد من هواوي داعم لشبكات الجيل الخامس وهو الكيرن 985 بتكنولوجيا 7 نانو .. نوع الذاكرة الداخلية UFS 2.1 وهي المُتعارف عليها في الفئة المتوسطة.
المعالج ده تقريبًا مُكافيء لنفس الاداء بتاع الـKirin 980 ومفيش فرق محسوس بينهم .. واللي هو اصلًا كان أدائه مُمتاز بصراحة .. والسخونية في Kirin 985 أقل بفرق واضح عن Kirin 980 اللي كان بيسخن بسهولة مع الضغط على الموبايل، وفوق ده دعم لشبكات الجيل الخامس.
الأداء مُمتاز .. الموبايل مش بيتأخر عليك في أي حاجة إنت بتطلبها منه .. ولكن التجربة ديه بصراحة كان ناقصها الـ90 هيرتز علشان كانت هتبقى متناغمه أكتر وسلسة أكتر من كدا .. بس هما لازم يسيبوا حاجة للموبايلات الرائدة .. مش هيحطوا كل حاجة في موبايلات الفئة المتوسطة او حتى الفئة المتوسطة العليا.
الـNova 7 بيشغل ببجي على Ultra HDR .. واللعبة بتشتغل كويس جدًا بدون اي تقطيع او تهنيج .. كول اوف ديوتي شغالة على Very High بدون أي مشاكل برده .. لعبة فورت نايت شغالة كويس جدًا على High.
من الأخر الموبايل ده محترم جدًا في تشغيل كل الألعاب بأداء مُستقر .. السخونية برده قليلة بشكل مُحترم جدًا.
عوامل الأمان وعناصر اخرى :-
البصمة مُدمجة بالشاشة .. مكانها كويس جدًا .. وسريعة جدًا ومش بتغلط وتقدر تعتمد عليها .. والـFace Unlock سريع جدًا برده مفهوش اي مشاكل.
قبل ما أتكلم عن الواجهة .. لازم تبقى عارف إن الموبايل جاي من غير خدمات جوجل والإعتماد فقط على خدمات هواوي.
وكمان هواوي ضافت ابلكيشن اسمه Petal Search .. من خلالة بتقدر تبحث عن أي ابلكيشن إنت عاوزه وفي ثواني هيظهرلك نتايج كتير علشان تقدر تحمل التطبيق بسهولة .. علشان يعوضوا النقص الموجود في الـApp Gallery لحد أما يبقى مُتكامل وعليه كل البرامج.
الحاجات الأساسية في جوجل زي اليوتيوب والـGmail تقدر تشغل ليهم بدايل .. ولكن زي ما بقول دايمًا .. لو إنت مُستخدم مُتعلق بتطبيقات كتير من جوجل .. مش هتقدر تحمل برامجهم .. وهتعتمد إنك هتفتحهم من Chrome اللي بينزل بشكل طبيعي جدًا على الموبايل.
الواجهة هنا فيها إختصارات كتير .. زي إنك تدوس مرتين على زُرار الـPower بيفتح ابلكيشن الكاميرا مثلًا .. او إنك تعمل خبطة مُعينة على الشاشة تاخد Screenshot.
الموبايل مفيهوش لمبة إشعارات .. بس في خاصية الـAlways On Display .. بتعرضلك الساعة وأيقونة الـMissed Calls او الـMessages اللي جاتلك من الخط .. إنما مش بتعرض إشعارات فيس بوك مثلا .. مش عارف ليه.
كل المُستشعرات شغالة كويس في الموبايل ده .. ضوء، تقارب، جيروسكوب .. وكمان الموبايل داعم لمستشعر IR Blaster علشان تقدر تستخدم الموبايل كريموت .. وكمان الموبايل بيدعم خاصية الـNFC.
الموبايل جاي بسماعة واحدة تحت على اليمين .. صوتها عالي ومُجسم .. ومتتوقعش إن الصوت كان يبقى Stereo .. ده الـP40 Pro الفلاج شيب بتاعهم مش ستريو .
صوت سماعة المكالمات عالي ومُمتاز .. ومفيش مدخل سماعة 3.5 ملم زي الـNova 5T بالظبط .. يا وصلة تحويل يا تشتغل بسماعة Type C علطول .. الموبايل جاي معاه سماعة في العلبة.
بالنسبة للشبكات فا مفيش حاجه نقلق منها .. شبكة WiFi قوية .. وشبكة مكالمات قوية .. هواوي شاطرة في الشبكات.
البطارية :-
بطارية عادية تقليدية بسعة 4000 مللي أمبير .. في 2020 بقت صغيرة .. ولكن حجمها الصغير ده مخلي الموبايل خفيف شوية .. هي نسبة وتناسب.
عمومًا البطارية هتديلك متوسط إستخدام من 6 لـ7 ساعات شاشة مفتوحة وهتكمل اليوم بإستخدام مُتوسط مش عنيف.
ولكن الشاحن المُرفق مع الموبايل الـ40 واط هيلحقك وهيشحن البطارية بالكامل في ساعة واحدة عن طريق منفذ USB Type C.
