مقارنة بين هواوي Y7 2019 الجديد و Y7 2018 القديم – اعرف الاختلافات والاسعار الرسمية !

بعد الاعلان رسميا عن سعر موبايل هواوي الجديد Huawei Y7 Prime 2019 وهو 2999 جنية , حصل لغبطة كبيرة جدا عند المستخدمين بين الموبايل الجديد و موبايل Huawei Y7 Prime 2018 القديم الي سعره في حدود 2800 جنية , وعلشان كدا قررنا نعمل مقارنة سريعة ما بينهم علشان تعرف ايه الجديد في موبايل Y7 Prime 2019 وليه هو اختيار أفضل من واي 7 القديم .


المعالج :-

موبايل Y7 Prime 2019 الجديد بيجي بمعالج سناب دراجون 450 , وده معالج كويس جدا في الفئة تحت المتوسطة وبكل الاحوال هو افضل من معالج سناب دراجون 430 الموجود في هواوي Y7 Prime 2018 , الفرق حوالي 30% افضل لصالح المعالج الجديد , وده مش معناه ان معالج Y7 2019 هو افضل معالج بالسعر ده , لا طبعا ما زالت شاومي بتقدم معالج سناب دراجون 625 الي هو افضل من سناب دراجون 450 في موبايلات بنفس متوسط الاسعار زي Xiaomi Redmi S2 , وحابب أكد عليكم ان المعالج هو المسؤل عن اداء الهاتف اليومي في البرامج والاداء في الالعاب زي Pubg الي بمعالج سناب دراجون 450 هتشتغل بدون تهنيج على اقل اعدادات جرافيك .


الكاميرا الخلفية :-

كاميرا Y7 2019

موبايل Y7 2019 نازل بنفس الكاميرا القديمة الي في Y7 2018 وهي 13 ميجا بيكسل مع كاميرا ثانوية 2 ميجا بيكسل ولكن الفرق ان فتحة العدسة بقت اوسع في 2019 وهي f/1.8 وده معناه ان التصوير في الاضاءة الضعيفة هيبقا افضل بفرق بسيط عن الكاميرا القديمة لموبايل 2018 الي كانت f/2.0 .


الكاميرا السيلفي :-

موبايل Y7 2019 نازل بكاميرا سيلفي جديدة 16 ميجا بيكسل فتحة عدسة f/2.0 وكمان معاها فلاش LED وبكل الاحوال هيبقا افضل من كاميرا سيلفي Y7 2018 الي كانت 8 ميجا بيكسل .


البطارية :-

اكبر اختلاف حقيقي هي البطارية , كانت 3000 مللي أمبير في موبايل Y7 2018 وكانت بتخلص بسرعة جدا والكلام ده كان شكوى متكررة من مستخدمين كتير , اما الـ Y7 2019 نازل ببطارية 4000 مللي أمبير وكمان المعالج افضل وموفر اكتر فبالتالي البطارية هتبقا افضل بفرق كبير جدا .


التصميم :-

الموبايلين من البلاستيك , بس الاختلاف في شكل الكاميرات ودرجة الالوان والكلام ده ممكن تتعرفوا عليه اكتر من صور كل موبايل الي موجودة في مقالة كل موبايل لوحده وهتلاقيها لما تدوس على اسم الموبايل باللون الأزرق فوق .


الشاشة :-

شاشة Y7 2019

شاشة الـ Y7 2019 نازله بحجم 6.26 بوصة بدقة HD+ وفيها نوتش صغير DewDrop مخلي الشاشة شكلها افضل بكتير من شاشة الـ Y7 2018 الي كان بينزل بشاشة 6 بوصة بردة بدون نوتش ولكن مع حواف شاشة كبيرة وبنفس الدقة الـ HD+ .


الاسعار :-

سعر الـ Y7 Prime 2019 اتحدد رسمي 2999 جنية , وبكدا هيبقا اغلى حوالي 200 جنية من موبايل Y7 Prime 2018 الي سعره دلوقتي حوالي 2800 جنية مع العلم ان الموبايلين نفس المساحة 32 جيجا ونفس الرام 3 جيجا واعتقد سعر Y7 2018 هيرخص عن كدا خلال اليومين الجايين لحد اما الكمية بتاعته تخلص من الاسواق ويفضل الـ Y7 2019 هو الي موجود ومتاح للبيع .

وموبايل Y7 2019 متاح للحجز المسبق وهيبقا متوافر من يوم 5 فبراير ان شاء الله .


هل Y7 Prime 2019 افضل موبايل ب3000 جنية ؟

Honor 8c

الاجابة باختصار … لا !
لان موبايل Honor 8c نازل وراه علاطول بنفس السعر مع معالج سناب دراجون 632 الي هو غالبا هيبقا افضل معالج بالسعر ده مع نفس البطارية 4000 مللي أمبير ونفس الكاميرا الخلفية وخامات التصنيع , بس الهونر 8c بنوتش عريض مش صغير زي الـ Y7 2019 و كمان كاميرته السيلفي 8 ميجا بيكسل مش 16 , بس عموما الي بيدور على اداء افضل اعتقد اختيار 8c هيكون ممتاز , اما الي بيدور على موبايل منتشر وسهل الصيانة ومتوسط الامكانيات فموبايل Y7 2019 هيكون مناسب ليه .


موبايل Xiaomi Note 7 هينزل بنفس السعر ؟

Xiaomi Note 7

معتقدش شاومي هتقدر تنزل الموبايل ده بسعر 3000 جنية , حاليا سعر Xiaomi Note 6 Pro حوالي 3400 جنية للنسخة 32 جيجا مع 3 جيجا رام , ازيد 400 جنية من Y7 2019 وافضل منه لانه بمعالج افضل وخامات معدن وكاميرات افضل , واعتقد الـ شاومي نوت 7 هينزل بسعر 3600 جنية مش أقل من كدا , وبالتالي هيبقا في فرق سعر حوالي 600 جنية بينه وبين الـ Y7 2019 وده هيخلي مستخدمين يفضلوا الواي 7 2019 علشان ارخص , بس الي هيقدر يزود المبلغ ويستنى شهر مارس أو أبريل لما النوت 7 ينزل مصر هيكون اختيار مميز جدا .

قد يعجبك أيضا...

Comments

Loading...