موبايل جديد من هواوي من الفئة المحبوبة واللي دايمًا بتبيع كتير وهي فئة الـY .. عندك الـY7 Prime 2019 كان عامل مبيعات كتير جدًا، وبعدية الـY7p بالرغم من عدم وجود خدمات جوجل فيه إلا إنه لقى قبول كبير .. النهارده هنراجع Huawei Y7a الجديد اللي بيجي بدون خدمات جوجل .. فتعالوا نشوف الموبايل ده قدم ايه جديد في الفئة الاقتصادية.
التصميم :-
لغة تصميم الموبايل ده اتغيرت خالص .. الموبايل مبقاش شبه الموبايلات الاقتصادية من هواوي .. لا الموبايل بقى شبه موبايلات زي Nova 7 و Nova 7 SE الموبايلات الأغلى في الفئة المتوسطة.
فـ كويس جدًا إننا نشوف تطوير التصميم ده ورصة الكاميرا الخلفية الرباعية في المستطيل الخلفي مع بروز خفيف للكاميرات .. التصميم مواكب جدًا لسنة 2020 .. والبصمة كمان على زرار الباور مش في الظهر.
الموبايل خاماته من البلاستيك ولكنه مش رديء خالص .. الموبايل خاماته نظيفة وقوية والفريم مطفي علشان يحسسك إنه معدن بس هو بلاستيك طبعا .. والتقفيل ممتاز.
الموبايل كبير شوية في الإيد بسبب شاشته الضخمة .. أبعاده كبيره و وزنه حوالي 206 جرام وتخانه 9.3 ملم .. فا هو مش صغير في الإيد خالص.
الشاشة :-
شاشة عملاقة بقياس 6.67 بوصة من نوع IPS LCD بدقة FHD+ مع ثقب كبير شوية للسيلفي في نص الشاشة من فوق .. الحواف حوالين الشاشة مش صغيرة برده .. فتحس كدا إنك ماسك موبايل ضخم في ايدك.
طب بالنسبة للأداء بتاع الشاشة بقى .. هي كسطوع حلوة جدًا .. يمكن ده من أعلى الموبايلات في فئته من ناحية السطوع تحت الشمس .. الألوان بتاعه الشاشة عادية ولا هي سيئة ولا هي حلوة .. حاجة كده في النص.
وعمومًا حاجة كويسة من هواوي إنها تخلي شاشتها بدقة FHD+ في فئة الـY بعد ما كنا بنشتكي في الموديلات القديمة إن الدقة مُنخفضة HD+ فقط.
الشاشة مفيش إعلان رسمي عن طبقة الحماية اللي عليها .. ولكن في سكرينة هتلاقيها متركبة على شاشة الموبايل أول ما تطلعه من العلبه بتاعته.
الأداء :-
الموبايل جاي بمعالج كيرن 710A .. وخلي بالك ده مُختلف وإقتصادي شوية عن كيرن 710F .. لإن كيرن 710A بتكنولوجيا 14 نانو والنواتين الأسرع Cortex A73 التردد بتاعهم أقل شوية من الـ710F .. وده بالتبعية إترجم لرقم Antutu أقل حاجة بسيطة .. وأداء فعلي أقل حاجة بسيطة من الكيرن 710F.
المهم نرجع لموضوعنا .. بالنسبة لموقف المعالج ده وسط المنافسين فا هو ممكن ينافس معالج سامسونج الـExynos 850 الموجود في A21s .. إنما يقل شوية عن الـG80 والـG70 اللي بنشوفهم في ريلمي وشاومي وانفنكس.
واجهة هواوي مُستقرة مفيش أي مشاكل ممكن تقابلك فيها مع الموبايل ده زي الواجهات الصينية التانية .. ولكن الأداء مش سريع أوي زي ما وضحتلك من شوية.
الأداء الرسومي زيه زي كيرن 710F لإنه نفس المعالج الرسومي .. ببجي بتشتغل على High HD .. مفيش تنازل في جودة الجرافيكس هنا .. واللعبة بتشتغل بشكل مقبول .. كول اوف ديوتي بتشتغل على Medium .. والـألعاب بتشتغل بشكل مقبول بدون سخونية كبيرة على المعالج اللي هنا.
عوامل الأمان وعناصر اخرى :-
بصمة مدمجة بزر الباور سرعتها كويسة .. والـFace Unlock برده سرعته مقبولة جدًا.
مفيش لمبة إشعارات ولا في NFC في الموبايل ده.
وطبعا الموبايل جاي بخدمات هواوي بدون خدمات جوجل .. عندك الـApp Gallery تحمل من خلالة التطبيقات اللي أنت عايزها .. ولو ملقتهاش عندك الـPetal Search Engine بتاع هواوي بتقدر تدور على أي تطبيق انت عايزه وتحمله على الموبايل .. بس طبعًا لازم يكون الـApplication ده مش مرتبط بحزمة جوجل الأمنية.
