مراجعة Infinix S5 Pro – أرخص موبايل بشاشة كاملة و موتور للسيلفي !

شركة انفينكس بتحاول كدا تطور من نفسها اليومين دول .. ونازلة بموبيلين جداد وهما الـInfinix S5 Pro والـInfinix Note 7 .. سيبك من النوت 7 دلوقتي ، ده هيبقى ليه مقالة مراجعة تانية لوحده .. خلينا في الـS5 Pro .. الموبايل ده نازل يلعب على حاجات مُعينه اهمها الشاشة الكاملة .. والسيلفي اللي في موتور .. طيب امتى تشتريه .. وامتى تبعد عنه ؟

التصميم :-

دايما انفينكس مميزة شوية في حتة التصميم في موبايلاتها الاقتصادية .. والموبايل ده جاي على نفس السيناريو .. التصميم بيجي من البلاستيك اللامع والوانة شيك .. بتحسسك انك شايل موبايل فخم شوية .. بس عمومًا التصميم اللامع ده مش حلو في موضوع البصمات والخرابيش .. اللي اعتقد الموبايل ده هيتبهدل منهم بسهولة.

الوان الموبايل الـPurple او البنفسجني البناتي الجميل اللي بنجربه واللي في الصور ده .. واللي معتقدش في ولد هيفكر يجيبه .. وممكن يفكر في اللون التاني الأخضر من الموبايل ده .. اللون ده حلو فعلا كان نفسي اجربه .. ما علينا.

اللي بيميز بقى الـS5 Pro في الظهر بتاعه رصه الكاميرا الخلفية الثلاثية اللي موجودة في فريم كدا بارز حاجة بسيطة عن الموبايل والفريم ده طالع لحد فوق خالص لطرف الموبايل لحد الحته اللي طالع منها سلايدر السيلفي .. شكل شيك من الأخر.

ولما نيجي نتكلم عن سلايدر السيلفي .. فكويس جدا ان احنا بقينا نشوف موبايل بسلايدر سيلفي وشاشة كاملة في الفئة الاقتصادية .. لإن اكيد في ناس كتير حابه تاخد التجربة ديه .. عمومًا الـSlider هنا مش متين اوي يعني .. بيتهز كدا شوية لما تمسكه بايدك .. بس هو استجابته كويسه وبيقفل بسرعه لو حس ان الموبايل هيقع.

وكمان بيعمل اصوات وهو طالع ونازل، ممكن تلغيها .. وكمان بيعمل Animation او شكل في طرف الشاشة من ناحية السلايدر كدا زي الـMi 9T والـReno 2F .. يعني حبة حركات روشة مع الموبايل الروش جدا ده.

الموبايل وزنه 194 جرام وتاخنته 9 مللم .. مش صغير ومش خفيف .. صعب تستخدمه بايد واحدة .. بس خلاص مبقاش في موبايلات بتستخدمها بايد واحدة بسهولة اصلًا.

واخيرًا .. اهم حاجة بتميز انفينكس هي وجود جراب شفاف في العلبة في كل موبايلاتها حتى الاقتصادية .. وديه حاجة كويسة جدا جدا.

الشاشة :-

تجربة الشاشة هنا ممتازة بس كان ناقصها حاجه واحدة بس .. الشاشة هنا كبيرة 6.5 بوصة نوعها IPS LCD .. ومش ديه القصة .. القصة ان الشاشة كاملة بدون نوتش وكمان بدقة FHD+.

وبصراحة حاجة كويسة جدا من انفينكس انها تحط الشاشة المميزه ديه .. تجربة الشاشة حلوة، الالوان كويسة الشاشة شارب وتفاصيلها كويسة .. بس الحاجة اللي كانت ناقصاها ايه هيا بقى ؟

كالعادة .. درجة السطوع .. اقصى درجة سطوع للشاشة مش عاليا اوي .. يعني قارنتها مع موبايل تاني منافس في نفس الفئة السعرية وهو Realme C3 لاقيت فرق واضح وصريح في درجة السطوع .. بس طبعًا زي ما انت فاهم محدش بياخد كل حاجة.

وانت بتشتري الـS5 Pro .. لازم تبقى متقبل انك بتاخد شكل شاشة ممتاز ودقة ممتازة بس بسطوع مش عالي ..

