مراجعة Huawei Y8s – أغرب موبايل من هواوي بخدمات جوجل بـ 3000 جنية !

موبايل جديد غريب من هواوي في فئة الـ3 الاف جنية .. وهو الـHuawei Y8s .. وده يُعتبر إعادة إحياء لموبايل Huawei Y9 2019 اللي عمل نجاح كبير في مصر لما نزل .. مع تغيرات بسيطة في الكاميرا الخلفية وتصميم خارجي أفضل وسعر أقل .. فا هل الموبايل ده هيقدر ينافس ويسد قصاد الموبايلات التانيه الموجوده حاليًا في الفئة دي ولا لأ ؟

ومعلومة سريعة كده .. اي موبايل من هواوي حاليًا في فئة الـY-s او من سلسلة الـY وبينتهي بحرف الـS بيكون عليه خدمات جوجل بشكل مُستقر وبدون مشاكل .. زي ما شوفنا في Huawei Y6s و Y9s و Y8s اللي بنراجعة النهاردة .


التصميم :-

الموبايل جاي بتصميم بلاستيكي بالكامل من الظهر والفريم .. الموبايل مُتماسك في إيدك ةتقفيل محترم من هواوي معنديش مشكلة معاه .. بس بلاستيك .. يعني مفيهوش ميزة تنافسية.

التصميم شيك ورصة الكاميرتين اللي في الظهر في فريم مُستطيل محسساك إنك مواكب شوية 2020.

الموبايل وزنه كويس جدًا 180 جرام مع تخانه 8.1 ملم .. معنديش اي مشاكل في إستخدام الموبايل ده ولا حاسس بتقل ولا كبر حجم زي الموبايلات بتاعت اليومين دول اللي بنجربها.

الموبايل بيجي معاه جراب شفاف في العلبة بيغطي البروز المتوسط اللي في الكاميرات.


الشاشة :-

شاشة الموبايل كبيرة .. بتيجي بحجم 6.5 بوصة من نوع IPS LCD بدقة FHD+ .. شاشة مُحترمة الوانها كويسة .. لو قارنتها مع الموبايل المنافس ليه بشكل مباشر هتلاقي تفوق واضح لألوان وتفاصيل شاشة الـY8s.

المشكلة الواضحة اللي في الشاشة هي التصميم القديم .. كحواف وإستغلال الشاشة للواجهة الأمامية وتصميم النوتش القديم.

مش مواكبة خالص سنة 2020 .. بس انا هسيبك الموضوع مفتوح ليك .. هل علشان تاخد شاشة كويسة من ناحية الوان وسطوع ودقة الشاشة وصعب جدًا يظهر فيها تطبيع او مشاكل .. هتضحي بالحواف وإستغلال الشاشة ؟


الأداء :-

اكيد إنت عارف بقى .. مش محتاج أتكلم .. الموبايل جاي بمعالج Kirin 710 .. التقليدي اللي كلنا عارفينه .. ونوع الذاكرة الداخلية هنا النوع البطيء EMMC 5.1 زيه زي المنافسين كلهم.

وبالترتيب كده انا جربت Redmi Note 9 وبعدة الـNokia 5.3 وبعده الـY8s .. واللي لاحظته ان الـY8s هو أسرعهم في فتح التطبيقات والتنقل بشكل سلس جدًا.

مفيش أي تهنيجات او تقطيعات او أي مشاكل في الواجهة .. ولكن سيظل الـKirin 710 هو تاني معالج من ناحية القوة في الفئة ديه بعد معالجات ميدياتيك الجديدة G80 وG85 واللي بيقدموا أداء رسومي أعلى.

الأداء الرسومي بقى .. لعبة ببجي بتشتغل على Y8s على اعدادات جرافيك High HD واللعبة بتشتغل كويس جدًا .. وكول اوف ديوتي شغالة على اعدادات جرافيك Low للأسف .. بسبب المعالج القديم.

اما بالنسبة للأداء فالألعاب بتشتغل كويس جدًا بدون مشاكل .. وبالنسبة للسخونية فهي طبيعية جدًا.


عوامل الأمان وعناصر اخرى :-

بصمة الإصبع موجوده في الظهر وهي سريعة جدًا مفيهاش أي مشاكل .. والـFace Unlock سريع مفيهوش أي مشاكل برده.

الموبايل بيدعم خدمات جوجل عادي خالص .. هتلاقي الـPlay Store وتقدر تحمل كل التطبيقات بتاعتك عادي خالص .. والموبايل للأسف جاي بأندرويد 9 وموصلوش أندرويد 10 لحد دلوقتي ومفيش Dark Mode .. وديه حاجة مش مقبولة في 2020.

سوفت وير هواوي بيدعم عمل نسختين من برامج التواصل الإجتماعي .. وبيدعم لمبة إشعارات بأكتر من لون .. الموبايل بيدعم كل المُسشتعرات ضوء وتقارب وجيروسكوب.

الموبايل للأسف صوته ضعيف شوية .. يمكن أقل من الـNote 9 اللي هو أصلًا صوته متوسط .. وصوت سماعات المكالمات عالي ومُمتاز .. وصوت سماعات الأذن عالي وكويس.

أما بالنسبة لقوة الشبكات .. فا الـWiFi مُمتاز والمدى بتاعه قوي جدًا .. وشبكات الإتصال هتاخد تقييم مُمتاز .. إحسن من الـNote 9 والـNokia 5.3 في قوة إستقبال الشبكات.


