مراجعة Infinix Note 11 – أفضل هاتف اقتصادي من انفينكس !

شركة انفينكس كانت دائمًا بتهتم انها تقدم بطارية كبيرة مع شاشة كبيرة وموبايل بمواصفات معقولة في سلسلة الـNote .. لكن دلوقتي الشركة رفعت سقف المنافسة بالسلسلة بتاعتها من خلال انها قدمت شاشة AMOLED كبيرة محترمة مع شاحن سريع في علبة الموبايل، النهارده هنقدم مراجعة Infinix Note 11 الجديد.


التصميم :-

نادرًا لما بيعجبنا تصميم من انفينكس، المرة دي تصميم Infinix Note 11 عاجبنا لأكثر من سبب، أولهم ان شكل التصميم مفيهوش نقشات غريبة .. تصميم سهل وبسيط، لون واحد وبيعكس الإضاءه عليه، وكمان البصمات مش بتظهر بسهولة على ظهر الموبايل.

تاني سبب شكل تصميم الكاميرا الخلفية .. شكل مقبول جدا مفيهوش بهرجة ملهاش لازمة، وبروز الكاميرا الأساسية الـ50 ميجا بيكسل جاي على درجتين، والجراب الأسود اللي مع الموبايل بيغطي البروز بالكامل.

الموبايل مسكته في الإيد كويسة، وزنه 184 جرام وتخانته 7.9 مللي .. الفريم بتاع الموبايل مسطح شوية علشان يديلك إنطباع حلو وانت ماسك الموبايل، والموبايل طبعا كبير شوية لإن شاشته ضخمة.

خامات تصنيع الموبايل بتيجي بالكامل من البلاستيك كالمعتاد في الفئة السعرية دي.


الشاشة :-

شاشة AMOLED كبيرة 6.7 بوصة بدقة ّّFHD+` مع نوتش للكاميرا السيلفي، وطبعًا في الفئة دي تردد شاشة 6ذ0 هيرتز .. متتوقعش انه يكون أعلى.

انفينكس عملت Package مختلف المرة دي .. معظم الموبايلات في الفئة دي بتيجي بشاشة IPS LCD ولما بتكون ممتازة بتكون بتردد 90 هيرتز .. انفينكس بقى قدمت شاشة AMOLED بألوان أفضل وسطوع أعلى.

الشاشة ممتازة على فئة الموبايل السعرية، والألوان فيها مُشبعة بزيادة وكمان مع دقة كويسة FHD+ .. حاجه كويسة ان انفينكس اهتمت بـ نوت 11 الموبايل الأرخص في السلسلة وضافت ليه ميزة تنافسيه زي دي.

الشاشة سطوعها ممتاز بيوصل لـ650 شمعة، وبتقدر تشوفها تحت اشعة الشمس بدون مشاكل، لكن العيب انك متقدرش تتحكم في درجة تشبع الألوان من اعدادات الشاشة.

لما تقارن الشاشة دي بشاشة أي موبايل تاني مُنافس زي Redmi 10 هتلاقي تفوق رهيب لصالح شاشة انفينكس نوت 11 .. ولكن الجانب السلبي هنا ان التردد 60 هيرتز فقط.


الأداء :-

الموبايل بيجي بمعالج ميدياتك Helio G88 بتكنولوجيا 12 نانو ميتر .. معالج مش جديد علينا شوفناه قبل كده في Infinix Hot 11S وفي Redmi 10 .. معالج أداءه كويس في الفئة الإقتصادية.

ولكن في نوت 11 هتحس ان الموبايل كان محتاج يكون 90 هيرتز علشان يكون أنعم شوية .. لكن لو مركزتش مش هتاخد بالك هتحسه زي أي موبايل 60 هيرتز تاني عادي.

أداء انفينكس نوت 11 معقول في فتح البرامج والتنقل ما بينها .. الموبايل بيعمل المطلوب منه بشكل معقول، مش أسرع حاجه، ومش بطيء .. ذاكرة التخزين هنا eMMC 5.1 من النوع البطيء للأسف.

نوت 11 في منه نسختين والاتنين 128 جيجا، واحده 4 جيجا رام وواحده 6 جيجا رام .. طبعًا الـ6 جيجا رام هتكون أفضل في فتح برامج أكثر بدون ما الموبايل يحتاج يقفل أي حاجه من البرامج المفتوحة.

بالنسبة للأداء الرسومي بقى ببجي بتشتغل على High HD واللعبة بتشغل كويس جدًا مع تقطيعات بسيطة جدآ .. والشاشة ألوانها كويسة هتاخد تجربة ألعاب كويسة.