واخيرا، العلبة بتاعت الموبايل بيجي فيها سكرينة ممكن تركبها على شاشة الموبايل علشان تحافظ عليه.

الأداء :-

موبايل S5 Pro بيجي بمعالج ميدياتك Helio P35 بيشتغل بتكنولوجيا 12 نانو .. متفرحش اوي كده .. ده مش فارق كتير عن الـP22 اللي متعودين عليه من انفينكس واللي كان في infinix S5.

علشان ابقى صريح معاك .. تحسن الاداء في الـS5 Pro عن الـS5 العادي بنسبة لا تتعدى 10% في الاداء اليومي من تصفح برامج، سوشيال، مكالمات، فيديوهات والكلام ده .. ويمكن اللي محسن التجربة كمان السوفت وير الجديد بتاع Infinix واللي اسمه Dolphin المبني على اندرويد 10.

بالنسبة للأداء الرسومي فالمعالج الرسومي اللي في Helio P35 هو هو اللي موجود في Helio P22 .. وبالتالي مفيش جديد .. ببجي هتشتغل كويس على Medium Graphic .. ولو حسيت بتسقيط فريمات بعد لعب فترة طويلة هتضطر تنزل الجودة لـ Low Graphic.

ولعبه كول اوف ديوتي بتشتغل على Low Graphic وMedium Framerate .. واللعبة بتشتغل كويس على اعدادات الجرافيك ديه بدون مشاكل.

ومن الأخر علشان ابقى صريح معاك .. لو يهمك الـGames اوي .. بلاش تجيب Infinix S5 Pro .. لو حابب انفينكس ممكن تستنى Infinix Note 7 لما ينزل او حتى تفكر في موبايلات تانيه من شركات تانيه .. هتاخد اداء ممتاز من الشركات التانيه في الفئة السعرية دي.

عوامل الأمان وعناصر اخرى :-

بصمة موجوده في الظهر .. سرعتها متوسطة .. مش اسرع حاجة خالص بس مقبولة ..

الـFace Unlock ممكن تخلي الموبايل اول ما تدوس على زرار الباور الـSlider يطلع يتعرف على وجهك ويفتح .. او انصحك تخليه على Option انك تدوس على زرار الباور وتـSlide على الشاشة علشان السلايدر يطلع ويفتح .. علشان تحافظ على السلايدر وكدا.

الواجهة هنا فيها Dark Mode .. تجربته كويسة مش وحشة .. بس طبعا مش افضل حاجة علشان الشاشة IPS LCD .. والموبايل بيدعم لمبة اشعارات لمبة قوية نورها واضح .. و باقي المستشعرات شغالة وحقيقية بدون مشاكل ضوء بوصلة تقارب جيروسكوب.

بالنسبة لصوت الموبايل .. فهو جاي من سماعة واحدة تحت على الشمال واللي بتخلي الصوت يتكتم وانت بتلعب Games .. ده يعني لو لعبت عليه.

وبالنسبة لدرجة إرتفاع الصوت فهي متوسطه او يمكن اقل من المتوسط كمان .. الصوت مفيهوش Bass خالص ومش واضح اوي ومش مجسم كده .. انما صوت سماعات المكالمات عالي وممتاز وصوت سماعات الاذن مقبول.

بالنسبة لقوة الشبكة فهي متوسطة .. مش اقوى حاجة بس في نفس الوقت مش بيفصل خالص .. حاجة كدا في النص.

البطارية :-

البطارية هنا مفيهاش جديد عن S5 القديم .. نفس البطارية الـ4000 مللي امبير موجودة هنا في الـS5 Pro .. وبرده بتديلك نفس وقت الاستخدام .. حوالي 7 ساعات شاشة مفتوحة.

نفس منفذ الشحن القديم Micro USB 2.0 .. واللي مش هعتبره عيب .. لإن مفيش منافسين كتير في الفئة ديه بيقدموا USB Type C .. والموبايل جاي معاه شاحن قوته 10 واط في العلبه، بيشحن البطارية في حوالي 3 ساعات إلا ربع .. وقت كبير شوية.

الكاميرات :-

الموبايل جاي بـ3 كاميرات في الظهر .. الاساسية منهم بتيجي بدقة 16 ميجا بيكسل بفتحة عدسة F/1.8 والعدستين التانين مفيش ليهم إستخدام فعلي .. واحدة بدقة 2 ميجا بيكسل للعزل والاخيرة Low Light للمساعدة في التصوير في اضاءات ضعيفة .. المهم يعني شكل وخلاص.