الكاميرات :-
الموبايل بيجي بـ4 كاميرات خلفية .. الأساسية 64 ميجا بيكسل بفتحة عدسة F/1.8 بمستشعر سوني IMX686 .. والعدسة التانية 8 ميجا بيكسل بفتحة عدسة F/2.4 للزوم الحقيقي 3X وبيوصل Digital لحد 20X .. والعدسة التالتة 8 ميجا بيكسل للتصوير الواسع فتحة عدسة F/2.4 .. والأخيرة 2 ميجا بيكسل للتصوير الماكرو بفتحة عدسة F/2.4.
والسيلفي الموجود في ثقب الشاشة بيجي بدقة 32 ميجا بيكسل مع فتحة عدسة F/2.2.
أنا كان ليا تجربة سابقة مع المستشعر الـ686 ده في الـMi Note 10 Lite .. معجبنيش أوي بسبب معالجة الألوان .. إنما المُستشعر ده في الـNova 7 عامل شغل عالي ومعالجة الألوان مُمتازة بصراحة.
ومعاك عدسة زوم 3 اكس Optical وبتوصل لحد 20 اكس Digital .. العدسة الـUltra Wide اللي هنا مش أفضل عدسة تصوير واسع من ناحية التفاصيل .. ولكنها مقبولة.
واللي فاجئني فعلًا في الموبايل ده واللي موضح مدى قوة الكاميرا الخلفية هو التصوير في الإضاءات الداخلية او الإضاءات الضعيفة .. التفاصيل مظبوطة وواضحة .. الألوان حقيقية .. الصور عمومًا اللي بتخرج من الكاميرا كويسة جدًا.
وفي أي إضاءة تقدر فعلًا تعتمد على الكاميرات اللي هنا .. وأنا حاسس بتطوير واضح عن الكاميرا الخلفية بتاعت الـNova 5T.
أما بالنسبة للسيلفي .. فالأداء بتاعه عادي .. والغريب إنه عادي في الإضاءات العالية .. تحس الموبايل متكبر يعمل معالجة للصور كويس.
أما في الإضاءات الداخلية والضعيفة برغم ضيق فتحة العدسة إلا إن السوفت وير ذكي وبيقدر يعالج الصور كويس جدًا وبيطلعلك ألوان كويسة وتفاصيل كويسة.
وبشكل عام حتى مش هتحتاج الـNight Mode بتاع السيلفي .. هتحس الفرق مش كبير .. وعمومًا التصوير السيلفي في الإضاءات الضعيفة مقبول جدًا بالموبايل ده.
اما بالنسبة لتصوير الفيديوهات .. الموبايل بيصور فيديوهات 4K مع ثبات إلكتروني .. ودي حاجه منطقية بالتسعير ده .. والموبايل بيدعم مايكروفون اضافي لعزل الضوضاء .. وفي Option لطيف اسمه الـDual View .. وده بيسمحلك إنك تقسم شاشة الموبايل ويكون على اليمين التصوير الكاميرا السيلفي بتصور وعلى الشمال في نفس الوقت الكاميرا الخلفية شغالة.
بس الجودة في الـDual View بتكون 1080p بس، مفيش 4K .. لكن في الوضع العادي فا إنت تقدر تصور بالكاميرا سواء الأمامية او الخلفية بالـ4K عادي.
شوف صور وفيديوهات متصورة بالموبايل في الفيديو في أخر المقال.
سعر الموبايل :-
السعر الرسمي 8390 جنية للنسخة 256 جيجا مع 8 جيجا رام .
وينفع تركب شريحتين إتصال بدعم شبكات الجيل الخامس ومينفعش اصلًا تركب كارت ميموري .. وإنت مش هتحتاج لإن الموبايل اصلًا مساحته 256 جيجا.
الرأي النهائي :-
مميزات Huawei Nova 7 :-
- أداء قوي جدًا
- شاشة محترمة
- كاميرات مُميزة جدًا
- خامات خارجية مُحترمة جدًا
- عوامل أمان سريعة
- شبكة قوية مع دعم للـ5G
- مساحة تخزين ضخمة
- بطارية تدعم الشاحن فائق السرعة
عيوب Huawei Nova 7 :-
- لا يوجد خدمات جوجل
- منفذ الـ3.5 مللي مش موجود
- شاشة 60 هيرتز فقط
- ارتفاع سعر الهاتف نسبيا
يعني من الأخر .. العوامل الرئيسية في الموبايل ده مُتكاملة الي حد كبير والموبايل بيديلك أداء محترم في كل حاجة.
طيب لو هنقارن Nova 7 بالمنافسين زي الـGalaxy A71 والـReno 2 .. النوفا 7 هيكسب في كل حاجه تقريبًا ومشكلته هتكون خدمات جوجل .. ولسه برده هنشوف الـPoco F2 Pro والـRealme X3 لما ينزلوا هيتسعروا بكام وهيقولوا ايه .. بس اعتقد هيكونوا اغلى من Nova 7.
ولو أنت عاوز رأيي ومحتار بين Nova 5T والـNova 7 .. فالنوفا 7 أفضل من ناحية الشاشة ومعالج سخونيته أقل وحجم ذاكرة أكبر وبطارية أكبر وشحن أسرع وكاميرات خلفية أقوى .. وفي وجه نظري هو متكامل أكتر من النوفا 5 تي ويستاهل إنك فعلًا تجيبه بالرغم من خدمات جوجل لو هي مش في حساباتك.
Comments