شركة انفينكس نزلت 3 موبايلات جديدة من فتره في مصر .. الأول هو Infinix Note 11 واللي راجعناه .. والثاني Infinix Note 11S، وأخيرًا Infinix Note 11 Pro واللي هنقدملكم مراجعته النهارده .. وهو أقوى موبايل في السلسلة دي .. وبيجي بمواصفاته في المقام الأول علشان يخاطب الـGamers والناس اللي بتحب الألعاب.
التصميم :-
الموبايل ضخم جدًا .. حجمه كبير ووزنه تقيل 209 جرام وتخانته متوسطة 8.7 مم .. هتاخد وقت على ما تتعود عليه، شكل التصميم كويس وشيك.
الظهر من البلاستيك بس متماسك وقوي مش ضعيف .. الظهر مطلي بطبقة مط بتعمل إنعكاسات شيك في الإضاءه ومش بيبصم ولا بيظهر عليه تراب ولا بيتخربش بسهولة.
الكاميرا الخلفية كبيرة شوية وبروزها كبير بس الجراب الشفاف المُرفق في علبة الموبايل بيغطي البروز .. فريم الموبايل بلاستيك ورفيع وبيكبر عند الزراير .. تفصيله لطيفة.
الشاشة :-
شاشة IPS LCD عملاقة 6.95 بوصة بدقة FHD+ بتردد بيوصل لـ120 هيرتز، وثقب كبير للسيلفي .. انفينكس اختارت سكة الـGamers اللي محتاجين شاشة سريعه بتردد عالي وميكونش تكلفتها عاليه .. وفي نفس الوقت بتقدملك شاشة عملاقة بمعنى الكلمة .. أكبر شاشة في الفئة دي لمحبي الشاشات الكبيرة.
سطوع الشاشة تحت الشمس مقبول وزوايا الرؤية مقبولة .. الحافة السُفلية للشاشة وثقب الكاميرا السيلفي لو كانوا أصغر شوية كان هيبقى شكل الشاشة أفضل.
متقدرش تتحكم في درجة تشبع ألوان الشاشة .. وهتحس انها مايلة للأزرق حاجه بسيطة، وطبعًا كان نفسي تكون الشاشة AMOLED حتى لو 90 هيرتز مش 120 هيرتز بس التجربة كانت هتبقى أفضل.
اما معدل التحديث فا تقدر تحدد 60 هيرتز او 120 هيرتز .. او تخلي السوفت وير يحول بينهم بشكل تلقائي علشان تاخد احسن أداء مقابل أقل إستهلاك للبطارية.
تجربة الشاشة بشكل عام متوسطة، شاشة IPS LCD معقوله مش ممتازة ومش وحشه، ولما قارنتها مع Poco X3 Pro بشاشة IPS LCD بمعدل تحديث 120 هيرتز لاحظت ان سطوع Note 11 Pro أعلى نسبيًا.
الشاشة مفيش عليها طبقة حماية رسمية بس الموبايل بيجي في العلبة متركب عليه سكرينة بلاستيك .. وكمان معاك سكرينة زجاج في علبة الموبايل لو حابب تركبها.
الأداء :-
معالج ميدياتك Helio G96 ثماني النواة بتكنولوجيا 12 نانو ميتر .. معالج قوي في تشغيل الألعاب، وكمان ذاكرة داخلية من النوع المتعارف عليه في الفئة دي UFS 2.2.
أداء الموبايل هنا مفيهوش مشاكل، سريع ومستقر، الـAnimation بتاع سوفت وير انفينكس الجديد بطيء شوية ومش هيحسسك بسرعه الـ120 هيرتز أوي .. بس ده مش بيحصل علطول، وبالنسبة للتطبيقات نفسها وإستخدامها فا الأداء سريع وسلس لو التطبيق بيدعم الـ120 هيرتز.
الموبايل بيجي بنسخة واحدة 128 جيجا مع 8 جيجا رام ودي حاجه كويسة جدًا، والسوفت وير بيستخدم 3 جيجا رام زيادة من مساحة التخزين وبيخلي الرام يوصل لـ11 جيجا.
المعالج هنا بعد الضغط عليه مش بيحصل له إختناق كبير ومش بيسخن زي Helio G95 .. سخونيته أقل شوية، معرفش هي قلت فعلًا ولا الجو هو اللي مش موضح السخونيه.
الأداء الرسومي بقى .. ببجي بتشتغل على High HD بس مفيش جودة أعلى من كده للأسف، والتجربة حلوة جدًا مفيش أي تقطيعات واجهتني في الموبايل وفعلًا قادر يشغل اللعبة بكل سهوية وأداءه ثابت ومستقر .. المعالج الرسومي قل شوية في G96 علشان يقلل من سخونية الموبايل.
عوامل الأمان وعناصر اخرى :-
البصمة موجودة على زِر الباور .. سريعة وعملية بس ساعات بيحصل تجميع لأيقونات الواجهة .. الـFace Unlock متوسط السرعة، والموبايل مفيهوش ميكروفون اضافي لعزل الضوضاء.
