هواوي قدمت موبايل Huawei Nova Y90 الجديد .. بمواصفات إقتصادية لكنه بيجي بسعر بيخليه ينافس في الفئة المتوسطة .. وبيتميز بالبطارية اللي بتدعم الشحن بقدرة 40 وات مع شاشة ضخمة 6.7 بوصة بمعدل تحديث مرتفع .. وتصميم شيك، النهارده هنقدملكم مراجعة Huawei Nova Y90 الجديد.
التصميم :-
الموبايل ده تصميمه أفضل ما فيه .. تصميم شيك جدًا .. وتفاعل اللون مع إنعكاسات الإضاءه عبقري جدًا .. وكمان في دائرة بارزة فيها الكاميرات والفلاش بتدي شكل للموبايل مميز ومختلف.
الموبايل حجمه كبيرة شوية .. علشان شاشته كبيرة، وزنه 195 جرام وده وزن ثقيل .. تخانته 8.4 مللي .. الفريم بتاعه مسطح مش Curved علشان تاخد مسكة كويسة في الإيد.
الشاشة :-
شاشة كبيرة 6.7 بوصة من نوع IPS LCD بحجم 6.7 بوصة بدقة FHD+ بتردد بيوصل لـ90 هيرتز .. مع إستغلال ممتاز لحواف الشاشة، الحافة العلوية قليلة أوي ودي حاجه كويسة.
الشاشة ألوانها كويسة جدًا ومواجهتش معاها أي مشاكل .. ألوان مظبوطة من غير لعب كتير في الألوان .. سطوع الشاشة تحت الشمس مقبول على إنها IPS LCD.
أكيد كنت أحب ان الشاشة تكون AMOLED .. لكن أرجع وأقول ان هواوي منزله الموبايل ده للمنافسة في الفئة الإقتصادية.
الأداء :-
معالج كوالكوم سناب دراجون 680 بتكنولوجيا 6 نانو ميتر .. وده المعالج الأشهر حاليًا في معظم الموبايلات من أول الفئة الإقتصادية زي Redmi Note 11 ولحد الموبايلات المتوسط زي Oppo Reno 8 4G.
معنديش مشكلة مع المعالج ده بس لازم تفهم ان المعالج ده بيجي علشان يقدملك أداء متوسط في الإستخدام اليومي بدون ما يسحب منك البطارية بشكل كبير .. لكن أداءه مش ممتاز.
ذاكرة التخزين من نوع UFS 2.1 وده نوع معقول وبيساعد الموبايل ان اداءه يكون معقول .. الـAnimations محسوسه أوي، كنت أتمنى لو تخف شوية .. لكنها ثابته ومستقره.
المعالج الـSD680 مش موجه لفئة الـGamers .. بس بيقدر يشغل لعبة ببجي بدون مشاكل على إعدادات جرافيك متوسطة بدون أي تهنيج او سخونه مبالغ فيها.
عوامل الأمان وعناصر اخرى :-
البصمة موجودة على زِر الباور .. أداءها كويس جدًا وسريع، والـFaceunlock سرعته كويسة.
الموبايل فيه ميكروفون اضافي لعزل الضوضاء .. وصوت الموبايل بيكون Mono مش Stereo لكن الصوت عالي .. والـBass فيه مش أفضل حاجه.
الموبايل للأسف مفيهوش مستشعر جيروسكوب .. ومستشعر التقارب سوفت وير علشان مفيش مكان في الحافة العلوية .. جربته في المكالمات، أداءه معقول بس مش أفضل حاجه.
بالنسبة لشبكات الـWi Fi والإتصال .. هي أحسن شبكات ممكن تجربها في أي موبايل في الفئة دي.
البطارية :-
بطارية الموبايل بتيجي بسعة 5000 مللي امبير .. أداءها كويس جدًا، الموبايل ده صعب يفصل معاك شحن خلال اليوم .. ممكن يعدي معاك 9 ساعات شاشة مفتوحة.
كمان الشاحن اللي بيجي مع الموبايل بيجي بسعة 40 وات .. بيشحن نص البطارية في ساعة وده وقت كويس.
الكاميرات :-
الكاميرا الخلفية 50 ميجا بيكسل بفتحة عدسة F/1.8 .. مع عدسة 2 ميجا بيكسل بفتحة عدسة F/2.4 ماكرو والأخيرة 2 ميجا بيكسل بفتحة عدسة F/2.4 للعزل، والسيلفي 8 ميجا بيكسل بفتحة عدسة F/2.0.
لما جربت الكاميرات لاقيت ان الموبايل بيطلع صور عادية بكمية تفاصيل متوسطة .. مع ألوان متوسطة، والـDinamic Range أقل من المتوسط بشوية .. لكن لسه هيوصل تحديث للموبايل هيظبط الكاميرا.
السيلفي متواضع شوية .. هو ده الطبيعي من كاميرا 8 ميجا بيكسل يعني متتوقعش أداء قوي.
بالنسبة لتصوير الفيديوهات فالموبايل بيصور على جودة 1080p مع 30 فريم في الثانية .. الموبايل فيه ميكروفون اضافي لعزل الضوضاء .. وللأسف مفيش مثبت بصري.
سعر Huawei Nova Y90 :-
- السعر في مصر: نسخة 128 جيجا مع 8 جيجا رام بسعر 7800 جنية
- السعر في السعودية: نسخة 128 جيجا مع 8 جيجا رام حوالي 800 ريال
- السعر في الإمارات: نسخة 128 جيجا مع 8 جيجا رام حوالي 750 درهم
تقدر تركب شريحتين إتصال من الجيل الرابع لكن مينفعش تركب كارت ميموري.
الرأي النهائي :-
مميزات Huawei Nova Y90 :-
- تصميم خارجي متميز
- شاشة كبيرة بحواف قليلة
- بطارية ضخمة
- شحن سريع 40 وات
- شبكات قوية جدًا
عيوب Huawei Nova Y90 :-
- مستشعر التقارب سوفتوير
- غياب مستشعر الجيروسكوب
- الكاميرات أداءها ليس الأفضل
- سعر الموبايل غالي نسبيًا
Comments