اما عن السيلفي الموجود في السلايدر .. بيجي بدقة 32 ميجا بيكسل مع فتحة عدسة F/2.0 ويمكن الارقام مُبشره شوية كعادة انفينكس في الكاميرات السيلفي.

بص .. تجربة الكاميرا الخلفية هنا افضل شوية من الـInfinix S5 القديم .. الصور تفاصيلها اكتر بفرق كبير يعني .. بس مازالت الصور بتبقى بهتانه من ناحية الالوان .. وكمان حسيت الصور سايحة شوية كدا .. مش Sharpe والوان البشرة مش مظبوطة شوية والـPortrait ساعات كان بيغلط.

بس يعني برده مفيش حد بيقدم كاميرا خرافية في الفئة الاقتصادية .. وكمان مفيش Night Mode في الموبايل وده طبيعي برده الى حد كبير في الفئة السعرية دي.

وعلشان اريح نفسي واريحكم حطيت الكاميرا بتاعت الـS5 Pro جنب كاميرا الـRealme C3 و صورت اكتر من صوره .. واللي لاحظناه تفوق كاميرا الـC3 في معظم الصور تقريبًا في الالوان ولون البشرة والتفاصيل عمومًا.

الموبايل بيصور فيديوهات بالكاميرا الخلفية بجودة 1080p بدون ثبات الكتروني وده طبيعي في الفئة السعرية ديه.

اما بقى بالنسبة للسيلفي فا هو كويس جدا .. التفاصيل كتير والصور واضحة .. يمكن حسيت السيلفي هنا افضل في التجربة من الكاميرا الخلفية .. محسيتش بتقصير من اداء الموبايل ده في السيلفي .. هو بس الموبايل تحسه برده بيفتح لون البشرة زيادة عن الطبيعي .. الحاجة اللي بتعجب البنات في التصوير .. بس هي مش حقيقية خالص..

وعمومًا برده قارنت السيلفي بين الـS5 Pro والـC3 ويعني حسيت ان الـS5 Pro قدر يسد في السيلفي .. وساعات كمان حسيته انه بيقدر يتفوق على الـC3.

ممكن تشوف الصور والفيديوهات المتصورة بالموبايل في فيديو المراجعة في أخر المقالة.

سعر الموبايل :-

سعر الموبايل الرسمي 2444 جنية للنسخة اللي بتيجي بمساحة تخزين 64 جيجا مع 4 جيجا رام .. وينفع تركب كارت ميموري وشريحتين اتصال مع بعض.

معرفش هينزل نسخة 128 جيجا منه ولا لأ .. بس معتقدش .. وده علشان يسيبوا مساحة للـNote 7 وميدخلوش في سعر بعض ..

ومن الأخر لو انت يهمك الاداء بشكل كبير وعاوز كمان كاميرا خلفية كويسة .. استنى النوت 7 احسن اللي هينزل قريب بعد الـS5 Pro علطول .. وهنراجعه برده !

من الأخر .. تشتريه ولا ؟!

من الأخر كدا .. تشتري الـS5 Pro لو انت بتدور على ارخص موبايل بشاشة كاملة .. وكمان دقتها ممتازة FHD+ مع سلايدر روش للسيلفي .. بطارية كويسة، تصميم شيك، سيلفي مقبول .. واستخدامك عادي مش بتاع العاب اوي او مش بتدوس على الموبايل جامد.

مميزات

• أرخص شاشة كاملة بدقة محترمة FHD+ .
• بطارية باداء كويس جدا .
• سعر مناسب .
• يدعم لمبة اشعارات .
• تصميم شيك .
• كاميرا سيلفي مقبولة .
• علبة الموبايل فيها سماعات اذن و سكرينة و جراب .

عيوب

• ضعف المعالج مقارنتا بـ Realme C3 .
• كاميرا خلفية لا تقدم افضل اداء .
• انخفاض اقصى درجة سطوع للشاشة .
• السماعات الخارجية ناحية اليسار يسهل كتمها أثناء اللعب .
• البطارية بتاخد 3 ساعات الا ربع للشحن .

فيديو المراجعة :-