الموبايل فيه مستشعر ضوء وتقارب شغالين كويس .. بس مفيهوش مستشعر جيروسكوب، معرفش ليه!
وصوت الموبايل جاي من Speaker وحيد سفلي صوته متواضع جدًا .. يدوبك يقضي الغرض!
قوة شبكات وWiFi .. فكالعادة الموبايل ده مُمتاز جدًا ومتقلقش منه خالص.
البطارية :-
وهنا التطوير المحسوس .. بطارية 5000 مللي أمبير مع سوفت وير هواوي الموفر جدًا فا هي هتستحمل معاك 9 ~ 10 ساعات شاشة مفتوحة .. حاجة كويسة جدًا.
وكمان معاك منفذ شحن USB Type C وشاحن سريع 22.5 واط يمكن يكون ده أسرع شاحن في الفئة السعرية ديه.
الكاميرات :-
الموبايل جاي بـ4 كاميرات في الظهر .. الأساسية 48 ميجا بيكسل فتحة عدسة F/1.8 والتانية 8 ميجا بيكسل للتصوير الواسع فتحة عدسة F/2.4 والتالتة 2 ميجا بيكسل ماكرو والاخيرة 2 ميجا بيكسل للعزل.
والسيلفي الموجود في ثقب الشاشة بيجي بدقة 8 ميجا بيكسل مع فتحة عدسة F/2.0.
وبعد ما جربت الكاميرات .. محستش بتطوير كبير عن الـY7p والـY8p اللي جربتهم من فترة .. نفس العدسات تقريبًا بنفس طريقة معالجة ألوان الصورة بالظبط .. الألوان بتطلع بهتانة حاجة بسيطة .. تحس إنك دايمًا عايز تعدل في الصورة وتخليها مشبعة بالألوان أكتر والـDinamic Range مش بيبقى قد كده.
انا جربت الكاميرا بتاعت الموبايل جنب Redmi Note 9 علشان نشوف فرق أداء الكاميرات بينهم .. مجملًا أنا شايف إن مشكلة هواوي دايمًا في معالجة الصورة .. الصورة بتطلعلك من الكاميرا زي ما أنت كنت شايفها وانت بتصور .. على عكس معظم الموبايلات التانية اللي بتعمل معالجة بسيطة وبتحسن شوية من الألوان وبتحسن شوية من الـDinamic Range ولون السماء والحاجات دي كلها.
ولكن كـ كمية تفاصيل في الصور فالـY7a منطقي .. بيطلع تفاصيل معقولة ولا هي كتير أوي ولا هي قليلة أوي .. حاجة كده في النص .. وكالعادة الـNight Mode في Y7a مُميز جدا بيطلع صور فيها Sharpness عالي وتفاصيل كتير جدًا مُقارنتا بالموبايلات التانية.
أما بالنسبة للسيلفي فا هو معجبنيش أوي .. سيلفي متواضع جدًا .. كالعادة الـPortrait في السيلفي بيغلط كتير في القص .. ولو وراك شمس وأنت بتتصور هتلاقي الخلفية كلها إتعزلت.
وبرده جرب وقارنت بسيلفي Note 9 اللي أصلا مش حلو اوي .. لاقيت الألوان الحقيقية في الـY7a .. بس معالجة الصور بتبقى أحسن في الـNote 9.
بالنسبة بقى للتصوير الفيديوهات بالموبايل ده فا هو بيقدر يصور فيديوهات على 1080p بس ومفيش أعلى من كده .. وده بسبب إستخدام المعالج الـKirin 710A .. والموبايل للأسف مفيهوش مُثبت إلكتروني .. لكن فيه ميكروفون اضافي لعزل الضوضاء.
تجربة التصوير بالموبايل صور وفيديوهات مع مقارنته بالـNote 9 في فيديو المراجعة.
سعر الموبايل :-
- نسخة واحدة 128 جيجا مع 4 جيجا رام بسعر رسمي 3599 جنية مصري
الموبايل متوفر للحجز المُسبق مع هدية Huawei Band 3E .. وأعتقد الموبايل سعره هيقل عن كده شوية، بعد فترة الحجز.
والموبايل بيدعم تركيب شريحتين إتصال من الجيل الرابع مع كارت ميموري بحجم يصل الي 512 جيجا.
الرأي النهائي :-
مميزات Huawei Y7a :-
- خامات محترمة وتقفيل مُتميز
- تصميم شيك راقي جدًا
- بطارية ضخمة جدًا بتستحمل لوقت طويل
- شاحن سريع 22.5 واط
- شاشة ضخمة مع شكل الثُقب ودقة عالية وسطوع عالي
عيوب Huawei Y7a :-
- صوت واطي مش الأفضل
- كاميرات مش الأفضل ومعالجة الصور مش الأفضل
- مفيش مثبت إلكتروني في تصوير الفيديوهات الـ 1080p
- مفيش جيروسكوب
- المعالج متواضع إقتصادي جدًا
- خدمات هواوي فقط ومفيش خدمات جوجل
Comments