مراجعة Infinix Note 10 Pro الجديد – عودة انفينكس بذكاء !

انفينكس زمان كانت بتلعب لعبة المساحة والرام على المستهلك .. بتقدم موبايل بمساحة كبيرة ورام كبير بس متسألش عن المعالج مثلا .. ولكن السوق بيتغير والمنافسة مولعة وانفينكس كان لازم تتغير .. والنهارده هنقدم مراجعة Infinix Note 10 Pro واللي الشركة جمعت فيه بين المواصفات القوية والمساحة والرام الكبيرة.


محتويات الصندوق :-

  • الموبايل
  • سماعة iRocker Pro بلوتوث هدية
    سماعة TWS صوتها عالي لكن الـBass مش قوي أوي .. صوتها في المكالمات معقول لكن مفيهاش Noise Cancelation ومدخل الشحن بتاعها MicroUSB 2.0
  • الشاحن الـ33 وات
  • وصلة الشحن USB Type C
  • وصلة الشحن الـMicroUSB 2.0 بتاعت السماعة البلوتوث
  • جراب شفاف
  • سكرينة


التصميم :-

موبايل كبير ضخم كالعادة .. كبير في الإيد بفضل الشاشة الكبيرة .. والموبايل مش تخين أوي السُمك بتاعه حوالي 7.8 مم وده سُمك معقول جدًا، لكن وزنه في حدود الـ200 جرام يعتبر تقيل .. والخامات كالعادة من البلاستيك.

ظهر الموبايل مقسوم نصفين .. النص اللي تحت فيه خطوط بالطول جنب بعض لكن النص اللي فوق لامع أكتر ومفيهوش خطوط .. والموبايل ده للأسف بيلم بصمات بسرعة جدًا وبتظهر فيه البصمات بسهولة.

لما تشوف شكل الكاميرا هتلاقي انفينكس عاملة 6 دوائر بيدولك إيحاء انهم 6 كاميرات .. لكن في الواقع انت عندك كاميرا أساسية وعدسة تصوير واسع وعدستين ملهمش إستخدام .. الشكل ده مش لطيف اوي.

بروز الكاميرات الخلفية جاي على درجتين .. ومستغرب ان انفينكس هي كمان بقى عندها بروز في الكاميرات، والجراب المُرفق في العلبة بيغطي البروز بالكامل.


الشاشة :-

نبص على الشاشة هنلاقيها عملاقة 6.95 بوصة IPS LCD بدقة FHD+ بتردد بيوصل لـ90 هيرتز مع ثقب كبير شوية للسيلفي .. حواف الشاشة هنا كبيرة شوية سواء الحافة السفلية او العلوية .. وثقب السيلفي نفسه كبير شوية.

جودة ألوان الشاشة هنا مش الأفضل .. بمعنى أن دي مش أفضل شاشة IPS LCD ممكن تجربها .. وفي مشكلة واجهتني في بعض فيديوهات اليوتيوب بلاقي أن الألوان بهتانة لو الفيديو ده شغال بـHDR واتوقع المشكلة دي تتحل بتحديث.

ملخص الكلام .. الشاشة مش الأفضل من ناحية الألوان زوايا الرؤيا و السطوع تحت الشمس .. وطبعا مُميزة في ان حجمها كبير لو انت من محبي الشاشات الكبيرة اوي دي .. وبالنسبة لمعدل التحديث فا هكلمك عنه الفقرة الجاية.


الأداء :-

معالج ميدياتيك Helio G95 .. معالج Gaming شديد شوفناه قبل كده في Realme 7 .. وهنشوفه في Realme 8 وفي Redmi Note 10S أخر الشهر ده في مصر.

المعالج ده أدائه قوي .. وسريع ونشط علطول .. بس على حساب استهلاك الطاقة لإن معمارية تصنيع 12 نانو كتير شوية .. ومع الضغط عليه شوية هتلاقيه بيسخن سخونية أزيد من اللي انت واخد عليها مقابل اداء قوي جدًا .. والمعالج ده انا مش شايف انه عنده مشكلة في تشغيل الـ90 هيرتز نهائيًا.

الواجهة بقا XOS 7.6 Dolphin المبنية على اندرويد 11 .. واجهة سريعة و خفيفة والموبايل بيجي بـ8 جيجا رام لذلك الواجهة بتاخد حريتها جدًا .. ده غير ان الموبايل مساحته 256 جيجا في أعلى نسخة .. ودي ميزة اضافية للموبايل ده.

الواجهة مش بيعجبني فيها شكلها، مش حلو اوي .. فيها شوية اعلانات سخيفة هتظهرلك كل شوية .. الواجهة الى حد ما بتحاول انها تستجيب بسرعة ومتسقطش فريمات علشان تحافظ على الـ90 فريم .. ولكن ساعات بسيطة اوي هتحس بتقطيعات كده لو ركزت اوي هتاخد بالك منها.

انفينكس علشان تتحايل على الموضوع ضايفه Option اسمه Ultra Touch في اعدادات الشاشة علشان تتحكم في سرعة الـScroll على الشاشة وسرعة التنقل بين التطبيقات علشان تحس ان علطول الموبايل سريع .. وهو بالفعل سريع.

جربت لعبة ببجي لاقيت اخرها High HD .. مفيش اعدادات تشغيل أعلى .. واللعبة بتشتغل بكفاءة .. لعبة كول اوف ديوتي بتشتغل على Very High بدون اي مشاكل.

