مراجعة Infinix Hot 10 Play – أفضل هاتف إقتصادي بـ 2000 جنية ؟!

انفنكس طورت جدا من نفسها الفترة الأخيرة في الفئة الاقتصادية .. بتحاول جاهدة تغيير فكرة المستخدم عنها من ناحية الجودة ومن ناحية المعالجات .. لو تفتكر Infinix Hot 10 كان محترم جدًا .. كان سعره رخيص وبيقدم معالج قوي في فئته السعرية .. واداءه الفعلي كان ممتاز.

دلوقتي انفينكس نزلت النسخة الأقل منه بأسم Infinix Hot 10 Play .. بسعر أقل من 2000 جنية .. وبرده انفينكس لعبت على نفس النقطة واستخدمت برده أفضل معالج اقتصادي موجود في فئته السعرية .. النهارده هقدملك مراجعة Infinix Hot 10 Play وهوضحلك كل حاجه عن الموبايل.

التصميم :-

انفينكس دايما بتتبنى فكرة الموبايلات الكبيرة .. شاشة كبيرة وبالتبعية الموبايل بيبقى كبير شوية .. وموبايل Hot 10 Play ماشي بنفس السياسة .. وبالتالي الموبايل كبير شوية أو شويتين في الايد.

ولكن بالرغم ان البطارية بتاعته ضخمة جدًا .. إلا أن تخانته 8.9 ملم .. تخانه مُمتازة في الفئة الإقتصادية بالنسبة للبطارية دي .. الوزن 207 جرام .. مش هقول خفيف بس نقدر نقول توزيع الوزن كويس مش هتحس ان الموبايل تقيل أوي.

لو بتسأل عن الخامات .. فهي بالكامل طبعًا من البلاستيك .. ولكن انفينكس برده بتحب تقدم حاجه مختلفة للمستخدم بتاعها .. في إنعكاسات شيك بتحصل لما الضوء بيجي على ظهر الموبايل .. ولكن كالعادة البلاستيك اللي هنا لامع للأسف .. مفيش صنفرة عليه .. وبالتالي هيظهر فيه خرابيش بسهولة.

وعلشان كده انفينكس حاطه جراب شفاف ولكن مش سيلكون طري .. لأ بلاستيك ناشف، علشان لما تحط الجراب متحسش ان الموبايل بقى تخين .. جوانب الجراب مش موجودة علشان مسكة الموبايل تبقى أحسن والموبايل جوا الجراب.

مش عاجبني شكل تصميم الكاميرا الخلفية .. هم حاولوا يعملوا شكل مواكب الترندات الجديدة ولكن للأسف في شكل عدسة كاميرا الخلفية منظر وفي عدسة تانية للذكاء الإصطناعي ملهاش لازمة .. ففي رصة كاميرات كده ملهاش لازمة وفي الأخر واحدة بس هي اللي شغالة .. وطبعًا بروز الكاميرا الخلفية خفيف جدًا لإن أصلا الكاميرا متواضعة جدا.

الشاشة :-

شاشة عملاقة 6.82 بوصة من نوع IPS LCD بدقة HD+ فيها نوتش للسيلفي.

مفيش موبايل تحت الـ 2000 جنية هتلاقي شاشته دقتها اعلى من كده، فا معنديش مشكلة تمامًا مع الدقة المستخدمة في انفينكس.

هي انفينكس هنا لعبت على أنها تكبر حجم الشاشة لأن المستخدم في الفئة الإقتصادية بيحب الشاشة الكبيرة .. ولكن ده أتترجم لكثافة بيكسلات قليلة .. لو ركزت أوي في الشاشة هتلاقي بكسلة شوية .. وألوان الشاشة مش احسن حاجة .. تحس الألوان كانت محتاجة تبقى مشبعة أكتر من كده شوية.

السطوع تحت الشمس متواضع 400 شمعة زي Poco M3 .. وبالتالي بلاش تركب سكرينة تقيلة على الشاشة علشان تعرف تتعايش معاها .. وعمومًا الموبايلات الإقتصادية كلها بتقدم سطوع تحت الشمس متواضع جدًا .. والحافة السفلية بتاعت الشاشة كبيرة شوية .. كنت أتمنى تبقى أصغر من كده شوية.

في سكرينة شفافة بتيجي في علبة الموبايل منصحكش بيها او ركبها لحد أما تجيب سكرينة احسن شوية .. وكالعادة في سماعات في العلبة مع الجراب والشاحن والوصلة .. مفيش اي تنازلات في علبة الموبايل.

الأداء :-

الموبايل ده في منه نسختين، نسخة بـHelio G25 ونسخة بـHelio G35 .. احنا في مصر وصل لنا النسخة اللي بمعالج Helio G35 بتكنولوجيا 12 نانو .. وده من الأخر بيعتبر أفضل معالج إقتصادي تحت سعر 2000 جنية في الأداء اليومي وفتح البرامج والتنقل ما بينهم .. ونفس المعالج موجود في Redmi 9C و Realme C12.

لكن موبايلات شاومي و ريلمي اغلى في السعر .. الـHot 10 Play سعره مش هيعدي 2000 جنية وبرده مساحته 64 جيجا من نوع eMMC مع 4 جيجا رام .. فا عاش انفينكس لإهتمامهم بالفئة الإقتصادية.

