انفينكس نزلت أحدث موبايلاتها بره من فتره .. وهي موبايلات Infinix Note 12 Pro في نسختين 4G و 5G .. والموبايلات دي بتيجي بشاشات AMOLED ومعالجات قوية من ميدياتك مع بطاريات ضخمة بتدعم الشحن السريع وكاميرات 108 ميجا بيكسل وصوت Stereo .. النهارده هنقدملكم مراجعة كاملة للنسختين دول من انفينكس.
التصميم :-
بالنسبة لنسخة 4G فا الموبايل بيجي بتصميم مختلف تمامًا، وزن الموبايل 192 جرام وده وزن مش تقيل مع تخانه 7.8 مللي .. فريم الموبايل مسطح مش Curved علشان يواكب التريند الجديد.
الكاميرا الخلفية موجودة في دائرة شكلها لطيف .. بارزة شوية عن جسم الموبايل، والدائرة محطوطة في مستطيل لامع بيخلي شكل الموبايل أشيك .. وكمان الموبايل طوله بقى متناسب أكثر مع عرضه.
اما بالنسبة لنسخة 5G فا تصميمها مميز جدًا .. شكل الكاميرات الكبير الموجود في مستطيل، الموبايل شكله حلو وبصراحة تصميمه أحلى من تصميم نسخة 4G .. والموبايل وزنه أقل 188 وتخانته أكبر 8 مللي.
وطبعًا كخامات فا الموبايلين من البلاستيك، مفيش جديد كالمعتاد في الفئة السعرية دي.
الشاشة :-
الموبايلين بيقدموا نفس الشاشة الـ6.7 بوصة من نوع AMOLED بدقة FHD+ مع نوتش وبتردد 60 هيرتز.
طبعًا حاجه كويسة ان الشاشة بقت من نوع AMOLED بدلًا من IPS LCD اللي كانت في Infinix Note 11 Pro .. لكن مقابل ده التردد بقى 60 هيرتز وكمان الشاشة بقت بتصميم النوتش مش الثقب .. كنا ممكن نحسبها ميزة لو التردد كان 90 هيرتز .. لكن عمومًا الموبايلات دي إقتصادية فا الوضع مقبول.
بالنسبة لأداء الشاشات فا هي كويسة، كويسة جدًا، كويسة لزيادة لدرجة انها بتلعب في الألوان من خلال السوفت وير علشان تقدملك إحساس انها مُشبعة في الألوان زيادة عن الطبيعي.
الأداء :-
نسخة 4G بتيجي بمعالج ميدياتك Helio G99 تكنولوجيا 6 نانو ميتر .. لأول مرة بنجرب المعالج ده، واللي نقدر نقول انه أكثر نضوجًا وإستقرارًا عن Helio G96 .. بيقدملك نفس الأداء تقريبًا لكن بيقدر يحافظ على الإستقرار لفترة أطول وكمان بيسخن أقل بفرق ملحوظ جدًا، وفي نفس الوقت إستهلاك البطارية أقل.
جربت أضغط على المعالج بكل الطرق المُمكنة .. ولاقيت ان المعالج حافظ على تردداته عالية لفترات طويلة في إختبار مدته 25 دقيقة .. وفي نفس الوقت البطارية إستهلاكها كان ممتاز، والسخونية فوق الممتاز.
لكن لو انت منتظر أداء أعلى من Helio G96 فا لا مش هتلاقي أداء أعلى .. التطوير هنا على جانب الإستقرار والإستهلاك بتاع البطارية وإستقرار الأداء تحت ضغط لفترات أطول من غير حرارة.
ودي معادلة معقولة جدًا .. انت مش محتاج حاجه أكثر من كده من معالج فئة متوسطة، انت محتاج أداء قوي وثابت بتكنولوجيا محترمة وفي نفس الوقت إستهلاك كويس للبطارية .. وعلشان كده كان في ناس بتفضل SD680 علشان إستهلاكه منخفض لكن أداءه متواضع، دلوقتي الـG99 حل المشكلة دي نهائيًا.
لسه دعم مطورين الألعاب مش كافي للمعالج ده .. ببجي بتشتغل على High HD ومش محتاج أقولك انك هتقدر تلعب بشكل كويس جدًا على الموبايل ده بدون أي مشاكل في الحرارة او تسقيط فريمات.
اما عن نسخة الـ5G فا هي بتيجي بمعالج كويس جدًا وهو Dimensity 810 بتكنولوجيا 6 نانو ميتر .. وبيدعم شبكات الجيل الخامس .. وهو أقوى حاجه بسيطة من Helio G99 الجديد .. لكنه بيتميز بدعم شبكات الجيل الخامس.
ببجي بتشتغل على High HD ومفيش أعلى من كده للأسف .. سخونية منخفضة وثبات أداء ممتاز جدًا.
