النهارده هنقدملكم مراجعة Huawei P50 Pocket الجديد من هواوي .. موبايل “فاخر” راقي جدًا بشاشة قابلة للطي، بيقدم تجربة متكاملة ممتازة مع إبتكارات جديدة لطيفة جدًا ولكن مع سعر مرتفع مناسب لفئة رجال الأعمال .. مع مراجعة Huawei Matebook E الجديد اللي بيدمج بين فكرة لاب توب وتابلت في جهاز واحد بشكل ذكي جدًا ومواصفات قوية جدًا.
التصميم :-
الموبايل شيك جدًا .. حجمه صغيرة علشان تحطه في أي جيب بسهولة .. ولما بيتفتح بتلاقي شاشة ضخمة جدًا .. وزنه 190 جرام، تخانته وهو مفتوح 7.2 مللي وفي حالة طيه بيكون 15.2 مللي.
تقفيل الموبايل والـFinish محترم جدًا، الخامات ممتازة وفاخرة .. لكنه مش مقاوم للماء او الغبار بشهادة معتمدة بالرغم من إنه موبايل رائد وسعره غالي.
الشاشة :-
الشاشة عليها إطار بارز علشان يمتص الصدمات، وتقفيل الموبايل ممتاز فا مستحيل يدخل تراب بين الشاشة .. الشاشة 6.9 بوصة OLED بدقة FHD+ بتردد 120 هيرتز .. شاشة ممتازة وسطوعها معقول.
الجزء اللي الجهاز بينحني منه مش هتاخد بالك منها وانت فاتح الموبايل، لكن هتحس بيها لما ايدك تيجي عليها .. وعمومًا الشاشة ممتازة لكن الحواف كبيرة شوية.
مش دي الشاشة الوحيدة، في شاشة تانية 1 بوصة جنب الكاميرا .. دي شاشة تقدر تشوف منها الإشعارات والساعة وتضيف Widgets وغيرها، وكمان تقدر منها تاخد صورة سيلفي بالكاميرا الخلفية.
الأداء :-
الموبايل بيجي بمعالج كوالكوم سناب دراجون 888 .. أداء الموبايل قوي ومفيهوش أي تنازل، هو بيسخن شوية بس مش سخونيه أوفر .. والموبايل شغال بخدمات هواوي بدون خدمات جوجل.
عوامل الأمان وعناصر اخرى :-
البصمة موجودة على زِر الباور .. سريعة جدًا، والـFace Unlock كمان سريع وعملي، الصوت Stereo بس مش أفضل حاجه، مش عالي أوي، مع ان سعر الموبايل غالي.
البطارية :-
بطارية 4000 مللي امبير .. معقولة مُقارنًة بموبايل قابل للطي، لو قارنته بـGalaxy Z Flip 3 فا هي أقوى .. بس مقارنة بأي موبايل تاني مش قابل للطي هي هتكون ضعيفة جدًا.
معاك شاحن 40 وات بيشحن البطارية بسرعة جدًا ودي حاجه ممتاز هنا .. لكن للأسف الموبايل مش بيدعم الشحن اللاسلكي.
الكاميرات :-
الكاميرا الخلفية بتطلع صور حلوة في معظم الأوقات، تقدر فعلًا تعتمد عليها سواء صبح او ليل، والموبايل بيعمل معالجة ممتازة للصور على مستوى الموبايلات الرائدة.
لكن الكاميرا السيلفي أداءها مش لطيف، معظم الوقت بستخدم الشاشة الخارجية في اني اخد صور سيلفي بالكاميرا الخلفية الممتازة واللي بتطلع صور أفضل من أي كاميرا سيلفي.
سعر Huawei P50 Pocket :-
- نسخة 256 جيجا مع 8 جيجا رام بسعر 34200 جنية
- نسخة 512 جيجا مع 12 جيجا رام بسعر 37400 جنية
تقدر تركب شريحتين إتصال من الجيل الخامس.
جهاز Huawei Matebook E :-
ده جهاز بفكر مختلف من هواوي .. هواوي بتنافس في قطاع اللاب توب والتابلت، ده بقى لاب توب وتابلت في نفس الوقت .. وزنه 709 جرام وسُمكه 8 مللي وخامات ألومنيوم محترمة .. لما تمسكه هتحسه تابلت معاه القلم الـmPencil كمان .. تحطه على الـKit بتاعة الكيبورد يبقى لاب توب متكاملة بـTouchpad.
لكنه في الأساس لاب توب لإنه بيجي بمعالج انتل كور i7 جيل 11 .. وفي نسخ تانية بمعالج كور i5، بيجي برامات 16 جيجا مع مساحة تخزين 512 جيجا SSD .. مواصفات Notebook محترم بتتقدم في جسم صغير مع شاشة 12.6 بوصة OLED بتقدم ألوان ممتازة وسطوع بيوصل لـ600 شمعة، ومعدل تحديث 60 هيرتز فقط.
القلم بتاع الجهاز نسبة التأخير فيه 2 مللي ثانية فقط، يعني قلم سريع جدًا، محستش منه بأي تقصير، من أسرع الأقلام اللي جربتها على شاشة تابلت .. مع نظام صوتي ممتاز، درجة علو ممتازة وصوت مُجسم ممتاز .. مع بصمة على زِر الباور ومدخل Type C تقدر تنقل منه بيانات وتوصله بشاشة أكبر، مع مدخل سماعات 3.5 مللي.
الجهاز فيه كاميرا أمامية 8 ميجا بيكسل مع كاميرا خلفية 13 ميجا بيكسل .. مع 4 ميكروفونات إضافية لعمل عزل للضوضاء .. بالنسبة للبطارية فهي 42 وات، بطارية عادية تكفي 4 ~ 5 ساعات شاشة مفتوحة، مش أكتر، بس الجهاز بيشحن بسرعة عن طريق الشاحن الـ65 وات اللي بيجي معاه.
سعر Huawei Matebook E :-
- نسخة Core i5 بمساحة تخزين 256 جيجا مع 8 جيجا رام بسعر 24400 جنية
Comments