وكمان الموبايل مفيهوش NFC .. ومفيش لمبة إشعارات، ومفيش Always On Display لإن الشاشة IPS LCD.
السوفت وير XOS 10 المبني على Android 11 اللي شكل القوائم فيه اتحسن شوية وبقى فيه Control Center لما تسحب من اليمين .. لما تسحب من الشمال هتنزل الإشعارات.
ده غير ميزة انك تشغل تطبيق جوا تطبيق زي يوتيوب اللي تقدر تفتحه وانت على فيس بوك او جوجل كروم مثلًا، وأكيد تقدر تعمل نسختين من برامج التواصل الإجتماعي من خلال xClone.
الصوت Stereo وعالي فعلًا وواضح بس الـBass مش أفضل حاجه .. المستشعرات كلها موجودة وشغاله ومستشعر التقارب حقيقي وشغال ممتاز وبيقفل الشاشة في الوقت المطلوب، والموبايل بيدعم تسجيل مكالمات.
بالنسبة لشبكات الإتصال والـWi Fi فكالعادة موبايلات انفينكس الفتره الأخيرة مواجهتش معاها أي أزمة في الشبكات والأداء كويس جدًا.
البطارية :-
بطارية 5000 مللي امبير أداءها ممتاز حتى مع تشغيل الـ120 هيرتز .. ممكن توصل لـ9 ساعات شاشة مفتوحة، بطارية قوية فعلًا.
الموبايل بيجي معاه شاحن سريع 33 وات بيشحن البطارية لحد 90% تقريبًا في ساعة، وهتحتاج تلت ساعة كمان علشان تشحنه لـ100%.
الكاميرات :-
الموبايل بيجي بـ3 كاميرات خلفية، الأساسية 64 ميجا بيكسل بفتحة عدسة F/1.7 .. الثانية Telephoto للزوم 13 ميجا بيكسل بفتحة عدسة F/2.5 .. الأخيرة 2 ميجا بيكسل F/2.4 للعزل .. والسيلفي 16 ميجا بيكسل .. مفيش عدسة Ultra Wide ولا عدسة Macro .. انفينكس ضافت مكانهم العدسة الـTelephoto.
انفينكس محتاجه تطور من سوفت وير الكاميرا بتاعها .. كنت متوقع نتيجة أفضل من اللي طلعتلي بالكاميرا الـ64 ميجا بيكسل .. معالجة الألوان ضعيفة والصور ألوانها بتكون بهتانة، والـHDR احيانًا مش بيشتغل والصور بتطلع مش مظبوطة .. واحيانًا الصور بتطلع Soft والـSharpness قليل شويتين.
التصوير في إضاءه داخلية التفاصيل بتقل كتير والمعالجة مش بتقدر تعمل أي حاجه للصور .. والـNight Mode معقول ولكن مش أفضل حاجه ومش اللي كنت متوقعه من الموبايل.
العدسة الـTelephoto بقى لحد الـ2X بتكون كويسة جدًا والتفاصيل محترمة جدًا .. والـ5X برده مقبولة بس التفاصيل قلت شوية ولازم الإضاءه تكون عالية، ولكن لما بتزوم بعد كده مش هتلاقي أي تفاصيل.
لما تقارن الموبايل مع Poco X3 Pro هتلاقي تفوق واضح لـ بوكو X3 برو في حدة تفاصيل الصورة وفي معالجة الألوان بشكل واضح وفي التفاصيل كمان في بعض الصور.
السيلفي كالمعتاد من انفينكس بيخلي لون البشره “أبيض”!! معالجة الصور مش أفضل حاجه خالص .. كمية تفاصيل مش كبيرة خصوصًا في خلفية صور السيلفي اللي بتتصورها .. والـHDR برده مش مستقر .. والـNight Mode في السيلفي بيخلي لون البشرة مصفر زيادة عن الطبيعي.
بالنسبة لتصوير الفيديوهات فالموبايل أخره تصوير فيديوهات بجودة 2K .. والثبات الإلكتروني شغال على 1080p عند 30 فريم في الثانية .. ومفيش ميكروفون اضافي لعزل الضوضاء.
ممكن تشوف الصور و الفيديوهات في فيديو المراجعة .
سعر Infinix Note 11 Pro :-
- نسخة 128 جيجا مع 8 جيجا رام بسعر 4250 جنية
بينفع تركب شريحتين إتصال من الجيل الرابع مع كارت ميموري بحجم 256 جيجا.
الرأي النهائي :-
مميزات Infinix Note 11 Pro :-
- تصميم شيك
- شاشة ضخمة بمعدل تحديث 120 هيرتز
- معالج قوي في تشغيل الألعاب
- بطارية قوية وشحن سريع
- صوت Stereo معقول
عيوب Infinix Note 11 Pro :-
- مفيش لمبة إشعارات
- مفيش NFC
- مفيش ميكروفون اضافي لعزل الضوضاء
- مفيش تصوير فيديوهات 4K
- مفيش عدسة تصوير Ultra Wide
- أداء الكاميرات متواضع جدًا
Comments