شركة Infinix قررت تنزل Infinix Zero 8 في مصر .. واللي معندوش المعلومة .. سلسلة Zero هي أعلى فئة عند انفنكس في مصر .. ودايما انفنكس بتحط اعلى مواصفات عندها في الموبايل ده.
أكيد إنت بنسبة كبيرة عارف أرقام المواصفات بتاعت الموبايل ده .. تحس إن Infinix عملت Combo Specs .. بس الفكرة بقى .. هل فعلًا أرقام المواصفات دي حقيقية .. هل هتاخد من الموبايل تجربة مُحترمة تقدر تنافس وتسد قصاد وحوش الفئة المتوسطة من Realme و Xiaomi ؟
التصميم :-
موبايل Zero 8 جاي بتصميم بخامات خارجية من البلاستيك بالكامل .. خاماته قريبه جدًا من خامات Infinix Note 7 اللي جربناه فتره ومحدش إشتكى من الخامة بتاعته.
الظهر البلاستيكي معروف مميزاته وعيوبه .. مميزاته إنه بيستحمل وقعات مش بيتكسر زي الزجاج .. بس بيتخربش بسهوله وده الموجود بالفعل في الـZero 8.
في الفئة السعرية بتاعت زيرو 8 هتلاقي موبايل الـRealme 6 بظهر بلاستيكي برده .. فا عارف إنت الواحد بيقول لنفسه ياه يا انفنكس لو كان الظهر زجاج كمان .. بس مش مشكلة .. Zero 8 بيخاطب الناس اللي بيحبوا التصميمات المطرقعة المختلفة.
شكل الكاميرا الخلفية المحطوطة في مربع ملفوف كده زي الـDiamond صايع اوي .. ورصه الكاميرات جواه والفلاش كمان مكمل الرصه جوا .. حلوة جدًا.
تصميم الموبايل عجب ناس كتير .. وفي ناس كتير اتقفلت منه .. هو تصميم شيك ولطيف كده بس انصحك تشوف فيديو المراجعة في أخر المقالة علشان تقدر تشوف الموبايل في كل الأوضاع .. وبالنسبة للألوان فالموبايل بيجي بألوان الفضي والإسود والأخضر.
الفكرة في أبعاد الموبايل .. الموبايل ضخم حرفيًا وكبير جدًا .. صعب تستخدمه بإيد واحده .. ولو إني شايف إن مُعظم مستخدمين انفينكس مش عندهم مشكلة في الحجم الكبير ده في Note 7 اللي لقى نجاح كبير في مصر.
الكاميرا الخلفية بارزة عن الظهر ومتحاوطة بفريم الومنيوم كده .. بس متقلقش الجراب الشفاف اللي في العلبة بيغطي البروز بالكامل .. ملخص التصميم، خامات بلاستيك عادية .. تصميم جديد مختلف .. حجم كبير في الإيد.
الشاشة :-
شاشة عملاقة بتيجي بحجم 6.85 بوصة من نوع IPS LCD وبدقة FHD+ .. الشاشة بتشتغل بتردد بيوصل لـ90 هيرتز مع ثقبين للسيلفي فوق على الشمال.
الشاشة كبيرة مفيش كلام وحتى الثقبين بتوع السيلفي حجمهم مش صغير برده .. مناسب حجم وابعاد الشاشة .. والحواف حوالين الشاشة عادية .. مقدرش أقول كبيرة لإني قارنتها بالمُنافسين لاقيتها نفس الحواف تقريبًا.
الشاشة نفسها ألوانها مقبولة .. مش أفضل ألوان طبعًا ولكنها مقبولة جدًا ومتقدرش تعدل في درجة تشبع الألوان من Setting الشاشة بس هي مظبوطة إن الشاشة تبقى Cold مش Warm وبالتالي مش هتلاقي الألوان مشبعه أوي.
سطوع الشاشة بيوصل لـ450 شمعة .. رقم متوسط ولا هو أعلى سطوع ولا هو سطوع قليل اوي .. حاجة في النص كده.
تقدر تختار ما بين التردد الـ90 هيرتز او الـ60 هيرتز أو تخليها Auto وتسيب الموبايل يحدد .. أنا شخصيًا كنت مخلي الموبايل علطول على الـ90 هيرتز.
لما قارنت الـ90 هيرتز في ريلمي 6 وزيرو 8 لاقيت الإتنين نفس الأداء .. مفيش فرق واضح في سرعة تردد الشاشة الفعلي في الموبايلين .. وكده نتأكد ان الـ90 هيرتز مش مجرد أرقام في Zero 8 زي ما سمعنا !
مفيش إعلان رسمي عن طبقة الحماية والموبايل بيجي في العلبة بـ سكرينة بلاستيك معاه .. ملخص الشاشة، شاشة كبيرة بتردد عالي بس مش بتوصل لدرجات سطوع عالية تحت الشمس.
