شركة هواوي بتاخد خطوات كتير ورا بعض .. علشان تقدر تعزز موقف مبيعاتها في السوق المصري بعد مشكلة خدمات جوجل .. بتحاول كدا تشوف المنافسين في كل فئة سعرية بيقدموا ايه .. وتعلي عليهم بحاجة .. والنهاردة هنراجع موبايل Huawei Y8p الجديد .. واللي لأول مرة من هواوي بيجي بشاشة OLED .. ولكن الموبايل للأسف فيه بعض التنازلات الي هتتعرف عليها دلوقتي في مراجعتنا للموبايل !
التصميم :-
الموبايل ده لعُشاق الموبايلات اللي حجمها صغير ووزنها خفيف .. الموبايل جاي بوزن 163 جرام وتخانة اقل من 8 ملم .. وكمان ابعاده في الإيد صغيرة .. يعني اي واحد إيده صغيرة هيبقى مرتاح جدًا في التعامل مع الموبايل ده بإيد واحدة.
ولما حطيط الموبايل جنب Note 9S و Galaxy A31 .. لاقيت فعلًا فرق الحجم بينهم واضح جدًا .. تحس ان الـY8p اخوهم الصغير كده !
بس طبعًا الوزن الخفيف على حساب الخامات .. الموبايل جاي بظهر من البلاستيك وفريم من البلاستيك .. واللي ممكن تحسبه ميزه علشان يديلك خفة وزن وميتكسرش بسهولة .. وممكن تحسبه عيب علشان مش هيبقى Premium وفخم معاك.
البلاستيك لامع شوية وفيه درجة كدا في لون الظهر علشان تديلك شكل شيك شوية .. بس طبعًا رصة الكاميرا الثلاثية اللي في الظهر .. خلت شكل الموبايل قديم شوية .. في رصة كاميرات احسن من كدا دلوقتي .. بس هي ازواق عمومًا.
بروز الكاميرات في الـHuawei Y8p خفيف اوي .. وبيتغطى بالجراب المرفق مع الموبايل في العلبة.
الشاشة :-
الشاشة بتيجي بحجم 6.3 بوصة من نوع OLED .. وبجودة FHD+ وبتيجي بنوتش Infinity U فوق .. والشاشة ديه حلوة فعلا.
يعني انا حطيتها جنب Redmi Note 9S والـGalaxy A31 .. طبعا سيبك خالص من شاشة الـNote 9S .. الوانها هتبقى اقل منهم بكتير .. وحسيت ان شاشة الـA31 مُشبعة ومُعززة اوي اوي بالألوان.
بس الحقيقة شاشة الـY8p الـOLED أكتر واحده واقعية والألوان فيها مظبوطة كدا .. مفيش تشبع الوان زيادة .. وفي نفس الوقت التشبع بتاعها كافي جدًا والألوان حلوة جدًا.
سطوع شاشة الـY8p تحت الشمس كويس جدًا مفيهوش اي مشاكل .. بس الحافة السُفلية للـY8p كان نفسي تبقى اقل من كدا .. وكان نفسي برده في شكل كاميرا سيلفي أحدث من كده .. بس مش مشكلة المهم خدنا الشاشة الـOLED !
وعمومًا ينفع تلغي شكل النوتش من إعدادات الواجهة لو حابب .. وأخيرًا .. الموبايل بيجي في العلبة متركب عليه سكرينة.
الأداء :-
وهنا تبتدي التنازلات تظهر .. الموبايل جاي بمعالج Kirin 710F .. المعالج التقليدي اللي بقينا نشوفه في موبايلات أرخص من هواوي وهونر زي اخر موبايل راجعناه وهو الـHonor 9X Lite واللي سعره اقل من 3000 جنية.
وبالتالي وجود المعالج ده بالسعر ده عيب .. بس هواوي كانت مضطرة تعمل ده .. مقدرتش تحط معالج اعلى علشان تحافظ على الفئة السعرية اللي الموبايل ده محطوط فيها.
وعمومًا الموبايل ده جاي بـ6 جيجا رام وكمان نوع الذاكرة الداخلية من النوع السريع في الفئة ديه UFS 2.1 مع واجهة هواوي EMUI 10.1 الجديدة .. واللي الأداء فيها اتحسن كتير .. اقدر اقولك وانا مرتاح البال الأداء هنا احسن من الـ9X Lite اللي بنفس المعالج.