البطارية :-

بطارية تقليدية بتيجي بحجم 4000 مللي أمبير .. هتستحمل معاك 6 ~ 7 ساعات شاشة مفتوحة .. مش هنقدر نقول عليها ميزة ولا هنقدر نقول عليها عيب.

بس المشكلة إن الموبايل مبني على موبايل قديم .. بيجي بنفس منفذ الشحن الـMicro USB 2.0 وبيدعم الشحن الـ10 وات فقط .. بس مع ذلك بيشحن في ساعتين بس.

أقدر أقولك الزمن ده معقول في الفئة السعرية ديه .. في موبايلات تانية بشحن سريع وType C وبتشحن في ساعتين ونص واكتر .. طبعًا حجم البطارية بيفرق بس الإستهلاك هنا مُمتاز برده.


الكاميرات :-

الكاميرا الخلفية مُزدوجة .. الأساسية 48 ميجا بيكسل بفتحة عدسة F/1.8 والتانية 2 ميجا بيكسل للعزل .. معرفوش يضيفوا Macro او Ultra Wide علشان رخصة جوجل تفضل موجودة.

والسيلفي الموجود في النوتش مُزدوج .. الأساسية 8 ميجا بيكسل بفتحة عدسة F/2.0 والتانية 2 ميجا بيكسل للعزل وفي نظري ملهاش لازمة.

الكاميرا الخلفية بتطلع صور عادية جدًا في الشمس .. صور أقدر أقول عليها متوسطة .. لا مش أفضل ألوان ولا أفضل تفاصيل .. والقص بتاع البورترية ساعات كتير بيغلط .. وده العادي من هواوي .. مش شاطرة اوي في العزل.

في الإضاءات الداخلية .. الأداء بيبقى مُناسب جدًا جدًا لسعر الموبايل .. تفاصيل وألوان مُرضية جدًا جدًا للعين .. أما الإضاءة الليلية والتصوير الـNight Mode .. عندي ملحوظة إن الموبايل بيتأخر شوية على ما يصور .. بس بيطلع صورة مُمتازة على سعر الموبايل.

اما بقى لما حطيته جنب النوت 9 .. لاقيت تفاصيل الـNote 9 أحسن شوية في الإضاءة العالية بس الـDinamic Range كان أفضل شوية في الـY8s وعرف يخلي الصورة متسلعش من الشمس.

الإضاءة الداخلية بقى .. لأ صور الـY8s أحسن كالوان وتفاصيل وDinamic Range والصور مش بتلسع.

واخيرا .. الـNight Mode بقى تفوق واضح وتام للهواوي .. اة بيطول شوية على ما بيطلع الصورة وبياخد وقت في معالجتها .. بس بتاخد صورة بـSharpness عالي شوية وتفاصيل كتير وألوان مظبوطة جدًا عن النوت 9.

السيلفي بقى نقطة سلبية قوية جدًا .. الألوان ضايعة .. القص ضايع .. التفاصيل مش مظبوطة على الإطلاق .. حرفيًا أسوأ حاجة في الموبايل ده واللي ممكن تقفلك منه هي الكاميرا السيلفي.

واللي لو انت هاوي سيلفي أعتقد إنك مش هتفكر تجيب الموبايل ده او هتستخدم فلاتر كتير علشان تقدر تاخد صورة مقبولة بالسيلفي اللي هنا.

ومُقارنتًا مع الـNote 9 اللي هو اصلًا السيلفي بتاعه مش الأفضل .. هتلاقي النوت 9 مُتفوق في كل إوضاع التصوير السيلفي .. ألوان احسن .. تفاصيل احسن .. Dinamic Range احسن وقص احسن.

يعني يمكن لما الإضاءات بتقل شوية .. بتلاقي الإتنين بيقربوا من بعض .. بس يعني الإتنين مش قد كدا اصلا.

بالنسبة بقى لتصوير الفيديوهات فالموبايل بيصور بجودة 1080p مع وجود المُثبت الإلكتروني بسبب وجود مستشعر الـGyroscope .. والموبايل كمان فيه مايكروفون اضافي لعزل الضوضاء بيطلع نتيجة أفضل في تسجيل الصوت بالموبايل ده.


سعر الموبايل :-

السعر الرسمي للـY8s بعد زيادة الأسعار الأخيرة هيكون 3299 جنية للنسخة 64 جيجا مع 4 جيجا رام.

وينفع تركب كارت ميموري بحجم 512 جيجا مع شريحتين إتصال مع بعض في نفس الوقت.


الرأي النهائي :-

مميزات Huawei Y8s :-

  • شاشة محترمة جدًا
  • أداء مفيش فيه اي مشاكل ومستقر
  • شبكات قوية ومُمتازة
  • دعم لـ لمبة الإشعارات
  • كاميرا خلفية كويسة خصوصًا في التصوير بالليل
  • موبايل مضمون مفيش فيه مشاكل .. يستحمل ويعيش

عيوب Huawei Y8s :-

  • مساحة تخزين قليلة
  • الكاميرا السيلفي
  • تصميم النوتش القديم
  • منفذ الشحن الـMicro USB 2.0
  • صوت ضعيف نسبيًا
  • إصدار أندرويد قديم
  • مفيش وظائف كتير في الكاميرا الخلفية زي الماكرو و الوايد انجل

فيديو المراجعة :-

قد يعجبك أيضا...

Comments

جاري التحميل...