عوامل الأمان وعناصر اخرى :-

بصمة الموبايل على زرار الباور .. البصمة سريعة بس ساعات بيحصل تجميع لايقونات الواجهة .. الـFace Unlock سرعته مقبولة جدًا.

الموبايل بيجي بواجهة XOS 10 المبنية على Android 11 اللي فيها مميزات كتير .. منها الـxClone لعمل نسختين من برامج التواصل الإجتماعي، وكمان تقدر تعمل Muti Windows، لكن للأسف لسه في إعلانات في الواجهة.

الموبايل مفيهوش NFC .. صوت الموبايل Stereo، مش عالي أوي ومش ضعيف .. وصوت سماعة المكالمات مش أعلى حاجه، هتحتاج تعلي الصوت للأخر .. ومفيش ميكروفون اضافي لعزل الضوضاء.

مستشعر التقارب موجود حقيقي وشغال كويس جدًا، وبيقفل الشاشة في الوقت المظبوط وانت بتعمل مكالمة، وفي ميزة تسجيل مكالمات .. وشبكات الإتصال والـWi Fi أداءهم جيد.


البطارية :-

بطارية الموبايل بسعة 5000 مللي امبير .. اداءها حلو كالمعتاد وبتحقق حوالي 8 ساعات شاشة مفتوحة، بطارية تكفي إستخدام اليوم .. والحاجه الممتازة ان الشاحن بقى 33 وات.

الشاحن بيشحن البطارية بالكامل في ساعة ونصف .. لكن أخر 10% من البطارية بتتشحن في نصف ساعة .. يعني نقدر نقول أن الموبايل بيشحن لحد 90% في ساعة بس !


الكاميرات :-

العدسة الأساسية 50 بيكسل بفتحة عدسة F/1.6 .. الثانية 2 ميجا بيكسل مُخصصة للعزل والأخيرة عدسة ذكاء إصطناعي .. الكاميرا السيلفي بدقة 16 ميجا بيكسل بفتحة عدسة F/2.0 مع فلاش LED ثُنائي.

بعد إستخدام مطول للكاميرات الواضح ان المستشعر الـ50 ميجا بيكسل أداءه نفس أداء Infinix Hot 11S .. الصوت بتطلع ضعيفة ومش مشبعة بالألوان، والتفاصيل قليلة شوية برده.

اما أداء الـSuper Night Mode فا هو ممتاز .. بياخد وقت على ما يلقط الصورة لكن في النهاية النتيجة ممتازة جدًا، في Over Sharpning بسيط بس مفيش Noise خالص في الصورة.

بالنسبة للسيلفي فا نوت 11 بيقدر يطلع تفاصيل مقبولة الصبح، ولكن أحيانًا المعالجة مش بتظبط والصور بتلسع بزيادة .. بس لو المعالجة ظبطت الصورة بتبقى معقولة جدًا.

الـSuper Night Mode شغال في الكاميرا السيلفي وبيطلع نتايج كويسة جدًا، بس على حساب حدة الصورة اللي بتزيد أوي.

بالنسبة لتصوير الفيديوهات فالموبايل بيصور على جودة 2K مع 30 فريم في الثانية بالأمامية والخلفية .. والموبايل بيدعم المثبت الإلكتروني لكن على جودة الـ1080p فقط .. والموبايل مش بيدعم ميكروفون اضافي لعزل الضوضاء.. والاداء ضعيف نسبياً في تصوير الفيديوهات.


سعر Infinix Note 11 :-

  • النسخة الـ128 جيجا مع 4 جيجا رام بسعر 3399 جنية
  • النسخة الـ128 جيجا مع 6 جيجا رام بسعر 3666 جنية

بينفع تركب شريحتين إتصال من الجيل الرابع مع كارت ميموري في نفس الوقت.


الرأي النهائي :-

مميزات Infinix Note 11 :-

  • شاشة AMOLED كبيرة سطوعها ممتاز
  • بطارية ممتازة جدًا وشاحن سريع 33 وات
  • تصميم لطيف وعملي جدا
  • صوت Stereo بس مش عالي أوي
  • أداء الموبايل معقول الى حد كبير

عيوب Infinix Note 11 :-

  • مفيهوش ميكروفون اضافي لعزل الضوضاء
  • اداء الكاميرات متواضع مش أفضل حاجه
  • اعلانات في الواجهة
  • ذاكرة تخزين مش سريعة

قد يعجبك أيضا...

Comments

جاري التحميل...