بس حقيقي مقدرش اقول الأداء مُمتاز خالص لإن في مُنافسين بيقدموا معالجات اقوى زي سناب دراجون 720G و712 والـHelio G90T.
بالنسبة للأداء الرسومي .. جربت ببجي اشتغلت على High HD واللعبة مقطعتش ولا هنجت واداءها كان ممتاز جدًا على الجودة ديه .. واللي لاحظته فعلًا .. انسى ان الموبايل ده يسخن .. الموبايل فعلًا مسخنش معايا خالص وديه حاجة بحترمها في موبايلات هواوي وهونر.
عوامل الأمان وعناصر اخرى :-
البصمة مُدمجة بالشاشة .. مقارنتًا بالفئة السعرية اللي الموبايل ده فيها .. فهي اسرع بصمة .. احسن من بصمات سامسونج بمراحل .. بس هي ساعات قليلة ممكن تغلط وتحتاج تشيل صباعك وتحطه تاني على البصمة .. والـFace Unlock صاروخي .. حلو جدًا وفعلًا هتعتمد عليه.
الموبايل جاي بدون خدمات جوجل .. الإعتماد على الـApp Gallery بتاع هواوي اللي بتحاول تضيف عليه كل حاجة .. بس طبعًا لسه مش كل البرامج موجودة .. وهتلاقي نفسك معظم الوقت بتحمل البرامج APK وتسطبها عادي خالص.
بالنسبة لبرامج جوجل الأساسية اللي لا غنى عنها .. الإيميل بتاعك Gmail هتفتحه من ابلكيشن ايميل هواوي عادي خالص .. واليوتيوب هتحمل يوتيوب فانسد وهتتعامل بيه عادي جدا.
والـGoogle Maps هتقدر تفتحه من الـBrowser .. ديه اسلم واسهل واسرع الحلول اللي تقدر تتعايش بيها مع الموبايل ده.
وأخيرا كلمة حق .. لو انت User عادي إستخدامك بسيط .. ممكن ارشحلك موبايل هواوي بدون خدمات جوجل .. إنما لو انت بتستخدم برامج اساسية كتير من جوجل .. او انت User ملكش في موضوع تحميل APK ده .. صعب اقولك اشتري موبايل من غير خدمات جوجل.
الموبايل مش فيه لمبة اشعارات .. بس فيه خاصية الـAlways On Display واللي هتظهرلك الساعة وايقونات اشعارات البرامج على الشاشة المطفية.
الموبايل فيه Dark Mode .. وشغال حلو علشان الشاشة الحلوة اللي هنا وتشبع اللون الإسود بيبقى كويس جدا .. والموبايل داعم للـNFC وديه ميزة كويس جدًا إننا نلاقيها في موبايل بالسعر ده.
المستشعرات كلها شغالة .. ضوء، تقارب .. بس مستشعر الجيروسكوب كان معلق ومش شغال وده إنعكس كمان على الثبات في تصوير الفيديوهات اللي هتكلم عنه كمان شوية .. ممكن تلاقي تحديث يظبط الحته ديه.
صوت الموبايل جاي من سماعة واحدة .. صوته عالي .. بس مش مجسم .. بس ده مش احسن صوت في الفئة السعرية ديه .. وصوت سماعات المكالمات عالي وممتاز .. وصوت سماعات الأذن مقبول بس برده مش عالي اوي.
وبالنسبة لقوة الشبكات .. الـWiFi المدى بتاعه حلو جدا .. وشبكات الإتصال قوية في الموبايل ده كعاده موبايلات هواوي اللي بجربها مفيش جديد.
البطارية :-
ويمكن يكون ده تاني تنازل .. بطارية هنا بحجم 4000 مللي أمبير .. سوفت وير هواوي موفر وكل حاجة .. بس بقينا بنشوف بطاريات اكبر في الفئة السعرية ديه .. بس عمومًا البطارية هتكمل معاك 6 ~ 7 ساعات شاشة مفتوحة في يوم من الاستخدام.
والموبايل جاي بمنفذ USB Type C بس للأسف مع شاحن 10 واط .. بيشحن البطارية في ساعتين.