واللي لاحظته بعد لعب فترة على الموبايل ده هو انه بيسخن أكيد .. السخونية بتبقى مسمعة اكتر في نافذة الكاميرا الخلفية وفي الجزء الشمال من الشاشة من قدام .. وده الطبيعي من المعالج ده انا مش مستغرب .. ولو اني كنت احب ان التبريد يبقى اقوى من كده شوية .. بس برده اليومين اللي بجرب فيهم دلوقتي حر جدًا.


عوامل الأمان وعناصر اخرى :-

بصمة الموبايل على زرار الباور .. وسريعة مفيهاش اي مشاكل .. والـFace Unlock سرعته معقولة جدا برده .. والموبايل مفهوش لمبة اشعارات .. مفهوش NFC .. مفهوش ميكروفون اضافي لعزل الضوضاء.

المستشعرات كلها شغالة وحقيقية .. ومستشعر التقارب مُمتاز وبيقفل الشاشة في المكالمات بدون اي مشاكل .. وكمان في تسجيل مكالمات مش بيقول للطرف التاني إنك بتسجله.

صوت الموبايل نفسه Stereo .. الصوت عالي وكويس بس ده مش اعلى صوت Stereo ولا اقوى Bass ممكن تاخده.

اما بالنسبة لقوة شبكات الـWi Fi والإتصال فالتقييم فوق المتوسط .. مش هتواجه معاهم مشاكل.


البطارية :-

بطارية الموبايل ده 5000 مللي أمبير .. استحملت معايا حوالي 7 ساعات شاشة مفتوحة .. علشان المعالج استهلاكه عالي .. فا هتحس انها بطارية 4000 مللي امبير مش 5000 مللي امبير.

الشاحن المرفق الـ33 واط بيشحن الموبايل في حوالي ساعة ونص .. اخر 10% من البطارية بياخدوا اكتر من نص ساعة لوحدهم علشان الشحن السريع بيتوقف فيهم علشان يحافظ على البطارية.


الكاميرات :-

الكاميرا رباعية .. الأساسية 64 ميجا بيكسل فتحة عدسة F/1.9 والتانية 8 ميجا بيكسل للتصوير الواسع وبتشتغل Macro برده والعدسة التالتة والرابعة ملهمش وظيفة حقيقية .. والسيلفي 16 ميجا بيكسل فتحة عدسة F/2.0.

ولما جربت الكاميرات .. لسه انفينكس محتاجة تطوير كبير في معالجة الصور .. الـHDR ضعيف وساعات كتير مش بيشتغل مع اني مشغله في التطبيق بتاع الكاميرا .. والألوان بتطلع مش مشبعة فا تحس أن الصور ساعات بتبقى بهتانة وساعات بتطلع مش مظبوطة ده غير البورترية ساعات بيغلط.

الكاميرا الـUltra Wide Angle ضعيفة من ناحية التفاصيل عن الطبيعي .. الـNight Mode هو اللي عجبني .. المعالجة فيه كويسة جدًا والموبايل بيطلع تفاصيل من تحت الأرض حرفيًا.

وبسرعة كده قارنت Infinix Note 10 Pro مع Realme 7 الإتنين نفس المعالج والمفروض الإتنين 64 ميجا بيكسل فا قولت اشوف الفرق بين الشركتين .. شوف المقارنة وتجربة التصوير صور وفيديوهات في فيديو المراجعة !

السيلفي برده فيه نفس القصة بتاعت الألوان .. هتحسها برده ساعات مش مظبوطة وهتحتاج تتدخل فيها .. يعني تتصور وبعد كدا تعدل الصور .. او تتصور اصلًا بتطبيق تصوير مختلف زي ما 90% من البنات بيعملوا.

بالنسبة لتصوير الفيديوهات بالموبايل فا هو بيصور لحد جودة 4K مع 30 فريم وبيصور على 1080p .. وفيه Ultra Stady Mode لتحسين ثبات الفيديو .. لكن مش بتشتغل على جودة الـ4K .. وللأسف مفيش ميكروفون اضافي لعزل الضوضاء.


سعر Infinix Note 10 Pro :-

  • النسخة الـ128 جيجا مع 8 جيجا رام بسعر 3666 جنية مصري
  • النسخة الـ256 جيجا مع 8 جيجا رام بسعر 4222 جنية مصري

والموبايل بيدعم تركيب شريحتين إتصال من الجيل الرابع مع كارت ميموري في نفس الوقت.

infinix note 10 pro price


الرأي النهائي :-

مميزات Infinix Note 10 Pro :-

  • مساحة تخزين ضخمة 256 جيجا مع 8 جيجا رام في أعلى نسخة
  • معالج قوي جدًا
  • شاشة ضخمة بتردد 90 هيرتز
  • صوت Stereo
  • بصمة سريعة
  • بطارية كبيرة وشحن سريع
  • مستشعر تقارب ممتاز

عيوب Infinix Note 10 Pro :-

  • كاميرات مش الأفضل في الفئة السعرية دي
  • جودة الألوان وسطوع الشاشة مش الأفضل والحواف كبيرة
  • الواجهة مش الأفضل من حيث التصميم وفيها إعلانات
  • مفيش ميكروفون اضافي لعزل الضوضاء

الموبايل ده مُوجه أكتر لمُحبي العاب الاندرويد، حد مش معاه Budget يجيب موبايل أقوى بمعالج أقوى زي Poco X3 Pro مثلا .. الـG95 من ناحية الأداء الرسومي أعلى حتى من SD732G بفرق حوالي 10% !

قد يعجبك أيضا...

Comments

جاري التحميل...