الأداء :-
انفنكس قالت يعني أنا مش أقل من ريلمي وشاومي اللي إستخدموا معالج ميدياتيك Helio G90T .. وإستخدمته في انفينكس زيرو 8 الجديد.
مش محتاج أقولك أداء المعالج ده عامل إزاي .. وواجهة انفنكس اصلًا خفيفة وتحس مفيهاش Animations كتير .. واجهة تحسها خام شوية .. في ناس بتعتبر ده عيب إن مفيش Animation .. بس أنا يهمني السرعة .. فأداء الموبايل هنا مُمتاز بصراحة .. ده أسرع موبايل من انفينكس جربته لحد دلوقتي بدون مبالغه.
قلت يمكن انفينكس قللت مثلًا من نوع الذاكرة الداخلية .. لاقيت إنه لأ .. الناس مبخلتش ونوع الذاكرة هو الـUFS 2.1 المُحترم المُتعارف عليه في الفئة المتوسطة.
وعلشان مندخلش في نقاشات ملهاش داعي .. جربت الموبايل مع Realme 6 اللي بيشتغل بنفس المعالج وعملت Speed Test بينهم .. وإستغربت فعلًا من سرعة Zero 8 في فتح البرامج والتنقل ما بينهم .. وحقيقي مبسوط من انفينكس إنها قدرت تستغل كل إمكانيات المعالج بدون أي مشاكل .. تقدر تشوف الـSpeed Test في فيديو المراجعة في أخر المقال.
بالنسبة بقى للأداء الرسومي .. لعبة ببجي بتشتغل على High HD .. واللعبة أكيد بتشتغل كويس جدًا .. بس الـG90T بيشغلها على Ultra HDR .. وأنا معرفش ليه مش شغاله هنا على الإعدادات دي.
لعبة كول اوف ديوتي بتشتغل على Very High .. ومش محتاج أقولك اللعبة ناعمه وسلسة قد إيه .. وكمان لعبة فورت نايت أتقل لعبة، سطبتها وجربتها على الموبايل لاقيتها بتشتغل على High بدون اي مشاكل.
ولو إنت قلقان من السخونية .. فالموبايل فيه نظام تبريد فعال والموبايل بيسخن أقل شوية من Realme 6 والفكرة بقى في توزيع السخونية .. زيرو 8 توزيع السخونية فيه أحسن كتير وبيوصل للأطراف إنما ريلمي 6 السخونية مركزة أكتر عند الكاميرا الخلفية .. فا مُجملًا السخونية اللي في انفينكس زيرو 8 مقبولة جدًا على المعالج الـHelio G90T.
عوامل الأمان وعناصر اخرى :-
البصمة في زرار الباور .. سريعة جدًا جدًا .. من أسرع البصمات اللي في المكان ده .. أما الـFace Unlock فا لازم الشاشة تنور وبعد كده يفتح ولكن الكلام ده كله بيتعمل بسرعه جدًا.
الموبايل جاي بسوفت وير XOS 7.0 المبني على Android 10 .. في Dark Mode بس مش بيخلي الـFacebook باللون الأسود .. مش هتقدر تعمل نسختين من برامج التواصل الإجتماعي في الواجهة هنا.
الواجهة فيها شوية إعلانات سخيفة كعادة انفينكس .. لازم تدخل على الإعدادات وتقفل شوية حاجات كده بإيدك علشان تخفي الإعلانات .. وكمان كان في برامج كتير ملهاش لازمة متحمله مُسبقًا على الموبايل يبقى إمسحها.
مفيش لمبة إشعارات ولا في بديل ليها .. والموبايل فيه كل المستشعرات .. الضوء، التقارب، والجيروسكوب .. كلهم شغالين كويس جدًا ومفيش أي مشاكل.
صوت الموبايل جاي من السماعة السفلية بس مش Stereo زي Note 7 .. الصوت عالي ومسموع جدًا بس الـBass بتاعه أو التجسيم قليل شوية .. صوت سماعة المكالمات عالي ومُمتاز والموبايل بيدعم تسجيل المكالمات كمان.
مفهوش ميكروفون إضافي لعزل الضوضاء .. فا ممكن لو بتعمل مُكالمة من مكان فيه دوشة الشخص اللي بتكلمه هيسمع شوية دوشة حواليك.
اما بالنسبة لقوة الشبكات والـWiFi .. فالشبكة كويسة جدًا مواجهتنيش معاها مشاكل .. والـWiFi أقدر اقول عليه فوق المتوسط.
البطارية :-
بطارية بحجم 4500 مللي أمبير .. إستحملت معايا وأنا فاتح الـ90 هيرتز حوالي 7 ساعات شاشة مفتوحة وده وقت أنا شايفه كويس جدًا بالنسبة للـ90 هرتز و الـG90T وحجم البطارية.