كان نفسي في شاحن اسرع من كدا .. لإن كل المنافسين بيقدموا شواحن اسرع بدايتًا من 15 واط و18 واط و20 واط .. وانا شايف ان ده عيب في الموبايل.
الكاميرات :-
الكاميرات تقليدية شوية .. الخلفية ثلاثية .. الأساسية 48 ميجا بيكسل فتحة عدسة F/1.8 والعدسة التانية 8 ميجا بيكسل فتحة عدسة F/2.4 للتصوير الواسع .. والاخيرة 2 ميجا بيكسل للعزل .. مفيش عدسة ماكرو هنا.
والسيلفي 16 ميجا بيكسل بفتحة عدسة F/2.0 .. السوفت وير بتاع الكاميرات فيه Night Mode في الكاميرا الخلفية وفي الكاميرا السيلفي.
بص من الأخر، الكاميرات هنا .. مش اقوى حاجة في الموبايل .. يعني مش هقولك ان الموبايل ده بيقدم أفضل كاميرا خلفية بسعره .. لا هو الكاميرات متوسطة .. الألوان بتميل اكتر لإنها تبقا حقيقية .. والتفاصيل مقبولة طول ما الإضاءة عالية.
وعلشان نشوف مع بعض جودة الكاميرات .. عملت مقارنة مع الـGalaxy A31 .. هتلاقي تفوق واضح لكاميرات الـHuawei Y8p .. انما مقارنتًا مع وحش الكاميرات وهو الـ Xiaomi Note 9S .. لاحظت ان تفاصيل صور الـNote 9S افضل من الـY8p.
يعني من الأخر ممكن أقول ان كاميرات الـ Huawei Y8p الخلفية متوسطة !
بالنسبة بقى للسيلفي فا هو معجبنيش اوي .. الوان البشرة مش مظبوطة والبورترية كمان ساعات كتير بيغلط في تحديد الاطراف.
ولما قارنته مع الـGalaxy A31 .. حسيت ان الإتنين مش حلوين في السيلفي .. على نفس المستوى تقريبًا.
انما مع الـRedmi Note 9S .. حسيت ان سيلفي الـNote 9S افضل شوية .. ومين عارف جايز يوصل تحديث يحسن من كاميرات الـ Y8p.
بالنسبة بقى لتصوير الفيديوهات فالموبايل ده بيصور فيديوهات على 1080p بـ30 فريم في الثانيه .. مفيش مثبت إلكتروني طبعا .. وفي مايكروفون اضافي لعزل الضوضاء بيظبط الصوت شوية.
ممكن تشوف الصور والفيديوهات المتصورة بالموبايل في فيديو المراجعة في أخر المقالة.
سعر الموبايل :-
موبايل Huawei Y8p بيجي بنسخة واحدة 128 جيجا مع 6 جيجا رام بسعر رسمي 3666 جنية .. والموبايل في الحجز المسبق هتاخد عليه Huawei Band 4 هدية.
وبينفع تركب شريحتين اتصال او شريحة وكارت ميموري 256 جيجا نانو اللي مش موجود في المحلات .. وبالتالي اعتبر تركيب كارت ميموري في الموبايل ده أمر صعب.
الرأي النهائي :-
مميزات الـY8p :-
- حجم مُناسب و وزن خفيف والمسكة في الإيد سهلة
- شاشة مُحترمه جدًا من نوع OLED
- بصمة سريعة في الشاشة
- شبكات Wifi و اتصال قوية
- دعم لخاصية الـNFC
- مساحة تخزين 128 جيجا و6 جيجا رام
- عدم وجود مشاكل عشوائية في هواتف هواوي .. عيوب التصنيع قليلة جدا جدا
وهواوي مرفعتش سعر الموبايل ده بعد الزيادات الغريبة اللي شوفناها من شاومي وسامسونج اليومين الي فاتوا.. رغم اني كنت شايف ان لو الـ Y8p نزل بسعر أقل من 3500 جنية كان هيبقا أفضل !
عيوب الـY8p :-
- تصوير الفيديوهات بجودة 1080p بدون تثبيت الكتروني
- انخفاض جودة الكاميرا السيلفي
- الشاحن البطيء الـ10 وات
- عدم وجود خدمات جوجل
- معالج كيرين 710 واللي مش مقبول بالنسبة لناس كتير وخصوصًا الجيمرز
Comments