بالنسبة لواجهة التشغيل الخاصة بانفنكس XOS 7 مبنية على أندرويد 10 فهي هنا خفيفة جدًا .. سريعة، مفيهاش مشاكل، بس على حساب ان الواجهة شكلها بدائي شوية .. مش احلى شكل واجهة موجود .. والمميزات اللي فيها قليلة شوية.

بالنسبة للأداء في الألعاب بقى فا المعالج الرسومي الموجود مع G35 هو نفسه الموجود في P22 من PowerVR GE8320 .. معالج رسومي متواضع جدًا يناسب ألعاب خفيف ومتوسطة مش العاب تقيله .. هتلاقي Setting الجرافيك بتاعت ببجي على Medium .. هتحتاج تنزلها لأقل جودة علشان تعرف تلعب ولكن هتلاقي برده تقطيع فريمات.

كول اوف ديوتي لعبة أخف شوية وبالتالي هتقدر تلعبها على اقل اعدادات جرافيك بدون اي مشاكل.

وعمومًا لو انت عايز تلعب على الموبايل فا هتحتاج تزود المبلغ وتطلع للـInfinix Hot 10 على الأقل علشان تقدر تلعب بأداء كويس.

عوامل الأمان وعناصر اخرى :-

الموبايل فيه بصمة في الظهر .. اداءها حلو جدًا سريعة واسرع من موبايلات تانيه اغلى منه .. الـFace Unlock سرعته مقبولة جدًا برده.

الفلاش الأمامي بتاع السيلفي بينور بس مع الشحن انما مش بينور كلمبة اشعارات للأسف.

الموبايل فيه مستشعر ضوء و تقارب حقيقين .. ولكن الجيروسكوب سوفت وير مش حقيقي واداءه مش حلو .. ومفيهوش ميكروفون اضافي لعزل الضوضاء.

أكبر عيب في الموبايل ده هو الصوت .. مفيش مخرج صوت تحت .. لا صوت الموبايل بيطلع من سماعة المكالمات.

الصوت مش ضعيف اوي للدرجة .. لأ هو على إنه صوت طالع من سماعة مكالمات فهو عالي .. ولكنه مقارنتًا باي موبايل تاني فيه Speaker سفلي للصوت فالصوت بتاعت هوت 10 بلاي اقل منه بنسبة 30% مثلا.

شبكة الإتصال في الموبايل هنا كويسة مفيهاش مشاكل .. شبكة الـWi-Fi متوسطة .. المدى بتاع الـWiFi مش أقوى حاجة هنا.

البطارية :-

الموبايل جاي ببطارية ضخمة 6000 مللي أمبير .. أنا ضغطت جامد في الإستخدام إستحملت معايا 11 ساعة شاشة مفتوحة في خلال 3 أيام .. وده وقت ممتاز جدا جدا .. بطارية قوية فعلًا.

الشاحن المرفق 10 واط ومنفذ الشحن قديم MicroUSB 2.0 .. وبالتالي الموبايل أخد 3 ساعات ونص في الشحن وقت كبير شوية .. وبيطول اوي في أخر 10%.

الكاميرات :-

الكاميرا الخلفية 13 ميجا بيكسل والتانية للذكاء الإصطناعي ملهاش إستخدام فعلي واضح .. والسيلفي 8 ميجا بيكسل.

عمومًا في الفئة السعرية اللي تحت 2000 جنية مش هتلاقي موبايل بكاميرات قوية .. للأسف لازم تزود المبلغ شوية وتطلع للفئة بتاعت 2500 جنية علشان تاخد كاميرا كويسة.

عمومًا كاميرات Hot 10 Play كاميرات عاديه جدًا بالنسبة للموبايلات اللي تحت 2000 جنية .. منقدرش نقول مميزة ولا نقول انها عيب .. الطبيعي بتاع الفئة دي تلاقي الألوان مش مظبوطة اوي .. تلاقي الـHDR مش قد كده .. وتلاقي التفاصيل مش احسن حاجة.

والسيلفي نفس الحال .. لأ ده كمان السيلفي أسوأ شوية من الكاميرا الخلفية ومعظم الصور بتبقى مبكسلة.

بالنسبة لتصوير الفيديوهات بالموبايل فا هو إقتصادي تحت الـ2000 جنية .. متتوقعش منه كتير، هو أخره بيصور على 1080p مع 30 فريم في الثانية .. وطبعًا مفيش ثبات إلكتروني، وكمان جودة الصوت مش قد كده لإن مفيش ميكروفون اضافي لعزل الضوضاء.

سعر Infinix Hot 10 Play :-

• سعر الموبايل الرسمي للنسخة الـ64 جيجا مع 4 جيجا رام هو 2099 جنية

وبينفع تركب شريحتين إتصال من الجيل الرابع في نفس الوقت مع كارت ميموري بحجم 512 جيجا.

الرأي النهائي :-

مميزات Infinix Hot 10 Play :-

• شاشة ضخمة جدًا
• بطارية كبيرة هتستحمل وقت شغل كبير
• أفضل معالج إقتصادي تحت سعر 2000 جنية
• مساحة تخزين 64 جيجا مع 4 جيجا رام
• بصمة بتقدم أداء سريع

عيوب Infinix Hot 10 Play :-

• مفيش سماعة سُفلية للأسف
• شاحن سرعته بطيئة بسبب حجم البطارية الضخم
• منفذ شحن قديم
• مفيش ميكروفون اضافي لعزل الضوضاء