الشاحن المرفق بيجي بقوة 33 واط .. شحن معايا البطارية بالكامل في ساعة واحدة .. وده وقت كويس جدًا ميقلش أي حاجة عن المنافسين.
الكاميرات :-
الموبايل جاي بـ4 كاميرات في الظهر .. الأساسية بدقة 64 ميجا بيكسل بفتحة عدسة F/1.8 بمستشعر سوني IMX686 .. التانية 8 ميجا بيكسل للتصوير الواسع فتحة عدسة F/2.2 .. التالتة 2 ميجا بيكسل بتساعد في التصوير الليلي .. الرابعة 2 ميجا بيكسل للعزل.
أما بالنسبة للسيلفي فهو مُزدوج .. العدسة الأساسية 48 ميجا بيكسل .. والعدسة التانية للتصوير الواسع 8 ميجا بيكسل مع فلاش ليد قوي للسيلفي.
سوفت وير الكاميرا كالعاده تحسه يلخبط شوية .. ولكن فيه الـSuper Night Mode في الكاميرا الخلفية والسيلفي .. ودي أحسن حاجة في سوفت وير الكاميرا وهتكلم عنه كمان شوية.
الكاميرا اللي هنا إتغيرت خالص بالنسبة لمستوى كاميرات Infinix .. بس الفكرة كلها في مُعالجة ألوان الصور والـHDR مش بيشتغلوا كويس في الإضاءات العالية.
ساعات كنت بحتاج أصور الصورة أكتر من مره علشان أطلع صورة كويسة .. بس الصورة فيها كمية تفاصيل كبيرة أول مرة أشوفها في انفينكس وده راجع للـSensor المُحترم جدًا بتاع سوني واللي موجود هنا في Zero 8.
كل ده عادي .. لحد أما نجرب الـSuper Night Mode بقى .. قصه تانيه خالص .. موبايل تاني فعلًا .. حرفيًا ده أفضل Night Mode لحد دلوقتي من ناحية معالجة الألوان في الفئة السعريه ديه.
لما جربت الموبايل جنب Realme 6 بقى .. تفاصيل Zero 8 أفضل بس مُعالجة الألوان بشكل عام ولون البشرة والسما أحسن بفرق ملحوظ في الـRealme 6.
في الإضاءة الداخلية العليا .. الـ زيرو 8 بيزيد التفوق بتاعه في التفاصيل .. الصورة Sharp وواضحة .. ريلمي بس مطلع لون بشرة احسن حاجة بسيطة.
بس لما نظلم الدنيا بقى .. الـZero 8 حته لوحده .. أنا مكنتش مصدق إن انفينكس طلع الصورة ديه .. كررت التجربة كتير وبرده في كل مره كان الـZero 8 بيتفوق في الـNight Mode.
اما بالنسبة للسيلفي فا نفس اللي قولته على الكاميرا الخلفية هيتكرر هنا برده .. ويزيد عليهم عدسة Ultra Wide Angle في السيلفي تجربتها كويسة جدًا .. بس بتطلع ألوان مش مظبوطه، لازم تعمل عليها Filter كده.
والتجربة الليلية في السيلفي لسة مُميزة في الـInfinix Zero 8 .. لما نقارن مع Realme 6 هنلاقي تفوق واضح للـRealme 6 في الإضاءات العالية والإضاءات الداخلية من ناحية معالجة الصورة والـDinamic Range.
بس كالعادة برده .. في الإضاءة الضعيفة الـInfinix Zero 8 هيتفوق بفرق واضح.
بالنسبة بقى لتصوير الفيديوهات .. الموبايل اه بيصور 4K و1080P و بيدعم ثبات الكتروني في الجودة الـ 1080P الا ان بشكل عام شكل الفيديو النهائي بيبقا ضعيف من ناحية التفاصيل .. وكمان مفيش ميكروفون اضافي لعزل الضوضاء.
شوف تجربة التصوير بالموبايل في فيديو المراجعة في أخر المقال !
سعر الموبايل :-
السعر الرسمي للموبايل هو 4650 جنية للنسخة الـ128 جيجا مع 8 جيجا رام.
وبينفع تركب كارت ميموري بحجم 256 جيجا وشريحتين إتصال مع بعض في نفس الوقت.
الرأي النهائي :-
مميزات Infinix Zero 8 :-
- معالج قوي مع تبريد محترم
- شاشة ضخمة بمواصفات ممتازة
- بطارية قوية جدًا
- دعم للشحن السريع
- بصمة سريعة جدًا
- مساحة تخزين ورامات كُبار
- كاميرا خلفية وأمامية مُمتازة في التصوير الليلي
عيوب Infinix Zero 8 :-
- تجربة تصوير الفيديوهات مش الأفضل
- التصوير في إضاءة عالية محتاج تحديث
- مفيش ميكروفون اضافي لعزل الضوضاء
- السوفت وير محتاج يتضاف فيه مميزات أكتر
Comments