الموبايلات دي كان ناقصهم يكونوا بتردد أعلى زي 90 هيرتز مثلًا .. كانت التجربة هتكون أحسن علشان الـ60 هيرتز دي خلاص مبقتش تقدر تتقبلها بسهولة .. حتى لو السوفت وير خفيف وسريع.
عوامل الأمان وعناصر اخرى :-
البصمة في الموبايلين موجودة على زِر الباور ومفيهاش أي مشاكل .. والـFace Unlock سرعته معقولة برده على الموبايلين .. عوامل الأمان معقولة ومفيهاش أي مشاكل.
طبعًا في Always On Display علشان شاشاتهم AMOLED .. والموبايلين للأسف مفيهمش ميكروفون اضافي لعزل الضوضاء .. لكن فيهم كل المستشعرات شغاله كويس زي الـGyroscope والتقارب.
الصوت في الموبايلين بيكون Stereo لكن صوته مش عالي أوي .. هما ظبطوا الـBass شوية لكن درجة إرتفاع الصوت للأسف مش عالية أوي.
بالنسبة للشبكات فا هي مفيهاش أي مشاكل في الموبايلين.
البطارية :-
بطارية الموبايلين بتيجي بسعة 5000 مللي امبير .. أداءهم كويس جدًا وزي بعض تقريبًا علشان المعالجين موفرين في البطارية، البطاريات هتكمل معاك اليوم مستريح جدًا.
ونفس الشاحن الـ33 وات في الموبايلين واللي بيشحن البطارية بالكامل في حوالي ساعه وتلت.
الكاميرات :-
الموبايلين بيقدموا نفس الكاميرا الخلفية الرئيسية بدقة 108 ميجا بيكسل بفتحة عدسة F/1.8 لكن للأسف مفيش Ultra Wide .. وبيقدموا نفس الكاميرا السيلفي الـ16 ميجا بيكسل بفتحة عدسة F/2.0.
مستوى معالجة الصور اتحسن بشكل واضح في واجهة انفينكس .. مازالت مش أفضل معالجة في الفئة الإقتصادية والمتوسطة لكنها بقت مقبولة شوية عن ما سبق.
مستوى التصوير متقارب جدًا في الموبايلين نسخة الـ4G والـ5G .. مع ان المعالجات مختلفة إلا ان مفيش تأثير على معالجة الصور وشكل الصور النهائي في الموبايلين.
معظم الصور بتطلع بكمية تفاصيل مقبولة .. بس الـSharpness او حِدة الصور محتاجة تتظبط شوية ولون البشرة محتاج يبقى واقعي أكثر .. علشان بحس ان الصور واخدة فلتر مش لطيف.
مستوى التصوير في إضاءات داخلية وليلية مقبول جدًا في الموبايلات مع كمية تفاصيل مقبولة من العدسة الـ108 ميجا بيكسل ومعالجات ميدياتك المُستخدمة هنا .. بس ليه مفيش عدسة Ultra Wide ؟
بالنسبة للكاميرا السيلفي فا هي مفرقتش كتير عن الأجيال اللي فاتت .. نفس السيلفي اللي بيخلي لون البشرة فاتح شوية وبيعملك فلتر ويغيرلك في شكل وألوان الصورة بشكل واضح.
في الظلمة تقدر تشغل الـFlash بتاع السيلفي وتصور Night وهتاخد صور معقولة جدًا .. انا شايف السيلفي كان محتاج يتظبط شوية عن الجيل اللي فات علشان نحس بتطوير.
الموبايلات بتدعم تصوير فيديوهات على جودة 4K مع 30 فريم في الثانية .. لكن للأسف الثبات مش أفضل حاجه لإن مفيش مثبت إلكتروني وكمان مفيش ميكروفون اضافي لعزل الضوضاء فا جودة الصوت مش أفضل حاجه.
سعر Infinix Note 12 Pro :-
الموبايلات دي بنسبة كبيرة مش نازلة السوق المصري .. وأسعارها بره في حدود 200 دولار ~ 250 دولار.
المميز هنا ان علبة الموبايل فيها كل حاجه، شاحن ووصلة شحن وسماعات وجراب، يعني مش هتحتاج تشتري حاجه.
الرأي النهائي :-
موبايلات Infinix Note 12 Pro الجديدة سواء 5G او 4G خدت فكرة تصميم منطقي أكثر من ناحية الحجم والمسكة في الإيد .. بتقدم معالجات قوية بدون سخونة كبيرة او تقصير في الألعاب .. مع بطارية كبيرة وإستهلاك ممتاز وشحن سريع معقول .. صوت Stereo مقبول، وشاشة سطوعها حلو بس ترددها ضعيف .. ومستوى كاميرات مقبول.
نتمنى الأزمة الحالية تتحل في أقرب وقت .. ونرجع نشوف الأجيال الجديدة من الموبايلات بتنزل مصر بسرعة.
Comments